ཝང་དབྱང་གིས་ཀྲེ་ཅང་ཞིང་ཆེན་གྱི་སྲིད་གྲོས་བྱ་བར་རྟོག་ཞིབ་མཛད།

རྩོམ་སྒྲིག་པ།ཡོང་ཁུངས།མཚོ་སྔོན་བོད་སྐད་རླུང་འཕྲིན། སྤེལ་དུས། 10-29


           ཞིན་ཧྭ་གསར་འགྱུར་ཁང་གི་གློག་འཕྲིན་ལྟར།  ཉེ་ལམ། ཀྲུང་གུང་ཀྲུང་དབྱང་ཆབ་སྲིད་ཅུའུ་ཡི་རྒྱུན་ལས་ཨུ་ཡོན། རྒྱལ་ཡོངས་སྲིད་གྲོས་ཀྱི་ཀྲུའུ་ཞི་ཝང་དབྱང་གིས་ཀྲེ་ཅང་ཞིང་ཆེན་གྱི་སྲིད་གྲོས་བྱ་བར་རྟོག་ཞིབ་མཛད། ཁོང་གིས་བསྟན་དོན། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ཀྲུང་དབྱང་སྲིད་གྲོས་བྱ་བའི་གྲོས་ཚོགས་དང་མི་དམངས་སྲིད་གྲོས་བཙུགས་ནས་ལོ་འཁོར་བདུན་ཅུ་ལོན་པར་རྟེན་འབྲེལ་ཞུ་བའི་ཚོགས་ཆེན་སྟེང་གནང་བའི་གསུང་བཤད་ཀྱི་དགོངས་དོན་གལ་ཆེན་སློབ་སྦྱོང་དང་ལག་བསྟར་བྱས་ཏེ། བསམ་བློ་རིགས་གཞུང་དྲག་ཆས་ཐད་ནས་མུ་མཐུད་དུ་གྲུབ་འབྲས་གསར་བ་ལེན་པ་དང་སྲིད་གྲོས་བྱ་བར་ཤུགས་སྣོན་དང་ལེགས་སྒྱུར་བྱེད་པའི་ཐད་ནས་མུ་མཐུད་དུ་འཚོལ་ཞིབ་གསར་བ་ཡོད་དགོས་ལ། མི་རིགས་བསྐྱར་དར་བྱེད་པར་བློ་གྲོས་དང་སྟོབས་ཤུགས་གཅིག་སྡུད་བྱེད་པའི་ཐད་ནས་མུ་མཐུད་དུ་སྤྱོད་ཚུལ་ལེགས་པོར་བརྟེན་ནས། ཏང་ཀྲུང་དབྱང་གིས་མི་དམངས་སྲིད་གྲོས་བྱ་བར་བཏོན་པའི་ཐབས་ཇུས་དང་བཀོད་སྒྲིག་སྣ་ཚོགས་དངོས་འབེབས་བཟང་བོ་བྱེད་རྒྱུ་འགན་སྲུང་བྱེད་དགོས་ཟེར།
           ཟླ་བཅུ་བའི་ཚེས་ཉེར་ལྔ་དང་ཚེས་ཉེར་དྲུག་ཉིན་གཉིས་ལ། ཝང་དབྱང་ཧང་ཀྲིག་དང་ཅ་ཞིན་གྱི་ཞིང་སྡེ་དང་གཞིས་ཁུལ། ཁེ་ལས་སོགས་སུ་ཕེབས་ཏེ་གཞི་རིམ་སྲིད་གྲོས་གྲོས་མོལ་དམངས་གཙོ་བྱ་བར་རྒྱུས་ལོན་བྱས་པར་མ་ཟད་འགོ་འཛིན་མཛད་དེ་ཀྲེ་ཅང་དུ་ཡོད་པའི་རྒྱལ་ཡོངས་སྲིད་གྲོས་ཨུ་ཡོན་དང་བཞུགས་མོལ་ཚོགས་འདུ་བསྡུས་ཏེ། འབྲེལ་ཡོད་ཕྱོགས་ཀྱིས་ཀྲུང་དབྱང་སྲིད་གྲོས་བྱ་བའི་གྲོས་ཚོགས་ཀྱི་དགོངས་དོན་དངོས་འབེབས་བྱེད་པ་དང་སྲིད་གྲོས་བྱ་བ་བཟང་བོར་བསྒྲུབ་པའི་ཐད་ལ་བཏོན་པའི་བསམ་འཆར་དང་གྲོས་གཞི་ལ་ཉན།  ཝང་དབྱང་གིས་ཀྲེ་ཅང་ཞིང་ཆེན་གྱིས་སྲིད་གྲོས་བྱ་བར་ཤུགས་སྣོན་དང་ལེགས་སྒྱུར་བྱེད་པའི་ཕྱོགས་ཀྱི་འཚོལ་ཞིབ་ལག་ལེན་ལ་ཁས་ལེན་གང་ལེགས་བྱས། ཁོང་གིས་བསྟན་དོན། ཟླ་སྔོན་མའི་ནང་ཚོགས་པའི་ཀྲུང་དབྱང་སྲིད་གྲོས་བྱ་བའི་གྲོས་ཚོགས་དེ་དུས་རབས་གསར་བར་མི་དམངས་སྲིད་གྲོས་བྱ་བར་ཤུགས་སྣོན་དང་ལེགས་སྒྱུར་བྱེད་པར་དོན་སྙིང་གལ་ཆེན་ལྡན། གྲོས་ཚོགས་ཀྱི་དགོངས་དོན་སློབ་སྦྱོང་དང་ལག་བསྟར་བྱེད་པ་ནི་རིགས་གཞུང་དོན་དངོས་དང་སྦྲེལ་བ་དང་ཡང་སྐོར་བསྐྱར་སྐོར་ལ་ངོས་འཛིན་དང་ལག་ལེན་བྱེད་པའི་བརྒྱུད་རིམ་ཞིག་ཡིན་པས་རྒྱུན་ཏུ་དམ་འཛིན་བྱེད་དགོས། མི་དམངས་སྲིད་གྲོས་ཀྱིས་ངོས་འཛིན་ཐད་ལ་སྔར་ལས་ཤུགས་སྣོན་པ་དང་བྱ་བའི་ཐད་ལ་སྔར་ལས་རང་རྟོགས་བྱེད་པའི་བྱ་བ་ལེགས་པོར་བསྒྲུབ་དགོས་ཟེར།
           ཀྲེ་ཅང་ཞིང་ཆེན་དུ་རྟོག་ཞིབ་མཛད་སྐབས། ཝང་དབྱང་གིས་ད་དུང་འབྲེལ་ཡོད་ཆོས་ལུགས་བྱ་འགུལ་སྤེལ་ས་དང་དམངས་གཉེར་ཁེ་ལས་ལ་རྟོག་ཞིབ་མཛད།


དྲ་ཚིགས་འདིའི་པར་དབང་གངས་ལྗོངས་ཉི་གཞོན་དྲ་བར་དབང་བས་ཕན་ཚུན་ལ་དབང་བཅོལ་མ་བྱས་གོང་རང་དགར་མི་སྤྱོད་པར་མཁྱེན།
དྲ་ཚིགས་དཔང་རྟགས། 蜀ICP备14009601号-1