སྤྱི་ཚོགས་ནི་ཁ་ལེབ་མེད་པའི་ཟངས་རྒན་ཞིག་རེད
ཟངས་རྒན་དེའི་ནང་དུ
ཚག་ཚག་གི་སྒྲ་དང་བཅས་མི་རྣམས་བརྔོ་ཡིན་ཡོད

མི་སྐོར་ཞིག་གིས
རང་ཉིད་རྔོད་ཀྱིན་པ་གཏན་ནས་ཤེས་ཀྱིན་མེད
གཞན་གྱིས་རྔོད་ཀྱིན་པ་དེ་བས་ཀྱང་ཤེས་ཀྱིན་མེད

ཡང་དང་བསྐྱར་དུ་བརྔོས་རྗེས་སུ
རྣ་ཡས་འོན་པ་ཅན
མིག་ཡས་ཞ་ར་ཅན
རྐང་ཡས་ཞ་བོ་ཅན་ཏག་ཏག་ཐོན
 
ཁོ་ཚོས་འོད་ཟེར་ལ་བལྟས་ཏེ་མུན་ནག་རེད་ཟེར
ཁོ་ཚོས་མུན་ནག་ལ་བལྟས་ཏེ་འོད་ཟེར་རེད་ཟེར
ཁོ་ཚོས་དབང་བོ་རྣམ་ལྔ་གསལ་བའི་མི་དག་ཀྱང                         
ཡང་བསྐྱར་ཟངས་རྒན་ཁ་ལེབ་མེད་པ་དེའི་ནང་དུ་འཕངས།