ཁྲི་སེམས་དཔའ།
—གསུམ་བརྒྱད་བུད་མེད་དུས་ཆེན་ཉིན་ཨ་ཅེ་ལ་བྲིས་པ།
དགུན་ཁ་ཧ་ཅང་འཁྱག
ང་ཕ་ཡུལ་དུ་ལོག་འདོད།
རྡོག་འོག་གི་གཞུང་ལམ་ངོས་སུ་བ་མོ་མཐུག་པོ་ཆགས་འདུག
ངའི་ཁ་རླངས་དྲོན་མོས་ཞོགས་པའི་ནམ་མཁའ་སྲོས་ནའང་།
ས་གཞིའི་སྲ་མཁྲེགས་རུས་ལ་ཟུག་པས།
ང་ཤིན་ཏུ་གྲང་།
མཐོང་ལམ་གྱི་རི་ཚོགས་ཁ་བས་བཟུང་ཚར།
དཀར་བོང་བོང་གི་འཇིག་རྟེན་དུ།
ཁྱོད་ཀྱི་སྙིང་ཉེ་བའི་རྒྱབ་གཟུགས།
ཁྱོད་ཀྱི་མགོ་རས་གློ་སྐྱ། ཁྱོད་མི་འདུག
གྲོང་ཁྱེར་གྱི་གྲུ་ཟུར་འདི་རུ།
ངས་ཁེར་རྐྱང་མཐོང་བྱུང་།
ཁེར་རྐྱང་ང་ལ་གཟས་འོངས།
སེམས་པ་འདི་སིལ་བུར་གཤགས་པའི་ཤོག་བུ་བཞིན།
རླུང་ནང་དུ་གཤེགས་སོང་།
ཁེར་རྐྱང་དུ་བསྡད་ནས་ཕ་ཡུལ་དྲན་དུས།
ངས་ཕ་ཡུལ་གྱི་ཕྱོགས་མཚམས་མི་རྙེད།
ཡུན་རིང་གི་འཁྱམ་ཉུལ་ལས་ངས་ཕ་ཡུལ་བོར་སོང་།
ངས་རང་ཉིད་བོར་སོང་།
སྨག་གིས་བཅིངས་པའི་མཚན་མོ་མང་པོར།
ངས་ཕྱིར་དྲན་ཁོ་ནས་རང་སེམས་གསོས།
ཨ་ཅེ། ང་ཕ་ཡུལ་དུ་འཁྲིད་རོགས།
དགུང་གཞུང་འདིར།
ཆུ་ཕྲན་གྱི་སྨྲེ་སྔགས་རིང་མོས་ངའི་རྨི་ལམ་དཀྲོགས་སོང་།
དྲན་རེག་ཏུ་གྱུར་བའི་མངོན་སུམ་ཡོད་ཚད་ང་དང་རྒྱང་ཐག་རིང་།
ཨ་ཅེ། ང་དཔུང་མེད་རྒྱབ་ཆད་དུ་ལུས་ཡོད།
ཡིད་རྟོན་གྱི་མེ་སྟག་ཕྲ་མོ་ཙག་རླུང་གིས་ཁུར་སོང་།
གྲང་ཤུར་ཤུར་གྱི་མཁའ་དབུགས་ངའི་གདོང་དུ་བཙངས་ནས།
དུས་ཚིགས་ཤིག་གི་གདུག་རྩུབ་ང་ལ་བསྐྱུར།
སྨྱོ་ཧམ་གྱི་རླུང་བུས་ང་ལ་ཁ་ཤུ་འདེབས།
ཨ་ཅེ། ཁྱེད་ཀྱིས་དྲོད་ལམ་ལམ་གྱི་ལག་པ་ང་ལ་སྲིངས་རོགས།
ཨ་ཅེ། ང་ཕ་ཡུལ་དུ་ལོག་འདོད།
ང་བྱིས་དུས་ཀྱི་ཕ་ཡུལ་དུ་ལོག་འདོད།
（མཚོ་སྔོན་བོད་ཡིག་ཁྲིམས་ལུགས་ཚགས་པར་གྱི་འཕྲིན་སྟེགས་ལས་བཤུས།）
