སྤྱི་ཟླ་7པའི་ཚེས་17ཉིན། ཞོགས་པའི་ཉི་གཞོན་རི་རྩེ་རུ་འཕྲོས་པ་དང་མཉམ་དུ་ཁྲི་འདུ་རྫོང་གི་ནོར་གནག་དུས་ཆེན་ལ་ལྟ་སྐོར་རུ་ཕྱིན་པ་ཡིན། དེ་རུ་སྲོལ་རྒྱུན་འབྲོག་ལས་ཀྱི་རིག་གནས་རྒྱུན་འཛིན་ལེགས་པོ་བྱས་ཡོད་པ་མ་ཟད། དེའི་ཐོག་དེང་རབས་ཀྱི་རིག་གནས་དང་ལག་རྩལ་ཁ་སྣོན་དང་ཟུང་འབྲེལ་གང་ལེགས་བྱས་འདུག དཔེར་ན་སྲོལ་རྒྱུན་གྱི་ཁྱད་ཆོས་འབུར་དུ་ཐོན་པའི་སྦྲ་གུར་དང་འབྲོག་པའི་ཡོ་བྱད་གང་མང་ཞིག་བཤམས་སྟོན་བྱས་འདུག་ལ། དེང་རབས་ཀྱི་ལག་རྩལ་བེད་སྤྱོད་བྱས་ནས་ཞོ་དང་འོ་མ། ཕྱུར་བ་དང་ཐུད། རྩམ་པ་སོགས་ཚོང་རྟགས་ཅན་དུ་བསྒྱུར་ནས་རྒྱལ་ཡོངས་ཀྱི་ཡུལ་གྲུ་སོ་སོར་འགྲེམ་སྤེལ་གང་ལེགས་བྱེད་ཀྱིན་འདུག
དེ་ནས་ཕར་ཇ་ཡུན་ཙམ་སོང་རྗེས་གུ་ཚ་ལྷ་ཁང་དུ་སླེབས་སོང་། རྒན་རྒོན་འགས་ངོ་ལ་འཛུམ་དང་ལག་ལ་ཁ་བཏགས་བཟུང་ནས་ང་ཚོ་བསུ་མ་བྱེད་པའི་ཚུལ་ལ་བལྟས་ན། ཁོང་ཚོས་རིག་དངོས་གལ་ཆེན་གཏམས་པའི་ལྷ་ཁང་འདི་ལ་གཙིགས་ཆེན་དང་སྲུང་སྐྱོབ་ཡག་མོ་བྱེད་བཞིན་ཡོད་པ་ངང་གིས་རྟོགས་ཐུབ། ལྷ་ཁང་དེ་ལ་ཁང་པ་ཕྱི་ནང་གཉིས་འདུག་ལ། ནང་གི་ལྡེབས་རིས་དག་རྙིང་ཉམས་ཆེ་ཞིང་གཏོར་བཤིག་གི་ཚད་ཅུང་ཆུང་བ་འདུག རྒྱུ་མཚན་ནི་རིག་གསར་སྐབས་སུ་འབྲུ་རིགས་སོགས་བཞག་ས་བྱས་ཏེ་གཏོར་བརླག་ཆེན་པོ་ཐེབས་ཡོད་མ་རེད་གསུང་བཞིན་འདུག དེ་ནས་དགོང་མོ་དུས་ཚོད་དགུ་ལྷག་ལ་གསེར་ལྡན་ཆུ་བོའི་ངོགས་ཀྱི་གྲོག་རོང་ལམ་འཕྲོང་བརྒྱུད་དེ་མཚན་མོ་དུས་ཚོད་བཅུ་གཉིས་ཡས་མས་སུ་ཡུལ་ཤུལ་གྲོང་ཁྱེར་རུ་འབྱོར།
སྤྱི་ཟླ་7པའི་ཚེས་18ཉིན། དགེ་རྒན་ཆེན་མོ་ཁ་སྒང་བཀྲ་བྷོ་དང་འབུམ་རབས་གོང་མ་གཉིས། དེ་མིན་འབྲེལ་ཡོད་ལས་བྱེད་པ་ཁག་གཅིག་དང་ལྷན་དུ་འབྲི་ཆུའི་འགྲམ་གྱི་གྲུ་དཔོན་ཚང་གི་ཁྱིམ་དུ་ལྟ་སྐོར་རུ་ཕྱིན་པ་ཡིན། དེ་རུ་སྲོལ་རྒྱུན་རིག་གནས་ཀྱི་ཁྱད་ཆོས་འབུམ་གྱིས་ཕྱུག་པའི་བོད་ཁང་དང་བོད་ཀྱི་གནའ་རབས་ཡོ་བྱད། ཁྱད་པར་དུ་ཀོ་གྲུ་བཟོ་བའི་ལག་རྩལ་དང་ལོ་རྒྱུས་གྱ་ནོམ་པ་ཞིག་ལབས་རྒྱུ་འདུག དེ་ནས་རླངས་འཁོར་བསྡད་དེ་ལེགས་པ་ལུང་པའི་བྲག་བརྐོས་རི་མོ་དང་གནའ་ཡིག་མཇལ་དུ་ཕྱིན་པས། གནའ་མི་དག་གི་ཤེས་རབ་དང་མཛད་རྗེས་ཇི་ལྟར་ཞིག་ཡིན་པ་མེ་ལོང་གི་དངོས་སུ་བལྟས་པ་ནང་བཞིན་ཡིད་ལ་གསལ་ལེ་འཆར་བྱུང་། དགེ་རྒན་རྣམ་པ་རྩལ་ཆེན་རྟ་ཐོག་ཏུ་སླེབས་པ་ནང་བཞིན་དེ་ལ་ཞིབ་འཇུག་དང་པར་ལེན་པ་སོགས་ཀྱི་ལས་ལ་བྲེལ་བཞིན་འདུག དེ་ནས་ཕྱི་དྲོ་འབུས་རྣམ་པ་སྣང་མཛད་མཇལ་དུ་ཕྱིན་པས། དེ་རུ་ཉེ་བའི་སྲས་ཆེན་བརྒྱད་དང་རྒྱ་བོད་ཀྱི་གནའ་ཡིག་བྲག་བརྐོས་མ་ཡིད་ལ་ཤོང་དཀའ་བ་ཞིག་མཇལ་རྒྱུ་འདུག གནས་དེའི་བདག་གཉེར་བས་ངོ་སྤྲོད་གནང་བ་བརྒྱུད་ནས་ཕྱི་ནང་གི་གནའ་ཤུལ་ཡོངས་རྫོགས་ཞིབ་མོ་བྱས་ནས་མཇལ་བ་ཡིན།
སྤྱི་ཟླ7པའི་ཚེས་19ཉིན། སྔ་དྲོའི་དུས་ཚོད་དགུ་དང་ཕྱེད་ལ་ཡུལ་ཤུལ་ཁུལ་གྱི་དངོས་མང་བཤམས་སྟོན་ཁང་དུ་ལྟ་སྐོར་རུ་ཕྱིན་པ་ཡིན། དེ་རུ་ཡུལ་ཤུལ་གྱི་ཁྱད་ཆོས་རབ་ཏུ་ལྡན་པའི་རིག་དངོས་དང་གནའ་རྫས། སྲོག་ཆགས་ཀྱི་རྣམ་པ་སོགས་རིན་ཐང་གཞལ་བ་དཀའ་བའི་དངོས་རྫས་བགྲང་ལས་འདས་པ་ཉར་ཚགས་དང་འགྲེམ་སྟོན་བྱས་འདུག ཉིན་གུང་དཔལ་ཐང་རྩྭ་ཐང་དུ་སོང་ཞིང་། དེ་རུ་ཡུལ་ཤུལ་བོད་རིགས་རང་སྐྱོང་ཁུལ་གྱིས་《སྟོན་པའི་གོས་སྐུ་ཆེན་མོ།》ཡི་འཛམ་གླིང་ཟིན་ཐོའི་བདེན་སྤྲོད་བྱེད་སྒོ་སྤེལ་བཞིན་འདུག་ལ། གོས་སྐུ་ཆེན་མོ་འདིའི་ཇུས་འགོད་དང་འགན་འཛིན་པ་ནི་ཡུལ་ཤུལ་ཁུལ་གྱི་བོད་ལྭ་ཇུས་འགོད་པ་ཕུར་བུ་སྒྲོལ་མ་རེད། གོས་སྐུ་ཆེན་མོ་འདིའི་སྤྱིའི་རིང་ཚད་ལ་སྨི་123དང་ཞེང་ཚད་ལ་སྨི་87 སྤྱིའི་རྒྱ་ཁྱོན་ལ་སྨི་གྲུ་བཞི་མ་10701ཡོད་ལ། ལྷོ་མི་ཡེལ དགོན་པའི་ལྷོ་པ་སྐྱབས་མགོན་རིན་པོ་ཆེས་སྤྱིའི་འགྲོ་གྲོན་དམངས་སྒོར་ཁྲི་470བཏང་ནས་ལོ་ངོ་བདུན་གྱི་རིང་ལ་བཞེངས་པ་རེད།
