ཟླ་4ཚེས་18ཉིན། གསར་འགོད་པས་བོད་རང་སྐྱོང་ལྗོངས་རིག་དངོས་ཅུས་ནས་ཤེས་རྟོགས་བྱུང་གསལ། 2018ལོར་ཁྱོན་བསྡོམས་མ་དངུལ་སྒོར་དུང་ཕྱུར་5ལྷག་ཕོ་བྲང་པོ་ཏ་ལ་དང་། བསམ་ཡས་དགོན། མངའ་རིས་ཡན་ལག་ལས་དོན་ཨུ་ལྷན་གྱི་གནས་ཡུལ་རྙིང་པ། སྤོ་བོ་ཁྲབ་རྨོག་ལྟེ་བའི་རྫོང་ཨུད་ཐོག་ཁང་དམར་པོ་སོགས་རྒྱལ་ཁབ་དང་རང་སྐྱོང་ལྗོངས་རིམ་པའི་གཙོ་གནད་རིག་དངོས་སྲུང་སྐྱོང་སྡེ་ཚན་དུ་སྲུང་སྐྱོང་བཀོལ་སྤྲོད་ལས་དོན་སྤེལ་བ་རེད། བོད་རང་སྐྱོང་ལྗོངས་རིག་དངོས་ཅུས་ཀྱི་ཏང་ཙུའི་ཧྲུའུ་ཅི་གཞོན་པ། ཅུས་ཀྲང་ལེའུ་ཧྲེ་ཀྲུང་གིས། 2018ལོར་རྒྱལ་ཁབ་ཀྱིས་རིག་དངོས་སྲུང་སྐྱོང་ཆེད་སྤྱོད་མ་དངུལ་སྒོར་དུང་ཕྱུར་4.59བཀོད་སྒྲིག་བྱས་པ་དང་། རྒྱལ་ཁབ་རིམ་པའི་གཙོ་གནད་རིག་དངོས་སྲུང་སྐྱོང་ཚན་པའི་སྲུང་སྐྱོང་རྣམ་གྲངས་55སྤེལ་བས། རང་སྐྱོང་ལྗོངས་ནོར་སྲིད་ཀྱིས་མ་དངུལ་སྒོར་དུང་ཕྱུར་1.18བཀོད་སྒྲིག་བྱས་ནས། རང་སྐྱོང་ལྗོངས་རིམ་པའི་རིག་དངོས་སྲུང་སྐྱོང་ཚན་པའི་སྲུང་སྐྱོང་རྣམ་གྲངས་30སྤེལ་བ་རེད།
