༄༅།། ལྷ་སའི་བར་སྐོར་གྱི་དར་ཆེན་ལྔ།

ཝེ་ཁེ་རིག་མཛོད། རྩོམ་སྒྲིག་པ།ཚེ་དཔལ། ཡོང་ཁུངས།གངས་ལྗོངས་ཉི་གཞོན་དྲ་བ། སྤེལ་དུས། 12-05



ལྷ་སའི་བར་སྐོར་གྱི་དར་ཆེན་ལྔ།
        དག་པའི་ཞིང་མཆོག་ལྷ་ལྡན་གཙུག་ལག་ཁང་གི་བར་སྐོར་བྱང་ཆུབ་བྱོན་ལམ་གྱི་དར་པོ་ཆེ་བཙུགས་པ་རྣམས་ལ་མང་ཚོགས་ཀྱི་ངག་རྒྱུན་ལྟར་ན་བསྟན་པའི་སྲོག་ཤིང་དུ་གྲགས།  དར་ཆེན་དག་རེ་རེ་ལ་དམིགས་བསལ་གྱི་ལོ་རྒྱུས་ངོ་མཚར་ཆེ་བ་རེ་བརྗོད་རྒྱུ་ཡོད་པས།   དར་ཆེན་རེ་རེས་ལོ་རྒྱུས་ཀྱི་དཔང་རྟགས་རེ་མཚོན་ཐུབ་ཀྱི་ཡོད།
        ལྷག་པར་དུ་ནང་པ་སངས་རྒྱས་པའི་བསྟན་པ་རིན་པོ་ཆེ་རྒྱལ་བ་དང་།བསྟན་པ་དེ་འཛིན་གྱི་སྐྱེས་ཆེན་དམ་པའི་ཆོས་སྲིད་ཀྱི་མཛད་འཕྲིན་འཕེལ་བ།   ནག་ཕྱོགས་ཀྱི་དཔུང་ཚོགས་རྟག་ཏུ་གཞོམ་པར་བྱེད་པ་བཅས་ཀྱི་ཆེད་དུ་དམིགས་བསལ་གྱི་དར་ཆེན་བཙུགས་པ་ཞིག་རེད།
ཤར་སྐྱ་རེངས་དར་ཆེན།
        ཤར་སྐྱ་རེངས་དར་ཆེན་ནི།  བར་སྐོར་ཤར་ལྷོའི་དུང་མཚོའི་ཟུར་དུ་ཡོད་ཅིང༌།  རབ་བྱུང་བཅུ་བདུན་པའི་ས་གླང་སྤྱི་ལོ་ 1409ལོར་རྗེ་ཙོང་ཁ་པ་ཆེན་པོས་ལྷ་ལྡན་ཆོ་འཕྲུལ་སྨོན་ལམ་ཆེན་མོའི་སྲོལ་བཟང་གསར་གཏོད་མཛད་པའི་རྗེས་དྲན་དུ་བཙུགས་གནང་མཛད་ཅིང༌། བོད་ཟླ་དང་པོའི་ཚེས་བཅོ་ལྔའི་ཞོགས་པ་སྐྱ་བརྡ་མ་བཏང་གོང་སྐུ་བཞེངས་གྲུབ་དགོས་པ་སྲོལ་ཡོད་རྐྱེན་ཤར་སྐྱ་རེངས་ཞེས་མིང་དེ་ངག་རྒྱུན་དུ་ཆགས་ཤིང༌། དོན་དུ་དར་ཆེན་དེ་ནི་རྗེ་ཙོང་ཁ་པ་ཆེན་པོས་ནང་པ་སངས་རྒྱས་ཀྱི་བསྟན་པ་རིན་པོ་ཆེ་ཕྱོགས་དུས་ཀུན་ཏུ་དར་རྒྱས་ཡོང་བའི་ཐུགས་སྨོན་དང་བཅས་གསར་བཙུགས་གནང་བར་གྲགས་སོ། །
བསྐལ་བཟང་དར་ཆེན།
        སྐལ་བཟང་དར་ཆེན་ནི། བར་སྐོར་ལྷོ་ངོས་གསུང་ཆོས་རྭ་བའི་མདུན་དུ་བཙུགས་ཡོད།    དར་ཆེན་དེ་ནི་རབ་བྱུང་བཅུ་གཉིས་པའི་ལྕགས་བྱ་ལོ་སྟེ་སྤྱི་ལོ་1720ལོར་ཏཱ་ལའི་བླ་མ་སྐུ་ཕྲེང་བདུན་པ་བསྐལ་བཟང་རྒྱ་མཚོ་མཆོག་ལྷ་ལྡན་དུ་གདན་དྲངས་ཤིང༌།   རྒྱལ་བའི་ཡབ་གཞིས་ཀྱི་བཞུགས་ཡུལ་བསམ་གྲུབ་ཕོ་བྲང་དུ་གནང་བ་དང༌། དེ་གའི་མདུན་དུ་མཆོག་སྤྲུལ་འཁྲུལ་བྲལ་ངེས་རྙེད་བདེ་ཕེབས་ཀྱིས་ཕོ་བྲང་པོ་ཏཱ་ལར་གསེར་ཁྲི་མངའ་གསོལ་གྱི་མཛད་སྒོ་བཤམས་པའི་ཉིན་དེར་རྒྱལ་དབང་དེ་ཡི་མཚན་གྱི་ཟུར་ནས་འཆང་ཞིང༌། བསྐལ་པ་བཟང་པོ་རྟག་ཏུ་བརྟན་པའི་ཐུགས་སྨོན་དང༌།   ཆོས་སྲིད་གཉིས་ཀྱི་མཛད་འཕྲིན་ཕྱོགས་ཐམས་ཅད་ལས་རྣམ་པར་རྒྱལ་བའི་མཚོན་རྟགས་སུ་བསྐལ་བཟང་དར་ཆེན་དེ་ཉིད་བཙུགས་པར་མཛད་དོ། །
ཇུས་ཡག་དར་ཆེན།
        ཇུས་ཡག་དར་ཆེན་ནི།      ལྷ་ལྡན་གཙུག་ལག་ཁང་གི་མདུན་ངོས་གཡས་སུ་གནས།    དར་ཆེན་དེ་ནི་བོད་རབ་བྱུང་བཅུ་གཅིག་པའི་ས་ཡོས་སྤྱི་ལོ་ 1639 ལོར་རྒྱལ་དབང་ལྔ་པ་ཆེན་པོའི་ཆོས་སྲིད་གཉིས་ལྡན་གྱི་དཔུང་རྒྱབ་སོག་པོ་གུ་ཤྲིའ་ཧན་བསྟན་འཛིན་ཆོས་ཀྱི་རྒྱལ་པོས་མདོ་སྟོད་བེ་རི་རྒྱལ་པོ་ཆམ་ལ་ཕབ་ཅིང༌། སྡེ་དགེ་དང་སྨར་ཁམས་སོགས་ས་གནས་མང་པོ་ཚུར་བླངས་ཏེ་གཏམ་སྙན་ལྷ་སར་འབྱོར་སྐབས། ཏཱ་ལའི་བླ་མ་ལྔ་པ་ཆེན་པོའི་ཕྱག་མཚོད་སྡེ་སྲིད་བསོད་ནམས་ཆོས་འཕེལ་གྱིས་སངས་རྒྱས་བསྟན་པའི་ཇུས་ཡག་ལམ་དུ་ལྷོངས་སོ་ཟེར་བའི་དྲིལ་བསྒྲགས་དང་བཅས་ཇུས་ཡག་དར་ཆེན་བཙུགས་པར་གྲགས། །
        དེའི་འགྲམ་གྱི་ཁང་ཆེན་༼ལྷ་སའི་གཙུག་ལག་ཁང་ནས་རྩིས་པའི་ལྷོ་ནུབ་མཚམས་དེང་སང་ཐང་ཆེན་གྱི་ཟུར་ཅིག༽དེར་དུས་རབས་བཅུ་བདུན་པའི་ནང་སྡེ་སྲིད་གཙང་པའི་དབང་བསྒྱུར་གཏོར་ཏེ་དགའ་ལྡན་ཕོ་བྲང་པའི་སྲིད་དབང་འཛུགས་ཕྱིར་སོག་པོའི་དཔུང་དམག་བོད་དུ་བསྐོང་རྒྱུའི་ཆེད་དགའ་ལྡན་ཕོ་བྲང་པའི་ཕྱག་མཛོད་བསོད་ནམས་རབ་བརྟན་དང༌།  སྡེ་པ་སྐྱིད་ཤོད་པ་སོགས་འཚོགས་ནས་ཇུས་གཞི་བཏིངས་པས་ཕྱིས་གྲུབ་འབྲས་ཆེན་པོ་ཐོབ་སྟབས་ཁང་མིང་དུ་ཇུས་འདིང་གནས་སམ་ཇུས་འདིང་གླིང་༼ཁ་རྒྱུན་དུ་ཇི་སྡེ་གླིང་ཞེས་ཟེར།༽ཞེས་མིང་ཐོགས་ཤིང༌། ད་ལྟའང་དེ་ལྟར་འབོད་བཞིན་ཡོད། །
དགའ་ལྡན་དར་ཆེན།
        དགའ་ལྡན་དར་ཆེན་ནི།     བར་སྐོར་བྱང་ཆུབ་བྱོན་ལམ་གྱི་བྱང་ཤར་ཟུར་དུ་བདེ་ཆེན་རབ་བརྟན་ཞེས་པའི་གྲོང་ཁྱིམ་ཐོག་བརྩེགས་ཅན་དེའི་ཉེ་འགྲམ་དུ་གནས་ཤིང༌། སྤྱི་ལོ་1681ལོར་དགའ་ལྡན་ཚེ་དབང་དཔལ་བཟང་ཟེར་བའི་སོག་རིགས་ཀྱི་རྗེ་བོ་ད་ལ་ཧོ་ཐའི་ཇིའི་བུ་བཀྲས་ལྷུན་དགོན་དུ་ཆོས་སྒོར་ཞུགས་བཞིན་པའི་སྐབས་སུ་ཏཱ་ལའི་བླ་མ་སྐུ་ཕྲེང་ལྔ་པ་ཆེན་པོས་བཀའ་ལུང་ཕེབས་པ་བཞིན། དམག་སྤྱིའི་ཐུགས་འགན་བཞེས་ཏེ་ཡན་ལག་དཔུང་ཚོགས་དང་བཅས་པ་ལ་དྭགས་རྒྱལ་པོ་སེང་གེ་རྣམ་རྒྱལ་ཟེར་བས་རང་རེའི་གངས་ཅན་མངའ་རིས་སྐོར་གསུམ་བཙན་བཟུང་བྱས་པར་དཔའ་ཞིང་བརྟུལ་ཕོད་པའི་ཕར་རྒོལ་འཐབ་ལག་ཤུགས་ཆེ་སྤྲད་པའི་མཐར་དགྲ་བོའི་གཡུལ་ལས་རྣམ་པར་རྒྱལ་བའི་དཔའ་ཉམས་རྟགས་སུ་ཐོག་མར་སྟོད་གངས་རིན་པོ་ཆེའི་མདུན་དུ་དགའ་ལྡན་དར་ཆེན་ཞེས་པ་ཞིག་བཙུགས་པ་དང༌། དེ་ནས་ལོ་དེའི་མཚམས་སུ་ལྷ་སར་དགའ་ལྡན་དར་ཆེན་དེ་ཉིད་བཙུགས་པ་དང༌། མིང་གཞན་དགའ་ལྡན་དར་སྨྱོན་ཞེས་ཀྱང་གྲགས་སོ། །
 བཀྲ་ཤིས་དར་ཆེན།
        བཀྲ་ཤིས་དར་ཆེན་ནི། ལྷ་ལྡན་གཙུག་ལག་ཁང་མདུན་གྱི་གཡོན་ངོས་སུ་གནས་ལ། དེ་ནི་བོད་རབ་བྱུང་བཅུ་བདུན་པའི་སྤྱི་ལོ་1986 ལོར་ཀུན་གཟིགས་པཎ་ཆེན་རིན་པོ་ཆེ་སྐུ་ཕྲེང་བཅུ་པ་ཆོས་ཀྱི་རྒྱལ་མཚན་མཆོག་ནས་མི་ལོ་ཉི་ཤུ་ཙམ་བར་ཆད་བྱུང་བའི་ལྷ་ལྡན་ཆོ་འཕྲུལ་སྨོན་ལམ་ཆེན་མོ་སླར་ཡང་བསྐྱར་གསོ་གནང་སྟེ་གདན་ས་སེ་འབྲས་དགེ་གསུམ་གྱིས་གཙོས་དགེ་འདུན་ཞལ་གྲངས་སྟོང་གཉིས་ཙམ་ལྷ་ལྡན་གཙུག་ལག་ཁང་དུ་འཛོམས་ནས་སྨོན་ལམ་རྒྱ་ཆེ་གཟབ་རྒྱས་ཤིག་འཚོགས་པ་དང་བསྟན་པ་ཡང་དར་མཚོན་པ་བྱེད་པའི་བཀྲ་ཤིས་དར་ཆེན་ཞེས་པ་དེ་བཙུགས་གནང་མཛད་དོ། །

 


རྩོམ་ཡིག་རྗེས་མ།

དྲ་ཚིགས་འདིའི་པར་དབང་གངས་ལྗོངས་ཉི་གཞོན་དྲ་བར་དབང་བས་ཕན་ཚུན་ལ་དབང་བཅོལ་མ་བྱས་གོང་རང་དགར་མི་སྤྱོད་པར་མཁྱེན།
དྲ་ཚིགས་དཔང་རྟགས། 蜀ICP备14009601号-1