གཙོ་ངོས།>> རྩོམ་རིག>>སྙན་རྩོམ།

ཏཱ་ནི་ལྷ་རྒོད། རྩོམ་སྒྲིག་པ།ཡོང་ཁུངས།མཚོ་སྔོན་བོད་ཡིག་གསར་འགྱུར། སྤེལ་དུས། ༢༠༡༩ལོའི་ཟླ་བ་༠༤ཚེས་༡༡ཉིན།

༄༅།། གཡུང་དྲུང་རི་མོ་ལྟ་བུའི་བུ་མོ་ཁྱོད།

ཏཱ་ནི་ལྷ་རྒོད། 
འཇིག་རྟེན་འཇིག་རྟེན་ཟེར་བའི་རྩེད་ར་ན། །
སྔོན་བསགས་ལས་ཀྱིས་འཕྲད་པའི་ནེའུ་ལྡངས་རེ། །
ཁྱོད་ཀྱི་ལང་ཚོ་གཡུང་དྲུང་རི་མོ་ཡིན། །
མདངས་ལ་འགྱ་འགྱུར་མེད་པའི་རྟེན་འབྲེལ་སྒྲིགས། །
ལང་ཚོ་ལང་ཚོ་ཟེར་བའི་ནོམ་པ་འདི། །
རང་ལ་དབང་བའི་ཚོགས་དྲུག་ཕུན་ཚོགས་ཡིན། །
ཁྱོད་ཀྱི་བརྩེ་དུང་གཡུང་དྲུང་རི་མོ་ཡིན། །
རིས་ལ་ཚོན་མདངས་འགྲིག་པའི་རྟེན་འབྲེལ་སྒྲིགས། །
བརྩེ་དུང་བརྩེ་དུང་ཟེར་བའི་ལོངས་སྤྱོད་འདི། །
མགོ་ནག་མི་ལ་ལྡན་པའི་འབྱོར་བ་ཡིན། །
ཁྱོད་ཀྱི་གཉུག་གཤིས་གཡུང་དྲུང་རི་མོ་ཡིན། །
ཚོས་ལ་མག་མོག་མེད་པའི་རྟེན་འབྲེལ་སྒྲིགས། །
གཉུག་གཤིས་གཉུག་གཤིས་ཟེར་བའི་ཡེ་ཤེས་འདི། །
རྣམ་པར་ཤེས་པར་ཚང་བའི་རང་བཞིན་ཡིན། །
ཁྱོད་ཀྱི་ཁྲེལ་གཞུང་གཡུང་དྲུང་རི་མོ་ཡིན། །
རྒྱུན་ལ་མཚམས་ཆད་མེད་པའི་རྟེན་འབྲེལ་སྒྲིགས། །
ཁྲེལ་གཞུང་ཁྲེལ་གཞུང་ཟེར་བའི་གསེར་ཐག་འདི། །
དགའ་བདེའི་དཔལ་ལ་འདྲེན་པའི་ལྕགས་ཀྱུ་ཡིན། །
ཁྱོད་ཀྱི་འཛུམ་མདངས་གཡུང་དྲུང་རི་མོ་ཡིན། །
རིན་ལ་རྟ་བརྒྱ་མངའ་བའི་རྟེན་འབྲེལ་སྒྲིགས། །
འཛུམ་མདངས་འཛུམ་མདངས་ཟེར་བའི་བསོད་ནམས་འདི། །
ལེགས་བྱས་རྣམ་དཀར་དགེ་བའི་ཕྱག་རྗེས་ཡིན། །
ཁྱོད་ཀྱི་དད་འདུན་གཡུང་དྲུང་རི་མོ་ཡིན། །
མདུད་ལ་བཤིག་པ་མེད་པའི་རྟེན་འབྲེལ་སྒྲིགས། །

39.7K

ཐག་རག་ཡིག་བསྒྱུར་མ་ལག

དྲ་ཚིགས་འདིའི་པར་དབང་གངས་ལྗོངས་ཉི་གཞོན་དྲ་བར་དབང་བས་ཕན་ཚུན་ལ་དབང་བཅོལ་མ་བྱས་གོང་རང་དགར་མི་སྤྱོད་པར་མཁྱེན།
དྲ་ཚིགས་དཔང་རྟགས།蜀ICP备14009601号-1