སྒེའུ་ཁུང་ནས་ཕར་ལ་བལྟས་ན།

རི་བོ་ཕ་རོལ་གྱི་གྲོང་མཐའ་ན་འགྱིང་།

ནམ་མཁའ་ཕ་རོལ་གྱི་རི་མགོ་ན་བཞུགས།

སྔོ་ལྟེམ་མེ། སུ་ཞིག་གི་མིག་མདངས་དང་འདྲ་བར།

སྤྲིན་པ་ཕ་རོལ་གྱི་ལུག་ཁྱུ་དང་འདྲེས།

གཙང་པོ་ཕ་རོལ་གྱི་གནམ་མཐའ་ལ་བསྲིངས།

དེ་ནས་ཕར་ལ་བལྟས་ན།

དགོད་སྒྲ་ཕ་རོལ་གྱི་སྦྲ་ནང་ན་མཆེད།

མེ་ལྕེ་ཕ་རོལ་གྱི་ཐབ་ཁ་ན་འཕྱོ།

སྦྲ་ནང་ནས་ཕར་ལ་བལྟས་ན།

རང་ཉིད་ཕ་རོལ་གྱི་གྲོང་མཐའ་ན་ལུས།

ལང་ཚོ་ཕ་རོལ་གྱི་རླུང་ཁ་ན་ཟད།

འཁྱག་སིབ་བེ། སུ་ཞིག་གི་མིག་ཆུ་དང་འདྲ་བར།

རང་ཉིད།

ཇེ་ཆུང་ནས་ཇེ་ཆུང་།

ཕ་རོལ་ནས་ཕ་རོལ་ལ་བལྟས་ན།

དྲི་བའི་ཕ་རོལ།

སྙིང་ཉེ།

ཁྱོད་ཕ་མཐའ་མི་མངོན་པའི་དྲི་བ་ཞིག་རེད།

ངས་ཀོ་གྲུ་སྤྱད་དེ་ཁྱོད་ཀྱི་ཀློང་དུ་བསྐྱོད་ཀྱང་།

དྲི་བའི་ཕ་རོལ་ང་དང་རྒྱང་ཐག་རིང་།

སྙིང་ཉེ། ཁྱོད་དྲི་བའི་ཕ་རོལ་དུ།

བདེ་ལེགས་ངང་བཞུགས་སམ།

སྙིང་ཉེ།

ཁྱོད་རང་མཚོན་བྱེད་དུ་སྨྲ་སྒོ་ལས་ཤོར་བའི།

ངའི་སྐད་ཆ་དག་ལ་ད་ནི་སྟོབས་ཤུགས་མི་འདུག

དྲི་བའི་ཕ་རོལ་དུ་ཁྱོད་རང་བཞུགས་པ་དྲན་དུས།

ངས་མཚན་མོ་བགྲང་མེད་ཅིག་ཆང་རག་གིས་བསྐྱལ་དགོས་བྱུང་།

ངས་ཁེར་རྐྱང་མཁྲེགས་པོ་ཞིག་དྲན་གདུང་གིས་འདེགས་དགོས་བྱུང་།

སྙིང་ཉེ།

ཁྱོད་ཀྱི་ཉེ་སར་གཅར་བ་དེ་ཁོ་ནས་ཆེད་དུ།

ངས་ནམ་མཁའི་སྤྲིན་པ་ལ་དྲི་བ་དྲིས་མྱོང་།

སྤྲིན་པས་ང་ལ་ཆར་ཆུ་ཐིགས་པ་འགའ་ལན་དུ་གསོལ།

ངས་སྟོན་མཇུག་གི་རླུང་བུ་ལ་དྲི་བ་དྲིས་མྱོང་།

རླུང་བུས་ང་ལ་སྡོང་ལོ་སེར་པོ་འགའ་ལན་དུ་གསུངས།

ངས་རྒྱང་བཞུད་ཀྱི་གཙང་པོ་ལ་དྲི་བ་དྲིས་མྱོང་།

གཙང་པོས་ང་ལ་ཕ་བོང་འཁྱག་པོ་འགའ་ལན་དུ་བསྐྱུར།

སྙིང་ཉེ།

དྲི་བའི་ཕ་རོལ་ཅི་འདྲའི་རིང་ཨང་།

ཁྱོད་ཀྱི་ཕ་རོལ་ཅི་འདྲའི་རིང་ཨང་།

ཁྱོད་རང་དྲི་བ་མང་པོ་ལས་གྲུབ་པའི་ཕ་རོལ་དུ་བཞུགས།

རླབས་ཆེན་གྱི་དྲི་བ་དེ་དག་གི་མདུན་སར།

ངས་སྲོག་བསྡོས་ཀྱིས་ཨ་ལན་འཚོལ་བ་ནི།

ཉམ་ཆུང་གི་བྱེའུ་ཞིག་གིས་དགུན་དུས་ཀྱི་ཞོགས་པར།

སྲོག་བསྡོས་ཀྱིས་རྒུན་འབུ་འཐུ་བ་དང་ཅི་འདྲའི་མཚུངས།

སྙིང་ཉེ། ཁྱོད་ཀྱིས་མཐོང་བྱུང་ངམ།

དྲི་བའི་ཕ་རོལ་ཇི་འདྲའི་རིང་ཡང་།

ཁྱོད་ཀྱི་ཕ་རོལ་ཅི་འདྲའི་རིང་ཡང་།

ང་སྔར་བཞིན་ཁྱོད་ཀྱི་ཕྱོགས་སུ་ཡོང་བཞིན་ཡོད།

དྲི་བའི་ཕ་རོལ་དུ་ཁྱོད་ནི།

ངའི་མདུན་སྐྱོད་ཀྱི་སྟོབས་ཤུགས་དང་།

ངའི་མཐར་ཐུག་གི་དམིགས་འབེན་ཡིན།

སྙིང་ཉེ། ཁྱོད་དྲི་བའི་ཕ་རོལ་དུ།

བདེ་ལེགས་ངང་བཞུགས་སམ།