༄༅།། ཁམས་པའི་པི་ཝང་གི་ངོ་སྤྲོད་མདོར་བསྡུས།

རྩོམ་སྒྲིག་པ།ཚེ་དཔལ།ཡོང་ཁུངས། བོད་ལྗོངས་རིག་གནས་དྲ་བ། སྤེལ་དུས། 05-04


        པི་ཝང་གི་ཕྱིའི་རྣམ་པ་ནི་རྒྱ་ནག་གི་ཨཱར་ཧུའུ་འདྲ་པོ་ཡོད་ཀྱང་དེའི་གྲུབ་ཆ་དང་བཟོ་རྩལ་གྱི་ཐད་ཁྱད་ཆོས་མི་འདྲ་བ་མང་པོ་ཡོད།  གཙོ་བོ་ནི་བོད་ཀྱི་པི་ཝང་གི་བྲེ་ནི་སྔོན་མ་འབྲོང་རྭ་ཡིས་བཟོས་པ་དང་།  དེང་གི་ཆར་ཤིང་གིས་བཟོ་བཞིན་ཡོད།  བྲེ་ངོས་ཀྱི་ལྤགས་པ་ནི་སྔོན་མ་ཉ་དང་སྦྲུལ་གྱི་ལྤགས་པ་བརློན་པ་བཟོས་ཏེ་གཟེར་བཏབ་ནས་བཟོ་བཞིན་ཡོད་པ་དང་།  དེང་སྐབས་ལུག་གི་ལྤགས་པ་སོགས་མཉེས་ཏེ་སྲབ་མོ་བཟོས་ནས་བྲེ་ངོས་ཐོག་གཡོག་པ་ཡང་ཡོད།  བྲེའི་སྐེའམ་རྒྱུད་རྟ་ཞེས་དབྱུག་པ་ཞིག་ཡོད་པ་དེའི་མགོ་ན་རྭ་ཅོ་ཞེས་རྒྱུད་སྐུད་གཉིས་འདོགས་ས་དང་སྒྲའི་ཡང་ལྕི་ཚོད་འཛིན་སའི་དབྱུག་པ་གཉིས་ཡོད། 

        བྲེའི་སྟེང་གི་རྒྱུད་སྐུད་གཉིས་པི་ཝང་གི་རྭ་ཅོའི་མགོར་འཐེན་ཞིང་རྒྱུད་སྐུད་དེ་གཉིས་ལས་སྦོམ་པ་དེར་ཕོ་སྐུད་དང་ཕྲ་བ་ལ་མོ་སྐུད་ཞེས་ཟེར་གྱི་ཡོད།  རྒྱུད་སྐུད་དེ་གཉིས་རྟའི་རྔ་སྤུ་བཀོལ་ནས་བཟོ་བ་ཡིན་པས་དེར་སྒྲ་སྙན་ཞིང་ཅུང་སྦོམ་ཤས་ཆེ་བ་ཞིག་ཡོད་པས་འབའ་གཞས་བཀྲོལ་འཁྲབ་ཀྱི་ཡིད་ཡུལ་མཉེས་སྣང་ལེགས་པ་དང་།  ཁམས་པའི་མི་ཆེན་ཕོ་རྒོད་ཀྱི་ཁྱད་ཆོས་ཡང་མངོན་ཐུབ་པ་ཡོད།  བྲེའི་ཐོག་གི་རྒྱུད་སྐུད་འདེགས་བྱེད་ལ་སྒ་ཞེས་ཟེར་བ་ཡིན་རྒྱུད་སྐུད་འཐེན་བྱེད་དམ་ཡང་ན་དཀྲོལ་བྱེད་ལ་གཞུ་ཞེས་གཞུའི་རྣམ་པ་དང་འདྲ་བོ་ཞིག་ཡོད།  དེའི་སྐུད་པ་ལ་གཞི་སྐུད་ཟེར་ཞིང་རྟ་རྔས་བཟོས་པ་ཡིན།  ཁམས་ཁུལ་པི་ཝང་གི་ཕྱིའི་བཟོ་དབྱིབས་ནི་ཕལ་ཆེ་བ་འདྲ་པོ་ཡོད་ཅིང་གཙོ་བོ་མི་འདྲ་སའི་ཆ་ནི་སྐེའི་རིང་ཐུང་དང་།  ཡུལ་ལུང་སོ་སོའི་དགའ་མོས་དང་ལུགས་སྲོལ་མི་འདྲ་བར་རྒྱན་གྱི་རི་མོ་འགོད་སྟངས་སོགས་ཀྱི་ཁྱད་པར་ཡོད། 

        སྤྱིར་ན་པི་ཝང་ནི་བོད་ཤར་ལྷོའི་སྨར་ཁམས་དང་འབའ་ཐང་།  བདེ་ཆེན་སོགས་ཁུལ་གྱི་རས་པའམ་འབའ་གཞས་དང་མཉམ་དུ་དར་ཁྱབ་བྱུང་བ་ཞིག་ཡིན།།


དྲ་ཚིགས་འདིའི་པར་དབང་གངས་ལྗོངས་ཉི་གཞོན་དྲ་བར་དབང་བས་ཕན་ཚུན་ལ་དབང་བཅོལ་མ་བྱས་གོང་རང་དགར་མི་སྤྱོད་པར་མཁྱེན།
དྲ་ཚིགས་དཔང་རྟགས། 蜀ICP备14009601号-1