དཀར་མཛེས་ཞེས་གླེང་བའི་ཚེ། གལ་ཏེ་ཁྱེད་ཀྱིས་ར་རྔ་ཁ་དང་། གངས་དཀར་འཁྱགས་རོམ། དར་མདོའི་མཛའ་གཞས་བཅས་མ་གཏོགས་ཤེས་མེད་ན། ད་ལྟ་ཁྱེད་རང་དཀར་མཛེས་ལ་བསྐྱར་དུ་ལྟ་བར་ཡོང་དགོས་རྒྱུ་རེད། གཅིག་བྱས་ན་ཁྱེད་རང་གིས་ད་དུང་འདི་གར་ལྷའི་ཆོ་འཕྲུལ་ལས་གྲུབ་པ་ལྟ་བུའི་ས་གཤིས་སྤྱི་གླིང་སྟེ་སྣག་རྡོ་སྤྱི་གླིང་ཞེས་པ་ཞིག་ཡོད་པ་ཤེས་རྒྱུ་མ་རེད། དེ་ནི་དཀར་མཛེས་ཁུལ་རྟའུ་རྫོང་བ་སྨད་གྲོང་རྡལ་གྱི་མཁར་དམར་གྲོང་ཚོ་དང་གྲོང་མགོ་གྲོང་ཚོའི་འབྲེལ་མཚམས་སུ་བབ་ཆགས་ཤིང་ངོ་མཚར་བའི་ངང་ནས་གནས་ཡོད།
སྣག་རྡོ་སྤྱི་གླིང་ནི་ཀྲུང་གོའི་ས་མཐོའི་རྡོ་ཚོགས་མཛེས་ལྗོངས་འབའ་ཞིག་ཡིན་པ་དང་། “ཀྲུང་གོའི་མཛེས་ལྗོངས་ཆེ་ཤོས་ཀྱི་ལམ་ཆེན་གྱི་མཛེས་ལྗོངས་བརྒྱད་པ”ཞེས་པའི་མཚན་སྙན་ཡོད། དུས་རབས་བཞི་པའི་སྐབས་གྲུབ་ཆ་གསར་པའི་འགུལ་སྐྱོད་ཀྱི་ཤུགས་རྐྱེན་ཐེབས་པའི་དབང་གིས་མཚོ་བོད་ས་མཐོ་འབུར་བ་དང་བསྟུན་ཕྱག་རུ་ཆུ་བོའི་གས་སྲུབས་ས་རྒྱུད་ཀྱི་བྲག་རྡོ་ལ་བཙིར་གནོན་དང་། དྲས་གཏུབ། ཆག་པ། རུལ་བ་བཅས་བྱུང་ནས་རྨེང་ལིན་བྲག་རྡོའི་རྡོ་ཚོགས་ཆགས། རྡོ་ཚོགས་སུ་ཀའེ་ཚྭ་འདུས་པ་དང་། མཁའ་རླུང་གི་བརླན་ཚད་ཀྱི་ཤུགས་རྐྱེན་ཐེབས་པས་སྐམ་ཤས་ཆེ་བའི་དུས་ཚིགས་ལ་སྐྱ་མདོག་དང་སྔོ་སྐྱར་མངོན་པ་དང་། བརླན་གཤེར་ཆེ་བའི་དུས་ཚིགས་ལ་རྫ་ནག་གི་མདོག་མངོན་པས། མདོག་འགྱུར་རྡོ་ཚོགས་ཀྱང་ཟེར།
རྨེང་ལིན་བྲག་རྡོའི་ནང་དུ་མེང་ཐུའོ་རྡོ་དང་ཀའོ་ལིན་ས་སོགས་སྤུས་ལེགས་གཏེར་རྫས་དཀོན་རིགས་འདུས་ཡོད་པས། ཆུ་ཚན་གྱི་འདམ་བག་འཁྲུད་པར་སྤྱད་ན་མཛེས་བཟོ་ལ་ཡང་ཤིན་ཏུ་ཕན། མིག་སྔར། དེ་དང་འདྲ་བའི་ངོ་བོ་འགྱུར་བའི་རྡོ་ཚོགས་ཀྱི་མཛེས་ལྗོངས་འཛམ་གླིང་ཐོག་ནའང་མཐོང་དཀོན་པ་ཞིག་ཡིན་པས། དེའི་ཐུན་མོང་མ་ཡིན་པའི་ས་གཤིས་གྲུབ་ཚུལ་ལ་རིགས་གཅིག་མཁས་ཅན་དང་མཁས་དབང་དག་གིས“ཀྲུང་གོའི་ས་གཤིས་ཀྱི་པའེ་མུའུ་ཏ་”ཞེས་བརྗོད།
སྣག་རྡོ་སྤྱི་གླིང་ནི་2017ལོར་དངོས་སུ་ཡུལ་སྐོར་བར་སྒོ་ཕྱེ་བ་དང་། ཚན་རིག་ཁྱབ་གདལ་དང་ལྟ་སྐོར་གྱི་རིན་ཐང་ཆེན་པོ་ལྡན་ཡོད། “འདི་འདྲའི་ངོ་མཚར་ལྡན་པའི་མཛེས་ལྗོངས་ད་བར་དུ་སྐད་གྲགས་མེད་པའི་རྒྱུ་མཚན་ག་རེ་ཡིན་པ་ཤེས་མ་སོང་”ཞེས་ཡུལ་སྐོར་བ་ཞིག་གིས་དེ་ལྟར་བརྗོད། གཅིག་བྱས་ན་སྣག་རྡོ་སྤྱི་གླིང་ལ་མིའི་རིགས་ཀྱིས་བར་ཆད་མ་བཟོས་ན་བྱ་བ་ངན་པ་ཞིག་མིན་ཀྱང་སྲིད།
