གཙོ་ངོས།>> འཕྲོད་བསྟེན།>>བདེ་ཐང་ཤེས་བྱ།

རྩོམ་སྒྲིག་པ།ཡོང་ཁུངས།མཚོ་སྔོན་བོད་ཡིག་གསར་འགྱུར། སྤེལ་དུས། ༢༠༡༨ལོའི་ཟླ་བ་༡༠ཚེས་༠༩ཉིན།

༄༅།། རི་སྐྱེས་ཤ་མོའི་དུག་འགོག་ཤེས་བྱ།

        ད་སྔ་ཆར་པ་འབབ་པའི་དུས་ཚིགས་སུ་སླེབས་ཤིང་རི་སྐྱེས་ཤ་མོ་སྣ་ཚོགས་སྐྱེ་བའི་དུས་ཡིན་ལ། རི་སྐྱེས་ཤ་མོ་འཐུ་ནོར་དང་བཟའ་ནོར་བྱུང་སྟེ་དུག་ཕོག་པའི་དུས་ཚིགས་ཀྱང་ཡིན་པ་རེད། གལ་ཏེ་དུག་ཡོད་ཤ་མོ་བཏུས་ནས་ཟོས་པ་ཡིན་ན། དུག་ཕོག་སླ་ཞིང་ཚབས་ཆེན་ཡིན་ན་ཚེ་སྲོག་ལ་ཉེན་ཁ་ཡོད་པས་ཡིད་གཟབ་བྱེད་དགོས།
        གཅིག རང་གིས་ཟོས་མ་མྱོང་པ་དང་ངོ་མི་ཤེས་པ། ཞིང་སྨན་དང་ལུད་རྫས་འདྲེས་བའི་ས་ཞིང་ནས་སྐྱེས་པའི་ཤ་མོ་དེ་ཚོ་གང་མོས་ཀྱིས་འཐུ་བ་དང་འཚོང་བ།ཉོ་བ་བཅས་བྱེད་མི་ཉན། ལྷག་པར་དུ་ཁ་དོག་ཚོན་མདངས་རྣམ་པར་བཀྲ་བ་དང་ངོ་མི་ཤེས་པ། ཡང་ན་སྨིན་ནས་རུལ་པའི་ཤ་མོ་དེ་དག་འཐུ་མི་ཉན།
        གཉིས། རི་སྐྱེས་ཤ་མོ་ལས་སྣོན་དང་གཡོས་སྦྱོར་བྱེད་དུས་ངེས་པར་དོ་སྣང་བྱ་རྒྱུ་ནི་ཤ་མོ་རྗེན་ཟ་བྱེད་མི་རུང་ཞིང་བརྔོས་བཙོས་ཡག་པོ་བྱས་རྗེས་གཞི་ནས་བཟའ་དགོས། ཐེངས་རེར་ཤ་མོ་སྣ་གཅིག་མ་གཏོགས་ལས་སྣོན་དང་བཟའ་མི་རུང་། རི་སྐྱེས་ཤ་མོ་བཟའ་དུས་ཆང་འཐུང་མི་ཉན།
        གསུམ། བཟའ་བཏུང་ཚོང་གཉེར་སྡེ་ཚན་གྱིས་རི་སྐྱེས་ཤ་མོ་ཉོ་སྒྲུབ་བྱེད་པའི་སྐབས་སུ་ཞིབ་བཤེར་ནན་མོ་བྱ་དགོས། ལས་སྣོན་གཟབ་ནན་དང་མ་རྒྱུ་ཉར་ཚགས་བྱས་ནས་ཞིབ་བཤེར་བྱེད་པར་གྲ་སྒྲིག་བྱས་ཏེ་འཛད་སྤྱོད་པའི་བཟའ་བཅའི་བདེ་འཇགས་འགན་ལེན་བྱ་དགོས། རྒྱ་ཆེ་བའི་འཛད་སྤྱོད་པས་རང་ཉིད་སྲུང་སྐྱོབ་ཀྱི་འདུ་ཤེས་ཆེ་རུ་གཏོང་དགོས་ཤིང་། ཟས་མ་ཟོས་སྔོན་ལ་ཚོང་གཉེར་ཐོབ་ཐང་ཡོད་པའི་ཟ་ཁང་བདམས་ནས་ཞབས་ཞུ་པའི་ཁྲིད་སྟོན་འོག་བཟའ་དགོས།
        བཞི། སློབ་གྲྭའི་ཟ་ཁང་དང་། ཐུན་མོང་གི་ཟ་ཁང་། གཉེན་སྟོན་དང་འདས་མཆོད། གྲོས་ཚོགས་ཆེན་པོ་སོགས་ཐུན་མོང་གི་འཛོམས་སྟོན་སྐབས་སུ་རི་སྐྱེས་ཤ་མོ་ལས་སྣོན་དང་གཡོས་སྦྱོར་མི་བྱེད་པར་མང་ཚོགས་རང་བཞིན་གྱི་ཟས་དུག་ཕོག་པའི་དོན་རྐྱེན་མི་འབྱུང་བ་སྔོན་འགོག་བྱ་དགོས།
        ལྔ། གལ་སྲིད་རི་སྐྱེས་ཤ་མོ་ཟོས་རྗེས་སྐྱུག་ལངས་བ་དང་། མགོ་ན་བ། ཕོ་བ་ན་བ། ཁོག་པ་བཤལ་བ། སེམས་ཁམས་མི་བདེ་བ་དང་འཕྲུལ་སྣང་སོགས་ཀྱི་ནད་རྟགས་བྱུང་ན། མྱུར་དུ་ཉེ་འགྲམ་གྱི་སྨན་ཁང་དུ་ཕྱིན་ནས་སྨན་པར་བསྟེན་པ་དང་། འོ་སྣུན་བུད་མེད་ལ་གོང་གསལ་གྱི་ནད་རྟགས་བྱུང་ན་ཕྲུ་གུར་འོ་མ་སྣུན་མཚམས་བཞག་ནས་ཕྲུ་གུའི་བདེ་འཇགས་སྲུང་སྐྱོབ་བྱ་དགོས། །

39.7K

ཐག་རག་ཡིག་བསྒྱུར་མ་ལག

དྲ་ཚིགས་འདིའི་པར་དབང་གངས་ལྗོངས་ཉི་གཞོན་དྲ་བར་དབང་བས་ཕན་ཚུན་ལ་དབང་བཅོལ་མ་བྱས་གོང་རང་དགར་མི་སྤྱོད་པར་མཁྱེན།
དྲ་ཚིགས་དཔང་རྟགས།蜀ICP备14009601号-1