༄༅།། ཝང་ཁྲང་ཧྲན།

རྩོམ་སྒྲིག་པ།ཡོང་ཁུངས།ངེད་དྲ་བ། སྤེལ་དུས། 12-27




        ཝང་ཁྲང་ཧྲན་ནི་དཀར་མཛེས་ཁུལ་བརྒྱད་ཟིལ་རྫོང་སྐལ་གྲོང་རྡལ་གྱི་ལས་ཀ་པ་དཀྱུས་མ་ཞིག་ཡིན། 1983ལོར་བརྒྱད་ཟིལ་རྫོང་དུ་གློག་བརྙན་བཤམས་སྟོན་རུ་ཁག་དང་པོའི་གློག་བརྙན་བཤམས་སྟོན་གྱི་དྲིལ་བསྒྲགས་ལས་འགན་འཁུར་ནས། དཀར་ཆུས་གྲོང་སྡེ་དང་། ཐང་མགོ་ཤང་གཉིས་ཀྱི་ནགས་ར། དགོན་སྡེ། རྫོང་གྲོང་བཅས་སུ་ལོ་གང་བོར་ས་གནས་19རུ་སྐོར་སྐྱོད་བྱས་ནས་ཁྱིམ་ཚང་ཁྲི་སྟོང་མང་པོར་གློག་བརྙན་བཤམས་སྟོན་དང་དྲིལ་བསྒྲགས་བྱས་ཤིང་། ཅིའུ་ལུང་རྫོང་ནི་བོད་རིགས་དང་། རྒྱ་རིགས། དབྱིས་རིགས་བཅས་གཙོ་བོར་བྱས་པའི་མི་རིགས་མང་པོ་འདྲེས་སྡོད་བྱེད་པའི་དམིགས་བསལ་རྫོང་ཞིག་ཡིན་པ་སྔར་བས་ཤེས་རྟོགས་ཐུབ་པ་དང་མི་རིགས་ཁག་གི་རིག་གནས་ཕན་ཚུན་སྤེལ་རེས་དང་མཉམ་འདྲེས་བྱས་ནས་སྤྱི་ཚོགས་ཞི་མཐུན་འཕེལ་རྒྱས་ལ་སྐུལ་འདེད་གཏོང་བའི་དོན་སྙིང་གལ་ཆེན་ལ་ངོས་འཛིན་གང་ལེགས་ཐུབ་ཡོད། ཁོང་གིས་གློག་བརྙན་སྟོན་ཞོར་དུ་མི་རིགས་ཁག་གི་རིག་གནས་དང་། སྒྱུ་རྩལ། མི་རིགས་མཐུན་སྒྲིལ་བཅས་ཀྱི་སྲིད་ཇུས་ཤེས་བྱ་སོགས་སློབ་སྦྱོང་བྱས་ནས་གློག་བརྙན་སྟོན་པའི་གོ་སྐབས་གང་ལེགས་སྤྱད་དེ་མི་རིགས་ཁག་གི་མང་ཚོགས་དང་ཁ་བརྡ་བྱས། ལོ་བཅུ་གཅིག་རིང་གི་གློག་བརྙན་བཤམས་སྟོན་གྱི་བརྒྱུད་རིམ་ཁྲོད། ཏང་གི་དུས་སྐབས་ཁག་གི་བྱེད་ཕྱོགས་དང་སྲིད་ཇུས་ཁག་དང་། ལྷག་པར་དུ་ཀྲུང་དབྱང་གི་བོད་རིགས་ས་ཁུལ་གྱི་ལས་དོན་ཚོགས་འདུའི་དགོངས་དོན་དང་མི་རིགས་ཆོས་ལུགས་སྲིད་ཇུས་སོགས་ཚང་མ་མི་སེར་གྱིས་གོ་བདེ་ཤེས་སླའི་སྐད་ཆ་ནས་བརྒྱུད་བསྒྲགས་བྱས་པར་རིམ་ཁག་འགོ་ཁྲིད་ཀྱི་ཁས་ལེན་དང་རྒྱ་ཆེའི་མི་སེར་གྱི་ཁས་ལེན་ཐོབ་ཡོད།
        2012ལོར་རྫོང་ཨུ་དྲིལ་བསྒྲགས་པུའུ་ཡིས་ཁུལ་ཨུ་མང་ཚོགས་ནང་ཞུགས་རྒྱུར་འོས་སྦྱོར་བྱས་པ་དང་ཁུལ་ཨུས་མང་ཚོགས་སྒྲོག་འགྲེལ་པར་གདན་ཞུ་བྱས་ཏེ། ལོ་ཁ་ཤས་རིང་“རྒྱལ་གཅེས་དང་། ཁྲིམས་སྲུང་། དྲིན་ཚོར། མཐུན་སྒྲིལ”བཅས་ཀྱི་བརྗོད་དོན་གཙོ་བོར་དམིགས་ཏེ་དར་མདོ་གྲོང་ཁྱེར་དང། ལྕགས་ཟམ་རྫོང་། རོང་བྲག་རྫོང་། བརྒྱལ་ཟིལ་རྫོང་། དུང་འཁྱིལ་ལུང་ཤུར་སོགས་ས་ཆ་མང་པོ་ཞིག་ཏུ། དགོན་སྡེའི་དགེ་འདུན་པ་དང་། ཞིང་འབྲོག་མང་ཚོགས། སྤྱིར་བཏང་གི་ལས་བྱེད་ལས་བཟོ་པ། འགོ་ཁྲིད་ལས་བྱེད་པའི་རིམ་པ། ཤང་དང་གྲོང་རྡལ་གྱི་གྲོང་ཚོའིི་ལས་བྱེད་པ། ཁེ་ལས་པ། སློབ་གྲྭའི་དགེ་སློབ། མི་རིགས་མང་པོ་འདུས་པའི་གྲོང་གསེབ་ཀྱི་ཚོགས་སྤྱི་སོགས་ཚོགས་པ་མི་འདྲ་བར་སྔ་རྗེས་སུ་སྒྲོག་འགྲེལ་ཐེངས་སུམ་བརྒྱ་ལྷག་ཙམ་བྱས་པ་རེད།
        2010ལོ་ནས་2019ལོའི་བར་ཝང་ཁྲང་ཧྲེན་གྱིས་ཧྭ་ཆིའུ་གྲོང་ཚོར་བཅའ་སྡོད་བྱེད་རིང་གྲོང་རྡལ་ཡོངས་ཀྱི་ལས་ཀའི་སྒྲ་བརྙན་ཟིན་ཐོ་དང་། གསར་འགྱུར་སྤེལ་གཏོང་། གནས་སྤོས་ཡུལ་མི་མཐུན་སྦྱོར་སོགས་ཀྱི་ལས་ཀ་སྤེལ་བ་དང་ཆབས་ཅིག་གྲོང་ཚོ་དང་མི་སེར། སྤྱི་ཚོགས་ཀྱི་གནས་ཚུལ་བཅས་ཤེས་རྟོགས་བྱེད་པར་ཡོང་བ་རེད། དྲིལ་བསྒྲགས་དང་སྐུལ་སློང་ཐེངས་མང་བྱས་པ་བརྒྱུད་མང་ཚོགས་འཕེལ་རྒྱས་ལ་སྒུལ་ཤུགས་འཕེལ་བ་དང་། མང་ཚོགས་ཀྱི་སྣེ་ཁྲིད་ནས་མ་དངུལ་བསྡུ་རུབ་ཀྱིས་ཆུ་དང་ལམ་སོགས་རྨང་གཞིའི་སྒྲིག་བཀོད་འཛུགས་སྐྲུན་ཤུགས་ཆེན་བྱས།
        ཁོང་གིས་མི་ཚེ་གང་པོར་གཞི་རིམ་གྱི་སྒྲོག་འགྲེལ་དང་རིག་གནས་བྱེད་སྒོ་ལ་འབུལ་ཡོད་པས། བཀུར་འོས་པ་དང་བསྔགས་འོས་པ་ཞིག་ཡིན། ཁོང་གིས་ཀྱང་སྔ་གཞུག་ཏུ་རྒྱལ་ཁབ་དང་ཞིང་ཆེན། ཁུལ། རྫོང་རིམ་པ་ཁག་གི་ཏང་སྲིད་དང་འབྲེལ་ཡོད་སྡེ་ཁག་གིས་གཟེངས་བསྟོད་ཐེངས་མང་བྱས་མྱོང་། ། 


དྲ་ཚིགས་འདིའི་པར་དབང་གངས་ལྗོངས་ཉི་གཞོན་དྲ་བར་དབང་བས་ཕན་ཚུན་ལ་དབང་བཅོལ་མ་བྱས་གོང་རང་དགར་མི་སྤྱོད་པར་མཁྱེན།
དྲ་ཚིགས་དཔང་རྟགས། 蜀ICP备14009601号-1