གཙོ་ངོས།>> སྐྱེ་ཁམས།>>སྲོག་ཆགས།

རྩོམ་སྒྲིག་པ།ཚེ་དཔལ། ཡོང་ཁུངས། མཚོ་སྔོན་བོད་སྐད་དྲ་ལམ་རྒྱང་སྒྲོག་བརྙན་འཕྲིན་ཁང་། སྤེལ་དུས། ༢༠༡༧ལོའི་ཟླ་བ་༠༦ཚེས་༠༨ཉིན།

༄༅།། བྲེ་སེར་འབྲོང་གི་ཁྱད་ཆོས།

གཅིག  འབྲོང་ནི་མདོ་དབུས་མཐོ་སྒང་གི་ཁྱད་འཕགས་སྲོག་ཆགས་ཤིག་ཡིན་ཞིང་། མངོན་གསལ་ལྡན་པའི་མཐོ་སྒང་གྲང་ངར་ཆེ་སའི་སྲོག་ཆགས་ཡིན། གཟུགས་གཞི་ཆེ་ཞིང་སུག་བཞི་ཐུང་བ་དང་། ནོར་ནག་ལས་ལྡབ་2ནས་3གྱིས་ཆེ་བ་ཡིན། འབྲོང་མང་ཤོས་ཀྱི་སྤུ་ཁ་ནག་པོ་ཡིན་མོད། འོན་ཀྱང་སྤུ་ཁ་སེར་པོ་ཡིན་པའི་འབྲོང་ཡང་ཡོད།
གཉིས། འབྲོང་གི་གཟུགས་གཞིའི་ཁྱད་ཆོས། 
        གཟུགས་ཀྱི་རིང་ཚད་ནི་སྨི་106ནས་སྨི་2.2དང་། ལུས་ཀྱི་ལྗིད་ཚད་ནི་སྤྱི་རྒྱ་1000ཡས་མས་ཡིན། རྔ་མའི་རིང་ཚད་ནི་ལི་སྨི་80ནས་100ཡས་མས། ཕྲག་པའི་མཐོ་ཚད་ནི་ལི་སྨི་160ནས་180། རྭ་ཅོའི་རིང་ཚད་ནི་ལི་སྨི་40ནས་ལི་སྨི་50དང་ཆེས་རིང་བའི་རྭ་ཅོའི་རིང་ཚད་སྨི་1ཡིན་ལ། རྭ་ཅོ་གཉིས་ཀྱི་བར་ཐག་ཅུང་ཆེ། གཟུགས་གཞི་ཆེ་ཞིང་སུག་བཞི་ཐུང་བ་དང་། ནོར་ནག་ལས་ལྡབ་2ནས་3གྱིས་ཆེ་བ་ཡིན། འབྲོང་མང་ཤོས་ཀྱི་སྤུ་ཁ་ནག་པོ་ཡིན་མོད། འོན་ཀྱང་སྤུ་ཁ་སེར་པོ་ཡིན་པའི་འབྲོང་ཡང་ཡོད། འབྲོང་གི་སོག་མགོ་མཐོ་ཞིང་། ལུས་སྨད་དང་སྐེ་མཇིང་། སུག་བཞི་བཅས་ཀྱི་རྩིད་པ་ཧ་ཅང་རིང་བར་མ་ཟད། རྔ་སྤུ་རིང་ཞིང་རྔ་རྩེ་གཟེངས་འདུག འབྲོང་དང་འབྲོང་མོ་ཀུན་ལ་སྦོམ་ཞིང་རིང་བའི་རྭ་ཅོ་སྐྱེས་ཡོད། འབྲོང་གི་སུག་བཞིར་སྟོབས་ལྡན་ཞིང་རྨིག་ཆེ་ལ་སྒོར་སྒོར་ཡིན། ཡིན་ཡང་རྨིག་པ་ཆུང་ཞིང་རྣོ་བ་དང་ལུག་གི་རྨིག་པ་དང་མཚུངས་ལ། སྲ་ཞིང་སྟོབས་ལྡན་པ་ཡིན། རྨིག་གི་འགྲམ་དང་མདུན་དུ་མཁྲེགས་ཤིང་འབུར་བའི་མཐས་བསྐོར་བ་དང་། རྐང་མཐིལ་དུ་མཉེན་པའི་སྐོགས་ཤུན་འདུག་ཅིང་། འདི་ལྟ་བུའི་རྨིག་པས་ལུས་པོ་མར་ཤུད་པའི་མགྱོགས་ཚད་དང་འདེད་ཤུགས་ཇེ་དལ་དུ་གཏོང་ཐུབ་པ་དང་། དེས་གཡང་གཟར་གྱི་རི་མགོར་འགྲོ་བདེ་བར་བྱེད། འབྲོང་གི་བྲང་ཁོག་གི་སྐྱེ་འཕེལ་ལེགས་ཤིང་གློ་ཡུ་སྦོམ་ཞིང་ཐུང་ལ། ཁྱི་ཡི་གློ་ཡུ་དང་ཅུང་མཚུངས་པ་ཡིན་ཞིང་། མགྱོགས་ཚད་དེ་དབུགས་ལེན་པར་འཚམ་པས་མཚོ་ངོས་མཐོ་ཚད་མཐོ་ཞིང་རླུང་སྣོན་དམའ་བ་དང་། དབྱང་རླུང་ཉུང་བའི་མཐོ་སྒང་རྩྭ་ཐང་གི་གནམ་གཤིས་ཆ་རྐྱེན་དང་འཚམ་པ་ཡིན།
གསུམ། འབྲོང་གི་ཁྱབ་ཡུལ།
         འབྲོང་ནི་ཞིན་ཅང་རང་སྐྱོང་ལྗོངས་ཀྱི་ལྷོ་ཕྱོགས་དང་། མདོ་དབུས་མཐོ་སྒང་གི་མཚོ་སྔོན་ཞིང་ཆེན་དང་བོད་རང་སྐྱོང་ལྗོངས། ཀན་སུའུ་ཞིང་ཆེན་གྱི་ནུབ་བྱང་ཕྱོགས་དང་། སི་ཁྲོན་ཞིང་ཆེན་གྱི་ནུབ་ཕྱོགས་བཅས་ཀྱི་རྫ་མགོ་ན་གནས་འདུག འཚོ་གནས་ཀྱི་མཚོ་ངོས་མཐོ་ཚད་ནི་སྨི་3000ནས་6000བར་གྱི་མཐོ་སྒང་གི་ས་དང་། མི་མེད་ལུང་སྟོང་གི་མཐོ་སྒང་རི་མགོ ལུང་ཁུག རྩྭ་ཐང་། བྱེ་ཐང་སོགས་ཁོར་ཡུག་སྣ་ཚོགས་སུ་འཚོ་སྡོད་བྱེད་པ་དང་། དབྱར་དུས་སུ་ཐ་ན་མཚོ་ངོས་མཐོ་ཚད་སྨི་5000ནས་6000བར་གྱི་ས་ཆར་འཚོ་བ་ཡིན།
བཞི། འབྲོང་གི་འཚོ་གནས་ཁོར་ཡུག 
        དུས་རྒྱུན་དུ་གྲང་ངར་ཆེ་སའི་མཐོ་སྒང་གི་ས་སྟོང་ལུང་སྟོང་ན་འཚོ་སྡོད་བྱེད་བཞིན་ཡོད། འབྲོང་ནི་གྲང་ངར་ཐུབ་ཅིང་ཚ་གདུག་ལ་སྐྲག་པའི་རི་སྐྱེས་སྲོག་ཆགས་ཤིག་ཡིན་པས། གྲང་ངར་ཆེ་སའི་མཐོ་སྒང་གི་སྲོག་ཆགས་ཚད་ལྡན་ཞིག་ཡིན། འབྲོང་ནི་ཁྱུ་དང་ཁྱུ་བྱས་ནས་འཚོ་སྡོད་བྱེད་པར་གོམས་པ་དང་། དུས་རྒྱུན་དུ་འབྲོང་མོ་ཁྱུ་ཕྱོགས་བྱས་ཏེ་གནས་པ་དང་། དུས་ངེས་ཅན་རེར་འབྲོང་དང་འབྲོང་མོ་ཁྱུ་བྱས་ཏེ་འཚོ་བ་ཡིན་ལ། འབྲོང་ཁྱུ་ཆེན་པོ་ཞིག་ཡིན་ན་འབྲོང་བརྒྱ་ལྷག་འདུས་འདུག འབྲོང་གི་ཚོར་བ་རྣོ་ཞིང་གཏུམ་པོ་ཡིན་པས། ཁོང་ཁྲོ་ལངས་སྐབས་རྔ་མ་གྱེན་དུ་གཟེང་སྲིད། འབྲོང་གི་ཁ་ཟས་གཙོ་བོ་ནི་གྲང་ངར་ཆེ་སའི་མཐོ་སྒང་གི་སྤང་རྩྭ་དང་རྫ་རྩྭ། ན་རྩྭ་བཅས་ཡིན། ལོ་རེའི་ཟླ་8པ་ནས་ཟླ་11པའི་བར་དུ་འབྲོང་མོ་སྦྱིག་པ་དང་། ཕྱི་ལོའི་ཟླ་4བ་ནས་ཟླ་5བའི་བར་དུ་འབྲོང་མོ་རེས་འབྲོང་ཕྲུག་རེ་བཙའ་སྲིད། འབྲོང་མོའི་མངལ་སྦྲུམ་ཡུན་ནི་ཟླ་9ནས་ཟླ་བ་10ཡིན། ཡར་ཀླུང་གཙང་བོའི་སྟོད་རྒྱུད་དང་། ཁུ་ནུ་རི་རྒྱུད། ཨ་ཨར་ཅིན་རི་རྒྱུད། མདོ་ལ་རི་བོའི་སྣེ་གཉིས་བསྐོར་བའི་ཧ་ལམ་སྤྱི་ལེ་གྲུ་བཞི་མ་ཁྲི་140ཡི་རི་ཁྱུའི་གྲང་ངར་གྱི་བྱེ་ཐང་དུ་ཁྱབ་ཡོད། ཚོད་རྩིས་བྱས་པ་ལྟར་ན། 2012ལོའི་ལོ་མཇུག་བར། ཀྲུང་གོའི་འབྲོང་གི་ཁ་གྲངས་དེ་ཁྲི་3ནས་ཁྲི་5འདུག
ལྔ། འབྲོང་གི་འཚོ་བའི་གོམས་གཤིས། 
        འབྲོང་ནི་གཡག་གི་ཡང་མེས་ཡིན་ཞིང་སྔོན་ཆད་ཁྱབ་རྒྱ་ཤིན་ཏུ་ཆེ། ད་ལྟ་མདོ་དབུས་མཐོ་སྒང་དུ་མ་གཏོགས་མི་འདུག་ཅིང་། འབྲོང་གི་ལྗིད་ཚད་ལ་སྤྱི་རྒྱ་1000ཡན་ཡོད་པ་དང་། ལུས་པོ་ནག་པོ་དང་ལུས་ཀྱི་ཟུར་འོག་དང་རྐང་མགོར་སྤུ་མཐུག་པོ་སྐྱེས་པ་དང་གྲང་ངར་ཆེ་བའི་ཁོར་ཡུག་ཏུ་འཚོ་བར་འཚམ་པ་དང་། དུས་ཚིགས་བཞི་བོར་རི་མགོ་རུ་འཚོ་སྡོད་བྱེད་ཅིང་སྤང་རྩྭ་སྙི་མོ་བཟའ་བར་སྤྲོ་ཞིང་། དབྱར་དུས་སུ་སོ་ཡིས་བཟའ་བ་དང་དགུན་དུས་སུ་ལྕེ་ཡིས་ལྡག་པ་ཡིན། འབྲོང་གི་ལྕེ་ནི་ཤིན་ཏུ་རྣོ་ལ་ཁོའི་ལག་ཆ་གལ་ཆེན་ཞིག་ཀྱང་ཡིན། རྟག་ཏུ་འབྲོང་20ནས་30རེ་ཁྱུ་བྱས་ཏེ་རྩྭ་ཐང་དུ་རྒྱུ་བ་དང་བཟའ་བཏུང་འཚོལ་བ་ཡིན། སྐབས་འགར་འབྲོང་200ནས་300རེ་ཁྱུ་བྱས་ཏེ་འགུལ་བསྐྱོད་བྱེད་ཀྱི་ཡོད། རྒྱུས་ལོན་པ་ལྟར་ན། འབྲོང་ཕྲུག་སྲུང་སྐྱོབ་བྱེད་པར་འབྲོང་13ལྷག་སྒོར་སྒོར་བྱས་ཏེ་མགོ་ཁ་ཕྱིར་གཏད་ནས་ཕྱི་རོལ་གྱི་སྤྱང་ཀི་སོགས་ལ་རྒོལ་བ་ཡིན། སྤྱིར་བཏང་དུ་འབྲོང་གིས་མི་ལ་གནོད་འཚེ་མི་གཏོང་། འབྲོང་རྣམས་རྟག་ཏུ་མཚན་མོ་དང་ཞོགས་པར་སྒོ་ཕྱིར་ཡོང་སྟེ་བཟའ་བཏུང་འཚོལ་བ་དང་། ཉིན་དཀར་རི་ལུང་གི་གཡང་གཟར་དུ་སྐྱུག་ལྡད། ཡང་ན་ཐང་ལ་ཉལ་ཏེ་ངལ་གསོ་བྱེད། འབྲོང་གི་དྲི་ཚོར་ཤིན་ཏུ་དྲགས་ཏེ་ཉེན་ཁ་ཡོད་དུས་འབྲོང་ཕྲུག་དག་ཁྱུ་ཚོགས་ཀྱི་དཀྱིལ་དུ་ལེན་པ་དང་། གལ་སྲིད་དགྲ་བོ་ཐོན་ན། འབྲོང་རྣམས་ཀྱིས་མགོ་བོ་ཐུར་དུ་བཀུག་ཅིང་རྔ་མ་གྱེན་དུ་གཟེང་ནས་དེ་མུར་གར་སོང་ཆ་མེད་དུ་འགྱུར་བ་ཡིན། སྲོག་ཆགས་འདིའི་རིགས་ནི་དུས་རྒྱུན་ཁྱུ་ཚོགས་བྱས་ནས་འཚོ་བར་སྤྲོ་ཞིང་འབྲོང་ཕོ་ཁ་ཤས་མ་གཏོགས་སྤྱིར་བཏང་དུ་མང་ཆེ་བ་མཉམ་དུ་འཚོ་བ་ཡིན། འབྲོང་ཁྱུ་རྣམས་རང་འགུལ་གྱིས་དགྲ་བོ་ལ་གཡོལ་བ་དང་། མི་དང་རླངས་འཁོར་སོགས་ལ་འཕྲད་ནའང་འབྲོ་སྲིད། ཡིན་ཡང་རང་གཤིས་རྩུབ་པའི་ཁེར་རྐྱང་གི་འབྲོང་ནི་དེ་ལས་ལྡོག་ཅིང་དུས་རྒྱུན་རང་འགུལ་གྱིས་རང་གི་མདུན་དུ་བརྒྱུད་པའི་མི་དང་སྲོག་ཆགས་གང་རུང་ལ་རྒོལ་བར་བྱེད། དེས་བསྐྱོད་བཞིན་པའི་རླངས་འཁོར་ཁ་ལོ་བསྐོར་སྲིད། གནོད་འཚེ་ཐེབས་པའི་འབྲོང་ཕོ་འབྲོང་མོ་གང་ཡིན་ཡང་ཤི་བའི་བར་དུ་དགྲ་བོ་ལ་རྒོལ་ལན་སློག་པར་བྱེད། འབྲོང་གིས་རྒོལ་དུས་ཐོག་མར་རྔ་མས་གསལ་བརྡ་གཏོང་བས་ཕྱི་རོལ་ཡུལ་དུ་བྱ་བ་སྒྲུབ་དུས་འབྲོང་གི་རང་གཤིས་འདི་བློ་ལ་ངེས་དགོས། ལོ་ན་རྒས་པའི་འབྲོང་ནི་ཁྱུ་ཚོགས་དང་ཁ་གྱེས་པ་ཡིན་ན། ཚེ་སྨད་ཡོངས་སུ་ཁེར་རྐྱང་དུ་འཚོ་ངེས།
དྲུག འབྲོང་གི་སྐྱེ་འཕེལ། 
        འབྲོང་མོ་སྦྱིག་པའི་དུས་སྐབས་ནི་ཟླ་9བ་ནས་ཟླ་11པའི་བར་ཡིན་ཞིང་། འབྲོང་མོ་མངལ་སྦྲུམ་པའི་དུས་སྐབས་ནི་ཟླ་8པ་ནས་ཟླ་9བའི་བར་ཡིན་ལ། ལོ་རྗེས་མའི་ཟླ་6པ་ནས་ཟླ་7པའི་ནང་སྦྲུམ་སྐྱེས་པ་དང་། སྦྲུམ་ཐེངས་ཤིག་ལ་གཅིག་སྐྱེས་པ་ཡིན། འབྲོང་ཕྲུག་སྐྱེས་ནས་ཟླ་ཕྱེད་འགོར་རྗེས་འབྲོང་ཁྱུ་དང་ལྷན་དུ་འགུལ་བསྐྱོད་བྱས་ཆོག དེའི་ཕྱིར་ལོའི་དབྱར་ཁར་འབྲོང་ཕྲུག་ལ་ནུ་མ་ལྡུད་མཚམས་བཅད་ཆོག་པ་དང་། ཚེ་ཚད་23ནས་25བར་འདུག་པ་ཡིན།
བདུན། མཐོ་སྒང་གི་གྲུ་གཟིངས། དེ་ནི་ངོ་མཚར་ཆེ་བའི་འབྲོང་གི་ཁུར་ཤུགས་ཆེ་བས་ཡིན་ལ། འབྲོང་དང་གཡག་བསྡུར་ན། འབྲོང་གི་བཟོད་སྒོམ་ནུས་ཤུགས་དང་གྲང་ངར་ལ་རྒོལ་ཤུགས། དེ་མིན་སྟོབས་ཤུགས་སོགས་གཡག་ལས་ཤིན་ཏུ་ཆེ་བ་ཡིན། དེའི་གཟུགས་དབྱིབས་ནི་གཡག་དང་འདྲ་མཚུངས་སུ་སྣང་ཡང་། ཆེ་ཆུང་ནི་གཡག་ལས་ལྡབ་གཉིས་ཡན་དང་ལྗིད་ཚད་རྒྱ་མ་1200ཡོད། མ་ཟད་དེ་ལ་གྲི་ལྟར་རྣོ་བའི་རྭ་ཅོ་ཡོད་ཅིང་། དེས་སྤྱིར་བཏང་དུ་མི་དང་སྲོག་ཆགས་གཞན་ལ་མི་རྒོལ་ཞིང་ཏག་ཏག་གནོད་འཚེ་བཏང་ན་ད་གཟོད་རང་ཉིད་ལ་སྲུང་སྐྱོབ་བྱེད་པ་ཡིན།
བརྒྱད། འབྲོང་གི་པགས་པ་དང་ལྕེ། 
        འབྲོང་གི་པགས་པ་ཤིན་ཏུ་མཐུག་ཅིང་མཐུག་ཚད་ལ་ལི་སྨི་4ཡོད་པ་དང་། སྤྱིར་བཏང་དུ་མདེའུ་ཞིག་གིས་པགས་པ་རྟོལ་མི་ནུས་ཤིང་མ་མཐའ་ཡང་ཁུང་བུ་ཞིག་ལས་བཟོ་མི་ཐུབ། གལ་སྲིད་མི་ཞིག་གིས་རྔོན་པར་བྱ་བའི་ཡུལ་དུ་བཏང་ན། རྔོན་མི་ལོན་པར་མ་ཟད་རང་ཉིད་ཉེན་ཁར་སྐྱེལ་བའི་གནས་སུ་ལྷུང་ངེས། བོད་བྱང་ཐང་ཉེ་འགྲམ་གྱི་འབྲོག་དམངས་རྣམས་ཀྱིས་རྒྱུན་དུ་རེ་འགར་རྔོན་ཏེ་ཁྱེར་ཡོང་བའི་འབྲོང་ལྤགས་བཤུས་ཏེ་སྐམ་པར་བྱས་རྗེས་སྲ་ཞིང་མཁྲེགས་པའི་པགས་པ་དེ་ཚལ་པང་དུ་བྱེད་ཆོག་ཅིང་། ཐ་ན་རུས་པ་དང་ཤ་གཏུབ་ནའང་ལོ་30ནས་50བར་སྤྱོད་ཆོག འབྲོང་ལྕེ་སྟེང་ཤའི་སོ་ལྟ་བུ་ཞིག་སྐྱེས་ཡོད་ཅིང་། དེས་སྲ་མཁྲེགས་ཀྱི་རྩི་ཤིང་ལྡག་བཟའ་བྱས་ཆོག འབྲོག་པས་འབྲོང་ལྕེ་བླངས་ཏེ་སྐམ་རྗེས་སོ་མང་དུ་བཀོལ་སྤྱོད་བྱེད་ཅིང་། བུད་མེད་ཅིག་གིས་སྐྲ་དཀར་པོར་འགྱུར་བའི་བར་དུ་སྤྱོད་ཆོག ཤའི་སོ་མང་ནི་དབྱིབས་མི་འགྱུར་ལ་སོ་ཡང་མི་ལོག་པ་ཡིན། འབྲོང་ནི་རྒྱལ་ཁབ་ཀྱི་རིམ་པ་དང་པོའི་སྲུང་སྐྱོབ་སྲོག་ཆགས་ཀྱི་མིང་ཐོར་ཚུད་པ་དང་བསྟུན་ནས་འདི་ལྟ་བུའི་ཤའི་སོ་མང་ཞིག་ལོན་པ་ནི་དངོས་གནས་སླ་མོ་ཞིག་མ་ཡིན།
དགུ། འབྲོང་སྲུང་སྐྱོབ་བྱེད་པའི་དོན་སྙིང་། 
        འབྲོང་ནི་བོད་མི་རིགས་ཀྱི་རིག་གནས་ཀྱི་གྲུབ་ཆ་ཞིག་ཡིན་ལ། གཏམ་བཤད་དང་གླུ་ལེན་གར་རྩེ་བྱེད་ས་རུ་ནམ་ཡང་འབྲོང་དང་བྲེ་སེར་འབྲོང་ཞེས་པའི་མིང་དེ་ཐོས་ཀྱིན་འདུག དཔེར་ན། ཁྱོད་སྟག་གི་ཁ་ཆེ་ན། ང་འབྲོང་གི་གཉའ་སྦོམ་ལྟ་བུ་དང་། སྨུག་ལང་ལོང་ཁྲོད་ཀྱི་འབྲོང་མོ་སྐྱིད་ཅེས་པ་ལྟ་བུའོ།། འབྲོང་ནི་མདོ་དབུས་མཐོ་སྒང་གི་ཁྱད་ཆོས་ལྡན་པའི་སྲོག་ཆགས་ཤིག་ཡིན་པར་མ་ཟད། ནོར་ནག་གི་ཕ་མེས་ཡང་མེས་ཀྱང་ཡིན་པས། འབྲོང་སྲུང་སྐྱོབ་བྱེད་པ་ནི་ནོར་ནག་ཇི་ལྟར་བྱུང་བར་ཞིབ་འཇུག་བྱེད་པའི་རིན་ཐང་ཆེན་པོ་ལྡན་པ་རེད། འབྲོང་དང་ནོར་ནག་སྡེབ་སྦྱོར་བྱས་ན་ནོར་རྒྱུད་ཇེ་ལེགས་སུ་གཏོང་ཐུབ། འབྲོང་གི་ཤའི་ཐོན་ཚད་མཐོ་བར་མ་ཟད། འབྲོང་སྙིང་དང་འབྲོང་མཁྲིས། འབྲོང་ཁྲག་བཅས་ནི་བོད་སྨན་དུ་འགྲོ་བ་ཡིན།
བཅུ། འབྲོང་གི་ད་ལྟའི་གནས་བབ། 
        སྔོན་ཆད་འབྲོང་གསོད་དྲགས་པ་དང་ཕྱུགས་ཁྱུ་ཇེ་མང་དུ་སོང་བའི་དབང་གིས་འབྲོང་གི་ཁྱབ་ཡུལ་ཇེ་ཆུང་དང་། འབྲོང་གི་གྲངས་ཀ་ཇེ་ཉུང་ནས་ཇེ་ཉུང་དུ་འགྱུར་བཞིན་ཡོད་པས། ཕལ་ཆེར་འབྲོང་ཤུལ་ཆད་པའི་གནས་ཚུལ་བྱུང་འདུག དེར་བརྟེན། འབྲོང་ནི་རང་རྒྱལ་གྱི་གལ་གནད་དུ་བཟུང་སྟེ་སྲུང་སྐྱོབ་བྱེད་དགོས་པའི་རི་སྐྱེས་སྲོག་ཆགས་ཨང་རིམ་དང་པོར་གྱུར་ཡོད། ང་ཚོས་ཆད་པ་ལ་ནི་ཐམས་ཅད་སྐྲག །འཆི་བ་ལ་ནི་ཐམས་ཅད་འཇིགས། །རང་ཉིད་ལ་ནི་དཔེ་ལོངས་ལ། །བརྡེག་པར་མ་བྱེད་གསོད་མ་བྱེད་ཅེས་པ་ལྟར་རི་སྐྱེས་སྲོག་ཆགས་ལ་སྲུང་སྐྱོབ་བྱེད་དགོས་སོ།།



39.7K

དྲ་ཚིགས་འདིའི་པར་དབང་གངས་ལྗོངས་ཉི་གཞོན་དྲ་བར་དབང་བས་ཕན་ཚུན་ལ་དབང་བཅོལ་མ་བྱས་གོང་རང་དགར་མི་སྤྱོད་པར་མཁྱེན།
དྲ་ཚིགས་དཔང་རྟགས།蜀ICP备14009601号-1