ངེས་འབྱུང་ཧྲལ་ཧྲུལ་གྱི་གླུ་སྐད་ཐེད་པོ།།
འཁོར་བའི་གྲུ་ཟུར་ན་བྲག་ཅར་འཁོར་ཡང་།།
བློ་སྣ་རྦད་ཆོད་ཀྱི་དཔའ་སྤོབས་ཞན་པས།།
ཨ་ཕོ་སྡར་མ་དེའི་བཤུལ་ལམ་བསྙེགས་འགྲོ།།
སྤྱི་དོན་རྫིག་གཏམ་གྱི་ལྐོག་མའི་ནང་ལ།།
རང་དོན་ཁེར་གསོག་གི་ཚིལ་ལུ་རྒྱས་དུས།།
རྔམ་རྔམ་རྫིག་རྫིག་གི་རྣམ་འགྱུར་ཕག་ན།།
ཁེར་རྐྱང་གདུང་སེམས་ཀྱི་དངན་པ་བསྐུངས་འདུག།
རང་ཕན་རང་སྐྱིད་ཀྱི་ཧམ་པས་ཁྲིད་དེ།།
རང་སྡུག་རང་ཉོ་དེའི་བཀོད་བསྒྲིགས་གསེབ་ན།།
རང་སེམས་རང་གསོ་དེ་སྐྱིད་སྐྱིད་འདྲ་ཡང་།།
རང་བློ་རང་གསལ་དེས་སྡུག་ལ་སྦྱར་ཡོང་།།
ད་ནི་གང་ཕན་དེ་མི་བསྒྲུབས་སྐྱུར་འཇོག།
ད་ནི་གང་གནོད་ཀྱང་མི་སྤོང་ལེན་འཇོག།
ཕན་གནོད་རེས་མོས་ཀྱི་འཁོར་བའི་བྱ་བ།།
ཨ་ཅེ་མཛེས་མ་དེའི་བཞིན་གྱི་ཁྲོ་འཛུམ།།
གཅེས་གཅེས་དུང་དུང་གིས་འཚོ་སྐྱོང་བྱས་ཀྱང་།།
མི་འདོད་རྣམ་འགྱུར་གྱི་འཚུབ་ཆ་བསྟན་ཡོང་།།
གང་བྱུང་ཅི་དགའ་རུ་ལྷོད་ཀྱིས་གློད་ན།།
དགའ་ཉམས་མཛེས་མཚར་དེ་ཤུགས་ཀྱིས་མཐོང་ཡོང་།།
བདའ་ན་རྗེས་ཟིན་གྱི་གོ་སྐབས་ཕྲ་བའི།།
ཕུན་ཚོགས་འཇིག་རྟེན་གྱི་འཇའ་འོད་སྣང་བ།།
བཞག་ན་རང་བྱུང་གི་མཁའ་ལ་བཀྲ་བ།།
རྟིང་འཛིན་རྗེས་གཅོད་ཀྱི་ངལ་བས་ཅི་བྱེད།།
འདས་སོང་ལང་ཚོ་ཡི་ཆུ་རིས་ཤིག་ཤིག།
མི་ཚེ་ཐུང་ཐུང་དེ་རླུང་ལ་གཟད་དུས།།
ཨ་མ་རྒན་མོ་ཁོང་ཁྲེལ་འཛུམ་ལྷང་ལྷང་།།
མི་སྡུག་བཞིན་རས་ཀྱིས་ང་ལ་གཟིགས་བྱུང་།།
ཐོལ་བྱུང་རྟོག་པ་འཁྲིགས་པའི་གླུ།
རབ་དཀར་ཞོ་གསར་སྤུངས་འདྲའི་གངས་ཀྱི་ཁྲོད།།
མེ་ཏོག་འཇའ་རིས་འཁྲིགས་པ་དབྱར་གྱི་དུས།།
སྐྱ་རེངས་འོད་ཀྱིས་གསལ་བ་ཞོགས་པའི་མིག།
རེ་འདུན་སོ་མ་ཞིག་གི་དབུ་ཁྱུད་ལགས།།
བཅུ་ཕྲག་རིག་གཞུང་སྐྱེད་ཚལ་རྒྱས་པའི་ཀློང་།།
བློ་གྲོས་གཤོག་རླབས་རྩལ་གྱིས་བག་ཡངས་སུ།།
འདོད་དགུ་དབང་དུ་བསྡུ་བའི་བྱེད་པོའི་ཚོགས།།
མ་བོས་མགྲོན་དུ་ལྷགས་པའི་སྤྲོ་དགའ་བརྟས།།
གངས་ཀྱི་དབུ་འཕང་བསྟོད་པའི་འཕྲུལ་ཐབས་འདིར།།
ཕྲག་དོག་ངུར་མོ་སྒྲོག་པའི་མཁའ་གླང་ཁྱུས།།
མ་བཟོད་སྐྱོ་གདུང་མིག་ཆུ་ཆར་བའི་རྒྱུན།།
ཉིན་མཚན་སྦྲེལ་མར་འབབ་པ་སྙིང་རྗེའི་གནས།།
འོན་ཀྱང་སྙིང་སྟོབས་དཔུང་ཤུགས་མ་ཉམས་པའི།།
བཙན་པོ་བོད་ཀྱི་རྒྱུད་འཛིན་བུ་སློབ་རྣམས།།
རེ་སྙེག་ལས་ཀྱིས་བྲེལ་བའི་གོམ་འགྲོས་ཀྱིས།།
གཅིག་ལས་གཅིག་ལྷག་རིག་པའི་གླིང་དུ་འཛོམས།།
གནའ་རབས་གདོང་དམར་དམག་གི་ཟིལ་ཤུགས་ཀྱིས།།
སུམ་གཉིས་ས་ཡི་དཀྱིལ་འཁོར་དབང་དུ་བྱས།།
དེང་སྐབས་རྣམ་དཔྱོད་བློ་ཡི་ཁང་བཟང་དུ།།
གསར་རྙིང་རིག་བཅུད་ནོམ་དུ་གསོག་པར་འོས།།
དུས་ཀྱི་འགྱུར་བས་སྤྲད་པའི་ཁ་ཕྱོགས་དང་།།
མ་བསྟུན་སྟོང་སྐད་ཧལ་པོར་སྒྲོག་པ་ལས།།
འགྱུར་བག་གཤིས་ཀྱིས་དཀྲིགས་པའི་ཆུ་འཛིན་བཅུད།།
རང་ཁམས་གསོ་བྱེད་གྲོགས་སུ་བསྒྱུར་ན་ལེགས།།
ཐབས་མཁས་རིག་འཕྲུལ་སྦྱོར་བས་སྣ་ཚོགས་རྐྱེན།།
རང་གི་དཔལ་དུ་འགུགས་པའི་ཆོ་ག་ལ།།
ཇི་ལྟར་འོས་པར་འབད་པའི་དཔུང་རྡང་གིས།།
འབྱུང་འགྱུར་འོད་དུ་སྒྱུར་ལ་ཞུམ་པ་བྲལ།།
དེ་ལྟའི་ཕྱི་སྣང་སྒེག་མོའི་རྣམ་འགྱུར་གྱིས།།
ནང་སེམས་ཚོར་རྟོག་བསླངས་པའི་སྙན་ངག་གླུ།།
བཀྲ་ཤིས་གྲངས་དང་ལྡན་པའི་རེ་སྨོན་དབྱངས།།
བཅུ་ཕྲག་རིག་མཛོད་གླིང་ནས་ཐོལ་གྱིས་གྱེར།།
