པེ་ཅིན། འཇམ་དབྱངས་ཚེ་རིང་།
རྣམ་དཀར་དགེ་ལ་བཀྲི་བའི་བྱམས་བརྩེ་ཅན། །
ཤེས་རབ་འོད་སྣང་ཆེན་པོའི་བྱིན་རླབས་ཀྱིས། །
སྐལ་ལྡན་གཞོན་ནུའི་བློ་གྲོས་ཀུ་མུད་ད། །
ཡོན་ཏན་ཟེའུ་འབྲུས་བརྒྱན་མཛད་སློབ་དཔོན་ཉིད། །
ཁྱེད་ཀྱི་ཡོན་ཏན་དཔག་པར་དཀའ་མོད་ཀྱང་། །
བློ་དམན་བདག་གིས་དཔག་ཚོད་བརྗོད་འདོད་ནས། །
དབང་མེད་ལག་སོར་འགུལ་བའི་གར་སྟབས་ཀྱིས། །
མཆོད་ཚིག་ཟློས་པའི་གར་འདི་ཁྱེད་ལ་འཁྲབ། །
གཞོན་ནུའི་དུས་ནས་ངེས་འབྱུང་རྣམ་དག་གིས། །
རྣམ་དག་ཁྲིམས་ལྡན་གཞུང་ཆེན་སློབ་གཉེར་སོགས། །
ཉིན་མཚན་དབྱེར་མེད་ངལ་བརྒྱར་བསྟེན་ནས་ནི། །
ཆུ་ཡི་ཐིགས་པ་བསགས་པས་རྒྱ་མཚོ་བཞིན། །
ཤེས་རིག་ཡོན་ཏན་མཁྱེན་པའི་གཏེར་དུ་འཁྱིལ། །
དགེ་བཤེས་མཚན་གྱི་སྙན་པས་ས་གསུམ་གང་། །
ཀུན་སྤྱོད་གཙང་བས་སློབ་ཚོགས་མཐའ་ནས་བསྐོར། །
ཆགས་སྡང་སྨྲ་བ་ཉུང་བས་ཀུན་དང་མཐུན། །
བླ་མའི་རྒྱུད་ཀྱི་ཡོན་ཏན་མ་ལུས་འབྱོར། །
བླ་མའི་བཀའ་གསུང་རྣམ་ཀུན་སྤྱི་བོར་མཛེས། །
བླ་མའི་བྱིན་རླབས་བསྩལ་པའི་བཤེས་གཉེན་མཆོག །
བླ་མའི་དྲིན་ལན་འཇལ་ལ་སྒོ་གསུམ་སྤྱོད། །
ཆོས་མཐུན་ཆོས་བཞིན་སྤྱོད་པའི་རྣམ་ཐར་ཟབ། །
ངལ་བ་ཁྱད་བསད་བུམ་པ་གང་བྱོའི་ཚུལ། །
རང་གཞན་ཀུན་ལ་ཡོན་ཏན་བསྩལ་པ་ཡིས། །
བླ་མའི་དྲིན་ལན་ཆ་ཙམ་དྲན་པས་ཀྱང་། །
བློ་ཡི་མུན་པ་སེལ་ལ་པདྨོའི་གཉེན། །
ཀུན་གསལ་ཡངས་པའི་མཁའ་ལྡིང་དབང་པོ་བཞིན། །
རྣམ་ཀུན་ཤེས་བྱའི་ཀློང་ཆེན་རབ་འབྱམས་ལ། །
གོམས་པའི་སྟོབས་ཀྱིས་རང་གཞན་སྐྱེ་འགྲོ་ཀུན། །
མཛད་འཕྲིན་འོད་སྣང་དཀར་པོའི་ཁྱམས་སུ་འདུ། །
ཁྱེད་ཀྱི་གསུང་རབ་བློ་ལྡན་ཚོགས་རྣམས་ཀྱི། །
བློ་གྲོས་རྣམ་པར་འབྱེད་ལ་ཟླ་བྲལ་བས། །
ཁྱེད་ཀྱི་བཀའ་དྲིན་རི་བོའི་གཟི་བརྗིད་ཀྱང་། །
བདག་བློ་ས་འཛིན་མཛེས་པའི་རྒྱན་དུ་ཆེ། །
དེ་སྐད་སྨྲ་བ་མགྲིན་པ་གསལ་བའི་སྐྱེས། །
གནམ་བསྐོས་གོང་མའི་ཞབས་རྗེས་མཛེས་པའི་གནས། །
པེ་ཅིང་མི་རིགས་སློབ་གྲྭ་ཆེན་མོ་རུ། །
རང་སེམས་དར་དཀར་མཚོན་པའི་རྟེན་དུ་སྤེལ། །
