རྨི་ལམ་དཀྲོགས་པའི་མཚན་མོ་དེར།།

ཁ་བའི་འདབ་མ་ས་རུ་ལྷུང་།།

ཡི་གེའི་འདབ་མ་ཕྱོགས་སུ་རྒྱས།།

རྨི་ལམ་དེ་ཡིས་ང་རང་བསླངས།།

མཚན་དེའི་སྨུག་རུམ་སྟུག་པོ་དེ།།

ཆར་གྱིས་བྱབས་ཤིང་དེད་པས་ན།།

ཀུན་གསལ་དབྱིངས་ཀྱི་ཟླ་བ་ཡང་།།

གོས་བྲལ་སྒྲེན་མོའི་གཟུགས་སུ་མཐོང་།།

སྒོ་ཁྱིའི་ཟུག་སྐད་གཉོམ་དུང་ཡང་།།

ནམ་སྨད་ཡིན་ཡང་སོ་སྲུང་གི།

བཙག་རླུང་འགེམ་བཞིན་རི་གྲོང་འཚོ།།

ཙོག་པུར་སྡོད་ཅིང་ཀུ་ཅོ་འདོན།།

སྐར་མའི་འདུ་ལོང་འཁྲིགས་ན་ཡང་།།

རྨི་ལམ་ཁ་དོག་འཁྲིགས་མ་བྱུང་།།

གངས་ཀྱི་རྐེད་ལ་དཀྲིས་པའི་རས།།

ལག་པས་ཡངས་པོར་བཏེགས་པ་ན།།

མཚན་མོས་ཡོལ་རས་ཡངས་པོར་ཕྱེ།།

གསེར་གྱི་ལོ་མ་བསྡུ་བའི་རླུང་།།

ཤར་ནས་ལྡང་སྟེ་ནུབ་ཏུ་བསྐྱོད།།

མཚན་ལ་ཉལ་བའི་དྲི་བཞོན་ཁྱོད།།

རྨི་ལམ་གཞུང་ནས་ཐེངས་ཤིག་མཇལ།།

སེམས་ཀྱི་གྲུ་དར་ཡངས་མོ་དེ།།

ཐུན་གསུམ་མལ་ནས་ལྷབ་ལྷུབ་གཡོ།།

མཚན་སྨད་སྒྲ་ཡི་འབོད་པ་དེས།།

སྦྲ་ནག་ཁ་ཚབ་ཕྱེས་ཤིང་བཀྱགས།།

ཆར་གྱི་ཐིག་ལེ་མེ་ཏོག་མས།།

གདོང་དང་འགྲམ་པ་ཡང་ཡང་བཀྲུས།།

དེ་ལྟ་མོད་ཀྱི་རྨི་ལམ་ཞིག།

སུ་ཡིས་རྨིས་ཡོད་སུ་ཡིས་འགྲེལ།།

སྤྲིན་པའི་ཟེ་བ་དམར་ཆུང་གིས།།

གནམ་སྔོན་ཞལ་ལ་འཚལ་གྱིས་བརྒྱན།།

འབྲུག་ཆུང་ལྡིར་བའི་དབྱིངས་རིམ་ན།།

སྣང་བའི་རྒྱལ་ཁམས་གོར་གོར་ཞིག།

ཟླ་བ་ལྷ་མོའི་ལན་བུའི་དཔྱངས།།

སྐར་མའི་གྲོགས་ཀྱིས་བྱིལ་ཅིང་བྱུགས།།

འདོད་པས་བརྩེ་ཞིང་མགུ་བ་དང་།།

དགའ་བས་བགད་ཅིང་མྱོས་དང་སོགས།།

ཡིད་ལ་སྤྲོ་བའི་ལོངས་སྤྱོད་ཅིག།

རྨི་ལམ་ཡིན་ཡང་རྟག་པར་བཟུང་།།

སྒེག་ལྡན་སྨྱུག་མའི་གཟུགས་འཆང་གིས།།

ཉ་གང་གཞོན་ནུ་ལྕུག་ལྕུགས་བྱེད།།

མཛེས་པ་མིག་གི་རྐུན་པོ་དེས།།

བླ་དང་སྲོག་གི་རྣམ་ཤེས་བྲུས།།

སྤྲིན་པ་ཆུ་ལ་བབས་པ་ན།།

རྒྱ་མཚོའི་མེ་ཏོག་ཅིག་ཅར་བཞད།།

དབང་བོའི་དར་གྱི་ཡོལ་བ་དེ།།

རྨི་ལམ་ཁུགས་ནས་གོས་སུ་གྱོན།།

མ་ལའི་དྲི་ངད་ཕྱོགས་སུ་བཀྱེད།།

ཁ་དོག་སྨུག་པོར་མདངས་ཀྱིས་འཁྱུད།།

མཚན་གྱི་རྨི་ལམ་ལོ་མ་དེར།།

ལྕེ་ཡིས་རེག་ཅིང་འཇིབ་པར་བྱེད།།

དབྱར་ཟླའི་ཁུད་ཀྱི་རྩྭ་ལྗང་ཕོན།།

མལ་གདན་བྱས་པའི་མཚན་མོ་དེར།།

ཆང་གིས་སྦྲིད་ཅིང་འཐོམ་པ་བཞིན།།

དྲན་ཤེས་གཅིག་ཏུ་མ་འདུས་སོ།།

གསང་བ་འབོར་སའི་མལ་ཁང་དུ།།

ལྷ་མོའི་སྟོད་གོས་སྨད་ཤམས་ལུས།།

སེམས་ཀྱི་ལ་ཁའི་ན་བུན་དེ།།

སྣ་ལྔའི་འཇའ་ཡི་གོས་ལྟར་མཛེས།།

ལུས་ཀྱིས་བེད་དུ་བྱས་པས་ན།།

བདེ་སྟོང་དབྱིངས་ཀྱི་རྨི་ལམ་རྙེད།།

ཁ་དོག་ཚོན་གྱིས་མ་བསྡེབ་པ།།

སྙན་པ་རོལ་མོས་མ་བརྒྱན་པ།།

དྲི་ངད་སྤོས་ཆུས་མ་བྱུགས་པ།།

མངར་བ་སྦྲང་རྩིས་མ་སྦྲན་པ།།

གོས་འཇམ་རེག་བྱས་མ་བཀླུབས་པ།།

མཚན་མོའི་གཞུང་རྟ་ལ་འཁྱུད་པའི།།

རྨི་ལམ་ལོ་མའི་ལྟེང་ཀ་རུ།།

ངག་རིག་བསིལ་མ་འཛུམ་པའི་མུར།།

ཚིག་གི་མེ་ཏོག་གློ་དམར་བཞད།།

ཚོར་འདུའི་ཀློང་གི་ན་བུན་དར།།

ལུས་སུ་སྤྲས་འདོད་སྲེད་པའི་ལྕེ།།

དར་གཅིག་གཡུག་པའི་ཆོ་འཕྲུལ་གྱིས།།

དཔལ་གྱི་གྲོང་ཚོའི་ནམ་མཁའ་ལྡག།

དུས་ཀྱིས་བསྐྲུན་པའི་གར་སྟེགས་སུ།།

ངག་རིག་སྟངས་སྟབས་ལུས་ཀྱི་འགྲོས།།

ལྡེམ་ལྡེམ་ཚིག་གི་བྲོ་གར་དེས།།

ཀློག་འདོད་གཞོན་ནུར་སྨན་བཞིན་ཤོག།