གཙོ་ངོས།>> འཕྲོད་བསྟེན།>>བདེ་ཐང་ཤེས་བྱ།

རྩོམ་སྒྲིག་པ།ཡོང་ཁུངས།མཚོ་སྔོན་བོད་ཡིག་གསར་འགྱུར། སྤེལ་དུས། ༢༠༡༩ལོའི་ཟླ་བ་༠༥ཚེས་༠༥ཉིན།

༄༅།། དར་ཡོལ་དུས་ཀྱི་བུད་མེད་ཀྱིས་བདེ་སྲུང་བྱེད་པར་དོ་སྣང་བྱེད་དགོས།

        བུད་མེད་རྣམས་ལོ45ནས50བར་ནི་དར་ཡོལ་དུས(更年期)ཡིན།དར་ཡོལ་དུས་ནི་བུད་མེད་ཀྱི་ལུས་ཁམས་དར་བ་ནས་རྒུད་པར་གྱུར་པའི་འགྱུར་ལྡོག་གི་དུས་སྐབས་ཤིག་ཡིན་ལ།ཕྲུ་གུ་སྐྱེ་ནུས་འཕེལ་བའི་དུས་ནས་ཉམས་པའམ་མེད་པར་འགྱུར་བའི་བར་བརྒལ་གྱི་དུས་ཤིག་ཀྱང་ཡིན།སྐབས་འདིར་མགོ་ཡུ་འཁོར་བ་དང་མིག་འཆོལ་བ།མགོ་ན་བ་དང་རྣ་ནང་དུ་སྒྲ་གྲགས་པ།སྙིང་འཚང་ཞིང་གཉིད་མི་ཡོང་བ།སེམས་འཚབ་ཅིང་ཁྲོ་སླ་བ།སེམས་མི་སྐྱིད་པ།ཟླ་མཚན་ཉོག་པ།ལུས་ཚ་རྒྱས་ཤིང་རྔུལ་སླ་བ་སོགས་ཀྱི་ནད་རྟགས་འབྱུང་སྲིད།དེ་ལ་དར་ཡོལ་དུས་ཀྱི་ཕྱོགས་བསྡུས་ནད་རྟགས་ཟེར།སྐབས་དེར་སྙོམ་སྒྲིག་ལེགས་པོ་བྱས་ན།ནད་རྟགས་དེ་དག་གི་ཚབས་ཇེ་ཆུང་དང་ཡུན་ཇེ་ཐུང་དུ་གཏོང་ཐུབ།གཤམ་གྱི་དར་ཡོལ་དུས་ཀྱི་བུད་མེད་ཀྱི་གནད་དོན་འདི་དག་ལ་མཉམ་འཇོག་བྱ་དགོས་པ་སྟེ།
        གཅིག རང་གི་སེམས་ཁམས་བརྟན་འཇགས་ཡོང་བར་བྱེད་དགོས།དར་ཡོལ་དུས་ཀྱི་བུད་མེད་ཀྱིས་རང་གི་ལུས་ཁམས་ཀྱི་འགྱུར་ལྡོག་ལ་མཉམ་འཇོག་ཡང་དག་བྱས་ཏེ།མཁོ་མེད་ཀྱི་བསམ་བློའི་ཁུར་པོ་དང་སེམས་འཚབ་དངངས་སྐྲག དགོས་མེད་ཀྱི་སེམས་ངལ་དང་ཁུངས་མེད་ཀྱི་དོགས་པ་དག་དོར་ནས།སེམས་ཁམས་མི་ལེགས་པ་མེད་པར་བཟོ་དགོས།དོན་དག་མི་ལེགས་པ་དང་འཕྲད་ཚེ་ཁོང་ཁྲོ་མི་ལངས་པ་དང་སེམས་པ་མི་སྐྱིད་ཚེ་གཉེན་ཉེ་སྤུན་ཟླ་ལ་བཤད་དགོས།རང་གི་གཤིས་ཀ་དང་དགའ་ཕྱོགས་ལྟར་འོས་འཚམ་གྱིས་སྤྲོ་སྐྱིད་གཏོང་བ་དང་།ནམ་ཡང་སྤྲོ་སེམས་ཆེ་བ་དང་སེམས་དཀྱེལ་ཡངས་པར་བྱས་ཏེ།རང་གིས་རང་ལ་ཡིད་ཆེས་སྦྱིན་དགོས།
        གཉིས།བཟའ་བཏུང་སྙོམ་སྒྲིག་བྱེད་དགོས།དར་ཡོལ་དུས་སུ་བུད་མེད་ཀྱི་བཟའ་བཏུང་གི་འཚོ་བཅུད་སྙོམ་སྒྲིག་བྱས་ཏེ་མཁལ་མཚེར་སྲུང་སྐྱོབ་བྱེད་དགོས།སྙོམ་སྒྲིག་འོས་འཚམ་བྱུང་ཚེ་ལུས་ཁམས་ཀྱི་བྱེད་ནུས་ཉོག་པ་རྩ་བ་ནས་འགོག་པ་དང་གསོ་བཅོས་བྱེད་ཐུབ།བུད་མེད་རྣམས་དར་མ་ལས་ཡོལ་བའི་སྐབས་སུ་མཁལ་ནུས་ཉམས་ཡོད་པས།ཟླ་མཚན་ཐེངས་གྲངས་མང་ལ་ཁྲག་མང་པོ་འབབ་པར་མ་ཟད།འབབ་ཡུན་རིང་བས་རྒྱུན་དུ་ཁྲག་ཤེད་དམའ་བའི་སྣང་ཚུལ་འབྱུང་སྲིད།དེ་ལ་སྒོ་ང་དང་སྲོག་ཆགས་ཀྱི་ནང་ཁྲོལ།ཤ་སྣག འོ་མ་སོགས་ཀྱི་སྤྲི་དཀར་རྫས་མཐོ་བའི་ཟས་རིགས་སམ་ཚལ་སྣག་དང་སྣུམ་ཚལ། ལྡུམ་སྒོང་།ཁམ་བུ།ཚ་ལུ་མ་སོགས་ལོ་མ་ལྗང་ཁུ་ཅན་གྱི་སྔོ་ཚོད་དང་སིལ་ཏོག་ཟོས་ནས་ཁྲག་ཤེད་ཞན་པ་གསོ་བཅོས་བྱེད་དགོས།
        གསུམ།ངལ་རྩོལ་དང་ངལ་གསོ་ཟུང་འབྲེལ་བྱེད་དགོས།དར་ཡོལ་དུས་ཀྱི་བུད་མེད་ཀྱིས་ངལ་རྩོལ་དང་ངལ་གསོ་ཟུང་འབྲེལ་བྱེད་པར་མཉམ་འཇོག་དགོས་པ་དང་།ངལ་གསོ་བ་དང་གཉིད་ཡུན་ལ་ཁག་ཐེག་བྱེད་དགོས།གཉིད་ཡུན་རིང་དྲགས་ན་སྒྱིད་ལུག་ལུས་རྙིད་ཀྱི་དབང་དུ་སོང་ནས་བདེ་ཐང་ལ་གནོད་སྲིད།གལ་ཏེ་ལུས་ཕུང་བདེ་ཐང་ཡིན་ན་རྒྱུན་ལྡན་གྱི་བྱ་བ་རྩག་རྩིག་བསྒྲུབ་པ་དང་།ཡང་ན་འགུལ་སྐྱོད་ཚབས་མི་ཆེ་བའི་ལུས་རྩལ་བྱ་འགུལ་ལ་ཞུགས་པ་དང་རང་གིས་བསྒྲུབ་ནུས་པའི་ལས་ཀ་རྩག་རྩིག་བསྒྲུབས་ཏེ་འཚོ་བ་སྙོམ་སྒྲིག་བྱེད་དགོས།
        བཞི།དུས་བཅད་ལྟར་ལུས་ཕུང་ལ་བརྟག་དཔྱད་བྱེད་དགོས།དར་ཡོལ་དུས་ཀྱི་ཕྱོགས་བསྡུས་ནད་རྟགས་བྱུང་བའི་བུད་མེད་ཀྱིས།སེམས་ཁམས་དང་བཟའ་བཏུང་།སྤྱོད་ལམ།ངལ་རྩོལ་དང་ངལ་གསོ་སོགས་ལ་མཉམ་འཇོག་བྱེད་དགོས་པར་མ་ཟད།ནད་ལ་གཞིགས་ནས་སྨན་བཅོས་བྱེད་དགོས།དར་ཡོལ་དུས་སུ་བུད་མེད་ཀྱི་ཟླ་མཚན་རྒྱུན་ལྡན་མིན་པར་མ་ཟད།སྐབས་དེ་ནི་བུད་མེད་ལ་མཚན་མའི་སྐྲངས་འབྲས་འབྱུང་བའི་དུས་ཀྱང་ཡིན་པས།གལ་ཏེ་བསྟུད་མར་ཉིན10ཡན་ལ་ཟླ་མཚན་བབས་ཏེ་མི་ཆད་པ་དང་།ཟླ་མཚན་མང་པོར་བབས་ཏེ་ཁྲག་ཤེད་དམའ་བའི་ཚད་དུ་ལྷུང་ཚེ།མྱུར་དུ་སྨན་པར་བརྟེན་ནས་ནད་བཅོས་བྱེད་དགོས།གལ་ཏེ་ཟླ་མཚན་ཆད་རྗེས་མོ་མཚན་ལས་ཁྲག་འཛག་པ་དང་ཁམས་དཀར་ཇེ་མང་ལ་སོང་ན།དུས་ལྟར་བརྟག་དཔྱད་དང་སྨན་བཅོས་བྱེད་དགོས།དར་ཡོལ་དུས་སུ།བུད་མེད་རྣམས་ཀྱིས་རབ་ཡིན་ན་ལོ་ཕྱེད་དམ་ལོ་རེར་ལུས་པོར་བརྟག་དཔྱད་ཐེངས་གཅིག་བྱས་ནས།སྐྲན་ནད་སྔོན་འགོག་དང་ནད་རིགས་སྔ་མོ་ནས་ངོས་འཛིན་དང་སྔ་མོ་ནས་སྨན་བཅོས་བྱས་ན་ལེགས་སོ། །

39.7K

ཐག་རག་ཡིག་བསྒྱུར་མ་ལག

དྲ་ཚིགས་འདིའི་པར་དབང་གངས་ལྗོངས་ཉི་གཞོན་དྲ་བར་དབང་བས་ཕན་ཚུན་ལ་དབང་བཅོལ་མ་བྱས་གོང་རང་དགར་མི་སྤྱོད་པར་མཁྱེན།
དྲ་ཚིགས་དཔང་རྟགས།蜀ICP备14009601号-1