སྤྱི་ལོ1978ལོར་མི་རིགས་སྲིད་ཇུས་དང་ཆོས་ལུགས་དད་མོས་རང་དབང་གི་སྲིད་ཇུས་དངོས་སུ་ལག་བསྟར་བྱས་པ་དང་བསྟུན། མི་རིགས་སོ་སོའི་རི་མོ་བ་གྲགས་ཅན་མང་པོ་ཞིག་ཆེད་དུ་རྒྱལ་ས་པེ་ཅན་དུ་གདན་དྲངས་ནས་ལྷ་རིས་སྒྱུ་རྩལ་གྱི་འཚོགས་འདུ་ཞིག་ཚོགས། ཚོགས་འདུའི་སྟེང་མཚོ་སྔོན་ཞིང་ཆེན་ནས་རེབ་གོང་ལྷ་རིས་པ་གྲགས་ཅན་སྐོར་ཅིག་ཞུགས།
        སྤྱི་ལོ1979ལོར་མཚོ་སྔོན་ཞིང་ཆེན་རིག་གནས་སྒྱུ་རྩལ་ལྷན་ཚོགས་ཀྱིས་རྩ་འཛུགས་བྱས་ཏེ་ལྷ་བཟོ་ཁང་གི་ལས་ཁུངས་ཟི་ལིང་དུ་བཙུགས། ཡིན་ནའང་། རེབ་གོང་ལྷ་རིས་པའི་ཕ་ཡུལ་དང་ཁ་ཐག་རིང་བས་ཞིབ་འཇུག་དང་མྱུར་སྐྱོབ་སོགས་ཀྱི་ཐད་ལ་སྟབས་བདེ་མིན་པས་བྱེད་སྒོ་ངེས་ཅན་ཞིག་སྤེལ་མ་ཐུབ་པར་བརྟེན། མཚོ་སྔོན་ཞིང་ཆེན་རིག་གནས་སྒྱུ་རྩལ་ལྷན་ཚོགས་ཀྱིས་ཆེད་དུ་རེབ་གོང་ལྷ་རིས་པའི་ལྷ་དཔོན་ཆེན་པོ་རྐ་སར་ཀུན་བཟང་དང་། གཉན་ཐོག་འཇིགས་མེད་སྐར་མདའ། སེང་གེ་གཤོང་མ་མགོ་རྒྱ་མཚོ། སེང་གེ་གཤོང་ཡ་མགོ་ཤ་བོ་ཚེ་རིང་སོགས་གདན་དྲངས་ནས་རེབ་གོང་སེང་གེ་གཤོང་སྡེ་གཉིས་ཀྱི་སའི་བར་དཀྱིལ་ནས་རེབ་གོང་ལྷ་བཟོ་ཁང་གསར་དུ་བཙུགས། སྤྱི་ལོ༌1980ལོར་པན་ཆེན་སྐུ་ཕྲེང་བཅུ་པ་མཆོག་མཚོ་སྔོན་དུ་བཟིགས་ཞིབ་ལ་ཕེབས་སྐབས་རེབ་གོང་ལྷ་བཟོ་ཁང་དང་དགུ་ཆུའི་འགྲམ་རྒྱུད་ཀྱི་ལྷ་རིས་སྒྱུ་རྩལ་ལ་གཟིགས་ཞིབ་མཛད་དེ་རེབ་གོང་ལྷ་རིས་སྒྱུ་རྩལ་མྱུར་སྐྱོབ་དང་ཞིབ་འཇུག་སོགས་བྱེད་པའི་ཐད་ལ་བཀའ་སློབ་གལ་ཆེན་གནང་། སྤྱི་ལོ1986ལོར་མཚོ་སྔོན་ཞིང་ཆེན་རིག་གནས་སྒྱུ་རྩལ་ལྷན་ཚོགས་ཀྱིས་གནས་ཚུལ་གང་མང་ལ་གཞིགས་ལྷ་བཟོ་ཁང་དེ་རྨ་ལྷོ་ཁུལ་རིག་གནས་ཅུའུ་ལ་སྤྲད་དེ་གནས་ཡུལ་རྨ་ལྷོ་ཁུལ་ཐོག་ཏུ་སྤོིར། སྤྱི་ལོ1988ལོར་སྤྱི་ཁྱབ་ཧྲུའུ་ཅི་ཧོའོ་ཡོ་པང་གིས་རྨ་ལྷོའི་ཕྱོགས་སུ་གཟིགས་ཞིབ་མཛད་སྐབས་རེབ་གོང་ལྷ་བཟོ་ཁང་ལ《རེབ་གོང་སྒྱུ་རྩལ》ཞེས་པའི་སྒོ་བྱང་གི་ཕྱག་བྲིས་མཛད། དེ་ནས་བཟུང་རྨ་ལྷོ་ཁུལ་རིག་གནས་སྡེ་ཁག་གིས་ཕྱོགས་ཡར་མར་ནས་ལྷ་རིས་པ་མང་པོ་བསྡུས་ཏེ་རེབ་གོང་ལྷ་རིས་སྒྱུ་རྩལ་མྱུར་སྐྱོབ་དང་ཞིབ་འཇུག་གི་བྱེད་སྒོ་མང་པོ་སྤེལ་བས། ད་ལྟ་འཛམ་གླིང་ན་སྐད་གྲགས་ཆེ་བའི《རེབ་གོང་སྒྱུ་རྩལ》ཞེས་པ་འདི་ཉིད་དར་ཁྱབ་བྱུང་བ་ཡིན་ནོ།།