གཙོ་ངོས།>> རྩོམ་རིག>>སྙན་རྩོམ།

ཁྲི་སེམས་དཔའ། རྩོམ་སྒྲིག་པ།ཚེ་དཔལ།ཡོང་ཁུངས།སྐད་འཕྲིན། སྤེལ་དུས། ༢༠༡༧ལོའི་ཟླ་བ་༡༡ཚེས་༢༤ཉིན།

༄༅།། བདེ་སྐྱིད་ཀྱི་ཚོར་བ།

 

 ཁྲི་སེམས་དཔའ།                              

ཤིག་དང་སྲོ་མང་དེ་དག  
དཀའ་ཚེགས་ཀྱི་ལོ་ཟླ་དེ་དག
འཚོ་བའི་གཏིང་མཐར་བྱིངས་པའི་སྐྱོ་ངལ་དང་།
ན་ཟུག ཁུན་སྒྲ་དེ་དག
ནམ་ཡང་མི་མཐོང་བའི་ཁྱོད་ཀྱི་སེམས་པ།
རྟོག་བཏགས་ཀྱི་རླུང་བུ།
ནམ་ཟླ་སྟོན་ལ་རན་པའི་སྟ་གོན།
སེར་ཐིག་ལྷུང་བའི་ལོ་མ་ཞིག་མཁའ་ལ་འཕུར་ཞིང་ས་ལ་ལྷུང་བའི་གོ་རིམ།
དེ་དག་གི་དེ་དག སྐད་ཅིག་མ་དེ་དག    

རྒྱུ་མཚན་མེད་པར་ངུ་སྙིང་འདོད་པའི་སེམས་ཁམས།
རླུང་ནང་དུ་ཕ་ཡུལ་དྲན་པའི་སྐྱོ་སྣང་རབ་རིབ།
ཁེར་རྐྱང་གི་དུས་སུ་སུ་ཞིག་ལ་སྙན་ངག་གླེང་འདོད་ཀྱི་སེམས་ཀྱི་བྲེལ་འཚུབ།
ཅི་ཞིག་བརྗོད་འདོད་ཀྱང་ངག་ནས་ཁེགས་པར་གྱུར་པའི་ཚོར་སྣང་བན་བུན།
མེ་ཏོག་རྐང་གཅིག་ཐོར་ཞིང་ལྷུང་སྐབས་ཀྱི་མིག་ཆུ།
རྩམ་སྐྱ་ཁམ་གང་ལྡག་སྐབས་ཀྱི་སེམས་འགུལ།
དེ་དག་གི་དེ་དག

ངའི་འདོད་པ་དེ་དག   
ངའི་དྲན་པ་དེ་དག    
ངས་འཁྲབ་འདོད་པ་དེ་དག    
ངས་གཏོར་ཅིང་བཤིག་འདོད་པ་དེ་དག དེ་དག
ཡང་ན་ང་དང་ཉེ་ཙམ་ཉེ་ཙམ་དང་། ང་དང་རིང་ཙམ་རིང་ཙམ་གྱི་ཚོར་བ་དེ་དག
དེ་དག  
འཇིག་རྟེན་གསོན་ངོགས་ཀྱི་བདེ་སྐྱིད་རེད།
དེ་དག་ཚོར་བ་རེད།
དེ་དག་བདེ་སྐྱིད་ཀྱི་ཚོར་བ་དངོས་རང་རེད།

39.7K

ཐག་རག་ཡིག་བསྒྱུར་མ་ལག

དྲ་ཚིགས་འདིའི་པར་དབང་གངས་ལྗོངས་ཉི་གཞོན་དྲ་བར་དབང་བས་ཕན་ཚུན་ལ་དབང་བཅོལ་མ་བྱས་གོང་རང་དགར་མི་སྤྱོད་པར་མཁྱེན།
དྲ་ཚིགས་དཔང་རྟགས།蜀ICP备14009601号-1