རྐྱང་ནི་མདོ་དབུས་མཐོ་སྒང་ཁོ་ནར་ཡོད་པའི་རྒྱལ་ཁབ་ཀྱི་རིམ་པ་དང་པོའི་སྲུང་སྐྱོབ་སྲོག་ཆགས་ཤིག་ཡིན། དེའི་ཚུགས་ཀ་བོང་བུ་དང་རྟ་མཉམ་སྡེབ་ཀྱིས་བཙས་པའི་དྲེལ་དང་མཚུངས་ལ་རྔ་མ་རྟའི་རྔ་མ་དང་འདྲ། མཚོ་ངོས་ལས་སྨི་3600ནས་སྨི་5400ཡིས་མཐོ་བའི་ས་རུ་ཁྱུ་སྡེབ་ནས་འཚོ་སྡོད་བྱེད་བཞིན་ཡོད་ལ། ཚ་གྲང་དང་གངས་ཆར་སོགས་ཀྱི་བཟོད་བསྲན་ནུས་པ་མཐོ་བ་དང་སྤྱིར་བཏང་དུ་ལྔ་དྲུག་རེ་དང་མང་དུས་བཅུ་གྲངས་རེ་ཁྱུ་སྒྲིག་ནས་འགྲོ་ཞིང་། ཆེས་མང་དུས་བརྒྱ་ཕྲག་རེ་མཉམ་དུ་བགྲོད་པ་ཡིན་ལ་ཁྱུའི་མགོ་ཕོ་རྐྱང་ཞིག་གིས་ཁྲིད་དེ་རྩྭ་ཆུ་གང་བཟང་གི་རྗེས་སྙེག་ནས་སྐོར་སྐྱོད་ཀྱི་འཚོ་བ་རོལ།
རང་རེའི་ལོ་རྒྱུས་རྣམས་སུ་རྐྱང་ཕོ་མོ་རྟར་བཏུལ་ཞེས་བཀོད་ཡོད་ཅིང་། རྐྱང་གི་མགོ་བོའི་ཞེང་ཆེ་ལ་ཐུང་བ་དང་མཆུ་ཏོ་སྒོར་དབྱིབས་སུ་གྲུབ་ཅིང་མདོག་དཀར་པོ་ཡིན་པས་རང་རེའི་བོད་པ་ཚོས་རྐྱང་ཁ་དཀར་ཞེས་ཀྱང་བྱ། རྣ་གཤོག་གི་རིང་ཚད་ལ་ཧའོ་སྨི་170ཙམ་ཡོད་ཅིང་རྔོག་མ་ཐུང་ཞིང་དྲང་། སུས་བཞི་སྦོམ་ལ་རྨིག་པ་ཅུང་མཐོ། རྒྱབ་ཀྱི་སྤུ་མདོག་སྨུག་པོ་ཡིན་ལ་ལྟོ་བ་དང་སུག་བཞིའི་ནང་ངོས་དཀར་པོ་ཡིན། དབྱར་གྱི་སྤུ་མཐུག་ཅིང་དགུན་གྱི་སྤུ་ཅུང་སྲབ། རྐྱང་ཕྲུག་གི་སྤུ་མཐུག་ཅིང་ཅུང་སེར་ཤ་དང་ལྡན་ལ་ཁུ་ལུ་རིང་ཞིང་ལོ་གཉིས་པར་སྤུ་བརྗེ་རྗེས་ད་གཟོད་རྐྱང་དར་མའི་སྤུ་མདོག་ལྟ་བུར་འགྱུར།
སྐྱེ་འཕེལ་དུས་རིམ་ནི་ཟླ་བ་བདུན་པ་ནས་བརྒྱད་པའི་ནང་ཡིན་ལ་མངལ་སྦྲུམ་པའི་དུས་ཚོད་ཕལ་ཆེར་ཉི་མ་སུམ་བརྒྱ་ལྔ་བཅུ་ཡིན་པ་དང་རྐྱང་ཕྲུག་གཅིག་རེ་མ་གཏོགས་མི་བཙའ། རྐྱང་ཕྲུག་ལོ་བཞི་འགོར་ན་དར་ལ་འབབ་པ་ཡིན།
རང་རེའི་བོད་པའི་གཏམ་དཔེ་དང་དམངས་གླུ། གླིང་སྒྲུང་། གཏམ་རྒྱུད་སོགས་སུ་རྐྱང་ནི་ལྷ་ཡི་བཅིབས་པ་དང་རྒྱུགས་ཡ་མེད་པ་སོགས་ཀྱི་སྣང་བརྙན་ཁྱད་པར་ཅན་ཞིག་བསྐྲུན་ཡོད་ཅིང་། དོན་དངོས་སུའང་མདོ་དབུས་མཐོ་སྒང་ན་མ་གཏོགས་མེད་པའི་སྲོག་ཆགས་རྩ་ཆེན་གྱི་རིགས་ཡིན་ཞིང་། དེའི་ཤ་སོགས་སྨན་སྣ་རྩ་ཆེན་དུ་འགྲོ་བས་སྲུང་སྐྱོབ་ཀྱི་རིན་ཐང་ཆེན་པོ་ལྡན་ལ་ཚན་རིག་ཞིབ་འཇུག་གི་དོན་སྙིང་གལ་ཆེན་ཡོད་པས་ང་ཚོས་སྔར་ལས་ལྷག་པའི་སྒོ་ནས་སྲུང་སྐྱོབ་བྱ་དགོས་ཡོད།
སྐལ་བཟང་ནོར་བུ་དང་སྐལ་བཟང་རིན་ཆེན་གྱིས་བསྒྲིགས་པའི་《མདོ་དབུས་མཐོ་སྒང་གི་རྩ་ཆེའི་རི་སྐྱེས་སྲོག་ཆགས་རིས་འགྲེལ།》ལས་བཤུས།
