རབ་ཏུ་མཛེས་པ་སྟོན་གྱི་ཆུ་འཛིན་ནི། །

སྒེག་པའི་ཉམས་ལྡན་རླུང་གི་བུ་མོས་གཡོ། །

སྣ་ཚོགས་ཚོན་རིས་དང་བྲལ་བཞུགས་པ་ཁྱེད། །

སྲིད་གསུམ་གར་དུ་རྩེན་ཡང་གཡོ་བ་གང་། །

འཇིག་རྟེན་དབང་སྡུད་དབྱངས་ཅན་ཟླ་མཛེས་མས། །

རྒྱུད་མངས་དཀྲོལ་བའི་ཟོལ་གྱིས་གྲོགས་མཛད་དེ། །

མ་རིག་སྲིད་པ་འཁོར་བའི་གཡུལ་ས་རུ། །

འཇམ་མཉེན་རོལ་མོའི་གདངས་ཀྱིས་འགེངས་པར་བྱས། །

མང་ཐོས་རི་རབ་རྩེ་རུ་བབས་པ་དང་། །

གནའ་དེང་མཁས་པའི་སྲང་དུ་འགྲིམས་བྱས་ནས། །

ལོག་སྨྲའི་ཁ་ཆར་འཐིབ་པའི་གངས་ཁྲོད་དུ། །

ལྟ་བའི་སྤོས་ཤེལ་གཙང་མ་ཁལ་གཅིག་ཕོག །

ཉེར་འཚེ་ཀྱོ་བ་འཕངས་པའི་རྒོལ་ལན་ཏུ། །

བྱམས་པའི་གཞུ་རྒྱུད་ཤུགས་ཀྱི་ལྷོད་པ་ཡིས། །

རྩོད་ངག་རལ་གྲིའི་འཁྲི་ཤིང་གཡོ་བ་དག །

གཡེང་བར་འཕྱན་པའི་རྟུགས་ཞུགས་ལེན་དགོས་བྱུང་། །

ཡུམ་གྱི་དྲན་པའི་གདུང་བ་རྒྱ་མཚོའི་གཟིངས། །

རླབས་ཀྱིས་ཡུན་རིང་སྒུལ་བས་བཟོད་དཀའ་ཡང་། །

སྲིད་པ་ལས་ཀྱི་འཁོར་ལོའི་ངང་ཚུལ་དུ། །

དགོངས་པ་དེ་ཡང་འགྲོ་བའི་དོན་གྱི་བསླད། །

མི་དབང་འཕྲིན་ལས་ནམ་མཁའི་ཀློང་ཡངས་ནས། །

དབུ་ཡི་རྒྱན་ཏུ་གསོལ་ཞེས་འཕྲིན་གྱི་རྟ། །

ཡང་ཡང་བཏང་མོད་དབེན་པའི་རྫ་ལུང་དག །

གྲོགས་སུ་བསྟེན་པ་ཁྱོད་ལས་སུ་ཡིས་ནུས། །

དེང་སང་མཐོང་ཐོས་རི་ཡི་ངོས་ཡངས་སུ། །

དྲེགས་པ་འགའ་ཞིག་རང་བརླ་ལྕག་བྲབ་ཀྱིས། །

རྟ་རྒྱུག་ཨ་ཐང་ཆད་པ་དེ་མཐོང་ན། །

འཁོས་ཆུང་གད་མོ་འཆོར་བའི་རྒྱུ་ཡང་འབྱུང་། །

ད་དུང་སྔོན་དགེ་ཆུ་མཚོ་ལས་སྐྱེས་པ། །

ལོངས་སྤྱོད་འཁོར་ལོ་རྐང་བ་དྲུག་པའི་ཚང་། །

རྡོལ་བ་བཞིན་གྱི་སྲིད་པའི་ཕུན་ཚོགས་ལ། །

འཁྱུད་དག་མཐོང་ན་ཁྱེད་ཉིད་གཅིག་པུ་དྲན། །