༄༅།། ང་ཕ་ཡུལ་གྱི་པང་དུ་ལོག་ངེས།

ཁྲི་སེམས་དཔའ། རྩོམ་སྒྲིག་པ།ཚེ་དཔལ། ཡོང་ཁུངས།གངས་རྒྱན་མེ་ཏོག སྤེལ་དུས། 05-30



ཁྲི་སེམས་དཔའ། (ཟི་ལིང)


 

མུན་རུབ་སོང་ནའང 
ངས་ཞོགས་པ་ཞིག་འཆར་རྒྱུ་ཡོད་པ་བརྗེད་མི་སྲིད 
མཚན་ལམ་རིང་མོ་རླུང་གིས་ཤིག་ཤིག་བསྒུལ་ཡང
སེམས་ཀྱི་གངས་རི་སྔར་བཞིན་རྒྱང་རིང་དུ་ཀྲོང་ངེར་འགྱིང
རྨི་ལམ་གྱི་ཁ་ཚུབ་གང་དུ་ཕྱེས་ཀྱང་ཕྱེས
སྐར་ཚོགས་ཁྲ་ཆིལ་དགུ་ཆིལ་ཞིག
ངའི་སྨོན་འདུན་གྱི་མཁའ་རུ་འཚེར་ཡོད

 

མུན་པའི་ཁ་གཏད་དུ 
ཁེར་རྐྱང་གི་གདུང་བས་ཡང་ཡང་སྒེའུ་ཁུང་བརྡུངས་ཀྱང 
རླུང་ནང་གི་གྲིབ་གཟུགས་དེ་དག་ང་ལ་འབྲེལ་བ་ཡེ་ནས་མེད
ངའི་ནང་སེམས་ཀྱི་སྐྱེད་མོས་ཚལ་དུ
གཡུ་སྦྲང་གཞོན་ནུའི་སེམས་གཏམ་མེ་ཏོག་གི་མདངས་སུ་བཞད
ང་ལ་དབྱར་ཁ་རྫོགས་ཟིན་མ་ཟེར
དུས་ཚིགས་བཞི་བོ་ང་ལ་མཚོན་ན
མཐོ་སྒང་གི་ཨ་སྔོན་བཞིན་དྭངས་ཤིང་གཙང

 

འུར་ཟིང་གི་ས་གཞི་འདི  
ཞོགས་པ་གྲངས་མེད་ཀྱི་ནལ་བུ་ཡིན
ཚེར་མའི་གསེང་ནས་རྙེད་པའི་ལག་ཕྱིས་གློ་སྐྱ་དེ་རླུང་ལ་བསྐུར་རོགས
ལམ་ཟེར་བ་ཡོད་ཚད་ཀྱིས་སྤང་ལྗོངས་དེད་ནས་རི་ཀླུང་འགྲིམས་སོང
མནོལ་གྲིབ་ཕོག་པའི་ཆུ་ཕྲན་ཀྱ་ཀྱུ
མཚན་མོའི་འོབས་སུ་བཞུར་ནས་ལོ་ཟླའི་སྨྲེང་བ་དབྱངས་ལ་གྱེར
ང་མཚན་མོའི་ཁོང་དུ་བསྡད་དེ 
རྨི་ལམ་གྱི་ས་བོན་སྤར་མོ་གང་བོ་འདི་སང་ཞོགས་ཀྱི་མངལ་དུ་གཏོར

 

མཆོད་མེ་རྐོང་བུ་གང་གི་གཟི་མདངས་ནི
ངས་མཚན་མོར་ཕུལ་བའི་མཆོད་པ་ཡིན
ནམ་གྱི་ཕྱེད་ཀ་རྫོགས་དུས 
ལམ་གྱི་སྣེ་མོ་ཡོད་ཚད་ཕྱོགས་བཞིར་བརྐྱངས་ཀྱང 
ངས་བརྗིད་ཆགས་ཀྱི་གངས་རི་བསྙེགས་ནས
མ་ཡུམ་གྱི་འཛུམས་མདངས་བསྒོམས་ནས
ཕ་ཡུལ་གྱི་པང་དུ་ལོག་ངེས


རྩོམ་ཡིག་སྔོན་མ།
༄༅།། ཨ་སྐྱབས་དར་རྒྱས།
རྩོམ་ཡིག་རྗེས་མ།
༄༅།། རླུང་།

དྲ་ཚིགས་འདིའི་པར་དབང་གངས་ལྗོངས་ཉི་གཞོན་དྲ་བར་དབང་བས་ཕན་ཚུན་ལ་དབང་བཅོལ་མ་བྱས་གོང་རང་དགར་མི་སྤྱོད་པར་མཁྱེན།
དྲ་ཚིགས་དཔང་རྟགས། 蜀ICP备14009601号-1