མཚོ་སྔོན་ཞིང་ཆེན་རྨ་ཆུ་རྫོང་ནི་གླིང་གེ་སར་རྒྱལ་པའི་སྒྲུང་ཧ་ཅང་དར་ཁྱབ་ཆེ་བའི་ས་ཁུལ་ཞིག་ཡིན། ཡུལ་འདི་ན་གླིང་སྒྲུང་ནང་གི་ས་མིང་དང་ཆུ་མིང་། རུས་དང་སྒྲུང་གཏམ་ཤིན་ཏུ་མང་བས།དེ་ལས་ཅུང་ཙམ་ཞིག་བརྗོད་ན། དེ་ཡང《ཧོར་གླིང་གཡུལ་འགྱེད》སོགས་སུ་རྒྱུན་དུ་བྱུང་བའི་ཆུ་རྨ་ཆུའི་ཁུག་སོ་དང་བོའམ་ཆུ་རྨ་ཆུའི་འགྱིང་ཁུགས་དང་པོ་ཞེས་པ་དེ་རྨ་ཆུ་རྫོང་ན་ཡོད་དེ།《མདོ་སྨད་ཆོས་འབྱུང》ལས་བྰ་ཡན་ཧ་རིའི་ཁ་ཚུར་བལྟའི་ཆུ་རྣམས་རྨ་གཡང་ཕྱུག་མོའི་གཞུང་དུ་འབབ་པ་རྨ་ཆུའི་མགོ་ཡིན་ལ། དེ་ལྷོ་ངོས་སུ་འབབ་པ་གཉན་པོ་གཡུ་རྩེའི་གཡོན་ནས་ཐོན། རིམ་གྱིས་བྱང་དུ་འཁྱོག་པ་དཀར་དབུར་རྐ་ཆུ་དང་། ཚ་གན་བེ་ཤིང་གི་མདུན་ནས་དམེ་ཆུ་དང་འདྲེས་ཏེ་ནུབ་ངོས་དྲང་བོར་བགྲོད་པའི་ཁུག་སོ་གཅིག་ཅེས་རྨ་ཆུའི་ཁུག་སོ་དང་བོ་དེ་རྨ་ཆུ་རྫོང་གི་ཁོངས་སུ་ཡོད་པ་དེ་གསུངས་པའོ། རྨད་མེ་འདྲེས་མདོ། དེ་ཡང་ཡུལ་འདི་ཡི་རྒན་རབས་པ་རྣམས་ཀྱི་ཁ་རྒྱུན་གྱི་སྒྲུང་ལྟར་ན། རྨ་ཆུ་དང་དམེ་ཆུའི་འདྲེས་མདོ་འདི་ནི་རྩྭ་ཆུ་ཕུན་སུམ་ཚོགས་པར་མ་ཟད། དབྱར་ཀ་ཚ་བ་ལ་གཡོལ་སའི་གནས་ཤིན་ཏུ་སྐྱིད་པོ་ཡིན་པས་གླིང་ཆུང་རྒྱུད་ཚང་གི་གནས་གཞི་བྱས་པ་རེད་ཟེར། གླིང་སྒྲུང་ཁ་ཤས་ཀྱི་ནང་དུ་གནས་འདི་ལ་བསྟོད་པ་འདི་འདྲ་བྲིས་ཡོད་དེ།“སྒྲོག་མ་ལག་ཐང་ལ་ལྷུང་འདྲ་བོ།། སྟོད་ཀྱི་རྨ་དམེ་འདྲེས་མདོ་རེད། སྒྲོག་མདོ་བྱུ་རུའི་རྒྱན་འདྲ་བོ།།”ཅེས་གསུངས་ལྟར་རོ།། མཛོད་དགེ་གླིང་དཀར་སྟོད་ཅེས་འབོད་དོན། མཛོད་དགེ་ཉིན་མ་གཙོ་བྱས་རྨ་ཆུ་རྫོང་གི་ཡུལ་ཧྲེལ་བོད་དང་དེའི་ཉེ་འཁོར་གྱི་རོང་འབྲོག་གི་ཡུལ་མཐའ་དག་གླིང་རྗེ་གེ་སར་རྒྱལ་བོས་བཟུང་བའི་ཡུལ་ཡིན་པ་ནི་ཡོངས་སུ་གྲགས་པ་ཡིན་ཏེ། དཔེར་ན་མཛོད་དགེ་ཉིན་མའི་ཚ་གན་བེ་ཤིང་དགོན་པ་འདེབས་ཚུལ་སྐོར་ལ། 《མདོ་སྨད་ཆོས་འབྱུང》ལས་“རྨ་ཆུ་ཤར་ནས་ནུབ་ཏུ་འཁྱོག་པ་རྨད་མེ་འདྲེས་མཚམས་སུ་ཚ་གན་བེ་ཤིང་དགའ་ལྡན་རབ་རྒྱས་གླིང་ཇི་ལྟར་བྱུང་ཚུལ་ནི། པཎ་ཆེན་ཐམས་ཅད་མཁྱེན་པ་དེ་ཉིད་རྒྱ་ཕེབས་ཀྱི་དུས་སྐྱབས་མགོན་མཆོག་ལ། སྔོན་གླིང་རྗེ་གེ་སར་གྱིས་བཟུང་བའི་ཡུལ་མཛོད་དགེ་ཕྱོགས་དེ་མི་རབས་དུ་མར་འདུག་ཀྱང་། ད་ཕན་ཆད་གང་འདྲ་ཡོང་མི་ཤེས་དེའི་ས་གནད་ཟིན་ས་ཞིག་ཏུ་དགོན་པ་ཞིག་བྱུང་ན་ཕན་ཐོགས་ཡོད་པ་འདྲ་སྟེ་ཁྱེད་ཀྱིས་དགོན་པ་ཞིག་ཐོབ་ཅེས་བཀའ་གནང་ཐུགས་ལ་བཏགས”ཅེས་གསུངས་པ་ལྟར་དང་།《གུང་ཐང་བསྟན་པའི་སྒྲོན་མེའི་རྣམ་ཐར》ལས“དཔའ་རྩལ་དྲེགས་པས་ལྷ་མིན་ཕམ་བྱེད་གེ་སར་དམག་གི་རྒྱལ་པོ་ཡིས།གནའ་དུས་བཟང་བས་གླིང་ཡུལ་ཞེས་གྲགས་འབྱོར་བའི་མཛོད་དང་དགེ་བའི་དཔལ་”ཅེས་གསུངས་པ་ལྟར་རོ།།
