གཙོ་ངོས།>> རྩོམ་རིག>>སྙན་རྩོམ།

རྩོམ་སྒྲིག་པ།ཡོང་ཁུངས།མཚོ་སྔོན་བོད་ཡིག་གསར་འགྱུར། སྤེལ་དུས། ༢༠༡༩ལོའི་ཟླ་བ་༠༤ཚེས་༠༢ཉིན།

༄༅།། ཕྱི་དྲོ་ཞིག་ལ་སེམས་ཀྱི་བདག་མོར་བསྒུགས་པ།

ཟི་ལིང་། འོད་པོ་ཆེ།

 
ཕྱི་དྲོ་ཧྲིལ་བོར་ཁྱེད་ལ་བསྒུགས།
ངས་རྒྱང་རིང་ཡོད་ཚད་དབེན་འཇགས་སུ་བསྒྱུར་ཀྱང་།
ཁྱེད་ཀྱི་སྙིང་ཉེ་བའི་གོམ་སྒྲ་ཐོས་མ་བྱུང་།
སེམས་ཀྱི་ཨ་སྔོན་ཁྱེད་ཁོ་ནས་བཟུང་།
སྐད་ཅིག་སྐད་ཅིག་གི་དུས་ཚོད།
སྙིང་གི་འཕར་ལྡིང་ལ་བརྒྱུས་ནས།
ཁྱེད་ཀྱི་ཆེད་དུ་ཟད།
ཁྱེད་ད་རུང་སླེབས་མ་བྱུང་།
བསིལ་རླུང་གི་རྒྱུ་བར་སྐད་ཅིག་བསྐུར།
ཁེར་རྐྱང་གི་སེམས་ངོར་ཁྱེད་ཀྱི་མཛེས་སྡུག་བསྒོམས་ནས།
རྟོག་བཟོ་མཐའ་དག་གི་འདབ་གཤོག་ཁྱེད་ཕྱོགས་སུ་བརྐྱངས།
སྙིང་ཉེ། ཁྱེད་གང་དུ་ཡོད།
མུན་པས་ཉིན་བྱེད་ཀྱི་བཞིན་ལ་དྲེག་མག་སྐུད་ཅིང་།
སྲོད་ཀྱི་སྡོང་རྩེ་རུ་རྩེན་པའི་བྱིའུ་དག་གིས་ཚང་མལ་བསྙེགས་སོང་།
ཁྱེད་རང་མྱུར་དུ་ཕེབས་ཤོག
མུན་པའི་སྔ་རོལ་ཏུ།
ཁྱེད་ཀྱིས་གངས་དཀར་ལྟ་བུའི་སེམས་པ་བསྣམས་ནས།
གོམ་སྒྲ་ཐྲིག་ཐྲིག་ངང་ཕེབས་ཤོག་དང་།
ངས་ཁྱེད་ལ་བསྒུགས་ཡོད།
འཇིག་རྟེན་སྡུག་མོ་སྡུག་མོ། སེམས་པ་སྐྱོ་མོ་སྐྱོ་མོ།
ལམ་ཡོད་ཚད་མུན་པས་བསྒྲིབས།
སྙིང་ག་ན་མར་མེ་རྐོང་བུ་གང་བཞིན་འོད་དུ་འཚེར་བ་དེ།
ནམ་ཡང་ཁྱེད་ཡིན།
ཁ་ཕྱོགས་བོར་བའི་ལོ་ཟླ་འདིར།
རི་རབ་ཀྱི་ཁེངས་ཉམས་དང་། རྩྭ་ཕྲན་གྱི་མགོ་ལྕོག
ཡིད་རྟོན་གྱི་གཤོག་པ་གང་དུ་བརྐྱངས་ཀྱང་།
སེམས་པ་བསྙལ་ཆོག་པའི་རྫ་མ་ཞིག་མི་འདུག
ཁྱེད་ཁོ་ན་ཉི་ཐིགས་བཞིན།
ནམ་མཁའ་སྟོང་པའི་གས་སྲུབ་ནས།
འོད་ཀྱི་ལག་པས་ངའི་བཞིན་ལ་བྱིལ་བྱིལ་གནང་འོངས།
སྨག་ལ་ལྕེབས་པའི་མཚན་མོ་བྲོས་ཤུལ་དུ།
ཁྱོད་ནི་ངའི་ཕྱི་གསལ་ནང་གསལ་གྱི་ཞོགས་པ་ཡིན།
ཁྱོད་ཡོད་པས།
ང་ཡོད།

39.7K

ཐག་རག་ཡིག་བསྒྱུར་མ་ལག

དྲ་ཚིགས་འདིའི་པར་དབང་གངས་ལྗོངས་ཉི་གཞོན་དྲ་བར་དབང་བས་ཕན་ཚུན་ལ་དབང་བཅོལ་མ་བྱས་གོང་རང་དགར་མི་སྤྱོད་པར་མཁྱེན།
དྲ་ཚིགས་དཔང་རྟགས།蜀ICP备14009601号-1