གནས་འདིའི་དབུལ་ཕོངས་དུད་ཁྱིམ་རྣམས་གཞལ་ཡས་ཁང་དུ་གནས་སྤར་འདུག

སྒྲོལ་མ་ཚེ་བརྟན་དང་བསྟན་འཛིན་ཉི་མ། ཚུལ་ཁྲིམས་བཟང་པོ། རྩོམ་སྒྲིག་པ།ཡོང་ཁུངས།ངེད་དྲ་བ། སྤེལ་དུས། 08-15


        སྤྱི་ཟླ་8པའི་ཚེས་12ཉིན།  ངེད་བཅར་འདྲི་ཚོ་ཆུང་དཀར་མཛེས་རྫོང་སྲིབ་ངོ་ཡུལ་ཚོ་རྒྱུད་བཟང་ལུང་པའི་གཅིག་བསྡུས་བཀོད་སྒྲིག་བྱ་ཡུལ་དུ་བཅར་འདྲིར་ཕྱིན།  ས་གནས་དེ་ནི་རྫོང་མཁར་དང་བར་ཐག་ཉེ་ཞིང་།  གཡོན་གཡས་མདུན་རྒྱབ་ཡོངས་སུ་ལོ་ཏོག་དང་སྤང་ལྗོངས།  ལྕང་མ་སོགས་ཀྱིས་གཡོགས་འདུག  །ཁང་པའི་བཟོ་བཀོད་ལེགས་ཤིང་རྒྱ་ཁྱོན་ཆེ་ལ།  མདུན་གྱི་ར་བའི་ནང་དུ་མེ་ཏོག་དང་རྩྭ་ལྡུམ་གྱིས་ཁྱབ་པས།  ལྷིང་འཇམས་ཀྱི་ཁོར་ཡུག་དེ་ནི་འབྱོར་ལྡན་རྣམས་འདུག་སའི་སྤྲོ་སྐྱིད་ཁང་ཞིག་མིན་ནམ་སྙམ་སྲིད།  དེ་ནས་ང་ཚོས་པར་ལེན་བཞིན་ཚར་དུ་དངར་བའི་བཀོད་ལེགས་ཁང་བཟང་དག་གི་འགྲམ་དུ་སོང་ཞིང་།  དུད་ཚང་ཞིག་གི་སྒོ་རུ་སླེབས་པས་ཕོ་ལོ་སུམ་ཅུ་ལྷག་སོན་པའི་སྐྱེས་པ་ཞིག་གིས་གདོང་ལ་བཅོས་མིན་གྱི་འཛུམ་མདངས་ཤིག་བསྟན་ནས་ཁྱེད་ཚོ་གང་ནས་ཡོང་བ་ཡིན།  ཁྱིམ་དུ་འགྲོ་ནས་ངལ་གསོ་ཅུང་ཙམ་གྱིས་དང་ཟེར་བས།  ང་ཚོས་བཅར་འདྲི་བྱེད་པའི་གོ་སྐབས་དེ་འདྲ་ཞིག་ཨེ་རྙེད་བསམ་ནས་འགྲོ་བཞིན་ཡོད་སྟབས།  རྨ་བྱས་དབྱར་རྔའི་སྒྲ་ཐོས་པ་ནང་བཞིན་དང་ལེན་བྱས་ནས་ཁོའི་ཁྱིམ་དུ་སོང་།

        གོས་ཆེན་གྱིས་བཟོས་པའི་སྒོ་ཡོལ་ཡར་བཀྱགས་ནས་ནང་དུ་ཕྱིན་པས།  ཁང་པའི་ནང་གི་པང་གཅལ་མེ་ལོང་ལྟར་དྭངས་ཤིང་བདུག་སྤོས་ཀྱི་དྲི་བཟང་འཐུལ་བ་དང་།  བྱ་འབྲུག་ཁ་སྤྲོད་དང་བཀྲ་ཤིས་རྟགས་བརྒྱད་སོགས་ཀྱི་རི་མོ་བརྐོས་པའི་མདུན་ཅོག་དང་ཉལ་ཁྲི།  སྒྲོམ་བུ་སོགས་ལས་བོད་ལུགས་ཀྱི་ཁྱད་ཆོས་མངོན་ཞིང་།  འཁྱག་སྒམ་དང་བརྙན་འཕྲིན།  ཐབ་ཀ །ལུས་པོ་འཁྲུ་ཆས།  དེ་བཞིན་གློག་དང་ཁྱིམ་སྤྱོད་དྲ་བ་སོགས་ལས་དེང་རབས་ཀྱི་ཁྱད་ཆོས་མངོན་འདུག །བསོད་ནམས་རིན་ཆེན་བཟའ་མི་གཉིས་ཀྱིས་བོད་པའི་ཁྱིམ་ཚང་ཡ་རབས་ཤིག་གི་ཚུགས་ལྟར་མགྲོན་པོ་ལ་གུས་བཀུར་ཆེ་ཞིང་།  ཁ་ཞེ་གཉིས་མེད་ཀྱིས་སྣེ་ལེན་བྱེད་བཞིན་འདུག །དེ་ནས་ང་ཚོས་བསོད་ནམས་རིན་ཆེན་ཚང་གི་གནའ་ནས་ད་ལྟའི་བར་གྱི་འཕོ་འགྱུར་སོགས་ལ་རྒྱུས་ལོན་བྱེད་འགོ་བརྩམས་པ་ཡིན།  ཁོ་དང་ཁོའི་བཟའ་ཟླ་གཉིས་ནི་ལོ་ན་སུམ་ཅུ་ལྷག་ལ་སོན་ཡོད་ཀྱང་།  ཆུང་དུས་ཁྱིམ་གྱི་ཆ་རྐྱེན་ཞན་པས་སློབ་གྲྭ་འགྲོ་རྒྱུའི་གོ་སྐབས་མ་བྱུང་།  གཙོ་བོ་ཕྱུགས་ལ་བརྟེན་ནས་འཚོ་ཐབས་བྱས་ཀྱང་ཕྱུགས་ཟོག་གི་གྲངས་ཀ་ཉུང་བ་དང་ཁྱིམ་དུ་ཕྲུ་གུ་མང་པོ་ཡོད་པ་སོགས་ཀྱིས་རྐྱེན་ནས་དབུལ་ཕོངས་ཀྱི་གནས་སུ་ལྷུང་།  སྐབས་དེ་ཁོའི་སེམས་སུ་ཕྲུ་གུ་རྣམས་སློབ་གྲྭ་རུ་གཏོང་རྒྱུའི་འདུན་པ་ཆེ་ནའང་།  འབྲོག་ས་དང་སློབ་གྲྭའི་བར་ཐག་རིང་ཞིང་།  དབྱར་དགུན་སྟོན་དཔྱིད་ཀྱི་མཚེར་ས་ལ་འགྱུར་ལྡོག་ཆེ་བ་དང་།  ད་དུང་འབྲོག་ས་རུ་ཙག་ཙིག་གི་བྱ་བ་མང་བ་སོགས་ཀྱིས་རྐྱེན་ནས་ཕྲུ་གུ་རྣམས་ཀྱང་ཕ་མ་གཉིས་ལྟར་ཀ་ཁ་ཙམ་ཡང་མི་ཤེས་པའི་གནས་སུ་ལྷུང་ལ་ཉེ།  ལོ་འགའི་ཡར་སྔོན་དུ་ཁོ་པ་ཚང་སྡོད་དམངས་ཀྱི་ཆེས་དམའ་བའི་འཚོ་བའི་འགན་སྲུང་དང་གནད་སྨིན་དབུལ་སྒྲོལ་གྱི་འཆར་ཟིན་ནང་བཀོད་པས།  བསོད་ནམས་རིན་ཆེན་གྱི་ཕུགས་འདུན་མངོན་འགྱུར་ཡོང་བར་རེ་བའི་སྨྱུ་གུ་འབུས།  ལོ་གཉིས་ཀྱི་ཡར་སྔོན་དུ་དཀར་མཛེས་རྫོང་སྲིབ་ངོ་ཡུལ་ཚོ་རྒྱུད་བཟང་ལུང་པའི་དབུལ་ཕོངས་གནས་སྤོ་བྱ་ཡུལ་ལེགས་གྲུབ་བྱུང་ཞིང་།  ཁྱིམ་གྱི་གནས་ཚུལ་ལྟར་སྲིད་གཞུང་གིས་ཁོ་པ་ཚང་ལ་རིན་མེད་སྒོས་ཐོག་བརྩེགས་གཉིས་ཅན་གྱི་སྤྲོ་སྐྱིད་ཁང་པ་འདི་བྱིན་པས།  བསོད་ནམས་རིན་ཆེན་ཁྱིམ་མི་ལྔ་པོ་རྫོང་མཁར་དུ་སྤོས་ཤིང་ཕྲུ་གུ་ཚོས་དེང་རབས་ཀྱི་སློབ་གསོ་མྱོང་འགོ་བརྩམས།  ད་ལྟ་བུ་མོ་ཆུང་བ་རྫོང་བྱིས་གཉེར་ཁང་དང་།  བུ་མོ་ཆེ་བ་དང་འབྲིང་བ་གཉིས་སོ་སོས་རྫོང་སློབ་ཆུང་གཉིས་པའི་ལོ་རིམ་གསུམ་པ་དང་བཞི་པ་རུ་སློབ་སྦྱོང་བྱེད་བཞིན་འདུག །ཁོའི་བཟའ་ཟླས་རྫོང་མཁར་གྱི་སྣ་མང་ཚོང་ཁང་ཞིག་ཏུ་ཞབས་ཞུ་མའི་ལས་ཀ་གཉེར་བཞིན་ཡོད་ལ།  ཁོ་རང་དབྱར་ཟླ་དང་པོ་དང་གཉིས་པ་ལ་ཕྱིར་འབྲོག་ས་རུ་ལོག་ནས་དབྱར་རྩྭ་དགུན་འབུ་སོགས་རྩྭ་སྨན་འཐུར་བཞིན་ཡོད།



དྲ་ཚིགས་འདིའི་པར་དབང་གངས་ལྗོངས་ཉི་གཞོན་དྲ་བར་དབང་བས་ཕན་ཚུན་ལ་དབང་བཅོལ་མ་བྱས་གོང་རང་དགར་མི་སྤྱོད་པར་མཁྱེན།
དྲ་ཚིགས་དཔང་རྟགས། 蜀ICP备14009601号-1