སྡུག་གཏམ་ནང་གི་སྙིང་གཏམ།

ཆབ་རོམ། (མགོ་ལོག) རྩོམ་སྒྲིག་པ།ཡོང་ཁུངས། སྤེལ་དུས། 01-26


ཁོ་ཁོག་ལུང་བ་རིང་མོ།།

གཡག་རྒན་ཞིག་དང་མཚུངས་པ།།

མགྱོགས་ལམ་ལྕགས་ཀྱི་ཐག་པས།།

གཡག་རྒྱབ་བསྡམས་དང་མཚུངས་ལེ།།

ཡ་གིའི་རི་སྣ་ཕུག་ལུགས།།

གཡག་སྣ་ཤིང་བུས་གཟེར་འདྲ།།

མ་གིའི་རྩྭ་ཐང་གཙབས་ལུགས།།

གཡག་འཕོངས་དབྱུག་པས་བརྡུངས་འདྲ།།

རྩྭ་དང་རྩི་ཤིང་བཅད་ལུགས།།

གཡག་རྔ་ལག་རྩིད་བཅད་འདྲ།།

གད་སྙིགས་གང་སར་གཏོར་བ།།

གཡག་རྒྱབ་རྔོ་ཡིས་ཟོས་འདྲ།།

དཔྱིད་གསུམ་རྩྭ་བཏུ་ཤིང་བཏུ།།

གཡག་མགོ་ཁྭ་ཏས་བཏོགས་འདྲ།།

དབྱར་གསུམ་ས་བརྐོ་རྡོ་སློག །

སྒ་ཆག་ཁལ་གྱིས་མནན་འདྲ།།

སྟོན་གསུམ་མེ་སྐྱོན་སད་སྐྱོན།།

གེག་ནད་ཁ་ཚ་བྱུང་འདྲ།།

དགུན་གསུམ་རྩྭ་ཆད་ཁང་ལོག །

གཡག་ལྟོ་མུ་གེས་བཙིར་འདྲ།།

 

གཡག་འདིའི་ལོ་རྒྱུས་གླེང་ན།།

མགོ་ལ་རྭ་ཁ་ཡག་རབས།།

རྐང་ལག་སུག་བཞི་ཡག་རབས།།

རྔམ་དང་གཟི་བརྗིད་ཡོད་རབས།།

ལྷ་གཡག་ཁམ་པ་ཡིན་རབས།།

ལྷ་དང་སྲུང་མ་བཙན་རབས།།

བདག་པོ་དབང་ཐང་ཆེ་རབས།།

བསྟོད་གླུ་གེ་སར་སྒྲུང་རེད།།

ད་ལྟ་གཡག་འདི་རིག་ན།།

ཡིད་སེམས་མི་སྐྱོ་རང་སྐྱོ།།

སུག་བཞིས་གཟུགས་གཞི་མི་ཐེག །

དབུགས་ཀྱང་ལྷེམ་ཙམ་ལྷེམ་ཙམ།།

གཡག་འདིའི་ཚེ་སྲོག་སུས་སྐྱོབ།།

གཡག་འདིའི་སྐྱིད་སྡུག་སུས་རིག །

 

སྲུང་མ་ནུས་མཐུ་ཅན་པོས།།

ཚེ་ཡི་དངོས་གྲུབ་ད་སྩོལ།།

བདག་པོ་བྱམས་སེམས་ཅན་པོས།།

གཡག་གི་སྐྱིད་སྡུག་ད་གཟིགས།།

བླ་མ་ཐུགས་རྗེ་ཅན་པོས།།

ཐུགས་ཀྱི་དཀྱིལ་ནས་མ་འདོར།།

གཡག་རྒན་འཆི་ལ་ཁད་རེད།།

དཔོན་པོ་བློ་གྲོས་ཅན་པོས།།

ཐབས་དང་བཀོད་པ་ཞིག་རེམས།།

གཡག་རྒན་འཆི་ལ་ཁད་རེད།།

རྒན་པ་སྐུ་བསོད་ཅན་པོས།།

ཁ་ཏ་སློབ་སྟོན་ཞིག་རེམས།།

གཡག་རྒན་འཆི་ལ་ཁད་རེད།།

དར་མ་སྙིང་སྟོབས་ཅན་པོས།།

བདག་སྐྱོང་གཅེས་སྤྲས་ཤིག་རེམས།།

གཡག་རྒན་འཆི་ལ་ཁད་རེད།།

བྱིས་པ་ཚེ་ཐག་རིང་རྒྱུ།།

གད་སྙིགས་གང་སར་མ་གཏོར།།

གཡག་རྒན་འཆི་ལ་ཁད་རེད།།

 

སྡུག་གཏམ་ནང་གི་སྙིང་གཏམ།།

ནང་མི་ཁོ་ཁོག་ལུང་བའི།།

སྡེ་མི་གོང་འོག་བར་གསུམ།།

སྒོས་སུ་བཤད་ས་འདི་ཡིན།།

སྤྱི་རུ་གངས་ཅན་བོད་པའི།།

ག་ས་གང་གི་རུ་སྡེ།།

དཔེ་ལེན་གཅིག་དང་གཅིག་ཡིན།།

འབྲོག་ཕྲུག་ཅིག་གི་སྡུག་གཏམ།།

གཡག་རྒན་ཞིག་གི་ཆེད་ཡིན།།

གླེན་རྒན་ཉལ་ནས་མ་འདུག །

གཡག་རྒན་བདག་པོ་རེམས་ཤིག །

 

                              ༢༠༡༦.༡.༡༠ཉིན་གྲུབ།


དྲ་ཚིགས་འདིའི་པར་དབང་གངས་ལྗོངས་ཉི་གཞོན་དྲ་བར་དབང་བས་ཕན་ཚུན་ལ་དབང་བཅོལ་མ་བྱས་གོང་རང་དགར་མི་སྤྱོད་པར་མཁྱེན།
དྲ་ཚིགས་དཔང་རྟགས། 蜀ICP备14009601号-1