ཟླ7པའི་ཚེས19ཉིན་རྒྱལ་ཡོངས་བོད་སྐད་སྨྱན་སྦྱོར་མཐུན་སྦྱོར་ལས་གཉེར་ཚོགས་འདུ་སྐབས་བཅོ་བཅུ་དགུ་པ་རེབ་གོང་གསེར་མོ་ལྗོངས་དུ་ཚོགས་པ་དང་། ཐེངས་འདིའི་ཚོགས་ཡུན་ཉིན་ལྔ་ཡིན་ཞིང་། རྨ་ལྷོ་བོད་ཡིག་ཚགས་པར་ཁང་དང་རྨ་ལྷོ་ཁུལ་རྩོམ་པ་པོ་མཐུན་ཚོགས་གཉིས་ཀྱིས་གཙོ་སྒྲུབ་བྱས་པ་རེད།
རྒྱལ་ཡོངས་བོད་ཡིག་སྨྱན་སྦྱོར་མཐུན་སྦྱོར་ཚོགས་འདུ་ནི་ལོ་རེར་ཐེངས་རེར་འཚོགས་བཞིན་ཡོད་ལ། ད་ལོའི་ཚོགས་སྟེང་དུ་རྨ་ལྷོ་ཁུལ་དམངས་ཆེན་ཀྲུའུ་རིན་ཀླུ་རྒྱལ་ཚེ་རིང་དང། རྨ་ལྷོ་ཁུལ་ཨུའི་རྒྱུན་ལས་ཨུ་ཡོན་ནམ་དྲིལ་སྒྲོག་པུའུ་པུའུ་ཀྲང་ལི་ཞུའེ་ཅོན།བོད་ལྗོངས་ཉིན་རེའི་ཚགས་པར་ཁང་གི་ཏང་ཨུའི་རྒྱུན་ལས་ཨུ་ཡོན་ནམ་སྤྱི་ཁྱབ་རྩོམ་སྒྲིག་པ་གཞོན་པ་བཀྲ་ཤིས་དཔལ་ལྡན། མཚོ་སྔོན་ཉིན་རེའི་ཚགས་པར་ཁང་གི་ཏང་ཙུའུ་ཁོངས་མིའམ་སྤྱི་ཁྱབ་རྩོམ་སྒྲིག་པ་གཞོན་པ་ཚེ་མགོན། རྨ་ལྷོ་ཚགས་པར་ཁང་གི་ཧྲེ་ཀྲང་ངམ་སྤྱི་ཁྱབ་རྩོམ་སྒྲིག་པ་པ་ཀའོ་ཀོང་ཀྲི། རྨ་ལྷོ་ཚགས་ཁར་ཁང་གི་སྤྱི་ཁྱབ་རྩོམ་སྒྲིག་གཞོན་པའམ་རྨ་ལྷོ་ཁུལ་རྩོམ་རིག་མཐུན་ཚོགས་ཀྲུའུ་ཞི་རྡོ་རྗེ་ཚེ་བརྟན་བཅས་མགོ་ཚུགས་མཛད་སྒོར་ཞུགས་ནས་གསུང་བཤད་གལ་ཆེན་གནང་།ཐེངས་འདིར་ད་དུང་སྔོན་མའི་རྨ་ལྷོ་ཚགས་པར་ཁང་གི་སྤྱི་ཁྱབ་རྩོམ་སྒྲིག་པ་ཀའོ་བན་ལིན། སངས་རྒྱས། ཀྲའོ་ཧྲིན་ལིན། རིན་ཆེན་རྡོ་རྗེ། སྔོན་མའི་རྨ་ལྷོ་བོད་ཡིག་ཚགས་པར་ཁང་གི་ཀྲུའུ་རིན་ཀླུ་བྱམས་རྒྱལ་བཅས་མགོ་ཁྲིད་རྒན་པ་གདན་ཞུ་ཞུས་ཏེ་གུས་པའི་ཁ་བཏགས་ཕུལ་བ་རེད།
ཐེངས་འདིའི་ཚོགས་འདིར་བོད་ལྗོངས་ཉིན་རེའི་ཚགས་པར་དང་མཚོ་སྔོན་བོད་ཡིག་གསར་འགྱུར། མཚོ་སྔོན་བོད་ཡིག་ཁྲིམས་ལུགས་ཚགས་པར། དཀར་མཛེས་ཉིན་རེའི་ཚགས་པར། རྔ་བའི་ཚགས་པར། གཞིས་རྩེ་ཚགས་པར། བདེ་ཆེན་ཉིན་རེའི་ཚགས་པར་དང་། བོད་ལྗོངས་བརྙན་འཕྲིན་ཁང་། མཚོ་སྔོན་རྒྱང་སྒྲོག་བརྙན་འཕྲིན་ཁང་། ཁམས་པའི་བརྙན་འཕྲིན་ཁང་། ཀྲུང་གོ་བོད་ཀྱི་དྲ་བ། མཚོ་སྔོན་ཞིང་ཆེན་མཉམ་སྦྲེལ་དྲ་བའི་གསར་འགྱུར་ལྟེ་གནས། མཚོ་ལྷོ་ཁུལ་བོད་ཡིག་ཆ་འཕྲིན་ཞིབ་འཇུག་ལྟེ་གནས་སོགས་པེ་ཅིན་དང་བོད་ལྗོངས། མཚོ་སྔོན། ཀན་སུའུ། ཡུན་ནན། སི་ཁྲོན་སོགས་ཞིང་ལྗོངས་ཀྱི་བོད་ཡིག་ཚགས་པར་ཁང་དང་དུས་དེབ་ཁང་། རྒྱང་སྒྲོག་བརྙན་འཕྲིན། དྲ་རྒྱ་སོགས་སྨྱན་བྱད་ལས་ཁུངས40དང་གསར་འགྱུར་ལས་སྒྲུབ་པ70ལྷག་ཐེངས་འདིའི་གྲོས་ཚོགས་སུ་ཞུགས་ཡོད།
ཚོགས་ཡུན་ཉིན་ལྔའི་རིང་དུ་ཚགས་པར་ཁང་སོ་སོའི་ཉེ་བའི་ལོ་གཅིག་རིང་གི་ཕུལ་བྱུང་གསར་འགྱུར་དང་དཔྱད་རྩོམ། དྲ་བ་དང་བརྙན་འཕྲིན། རླུང་འཕྲིན། སྨྱན་བྱད་གསར་པའི་གསར་འགྱུར་དང་ལེ་ཚན་སོགས་ལ་དཔྱད་འདེམས་བྱ་བ་དང་། ལས་ཁུངས་སོ་སོས་ཕྱོགས་བསྡུས་བྱས་པའི་ལོ་གཅིག་ནང་འཕྲད་པའི་གསར་བྱུང་མིང་བརྡ་གཅིག་གྱུར་བྱ་རྒྱུ་ཡིན་ཞིང་། ད་དུང་གྲོས་ཚོགས་སུ“བོད་ཡིག་གཙོ་འདོན་སྨྱན་བྱད་ཀྱིས་སྨྱན་བྱད་གསར་པའི་དུས་རབས་ལ་ཇི་ལྟར་སྣེ་ཁྲིད་བྱེད་པ”ཞེས་པ་བརྗོད་དོན་དུ་བཟུང་བའི་གླེང་སྟེགས་སྤེལ་རྒྱུ་ཡིན་ཞིང་། གཙོ་འདོན་སྨྱན་བྱད་ཀྱི་གླེང་ཕྱོགས་སྣེ་ཁྲིད་དང་གཙོ་འདོན་སྨྱན་བྱད་ཀྱི་སྣང་བརྙན་འཛུགས་སྐྲུན། གཙོ་འདོན་སྨྱན་བྱད་མཐུན་སྦྱོར་སོགས་ཀྱི་གནད་དོན་ཐད་གཏིང་ཟབ་པའི་སྒོ་ནས་བགྲོ་གླེང་བྱ་རྒྱུ་རེད།
