༄༅།། ལུས་སྦྱོང་ཚད་ལས་བརྒལ་བའི་ཉེན་བརྡ།

རྩོམ་སྒྲིག་པ།ཡོང་ཁུངས།མཚོ་སྔོན་བོད་ཡིག་གསར་འགྱུར། སྤེལ་དུས། 04-08


        ལུས་ཕུང་སྦྱོང་བརྡར་བྱེད་པ་ནི་གོམས་གཤིས་བཟང་པོ་ཞིག་ཡིན་མོད།འོན་ཀྱང་ཁྱེད་ཀྱིས་རང་ཉིད་ཀྱི་ལུས་ཕུང་སྦྱོང་བརྡར་བྱེད་པའི་ནུས་པ་ཇེ་ཞན་ནས་ཇེ་ཞན་ཡིན་པ་ཤེས་པའམ་ཡང་ན་རྒྱུན་དུ་ཐང་ཆད་པའི་སྣང་བ་བྱུང་ན།དེ་ནི་ལུས་ཕུང་སྦྱོང་བརྡར་ཚད་ལས་བརྒལ་བའི་རྟགས་རེད།ཆེད་མཁས་པས་ལུས་ཕུང་སྦྱོང་བརྡར་ཚད་ལས་བརྒལ་བའི་སྐབས་སུ་བྱུང་བའི་ཉེན་བརྡ་འདི་དག་སྣང་མེད་དུ་འཇོག་མི་རུང་བའི་དྲན་སྐུལ་བྱེད་ཀྱིན་ཡོད།
        སྐྱུགས་པ་དང་ཞེ་མེར་ལངས་པ། འཇུ་བྱེད་མ་ལག་གི་ནད་རིགས་ཕུད་རྗེས།ལུས་སྦྱོང་བྱེད་པའི་སྐབས་དང་ལུས་སྦྱོང་བྱས་རྗེས་སུ་ཞེ་མེར་ལངས་ན།ཕལ་ཆེར་ལུས་སྦྱོང་ཚད་ལས་བརྒལ་བ་ལས་བྱུང་བའི་དབྱང་དབུགས་དཀོན་པའི་རྟགས་རེད།སྐབས་དེར་ལུས་སྦྱོང་བྱེད་མཁན་གྱིས་ལུས་སྦྱོང་བྱེད་ཚད་ཇེ་དལ་དུ་གཏོང་དགོས།
        མགོ་ན་བ་དང་མགོ་ཡུ་འཁོར་བ།ལུས་སྦྱོང་བྱེད་པའི་སྐབས་དང་ལུས་སྦྱོང་བྱས་པའི་རྗེས་གང་ཞིག་ཡིན་རུང་མགོ་ན་བའི་གནས་ཚུལ་འབྱུང་མི་འོས།གལ་ཏེ་མགོ་ན་བའི་གནས་ཚུལ་བྱུང་ན།ལུས་སྦྱོང་བྱེད་མཚམས་བཞག་ནས།གློ་སྙིང་གི་ནུས་པར་བརྟག་དཔྱད་བྱེད་དགོས།འཁོར་བའི་རིགས་ཀྱི་འགུལ་སྐྱོད་བྱས་ན་མ་གཏོགས་མགོ་ཡུ་འཁོར་བའི་གནས་ཚུལ་འབྱུང་མི་སྲིད་པས།གལ་ཏེ་ལུས་སྦྱོང་བྱས་པའི་རྗེས་སུ་མགོ་ཡུ་འཁོར་བའི་གནས་ཚུལ་བྱུང་ན།ཀླད་པར་ཁྲག་འདོན་སྤྲོད་བྱས་པ་མི་འདང་བའི་རྟགས་ཡིན་པས།དུས་ཐོག་ཏུ་ཀླད་པའི་ཁྲག་རྩའི་མ་ལག་དང་ཡང་ན་མཇིང་ཚིགས་ལ་བརྟག་དཔྱད་བྱེད་དགོས།
        བྲང་ཁོག་མི་བདེ་བ། གལ་ཏེ་ལུས་ཕུང་སྦྱོང་བརྡར་བྱས་པ་ཚད་ལས་བརྒལ་ན།བྲང་ཁ་ནས་རྔུལ་ཆུ་བཞུར་བ་དང་མཉམ་དུ་དབུགས་འཚང་བའི་གནས་ཚུལ་མངོན་པ་རེད།དེ་ནི་སྙིང་ལ་གནོན་ཤུགས་ཐེབས་པའི་ཉེན་བརྡ་ཡིན་པས་མྱུར་དུ་ལུས་སྦྱོང་བྱེད་མཚམས་འཇོག་དགོས།གལ་ཏེ་བྲང་ཁོག་ལ་ན་ཟུག་དྲག་པོ་བྱུང་བའམ་ཡང་ན་དབུགས་ལེན་མི་ཐུབ་པ་སོགས་ཀྱི་སྣང་ཚུལ་བྱུང་ན།ཁྲག་རྩ་འགག་པའི་དབང་གིས་སྙིང་ཁྲག་འཁོར་རྒྱུག་བྱེད་ཚད་ཇེ་དལ་དང་དབྱང་ཇེ་ཉུང་དུ་སོང་སྟེ་སྙིང་ནད་སློང་བའི་རྟགས་ཡིན་པས།མྱུར་དུ་སྨན་པར་སྟོན་དུ་འགྲོ་དགོས།
        ཐང་ཆད་པ། ལུས་ཕུང་སྦྱོང་བརྡར་བྱས་ན་ཚད་གཞི་ངེས་ཅན་ཞིག་གི་སྟེང་ནས་ཡིད་མུག་པ་དང་སེམས་འཚབ་པ་སོགས་ཀྱི་གནས་ཚུལ་གསོ་བཅོས་བྱེད་ཐུབ་མོད།འོན་ཀྱང་ལུས་སྦྱོང་ཚད་ལས་བརྒལ་ན་ཡིད་མུག་པ་དང་ཁོང་ཁྲོ་ལངས་སླ་བ།དགའ་ཁྲོ་ངེས་མེད་ཡིན་པ་སོགས་ཀྱི་སྣང་ཚུལ་འབྱུང་བ་རེད།གལ་ཏེ་ལུས་སྦྱོང་བྱས་རྗེས་ལུས་པོ་ཐང་ཆད་ན།མྱུར་དུ་རང་སྟེང་ནས་སྙོམ་སྒྲིག་བྱས་ཏེ་ལུས་སྦྱོང་བྱེད་ཚད་ཇེ་ཉུང་དུ་གཏོང་དགོས།
        རྐང་ལག་བཞི་པོར་ཤུགས་མེད་པ། རྐང་ལག་བཞི་པོར་ཤུགས་མེད་པའི་སྣང་ཚུལ་དེ་ནི་སྤྱིར་བཏང་དུ་སྐར་མ་འགར་ངལ་གསོས་རྗེས་སླར་གསོ་འབྱུང་ཐུབ།གལ་ཏེ་ཉིན་འགའ་ལ་བསྟུད་མར་རྐང་ལག་བཞི་པོར་ཤུགས་མེད་པའི་སྣང་ཚུལ་བྱུང་ན།མཚེར་བར་གནོད་པ་ཐེབས་པའི་རྟགས་ཡིན་པ་དང་།དེ་ལ་ཕོ་བ་སྦས་པ་སོགས་ཀྱི་ནད་རྟགས་སྦྲགས་མི་མངོན་ན།ལུས་སྦྱོང་བྱེད་ཚད་དེ་བས་ཀྱང་ཇེ་ཉུང་དུ་གཏོང་དགོས།
        དབུགས་འཚང་བ།ལུས་སྦྱོང་བྱེད་སྐབས་དབུགས་འཚང་བ་ནི་ཧ་ཅང་རྒྱུན་ལྡན་གྱི་སྣང་ཚུལ་ཞིག་ཡིན་མོད།འོན་ཀྱང་འགུལ་སྐྱོད་ཅུང་ཙམ་བྱས་ནའང་དབུགས་འཚང་བ་དང་ཡུན་རིང་པོར་ངལ་གསོ་བྱས་ནའང་སླར་གསོ་མི་འབྱུང་བའི་གནས་ཚུལ་བྱུང་ན།གློ་བའི་ནུས་པ་མི་བཟང་བའི་རྟགས་ཡིན།
        རུས་ཚིགས་ན་བ། ལུས་སྦྱོང་བྱས་ཚར་རྗེས་རུས་ཚིགས་ན་བ་དང་ན་ཡུན་སྐར་མ30ཡན་བརྒལ་ན་ངེས་པར་དོ་སྣང་བྱེད་དགོས།ན་ཟུག་དེ་ཚིགས་མོའི་ནང་དུ་འབྱུང་བ་དང་ཚིགས་མོའི་ནུས་པར་གནོད་པ་ཐེབས་པའི་སྐབས་སུ།ཆུ་བར་རྨས་སྐྱོན་ཕོག་ཡོད་མེད་ལ་བསམ་བློ་གཏོང་དགོས།
        ཤ་གནད་ན་བ། ཐོག་མར་ལུས་སྦྱོང་བྱེད་པ་དང་ཡང་ན་ཡུན་རིང་པོར་ལུས་སྦྱོང་བྱེད་མཚམས་བཞག་ནས་ཡང་བསྐྱར་ལུས་སྦྱོང་བྱེད་པ།ད་རུང་ལུས་སྦྱོང་བྱེད་སྟངས་བསྒྱུར་བ་སོགས་ཀྱི་སྐབས་སུ་ཤ་གནད་ན་བ་ནི་རྒྱུན་ལྡན་གྱི་སྣང་ཚུལ་ཞིག་ཡིན་མོད།འོན་ཀྱང་ཡུན་རིང་པོར་ཤ་གནད་ན་བ་ཡིན་ན།ཤ་གནད་ཀྱི་མཉེན་པོའི་ཕུང་གྲུབ་ལ་རྨས་སྐྱོན་ཕོག་པའི་རྟགས་ཡིན།
        མདོར་ན་ལུས་ཕུང་སྦྱོང་བརྡར་མ་བྱས་གོང་།ལུས་སྦྱོང་བྱེད་མཁན་དེ་ཐོག་མར་སྨན་ཁང་དུ་སོང་ནས་ལུས་སྦྱོང་གསོ་རིག་ཚན་ཁག་གི་སྨན་པར་དཔྱད་འཇོག་བྱེད་དུ་བཅུག་ནས།རང་ཉིད་ཀྱི་སྙིང་དང་གློ་བའི་བྱེད་ནུས་གནས་ཚུལ་ལྟར།རང་ཉིད་ལ་འཚམ་པའི་ལུས་སྦྱོང་བྱེད་སྟངས་དང་ལུས་སྦྱོང་བྱེད་ཚད་ཅིག་གཏན་འཁེལ་བྱས་ན་བཟང་ངོ་། །


དྲ་ཚིགས་འདིའི་པར་དབང་གངས་ལྗོངས་ཉི་གཞོན་དྲ་བར་དབང་བས་ཕན་ཚུན་ལ་དབང་བཅོལ་མ་བྱས་གོང་རང་དགར་མི་སྤྱོད་པར་མཁྱེན།
དྲ་ཚིགས་དཔང་རྟགས། 蜀ICP备14009601号-1