ཨ་ཁུ་རྒྱ་མཚོ་གསོལ་ཁང་དུ་སླེབས་བྱུང་།
འོ། ཨ་ཁུ་རྒྱ་མཚོས་བུ་མོ་མཛེས་མ་ཞིག་ཀྱང་ཁྲིད་འདུག
དེ་རིང་། ཨ་ཁུ་རྒྱ་མཚོ་ལ་ཅི་ཞིག་བྱུང་བ་ཡིན་ནམ། སྔོན་ཆད་ཨ་ཁུ་རྒྱ་མཚོས་ལུས་སྒོང་སྒོང་དང་གཉའ་སྒུར་སྒུར་བྱས་ཏེ་གསོལ་ཁང་དུ་འཛུལ་རྗེས། འཚེར་སྣང་ཆེན་པོས་གསོལ་ཁང་ཡོངས་ལ་ཞིབ་ལྟ་ལན་ཞིག་བྱས་ཏེ། གྲུ་ཟུར་ཞིག་ནས་རང་ལ་འོས་པའི་འདུག་སྟེགས་ཤིག་འཚོལ་ངེས་ཡིན་མོད། འོན་ཏེ་དེ་རིང་ཅི་ཞིག་བྱུང་སོང་ངམ། ཁོའི་གདོང་ལ་ཁེངས་ཉམས་ཤིག་རྒྱས་འདུག གོམ་པ་སྤོ་ལུགས་ལ་དཔོན་ཉམས་ཤིག་ཤར་འདུག
ཁྱེད་རང་ཕེབས་པར་དགའ་བསུ་ཞུ། ཞབས་ཞུ་མས་གོམས་སྲོལ་ལྟར་མགྲོན་བསུ་བྱས།
……
ཨ་ཁུ་རྒྱ་མཚོས་ཧང་འགྲོས་བྱས་ཏེ་གསོལ་ཁང་དབུས་ཀྱི་གསོལ་ཅོག་ཆེན་པོ་དེའི་འགྲམ་ལ་སླེབས་རྗེས། འཛེམ་དོགས་ཅི་ཡང་མེད་པར་རྐུབ་སྟེགས་སྟེང་ལ་ལྗིད་ཏིག་གེར་བསྡད་པ་ན། བུ་མོ་མཛེས་མ་དེ་ཁོའི་ཁ་གཏད་དུ་བསྡད་བྱུང་།
ཨ་ཁུ་རྒྱ་མཚོ་དང་ངེད་གཉིས་ནི་གྲོང་ཚོ་གཅིག་གི་ཡིན་རུང་། ངས་ཁོ་རང་ལ་སྐད་ཆ་ཚིག་གཅིག་ཀྱང་འཆད་འདོད་མེད་མོད། དེ་རིང་ལྟད་མོ་ཡ་མཚན་ཞིག་མཐོང་སྲིད་འདྲ་སྙམ་བཞིན་ཨ་ཁུ་རྒྱ་མཚོ་ལ་ལྐོག་ལྟ་བྱས།
ཨ་ཁུ། ཟ་མ་ཅི་ཞིག་ཟ་གྲབས་ཡོད། ཞབས་ཞུ་མས་གུས་པ་དང་བཅས་དེ་ལྟར་དྲིས།
ཁོ་མོར་དྲིས་ཤིག ཨ་ཁུ་རྒྱ་མཚོས་གདོང་ལ་ཁེངས་ཉམས་ཆེན་པོ་བསྡུས་འདུག
ཞབས་ཞུ་མས་གསོལ་ཐོ་དེ་བུ་མོ་མཛེས་མའི་ལག་ལ་བཞག་བྱུང་།
བུ་མོ་མཛེས་མ་དེ་སྒོར་མོར་བསམ་བློ་གཏོང་མཁན་ཞིག་གཏན་ནས་མ་རེད། མོས་རིན་གོང་མཐོན་པོ་ཅན་གྱི་ཟས་རིགས་མང་པོ་ཞིག་བདམས་བྱུང། ཨ་ཨ།དེ་རིང་ཨ་ཁུ་རྒྱ་མཚོས་ཟས་ཡོན་སྤྲོད་ཐུབ་བམ། འོན་ཏེ་ཨ་ཁུ་རྒྱ་མཚོའི་འཛུམ་མདངས་ལ་གཞིགས་ན། ཁོ་ལ་གདེང་ཚོད་ཆེན་པོ་ཡོད་པ་འདྲ།
ཨ་ཁུ་རྒྱ་མཚོ་དང་བུ་མོ་མཛེས་མ་གཉིས་ཀས་སྐད་ཆ་འབའ་ཞིག་ཤབ་ཤུབ་ཏུ་བརྗོད་བཞིན་ཡོད་ལ། གདོང་གི་འཛུམ་མདངས་ལ་གཞིགས་ན། བརྗོད་གཞི་ནི་གཉིས་ཀ་ཤིན་ཏུ་འཐད་པའི་དོན་ཆེན་ཞིག་ཡིན་པ་འདྲ།
སྐབས་ཤིག་ལ། ཨ་ཁུ་རྒྱ་མཚོའི་ཁ་པར་གྲགས་བྱུང་།
སྒོར་མོ་ད་དུང་མ་བླངས། ད་དུང་འགྲོ་ལུགས་མང་པོ་ཞིག་བསྒྲུབ་དགོས། ག་དུས་ཡོང་ཐུབ་པ་ད་དུང་མི་ཤེས།
ཁ་པར་སྒོ་བརྒྱབ་སོང་།
ཁ་པར་དེ་ཁྱོད་ཀྱི་ཆུང་མས་བཏང་བ་ཡིན་ནམ། བུ་མོ་མཛེས་མ་དེས་གཟབ་གཟབ་ངང་ནས་དེ་ལྟར་དྲིས།
རེད། ཨ་ཁུ་རྒྱ་མཚོས་ལུས་སྒོང་སྒོང་དང་གཉའ་སྒུར་སྒུར་བྱས་སོང་།
ངས་ཡང་བསྐྱར་ཐེངས་གཅིག་བཤད། རྗེས་སུ་ཆུང་མའི་ཁ་པར་ལ་ཉན་མི་ཆོག ང་ནི་རུམ་ལ་བྲོ་བཟུང་སྟེ་ཐང་ནས་རྡོ་འཐུ་བའི་སྐྱེས་པ་རྣམས་ལ་ཤིན་ཏུ་མི་དགའ། འདི་སེམས་ལ་དམ་པོར་ཟུངས། བུ་མོ་མཛེས་མ་དེ་ཁྲོས་བྱུང་།
ཁོང་ཁྲོ་མ་ལངས། རྗེས་སུ་མི་ཉན། ཨ་ཁུ་རྒྱ་མཚོས་སླར་ཡང་ལུས་སྒོང་སྒོང་དང་གཉའ་སྒུར་སྒུར་བྱས།
ཀྱེ་མ། ཨ་ཁུ་རྒྱ་མཚོ་དང་བུ་མོ་མཛེས་མ་གཉིས་ལ་འབྲེལ་བ་ཐུན་མོང་མ་ཡིན་པ་ཞིག་ཡོད་པ་འདྲ། དེ་འདྲ་སྲིད་དམ། ཨ་ཁུ་རྒྱ་མཚོ་ནི་ཕོ་ལོ་ལྔ་བཅུ་ལྷག་ལ་སོན་འདུག བུ་མོ་མཛེས་མ་འདི་མོ་ལོ་ཉི་ཤུ་ཡས་མས་ཙམ་རེད། དེ་མིན། ཨ་ཁུ་རྒྱ་མཚོ་ལ་སྟོབས་འབྱོར་བ་མི་ལྡན། ཐོབ་གོ་ས་མི་ལྡན། དེང་གི་མཛེས་མ་རྣམས་ནི་དབུལ་པོ་བགྲེས་པོ་ཞིག་ལ་དུངས་སྲིད་དམ། གཏན་ནས་དུངས་མི་སྲིད།
བུ་མོ་མཛེས་མས་སྡང་མིག་བགྲད་ནས་ཨ་ཁུ་རྒྱ་མཚོར་བལྟས་འདུག་ལ། ཨ་ཁུ་རྒྱ་མཚོས་དོགས་མི་བདེ་བའི་ངང་ནས་གསོལ་ཅོག་སྟེང་གི་ཐུར་མ་གཡས་འདེད་གཡོན་འདེད་བྱས།
ངས་ཨ་ཁུ་རྒྱ་མཚོའི་སྤྱོད་ལམ་དེ་མཐོང་བ་ན། སེམས་ལ་ཁོང་ཁྲོ་གློ་བུར་བ་ཞིག་ལྡང་སོང་། སྐབས་འདིར། ཨ་ནེ་ལྷ་མཚོ་གློ་བུར་དུ་གང་ཞིག་ནས་སླེབས་སོང་ན་ལེགས་པ་ལ་ཨང་།
ཇ་འཐུང་། སྐབས་ཤིག་ལ། བུ་མོ་མཛེས་མ་དེས་ཅི་ཞིག་དྲན་པ་ལྟར་དེ་ལྟར་བརྗོད།
ཡ་ཡ། ཨ་ཁུ་རྒྱ་མཚོ་ཤིན་ཏུ་དགའ་བར་གྱུར།
གཉིས་ཀ་ཇ་ལ་རོལ་ཏེ་དལ་ཅག་གེར་སྡོད་སྐབས། ཞབས་ཞུ་མས་ཟས་རིགས་སྐོར་ཞིག་སྔ་གཞུག་བྱས་ཏེ་གསོལ་ཅོག་སྟེང་ལ་བསྒྲིགས་བྱུང་།
ཡ། ཟ་མ་ཟོ། ཨ་ཁུ་རྒྱ་མཚོས་ལུས་སྒོང་སྒོང་དང་གཉའ་སྒུར་སྒུར་བྱས།
ཁྱོད་ཀྱིས་ཀྱང་ཟོ།
ཏག་ཏག་སྐབས་དེར་། ཁ་པར་སླར་ཡང་གྲགས་བྱུང་།
ཨ་ཁུ་རྒྱ་མཚོས་འཇིགས་ཞེད་དང་བཅས་ཁ་པར་ངོས་ལ་ལྟ་ཙམ་བྱས་པ་ན། གདོང་ལ་འཛུམ་མདངས་གློ་བུར་བ་ཞིག་རྒྱས་སོང་།
ང་ཆབ་ཆ་ན་ཡོད། སྒོར་མོ་ད་དུང་མ་བླངས། ད་དུང་འགྲོ་ལུགས་མང་པོ་ཞིག་བསྒྲུབ་དགོས། ག་དུས་ཁྱིམ་ལ་ལོག་ཐུབ་པ་ད་དུང་མི་ཤེས། ང་རང་ཡིད་ལ་ཤར་སོང་བར་བཀའ་དྲིན་ཆེ་ཞུ།
ཁ་པར་གཏན་སོང་།
སུ་རེད།
སྡེ་དཔོན་སྐྱབས་ལོ་རེད།
ཅི་ཞིག་བཤད་སོང་།
སང་ཉིན་སྡེ་དཔོན་སྐྱབས་ལོའི་བུ་མོ་གནས་ལ་འགྲོ་དགོས། ང་རང་བག་སྐྱེལ་ལ་འགྲོ་དགོས་ཟེར། ཨ་ཁུ་རྒྱ་མཚོས་ཁེངས་ཉམས་དང་བཅས་དེ་ལྟར་བརྗོད།
བདེན་ནམ། སྡེ་དཔོན་སྐྱབས་ལོ་ནི་མི་སྣ་སྐད་གྲགས་ཅན་ཞིག་ཡིན། དེ་ཉིད་ཀྱི་བུ་མོ་གནས་ལ་འགྲོ་སྐབས། བག་སྐྱེལ་གྲས་ལ་མི་ཕལ་བ་ཞིག་ཚུད་དཀའ། དེས་ཨ་ཁུ་རྒྱ་མཚོ་གདན་འདྲེན་སྲིད་དམ། གཏན་ནས་མི་སྲིད།
མགྲོན་པོ་ཡ་མཚན་གཉིས་ཀ་ཁ་རོག་གེར་ཟས་ལ་རོལ་སོང་།
བཟའ་བཏུང་ཕུན་སུམ་ཚོགས་པ་དེ་ལ་རོལ་སྐབས། ཨ་ཁུ་རྒྱ་མཚོའི་གདོང་ལ་བསམ་དོན་ཡིད་བཞིན་འགྲུབ་པའི་ཁེངས་ཉམས་ཤིག་རྒྱས་འདུག་པ་དང་། བུ་མོ་མཛེས་མས་ཨ་ཁུ་རྒྱ་མཚོའི་ཆུང་མའི་ཁ་པར་དེ་ཡོངས་སུ་བརྗེད་སོང་བ་འདྲ་བས། སྒེག་ཉམས་དང་བཅས་སྡེར་མའི་ནང་ལ་ཐུར་མ་ཡང་ཡང་སྲིང་བཞིན་གདའ།
ཁ་པར་སླར་ཡང་གྲགས་བྱུང་།
ཨ་ཁུ་རྒྱ་མཚོས་འཇིགས་ཞེད་དང་ཁ་པར་ངོས་ལ་ལན་ཞིག་བལྟས་རྗེས། འཛུམ་དམུལ་དམུལ་གྱིས་ཉན་པ་ན། ཕ་རོལ་གྱི་ཚིག་མགོ་ཐོས་མ་ཐག འཚུབ་ཆ་འདུག་མི་བཟོད་པ་ཞིག་ལྡང་བྱུང་།
འོ། སྐྱབས་མགོན་རིན་པོ་ཆེ་ལགས་ཡིན་ནམ། ལགས། ཐུགས་རྗེ་ལགས། ལགས། ང་ཆབ་ཆ་ན་ཡོད། སྒོར་མོ་ད་དུང་མ་བླངས། ད་དུང་འགྲོ་ལུགས་མང་པོ་ཞིག་བསྒྲུབ་དགོས། ག་དུས་ཡོང་ཐུབ་པ་ད་དུང་མི་ཤེས། ལགས། ང་རང་ཐུགས་ལ་ཤར་བར་བཀའ་དྲིན་ཆེ།
སུ་རེད།
མཆོག་སྤྲུལ་མཁའ་ལྡིང་རིན་པོ་ཆེ་རེད། ཨ་ཁུ་རྒྱ་མཚོས་དགའ་ལྷང་ལྷང་གིས་དེ་ལྟར་བརྗོད།
ཅི་ཞིག་བཤད་སོང་།
སང་ཉིན་ཁོང་རིན་པོ་ཆེའི་འཁྲུངས་སྐར་ཡིན། དགོན་པ་ན་གསོལ་སྟོན་ཤོམ་བཞིན་ཡོད། ང་རང་ལ་ཁོམ་པ་ཡོད་ན་གསོལ་སྟོན་ལ་ཡོང་རོགས་ཞེས་གསུངས་བྱུང་། ངས་དེ་རིང་གི་ཡར་སྔོན་ལ་མཁའ་ལྡིང་ཡིད་བཞིན་ནོར་བུའི་གསུང་ཐོས་མ་མྱོང་།
དངོས་འབྲེལ་དེ་འདྲ་ཡིན་ནམ། མཆོག་སྤྲུལ་མཁའ་ལྡིང་ལགས་ནི་མཁའ་ལྡིང་དགོན་གྱི་དགོན་བདག་དང་རྫོང་སྲིད་གྲོས་ཀྱི་མགོ་ཁྲིད་ཡིན་ལ། ཁོང་ཉིད་ཀྱི་འཁྲུངས་སྐར་ལ་གདན་དྲངས་པ་ནི་མགྲོན་པོ་ངོ་སོ་ཅན་འབའ་ཞིག་ཡིན། ཨ་ཁུ་རྒྱ་མཚོ་ནི་མགྲོན་པོ་དེ་དག་གི་གྲས་ལ་ཚུད་སྲིད་དམ། གཏན་ནས་མི་སྲིད། དེ་རིང་ཨ་ཁུ་རྒྱ་མཚོ་ལ་ཅི་ཞིག་བྱུང་སོང་བ་ཡིན་ནམ།
དེ་རིང་གི་མགྲོན་པོ་འདི་གཉིས་ནི་དངོས་འབྲེལ་མགྲོན་པོ་ཡ་མཚན་གཉིས་རེད།
མགྲོན་པོ་ཡ་མཚན་གཉིས་ཀ་དལ་ཅག་གེར་ཟས་ལ་རོལ།
སྐབས་ཤིག་ལ། ཁ་པར་སླར་ཡང་གྲགས་བྱུང་། ཨ་ཁུ་རྒྱ་མཚོས་ཁ་པར་ངོས་ཀྱི་ཨང་གྲངས་དེ་མཐོང་མ་ཐག བྲེལ་འཚུབ་འདུག་མི་བཟོད་པ་ཞིག་སྐྱེས་བྱུང་། ཁོས་རེ་ལྟོས་ཆེན་པོ་དང་བཅས་བུ་མོ་མཛེས་མའི་གདོང་ལ་ལྐོག་ལྟ་ལན་འགའ་བྱས་མོད། མཛེས་མས་ཁོ་རང་ལ་སྡང་མིག་བགྲད་ནས་བལྟས་བྱུང་བས། ཨ་ཁུ་རྒྱ་མཚོ་འུ་ཐུག་སྟེ་ལག་པ་འཕུར་འཕུར་ལན་འགའ་བྱས།
ཨ་ཁུ་རྒྱ་མཚོས་ཁ་པར་བཟུང་སྟེ་གསོལ་ཁང་ཕྱི་ལ་བརྒྱུགས།
བུ་མོ་མཛེས་མ་དེ་འཛེམ་བག་ཅི་ཡང་མེད་པར་ཨ་ཁུ་རྒྱ་མཚོའི་རྗེས་སུ་མཆོང་སོང་།
ཁོ་གཉིས་སླར་གསོལ་ཁང་ལ་ལོག་སྐབས། བུ་མོ་མཛེས་མས་ཨ་ཁུ་རྒྱ་མཚོའི་ཁ་པར་བཟུང་འདུག་ལ། ཨ་ཁུ་རྒྱ་མཚོས་ལུས་སྒོང་སྒོང་དང་གཉའ་སྒུར་སྒུར་བྱས་ཏེ་མཛེས་མའི་རྗེས་སུ་འབྲངས་བྱུང་།
ཁ་པར་གྱི་སྒྲ་སིལ་སིལ་དུ་གྲགས་བཞིན་གདའ།
མདུན་ལ་བཟའ་བཏུང་ཕུན་སུམ་ཚོགས་པ་ཞིག་བཤམས་འདུག་རུང་། གཉིས་ཀར་ཟས་ལ་རོལ་པའི་འདུན་པ་གཏན་ནས་མེད་པ་འདྲ། ཁ་རོག་གེར་ཁ་པར་གྱི་སིལ་སྒྲ་ལ་ཉན་ནས་བསྡད་བྱུང་།
ཁ་པར་ཡང་ནས་ཡང་དུ་སིལ་སིལ་དུ་གྲགས།
སྐབས་ཤིག་ལ། བདག་གི་ཁ་པར་གྲགས་བྱུང་།
བཀྲ་ཤིས། ང་ལྷ་མཚོ་ཡིན། རྒྱ་མཚོ་ཁྱོད་ཀྱི་གསོལ་ཁང་ན་ཡོད་དམ།
ཡོད། ངས་འབོད་དགོས་སམ།
རྒྱ་མཚོས་བུ་མོ་ཆུང་ཆུང་ཞིག་ཁྲིད་འདུག་གམ།
ཁྲིད……ངས་མཐོང་མ་བྱུང་། ངས་འཚབ་འཚུབ་ཀྱིས་དེ་ལྟར་བརྗོད།
ཕར་ཕྱོགས་ནས་ཁ་པར་ཁྲོག་སྒྲ་དང་བཅས་གཏན་སོང་།
འོ། ད་ནི་ཅི་ཞིག་བྱ། ཁ་པར་གཏོང་མཁན་ནི་ཨ་ཁུ་རྒྱ་མཚོའི་ཆུང་མ་རེད། ཁོ་མོའང་འདི་གར་སླེབས་འདུག་གམ། དེ་འདྲ་མིན་པར་སྨོན།
ཨ་ཁུ་རྒྱ་མཚོས་གུ་ཡངས་གནང་བའི་རེ་ལྟོས་དང་བཅས་བུ་མོའི་གདོང་ལ་ཡང་ཡང་བལྟས་མོད། བུ་མོ་མཛེས་མས་མིག་གིས་གནམ་གཅལ་བལྟས་ཏེ་རྔམ་སྟོན་བྱེད་བཞིན་ཡོད་པས། ཨ་ཁུ་རྒྱ་མཚོའི་སྤྱོད་ལམ་མཐོང་མ་བྱུང་།
སྙིང་སྡུག་མ། ཟས་ལ་རོལ་ཅིག ཁོང་ཁྲོ་མ་ལངས། ཨ་ཁུ་རྒྱ་མཚོས་ལུས་སྒོང་སྒོང་དང་གཉའ་སྒུར་སྒུར་བྱས་ནས་དེ་ལྟར་བརྗོད།
རྗེས་སུ་ལས་ཀ་ཁྲེལ་མེད་དེ་འདྲ་ལས་སམ། བུ་མོ་མཛེས་མས་ལུས་པོ་གཡེར་གཡོ་བྱེད་བཞིན་དེ་ལྟར་དྲིས།
མི་ལས། དངོས་འབྲེལ་མི་ལས།
ལས་སོང་ན་ཅི་བྱ། བུ་མོ་མཛེས་མའི་ཁོང་ཁྲོ་ཅུང་ཟད་ཞི་སོང་།
རྗེས་སུ་ཁྱོད་ལ་ཁོང་ཁྲོ་བསླངས་ན། དེ་ང་རང་མི་མིན་པའི་རྟགས་ཡིན།
བདེན་ནམ།
བདེན།
དངོས་འབྲེལ་བདེན་པ་ཡིན་ནམ།
བདེན་པ་ཡིན།
སྐབས་ཤིག་ལ། བུ་མོ་མཛེས་མ་དེའི་གདོང་ལ་སླར་ཡང་འཛུམ་མདངས་གསར་པ་ཞིག་རྒྱས་སོང་།
མགྲོན་པོ་ཡ་མཚན་གཉིས་ཀ་དགའ་དགའ་སྤྲོ་སྤྲོའི་ངང་ནས་ཟས་ལ་རོལ་བྱུང་ལ། ཁོ་གཉིས་ཀྱིས་གཏམ་གླེང་མང་པོ་བྱས་རྗེས། རླངས་འཁོར་གྱི་སྐོར་གླེང་ བྱུང་། ཚིག་གི་ཤུགས་ལ་བརྟགས་ན། ཨ་ཁུ་རྒྱ་མཚོས་བུ་མོ་མཛེས་མར་རླངས་འཁོར་ཉོ་གྲབས་ཡོད་པ་འདྲ། འོན་ཏེ་དབུལ་པོ་སྐད་གྲགས་ཅན་ཞིག་ཡིན་པས། རླངས་འཁོར་ཉོ་བའི་ལས་ཀ་དེ་ནི་སེམས་ལ་འཁོར་སྲིད་པ་ཞིག་ཀྱང་མིན།
སྐབས་ཤིག་ལ། ཨ་ཁུ་རྒྱ་མཚོའི་ཆུང་མ་གསོལ་ཁང་ལ་འཛུལ་བྱུང་།
ཁོ་མོས་བསེར་བུ་ཕོན་ཞིག་མདུན་ལ་དེད་འདུག་པ་དང་། འཚུབ་མ་གྱ་གྱུ་ཞིག་རྗེས་སུ་ཁྲིད་འདུག
མོས་ཨ་ཁུ་རྒྱ་མཚོ་དང་བུ་མོ་མཛེས་མ་གཉིས་ཀ་མཐོང་བ་ན། ཨག་རྒྱངས་བྱེད་བཞིན་མདུན་ལ་རྒྱུགས་བྱུང་ལ། ཨ་ཁུ་རྒྱ་མཚོ་མྱུར་མོར་ལངས་ཏེ་འགྲོ་གྲབས་བྱས་མོད། ཁོས་ཐར་ལམ་ཞིག་རྙེད་སྲིད་དམ།
ཨ་ཨ། དེ་རིང་། ངའི་གསོལ་ཁང་ནས་འཛམ་གླིང་འཁྲུག་ཆེན་གསུམ་པ་བསླང་དགོས་འདུག
ང་རང་མྱུར་མོར་ཨ་ནེ་ལྷ་མཚོའི་ཕྱོགས་སུ་བརྒྱུགས། །
