འདི་ནས་དཔག་ཚད་ཁྲི་ཕྲག་གོམ་པ་ཡིས།།

ཡོངས་སུ་བརྒལ་ཏེ་ནེའུ་གསིང་གཡུ་ཡི་ངོས།།

པད་མའི་ཚལ་དུ་བུང་བས་གར་ལ་རྩེན།།

བརྩེ་ལྡན་ཆུ་སྐྱེས་མེ་ཏོག་འཛུམ་གྱིས་བཞད།།

ཁྱེད་ཉིད་དྲན་པའི་གདུང་བ་ཉིན་རྗེས་མཚན།།

དཔྲལ་བའི་མིག་གི་མཆི་མའི་གྲངས་ཀ་འདིས།།

དབྱར་གྱི་ཆར་ཐིགས་དཔག་ལ་འགྲན་བཟོད་ཅིང་།།

ཁྱེད་ཉིད་དྲན་པའི་ན་ཟུག་སུ་ཡིས་ཚོར།།

ཁྱེད་ཉིད་སྣང་བའི་དྲན་གདུང་ལྕི་མོ་ཞིག།

བསྲན་ཡང་རང་དབང་མ་བྱུང་ཁ་ནས་ཐལ།།

ལོ་ཟླའི་གཙང་བོ་བཞུར་བའི་ལྟེབས་ཁུགས་ནས།།

དྲན་ཚིག་ཁུ་བྱུག་གླུ་འདི་ཁྱེད་ལ་འབུལ།།

མདང་དགོང་ཉལ་བའི་རྨི་ལམ་འཇིག་རྟེན་དུ།།

ཞལ་རས་འཛུམ་གྱིས་ཁེངས་པའི་ཨ་མ་ཁྱེད།།

མཉམ་དུ་དགའ་སྤྲོའི་སྙིང་གཏམ་གླེང་བྱས་མོད།།

གཉིད་ལས་སད་ཚེ་ཨ་མའི་བརྩེ་མདངས་དྲན།།

སྣ་ཚོགས་ཕྲེང་བ་དགོད་པའི་ས་སྐྱེས་རྩེར།།

དཔྱིད་ཀྱི་དཔལ་མོས་གླུ་དབྱངས་སིམ་སིམ་གྱི།།

ཚིག་རྩུབ་དྲི་མས་མ་གོས་བརྩེ་ལྡན་མའི།།

ངག་འཇམ་ཚིག་གི་སྙན་པའི་བསླབ་བྱ་དྲན།།

འཇམ་པོའི་གོས་དང་ཞིམ་པོའི་ཟས་མཆོག་དག།

གཅེས་ཕྲུག་ཁྱོད་ལ་འོས་ཞེས་འཛུམ་གྱིས་སྨྲས།།

རང་ལ་ཟས་དང་གོས་ཀྱིས་མནར་བྱས་ཀྱང་།།

ཕངས་མེད་ངང་ནས་བདག་ལ་ཡང་ཡང་གནང་།།

ཉེན་ཁའི་གནས་སུ་ལྷུང་དུས་སྐྱོབ་ལ་བྲེལ།།

བཙོག་པའི་ལུས་ལ་ཞུགས་ཚེ་འཛེམ་མེད་ངང་།།

ལུས་ཀྱི་དྲི་མ་མཐའ་དག་གསལ་བར་འཁྲུད།།

རང་ལ་ཞེན་པ་དཀར་བའི་བརྩེ་ལྡན་མ།།

ཞོགས་པའི་སྐྱ་རེངས་གནམ་མཐར་མ་གསལ་གོང་།།

གཞན་དག་མི་རྣམས་མལ་ལས་མ་ལྡང་སྔོན།།

ཁྱིམ་མི་རྒན་གཞོན་ཡོངས་ཀྱི་ཁ་ཟས་སུ།།

དཀའ་ཚེགས་མྱངས་པའི་ཨ་མའི་དཀའ་སྤྱད་དྲན།།

དབྱར་གསུམ་སྤྲིན་གྱི་མེ་ཏོག་བཞད་པའི་ཁྲོད།།

ང་རང་ཁྱིམ་ཕུག་དྲོ་སྐྱིད་ལྡན་གྱུར་ཀྱང་།།

རྟ་ནོར་ལུག་གི་ལྷས་མཐའ་བསྐོར་བ་ཡི།།

ལྗིད་མོའི་སྡུག་བསྔལ་རེག་པའི་བྲན་མོ་ཞིག།

འབྲས་ལྡན་དུས་ཀྱི་མཐའ་ཡས་ཞིང་འདབས་སུ།།

སོ་ནམ་ལས་ལ་སྦྱོར་བའི་ངལ་དུབ་ཀྱིས།།

ལུས་སྟེང་རྔུལ་ཆུ་ཟགས་པའི་ཆར་རྒྱུན་དེས།།

དོ་ཤལ་འཛིན་པའི་ང་ཡི་ཞབས་ཞུ་བ།།