ངས་གནའ་བོའི་ངག་རྒྱུན་ཞིག་གི་ཞབས་རྗེས་འཚོལ་བར་བརྩམས་པའི་དུས་དེ་ནས་བཟུང་།

ངས་རང་ཉིད་ཀྱི་རེ་བའི་རྟ་ཕོ་རྐང་ལམ་ཕྲ་མོ་རུ་བསྒྱུར་བ་ལྷོད་མ་མྱོང་།

བྲེ་སེར་འབྲོང་གི་ཕ་གཞིས་སུ་འབོད་པའི་སྒང་བ་བོད་ནས།

ངས་ཆོས་ལུགས་ཤིག་གི་ཚབ་མཚོན་རང་བཞིན་གྱི་རྔ་སྒྲ་དང་ཆོས་སྒྲ་ཐོས་བྱུང་།

གོམས་གཤིས་དང་ཀུན་སྤྱོད་མཐོང་སོང་།

འོད་སྣང་དང་རེ་བཞག་རྟོགས་བྱུང་།

ད་ནངས་ཞོགས་པར་ངས་འགྲན་རྩོད་ཀྱི་གོམ་ཆུང་མདུན་ལ་སྤོས་ནས།

འཆར་ཡན་ལྟ་བུའི་ཉི་འོད་ཀྱི་སྒེའུ་ཁུང་ལས་རྩྭ་ཐང་ཆེན་པོར་རྒྱང་ལྟ་བྱེད་དུས།

ལོ་དང་ཟླ་བ།

སེམས་པའི་ཕྱི་ནང་།

ཁུ་བྱུག་དང་འཇོལ་མོ།

གཟི་བརྗིད་དུ་གྲོང་ངེར་འགྱིང་བའམ་ཡང་ན་ཧྲལ་ཧྲུལ་དུ་གྱུར་པའི་གནའ་བོའི་དགོན་རྙིང་དག

ང་ནི་བཙན་པོའི་གོང་མའི་མིག་མཐའ་ནས་མཆེད་པའི་དགའ་སྐྱོ་ཡི་མཆི་མ་རྡོག་གཅིག

ངས་ནམ་ཡིན་ཡང་དུས་ཚོད་ཀྱི་རྨ་ཁ་དང་འདུ་ཤེས་ཀྱི་སྟོང་ལབ་ཁྲོད་ནས།

ཚ་ལམ་ལམ་དུ་འབར་བའི་ལོ་རྒྱུས་དང་།

སྟོང་ལབ་དེ་དག་གི་བར་གསེང་ནས་བདེན་དོན་འཚོལ་དགོས།

མེས་པོ་འཚོལ་དགོས།

ཀུན་སྤྱོད་འཚོལ་དགོས།

གོམས་གཤིས་འཚོལ་དགོས།

ག་ལེར་ག་ལེར། ཞི་བདེ་ཡི་རྟགས་མཚན་གྲུབ་པའི་དགོན་སྡེ་དེ་དག་ནས།

ཕ་སྐད་ཀྱི་བླ་སྲོག་དང་།

ཕ་མེས་ཀྱི་ལོ་རྒྱུས།

ད་དུང་མི་རིགས་ཤིག་གི་སྐད་ཡིག་དང་གཞིས་མཐུན་གྱི་སྤུན་ཟླ།

ངས་ནམ་ཡིན་ཡང་ངའི་མེས་པོ་ཡི་བཞུགས་ནས་དགོན་སྡེ་དེ་དག་ལ་སྐྱབས་སུ་བཅོལ།

ང་ཡི་ཡབ་མེས་ཀྱི་དད་ས།

ང་ཡི་ཕ་ལོ་ཡི་གུས་ས།

ང་ཡི་མ་ལོ་ཡི་སྐྱབས་གནས།

ཨ་མའི་འཛུམ་མདངས་ལྟ་བུའི་ཁ་བཏགས་དཀར་པོ་འདི།

ངས་རང་ཉིད་ཀྱི་རྒྱགས་ཕྱེ་ཞིག་དང་རུས་རྐང་གི་མཆོད་མེ་ཞིག་ཏུ་བསྒོམས་ནས།

རྩྭ་ཐང་གི་དཀྱིལ་དབུས་དང་།

སྦྲ་ནག་གི་འདབས་རོལ་ནས།

མི་རབས་ཤིག་གི་དད་འདུན་གྱི་དགེ་འདུན་པའི་དགོན་སྡེ་འཚོལ་དུ་ཕྱིན།

ངས་ངེས་པར་འཚོལ་གདོས།

ངས་ངེས་པར་རྙེད་དགོས།

ངས་ངེས་པར་རྙེད་དགོས།

ཨ་མའི་འཛུམ་མདངས་ལྟ་བུའི་ཁ་བཏགས་དཀར་པོ་འདི་བཟུང་ནས།

ང་ཚོ་མདུན་དུ་བསྐྱོད།

ང་ཚོས་འོད་སྣང་ཅིག་གི་སྣེ་མོ་ནས་བཟུང་སྟེ་མདུན་དུ་བསྐྱོད།

ཨ་མའི་འཛུམ་མདངས་ལྟ་བུའི་ཁ་བཏགས་དཀར་པོ་འདི།

ང་ཚོས་ཁྱེད་ལ་ཕུལ་བའི་ལྷ་དར་ཡིན།

ང་ཚོས་དྲན་གདུང་གི་གླུ་དབྱངས་ལེན་བཞིན་མདུན་དུ་བསྐྱོད།

ཨ་མའི་འཛུམ་མདངས་ལྟ་བུའི་ཁ་བཏགས་དཀར་པོ་འདི།

ང་ཚོས་ཁྱེད་ཉིད་མཇལ་བའི་མཇལ་དར་ཡིན།

དབྱངས་གསལ་གྱི་མེ་ཏོག་གང་ས་ནས་བཞད་པའི་ཕྱིར།

མེས་པོའི་གོམས་གཤིས་མ་ཡལ་བའི་དགོན་སྡེ་དེ་དག་ཏུ།

ང་ཚོས་ལོ་རྒྱུས་ཀྱི་དང་འབྱུང་འགྱུར་གྱི་ན་བུན་དབྱངས་སུ་གྱེར་བཞིན་པའི།

རྨི་ལམ་དང་རེ་བཞག་ཁྲི་འབུམ་ཁྱེར་ནས།

ཕ་ཁྱིམ་དང་མ་གཞིས།

གཏན་དུ་འཇིགས་པ་མེད་པའི་མི་རིགས་ཤིག་གི་ཚེ་སྲོག

ཕ་སྐད་དེ་གཏན་དུ་འཇིགས་མི་སྲིད་པའི་ཆེད་དུ།

ཨ་མའི་འཛུམ་མདངས་ལྟ་བུའི་ཁ་བཏགས་དཀར་པོ་འདི་སྐྱེས་སུ་འབུལ།