༄༅།། ཁམས་ཁུལ་དུ་བསྐྱོད་ནས་གླིང་གེ་སར་རྒྱལ་པོའི་ཞབས་རྗེས་འཚོལ་བ།

འཇམ་དབྱངས་ཆོས་སྒྲོན། རྩོམ་སྒྲིག་པ།ཡོང་ཁུངས།ངེད་དྲ་བ། སྤེལ་དུས། 12-31





བསང་སྐོར་བྱེད་བཞིན་པ།




དང་པོ། གེ་སར་རྒྱལ་པོའི་ཞབས་རྗེས་འཚོལ་ཞིབ་བྱེད་སྒོའི་ཉིན་ཐོ།

        སྤྱི་ལོ་2019ལོའི་ཁམས་ཁུལ་དུ་བསྐྱོད་ནས་གླིང་གེ་སར་རྒྱལ་པོའི་ཞབས་རྗེས་འཚོལ་ཞིབ་བྱེད་སྒོའི་རྡོག་ཐོན་མཛད་སྒོ་དེ་སྤྱི་ཟླ་8པའི་ཚེས་1ཉིན་གྱི་སྔ་དྲོར་གླིང་གེ་སར་རྒྱལ་པོའི་འཁྲུངས་ཡུལ་སྡེ་དགེ་ཨ་ཕྱུག་རྩྭ་ཐང་དུ་སྤེལ་ཡོད། རྡོག་ཐོན་མཛད་སྒོའི་ཐོག་ཀྲུང་གུང་སྡེ་དགེ་རྫོང་ཨུའི་ཧྲུའུ་ཅི་སྐལ་བཟང་གཡང་དྲུང་ལགས་ཀྱིས་སྤྲོ་སེམས་རབ་ཏུ་འཁོལ་བའི་ཤིས་ཚིག་ཕུལ་བ་དང་རྒྱལ་ཡོངས་གེ་སར་ལས་དོན་འགོ་ཁྲིད་ཚོ་ཆུང་གཞུང་ལས་ཁང་གི་ཀྲུའུ་རེན་ནོར་བུ་དབང་ལྡན་གྱིས་གསུང་བཤད་གནང་བ་མ་ཟད། གེ་སར་འཁྲུངས་ཡུལ་འགྲིམ་པའི་བྱེད་སྒོ་སྐབས་བཞི་པའི་ཁམས་ཁུལ་དུ་བསྐྱོད་ནས་གླིང་གེ་སར་རྒྱལ་པོའི་ཞབས་རྗེས་འཚོལ་ཞིབ་བྱེད་སྒོ་དངོས་སུ་འགོ་ཚུགས་པའི་ཁྱབ་བསྒྲགས་ཀྱང་གནང་།


   སྡེ་དགེའི་རྫོགས་ཆེན་གྱི་གེ་སར་འཆམ།


         རྡོག་ཐོན་མཛད་སྒོ་མཇུག་འགྲིལ་རྗེས། པེ་ཅིང་དང་། བོད་ལྗོངས། མཚོ་སྔོན། ཡུན་ནན། ཀན་སུའུ། སི་ཁྲོན་སོགས་ས་གནས་ནས་ཕེབས་པའི་གེ་སར་རིག་གནས་ཆེད་མཁས་དང་འབྲེལ་ཡོད་མི་སྣ་མི་གྲངས་46གདན་ཞུས་ལྟར་ཐེངས་འདིའི་བྱེད་སྒོའི་ནང་ཞུགས་ཡོད་ཅིང་། ཁོང་ཚོས་ཚོ་ཆུང་གཉིས་སུ་བགོས་ནས་ཉིན་11རིང་སྔ་རྗེས་སུ་སི་ཁྲོན་དང་། བོད་ལྗོངས། མཚོ་སྔོན། ཀན་སུའུ་བཅས་ཞིང་ལྗོངས་4དང་། དཀར་མཛེས་དང་། ཆབ་མདོ། ཡུལ་ཤུལ། མགོ་ལོག ཀན་ལྷོ། རྔ་པ་བཅས་གྲོང་ཁྱེར་དང་རང་སྐྱོང་ཁུལ་6། སྡེ་དགེ་དང་སེར་ཤུལ། འཇོ་མདའ། ཡུལ་ཤུལ། རྨ་ཆེན། རྨ་ཆུ་སོགས་རྫོང་19བཅས་བརྒྱུད་ཁྱོན་ལེ་བར་7000ཙམ་བསྐྱོད་ནས། གླིང་གེ་སར་དང་གླིང་གི་དཔའ་རྟུལ་སུམ་ཅུ་དང་མ་སྲུ་མོ་སྨན་རྣམས་ཀྱི་མཁར་ཤུལ་དང་། ཕོ་བྲང་། འབྲོག་ར། གཡུལ་ས་སོགས་མཁར་ཤུལ་དང་རྗེས་ཤུལ་བརྒྱ་ལྷག་ཙམ་ལ་ཡུལ་དངོས་ཀྱི་རྟོག་ཞིབ་བྱས་པ་དང་། འབྲེལ་ཡོད་དཔྱད་གཞིའི་ཡིག་ཆ་འཚོལ་བསྡུ་བྱས་ཡོད། གཞན་ཡང་ད་དུང་མཚོ་སྔོན་ཡུལ་ཤུལ་བོད་རིགས་རང་སྐྱོང་ཁུལ་གྱི་ཡུལ་ཤུལ་གྲོང་ཁྱེར་དང་། མཚོ་སྔོན་མགོ་ལོག་བོད་རིགས་རང་སྐྱོང་ཁུལ་གྱི་རྨ་ཆེན་རྫོང་། སི་ཁྲོན་དཀར་མཛེས་བོད་རིགས་རང་སྐྱོང་ཁུལ་གྱི་སྡེ་དགེ་རྫོང་བཅས་སུ་བཞུགས་མོལ་ཚོགས་འདུ་ཐེངས་གསུམ་ལ་ཚོགས་ནས། ས་གནས་དེ་གའི་ཏང་ཨུ་སྲིད་གཞུང་དང་། གཙོ་གཉེར་སྡེ་ཚན། གེ་སར་ཞིབ་འཇུག་མཐུན་ཚོགས་དང་དེ་བཞིན་གེ་སར་རིག་གནས་ཆེད་མཁས་པ། རིག་གནས་པ། རིག་གནས་ལས་དོན་པ་བཅས་དང་བཞུགས་མོལ་བགྲོ་གླེང་གཏིང་ཟབ་གནང་ཡོད།
        ང་རང་ཐེངས་འདིའི་གེ་སར་ཞབས་རྗེས་འཚོལ་ཞིབ་བྱེད་བྱེད་སྒོའི་ཚོ་ཆུང་དང་པོའི་ནང་ཞུགས་པའི་གོ་སྐབས་བྱུང་ཞིང་། དེ་ཡང་ཚོགས་ཆུང་དང་པོ་དེ་སི་ཁྲོན་ཞིང་ཆེན་ནང་བསྟན་མཐུན་ཚོགས་ཀྱི་ཚོགས་གཙོ་གཞོན་པ། དཀར་མཛེས་ཁུལ་ནང་བསྟན་མཐུན་ཚོགས་ཀྱི་ཚོགས་གཙོ་གཞོན་པ། སྡེ་དགེ་རྫོང་ནང་བསྟན་མཐུན་ཚོགས་ཀྱི་ཚོགས་གཙོ་དཔལ་རྒྱལ་རིན་པོ་ཆེ་དང་། སི་ཁྲོན་ཁམས་པའི་རིག་གནས་ཞིབ་འཇུག་ཁང་གི་འགོ་འཛིན་གཞོན་པ་ཡང་ཧྲེང་ལགས། དཀར་མཛེས་གེ་སར་རིག་གཞུང་ལྷན་ཚོགས་ཀྱི་ཆེད་མཁས་ལེའུ་ཨན་ཆོན་སོགས་ཀྱིས་གཙོས་པའི་ཁྱོན་ཁོངས་མི་23་ལས་གྲུབ། ཚོ་ཆུང་གཉིས་པ་དེ་སི་ཁྲོན་ཁམས་པའི་རིག་གནས་ཞིབ་འཇུག་ཁང་གི་དབུ་ཁྲིད་འཇིགས་མེད་ཆོས་དབྱིངས་དང་། དགེ་རྒན་ཆེན་མོ་ཀརྨ་རྒྱལ་མཚན། གངས་ལྗོངས་ཉི་གཞོན་གྱི་སྤྱི་ཁྱབ་རྩོམ་སྒྲིག་པ་དཀོན་མཆོག་རྡོ་རྗེ། དཀར་མཛེས་རྫོང་སྲིད་གྲོས་ཀྱི་ཀྲུའུ་ཞི། གེ་སར་ཆེད་མཁས་པ་ལྕགས་རྡོ་སོགས་ཁྱོན་ཆེད་མཁས་པ་22ལས་གྲུབ་ཡོད་ཅིང་། ཚོ་ཆུང་གཉིས་པོས་སྤྱི་ཟླ་8པའི་ཚེས་1ཉིན་གྱི་སྔ་དྲོར་གླིང་གེ་སར་གྱི་འཁྲུངས་ཡུལ་སྡེ་དགེ་རྫོང་ཨ་ཕྱུག་གྲོང་བརྡལ་གྱི་གེ་སར་དངོས་མང་བཤམས་མཛོད་ཁང་དང་གེ་སར་རྗེས་དྲན་ཁང་སོགས་ཨ་ཕྱུག་རྩ་ཐང་གི་གེ་སར་རྗེས་ཤུལ་དང་ངག་རྒྱུན་སྐོར་ལ་རྟོག་ཞིབ་བྱས་ཡོད། དཔལ་རྒྱལ་རིན་པོ་ཆེས་ས་གནས་དངོས་ནས་ངོ་སྤྲོད་གནང་བ་བརྒྱུད་ཨ་ཕྱུག་རྩ་ཐང་དུ་འདུ་ར་སྟག་ཐང་ཁྲ་མོ་དང་། སྤྱི་རྒྱལ་སྟག་རི་ཞེས་པ་སོགས་གླིང་སྒྲུང་ནང་བརྗོད་པ་ལྟར་ས་མིང་མ་ཉམས་པ་ཡོད་པ་དང་། གླིང་གིས་ཇོ་རུ་ས་མཐར་སྤྱུགས་རྒྱུའི་སྐོར་གྲོས་བྱེད་སྐབས་ཁྲོ་ཐུང་གིས་བྲག་རི་ནག་བསེ་རག་གི་ཡུལ་ནས་བརྒྱུད་དེ་མར་འབུད་དགོས་ཟེར་བ་དང་། རྒྱ་ཚས་གསུངས་ན་ལྕི་ཡང་འཛོམ་ཉི་མ་ཤར་ཡག་ནས་ཡར་མངགས་དགོས་ཞེས་གསུངས་པས། ཐམས་ཅད་ཀྱིས་དེར་གྲོས་འཆམ་ནས་ཐག་བཅད་པ་སོགས་ཀྱི་ངོ་མཚར་གཏམ་རྒྱུད་ངོ་སྤྲོད་གནང་།

ཚོ་ཆུང་གཉིས་ཀྱི་རྟོག་ཞིབ་ཉིན་ཐོ།


 རྒྱ་ཚ་ཞལ་དཀར་སྐུ་བཤེགས་ས།


        སྤྱི་ཟླ་8པའི་ཚེས་1ཉིན། ཚོ་ཆུང་དང་པོས་སེལ་ཤུལ་རྫོང་ཝ་ཤུལ་ཤང་དང་། སེར་ཤུལ་རྫོང་གི་ཁྲོམ་རྫ་འགབ་མ་ཤང་དང་དབོན་པོ་ཤང་། ཨ་རིག་རྫ་ཤང་སོགས་སུ་བསྐྱོད་ཅིང་། ཇོ་རུས་ཨ་མྱེ་སྒོམ་པ་ར་ཙ་བཏུལ་སའི་རྗེས་ཤུལ་དང་། ཇོ་རུས་ཕྱུག་འཚོ་ས། ཇོ་རུའི་བེའུ་རྩག་གཏེར་དུ་སྦས་སའི་རྗེས་ཤུལ། རྒྱ་ཚ་ཞལ་དཀར་སྐུ་གཤེགས་ས། སྤྱི་དཔོན་རོང་ཚ་ཁྲ་རྒན་གྱི་སྲས་སྣང་ངུ་གཡུ་སྟག་སྐུ་གཤེགས་ས་སོགས་གླིང་རྗེ་བློན་གྱི་རྗེས་ལ་ཤུལ་རྟོག་ཞིབ་བྱས།

རྒྱལ་ཡོངས་གེ་སར་གཞུང་ལས་ཁང་གི་ཀྲུའུ་རེན་ནོར་བུ་དབང་ལྡན་གྱིས་གླིང་འགུ་ཟི་དགོན་དུ་གླིང་གི་རྗེས་ཤུལ་སྐོར་རྟོག་ཞིབ་གནང་བཞིན་པ།

        ཚོ་ཆུང་གཉིས་པས་སྡེ་དགེ་རྫོང་གི་གླིང་འགུ་ཟི་ཤང་དང་། སེར་ཤུལ་རྫོང་གི་འདན་ཁོག་བཅས་བརྒྱུད་ནས། འབུམ་པའི་དགྲ་ལྷ་རྩེ་རྒྱལ་གྱི་ཕོ་བྲང་དང་། གླིང་རྗེའི་སྐུ་མཁར་སེང་འབྲུག་སྟག་རྩེ་རྫོང་། རྒུ་རུའི་མཁར་རྫོང་དང་འདན་མ་བྱང་ཁྲའི་མཁར་རྫོང་དཀར་དམར་སོགས་ཀྱི་རྗེས་ཤུལ་ལ་རྟོག་ཞིབ་བྱས།


སྒ་བདེ་དང་འདན་མས་མཉམ་དུ་བཞེངས་པའི་མཁར་ཤུལ།


        སྤྱི་ཟླ་8པའི་ཚེས་2ཉིན། ཚོ་ཆུང་དང་པོས་སེར་ཤུལ་རྫོང་གི་འབུམ་གསར་ཤང་དུ་དམུ་སྤྱང་རིན་ཆེན་དར་ལུའི་མཁར་ཤུལ་དང་། རྒྱ་ཚ་ཞལ་དཀར་གྱི་སྐུ་ཕུང་འཇོག་སའི་རྗེས་ཤུལ་སོགས་མཇལ། འབུམ་རྙིང་ཤང་འཇུ་རྙིང་དགོན་དུ་ཨ་ཁུ་ཁྲོ་ཐུང་གི་ཕུར་པ་ཞེས་བརྗོད་སྲོལ་ཡོད་པའི་རྗེ་མི་ཕམ་རིན་པོ་ཆེའི་དངོས་སུ་བེད་སྤྱོད་གནང་མྱོང་བའི་ཕུར་པ་རྩ་ཆེན་དང་། རྗེ་མི་ཕམ་རིན་པོ་ཆེས་སྒྲུབ་ཕུག་སོགས་ལ་མཇལ། དེ་ནས་སེར་ཤུལ་རྫོང་ཀ་བཞི་ཤང་པ་རོང་གྲོང་ཚོར་བསྐྱོད་ནས་གླིང་དཔའ་རྟུལ་སུམ་ཅུའི་ངོ་མཚར་ཆུ་ཚན་དང་། གླིང་གེ་སར་དང་འབྲུག་མོའི་མིག་མང་རྩེ་ས། འབྲུག་མོའི་སྦྲ་ཤུལ་སོགས་གེ་སར་རིག་གནས་རྗེས་ཤུལ་ལ་རྟོག་ཞིབ་བྱས།


སྒ་བདེ་དང་འདན་མས་མཉམ་དུ་བཞེངས་པའི་མཁར་ཤུལ།


        ཚོ་ཆུང་གཉིས་པས་སེར་ཤུལ་རྫོང་གི་འདན་ཁོག་གྲོང་བརྡལ་ནས་ཐོན་ཞིང་། འདན་ཁོག་བརྒྱུད་བོད་ལྗོངས་འཇོ་མདའ་རྫོང་གི་འདན་སྲས་གཡུ་འོད་འབུམ་མེའི་ཕོ་བྲང་དང་། འབྲུ་སྒ་བདེ་ཆོས་སྐྱོང་བེར་ནག་གི་ཕོ་བྲང་སོགས་ཀྱི་རྗེས་ཤུལ་ལ་རྟོག་ཞིབ་བྱས།

        སྤྱི་ཟླ་8པའི་ཚེས་3ཉིན། ཚོ་ཆུང་དང་པོ་མཚོ་སྔོན་ཡུལ་ཤུལ་ཁྲི་འདུ་རྫོང་དུ་བསྐྱོད་ནས་སྒ་སྡེ་ཆུ་རྫོང་སོགས་འབྲེལ་ཡོད་རྗེས་ཤུལ་ལ་རྟོག་ཞིབ་བྱས།

རྟོག་ཞིབ་ཚོགས་པས་རྟ་རྣ་དགོན་གྱི་གླིང་གི་གདུང་འབུམ་ལ་རྟོག་ཞིབ་གནང་བཞིན་པ།
        ཚོ་ཆུང་གཉིས་པས་ནང་ཆེན་རྫོང་ཁོངས་ཀྱི་བྱང་རྟ་རྣ་དགོན་དུ་རྟོག་ཞིབ་བྱས་ཤིང་། བྱང་རྟ་རྣ་དགོན་དུ་བཞུགས་པའི་གླིང་གི་སྐབས་ཀྱི་གནའ་རྫས་དང་གནའ་ཤུལ་དང་། གླིང་དཔའ་རྟུལ་སུམ་ཅུའི་སྐུ་གདུང་མཆོད་རྟེན་སོགས་འབྲེལ་ཡོད་རྗེས་ཤུལ་སྐོར་ལ་རྟོག་ཞིབ་བྱས།


ཡུལ་ཤུལ་གྱི་ཁྲེང་འདུ་རྫོང་གི་སྒ་བདེའི་མཁར་ཤུལ།

        སྤྱི་ཟླ་8པའི་ཚེས་4ཉིན། ཚོ་ཆུང་དང་པོས་ཡུལ་ཤུལ་གྲོང་བརྡལ་ཉེ་འཁོར་གྱི་འབྲེལ་ཡོད་གེ་སར་རིག་གནས་རྗེས་ཤུལ་ལ་རྟོག་ཞིབ་བྱས།



གདོང་ཚང་གི་དངོས་མང་བཤམས་སྟོན་ཁང་ལ་རྟོག་ཞིབ་གནང་བཞིན་པ།

        ཚོ་ཆུང་གཉིས་པས་རྫ་སྟོད་རྫོང་ཁོངས་སུ་ཡོད་པའི་འབྲེལ་ཡོད་རྗེས་ཤུལ་སྐོར་རྟོག་ཞིབ་བྱས། དགོང་མོ་ཚོ་ཆུང་གཉིས་ཡུལ་ཤུལ་སྐྱེ་དགུ་གྲོང་བརྡལ་དུ་མཉམ་འཛོམས་བྱས་ནས་བཞུགས་མོལ་ཚོགས་འདུ་འཚོགས་ནས་ས་གནས་ཀྱི་འབྲེལ་ཡོད་སྡེ་ཚན་གྱི་འགན་ཁུར་པ་དང་མྱོང་ཚོར་སྤེལ་རེས་བྱས།



ཡུལ་ཤུལ་དུ་འཚོགས་པའི་བཞུགས་མོལ་ཚོགས་འདུ།


སྤྱི་ཟླ་8པའི་ཚེས་5ཉིན། ཚོ་ཆུང་དང་པོ་སྐྱེ་དགུ་གྲོང་བརྡལ་ནས་ཐོན་ཏེ་ཁྲི་འདུ་དང་། ཆུ་དམར་ལེབ་རྒྱུད་རྨ་སྟོད་རྫོང་དུ་འབྱོར་ཞིང་། ལམ་བར་དུ་གླིང་དཀར་ཁྲ་མོའི་རྟ་རྒྱུག་རྒྱལ་འཇོག་བྱེད་ཡུལ་སོགས་རྗེས་ཤུལ་ལ་རྟོག་ཞིབ་བྱས།

འབྲི་སྟོད་ཀྱི་གེ་སར་སྒྲུང་པ་དང་རྟོག་ཞིབ་ཚོགས་པའི་ཆེད་མཁས་པ་རྣམ་པ།




        ཚོ་ཆུང་གཉིས་པས་སྐྱེ་དགུ་གྲོང་བརྡལ་ནས་ཐོན་ཏེ་རྨ་སྟོད་རྫོང་དུ་བསྐྱོད་ཅིང་། སྒ་སྐྱ་ལོ་སྟོན་པ་རྒྱལ་མཚན་གྱི་མཁར་ཤུལ་སོགས་རྗེས་ཤུལ་ལ་རྟོག་ཞིབ་བྱས།
        སྤྱི་ཟླ་8པའི་ཚེས་6ཉིན། ཚོ་ཆུང་དང་པོ་མཚོ་སྔོན་མགོ་ལོག་དར་ལག་རྫོང་དུ་འབྱོར་ཞིང་། བརྗིད་ཉམས་ལྡན་པའི་གེ་སར་རྒྱལ་པོའི་སྐུ་འདྲ་དང་། འབྲུག་མོ་ཐང་ཆེན། ནིས་ཆུང་མཚོ། ཨ་མྱེ་རྨ་ཆེན་སྤོམ་ར། སྐུ་མཁར་སེང་འབྲུག་སྟག་རྩེ་སོགས་མི་བཟོས་དང་རང་བྱུང་དངོས་དབྱིབས་ལ་རྟོག་ཞིབ་བྱས།
        ཚོ་ཆུང་གཉིས་པས་རྨ་སྟོད་རྫོང་ནས་འབྲི་སྟོད་དང་རྨ་ཆེན་རྫོང་དུ་བསྐྱོད་ཅིང་། རྨ་སྟོད་རྫོང་གྲོང་གི་གླིང་གེ་སར་རྒྱལ་པོའི་ཐང་ཆེན་དང་དེ་བཞིན་ལམ་རྒྱུད་ཀྱི་འབྲེལ་ཡོད་གེ་སར་རིག་གནས་རྗེས་ཤུལ་སྐོར་ལ་རྟོག་ཞིབ་བྱས།
        སྤྱི་ཟླ་8པའི་ཚེས་7ཉིན། ཚོ་ཆུང་དང་པོ་མཚོ་སྔོན་དར་ལག་རྫོང་ནས་ཐོན་ཏེ་དགའ་བདེ་རྫོང་དང་། རྨ་ཆེན་རྫོང་དུ་བསྐྱོད་ནས་འབྲེལ་ཡོད་གེ་སར་རིག་གནས་རྗེས་ཤུལ་འཚོལ་ཞིབ་བྱས།


དར་རི་རྫོང་ཁྲ་གླིང་དགོན་པའི་གེ་སར་རྣམ་ཐར་ཚོགས་པ།


        ཚོ་ཆུང་གཉིས་པས་རྨ་ཆེན་རྫོང་ཁོངས་ཀྱི་གེ་སར་རིག་གནས་དང་འབྲེལ་ཡོད་རྗེས་ཤུལ་སྐོར་ལ་རྟོག་ཞིབ་བྱས། དགོང་མོ་ཚོ་ཆུང་གཉིས་ཐེངས་གཉིས་པ་མཉམ་འཛོམས་བཞུགས་མོལ་ཚོགས་འདུ་དེ་མགོ་ལོག་ཁུལ་ཐོག་ཏུ་འཚོགས་ནས་མྱོང་ཚོར་སྤེལ་རེས་བྱས།
        སྤྱི་ཟླ་8པའི་ཚེས་8ཉིན། ཚོ་ཆུང་དང་པོ་རྨ་ཆེན་རྫོང་ནས་ཐོན་ཏེ་གཅིག་སྒྲིལ་རྫོང་དུ་འབྱོར་ཞིང་། འབྲེལ་ཡོད་གེ་སར་རིག་གནས་རྗེས་ཤུལ་ལ་རྟོག་ཞིབ་བྱས།
        ཚོ་ཆུང་གཉིས་པ་རྨ་ཆེན་རྫོང་གྲོང་ནས་ཐོན་ཏེ་རྨ་ཆུ་རྫོང་ཁོངས་སུ་འབྲེལ་ཡོད་གེ་སར་རིག་གནས་རྗེས་ཤུལ་ལ་རྟོག་ཞིབ་བྱས།
        སྤྱི་ཟླ་8པའི་ཚེས་9ཉིན། ཚོ་ཆུང་དང་པོ་མཚོ་སྔོན་མགོ་ལོག་གཅིག་སྒྲིལ་རྫོང་ནས་ཐོན་ཏེ་གསེར་རྟ་རྫོང་དུ་འབྱོར་ཞིང་། ལམ་རྒྱུད་དུ་པད་མ་རྫོང་དང་། གསེར་རྟ་རྫོང་ཁོངས་ཀྱི་གེ་སར་སྐོར་གྱི་འབྲེལ་ཡོད་རིག་གནས་རྗེས་ཤུལ་ལ་རྟོག་ཞིབ་བྱས།


གསེར་པའི་ཉི་འབུམ་དར་ཡག་གི་མཁར་ཤུལ།

        ཚོ་ཆུང་གཉིས་པ་རྨ་ཆུ་རྫོང་ནས་ཐོན་ཏེ་སི་ཁྲོན་གསེར་རྟ་དང་དཀར་མཛེས་རྫོང་བརྒྱུད་ནས་ལམ་བར་དུ་གེ་སར་རིག་གནས་སྐོར་གྱི་རྗེས་ཤུལ་ལ་རྟོག་ཞིབ་བྱས།


        སྤྱི་ཟླ་8པའི་ཚེས་10ཉིན། ཚོ་ཆུང་དང་པོ་དཀར་མཛེས་ཁུལ་གསེར་རྟ་རྫོང་ནས་ཐོན་ཞིང་ལམ་བར་དུ་དཀར་མཛེས་རྫོང་དང་སྡེ་དགེ་རྫོང་ཁྲོ་པ་ཤང་དུ་སྟག་རོང་དཔོན་པོ་ཁྲོ་ཐུང་གི་མཁར་ཤུལ་སོགས་གླིང་གི་གནའ་ཤུལ་གནའ་རྫས་ལ་རྟོག་ཞིབ་བྱས།
དཀར་མཛེས་རྫོང་གི་གེ་སར་མཁར་གྲོང་།
        ཚོ་ཆུང་གཉིས་པ་དཀར་མཛེས་རྫོང་ནས་ཐོན་ཏེ་སྡེ་དགེ་རྫོང་གི་རྫ་ཁོག་ཤང་དང་། ཉ་འགེ་ཤང་། དབོན་ཐོག་ཤང་། འཁོར་ལོ་མདོ་ཤང་སོགས་བརྒྱུད་ནས། འབྲུ་སྒ་བདེ་ཆོས་སྐྱོང་བེར་ནག་འཁྲུངས་ཡུལ། ཨ་ཁོད་ཐར་པའི་ཟོར་སྣའི་མཁར་ཤུལ། འོམ་བུ་ཨ་ནུ་དཔའ་སེང་གི་མཁར་ཤུལ། ཧོར་གུར་དཀར་རྒྱལ་པོ་དང་འབྲུག་མོའི་བུ་རོ་སྦས་ས་སོགས་རྗེས་ཤུལ་ལ་མཇལ་བ་དང་། དགོང་མོ་སྡེ་དགེ་རྫོང་དུ་འབྱོར།


རྒྱ་ཚའི་དངུལ་ཆུ་ཁྲོ་རྫོང་གི་མཁར་ཤུལ།

        སྤྱི་ཟླ་8པའི་ཚེས་11ཉིན། ཚོ་ཆུང་དང་པོས་སྡེ་དགེ་རྫོང་གི་ལྕང་ར་ཤང་དང་། དཔལ་སྤུངས་གི་དཔའ་རྒྱ་ཚའི་སྐུ་མཁར་དངུལ་ཆུ་ཁྲོ་རྫོང་དང་། འབུམ་པའི་དགྲ་ལྷ་རྩེ་རྒྱལ་གྱི་མཁར་ཤུལ། གླིང་གེ་སར་སྐུ་མཆེད་གསུམ་པོས་རྟ་ཆུ་བླུད་ས། ནུ་བོ་རོང་ཚ་དམར་ལེབ་ཀྱི་ཕོ་བྲང་། འབྲུག་མོ་དང་ནིས་ཆུང་གཉིས་ཀྱི་ཕོ་བྲང་། སི་ཏུ་ཆོས་ཀྱི་འབྱུང་གནས་ཀྱི་འཁྲུངས་ཡུལ། མགོན་ལྕེ་གཤིས། དཔེ་ཝར་དགོན་པའི་རྒྱབ་རིར་བཞུགས་པའི་སྟག་རོང་ཉ་ཚ་ཨ་བརྟན་གྱི་མཁར་ཤུལ། བྱང་ཨ་སྟག་ལྷ་མོའི་ཕོ་བྲང་། རོང་ཚ་དམར་ལེབ་ཀྱི་དུར་ས། དཔའ་ལ་སེང་སྟག་ཨ་དོམ་གྱི་འཁྲུངས་ཡུལ། འཇང་ཕྲུག་གཡུ་ལྷ་ཐོག་འགྱུར་དང་འཇང་སྲས་གཡུ་ཁྲི་གོང་སྔོན་གྱི་སྒར་ཤུལ། གླིང་ཁྲ་མོའི་དགྲ་དམག་བཙོན་འཇུག་བྱེད་ས་སོགས་གྲངས་ལས་འདས་ཤིང་བརྗོད་ཀྱིས་མི་ལང་པའི་གླིང་རྗེ་བློན་གྱི་རྗེས་ཤུལ་ལ་རྟོག་ཞིབ་བྱས།


ཀ་ཐོག་དགོན་དུ་ཉར་ཚགས་བྱས་པའི་རྒྱ་ཚའི་ཡ་ཟི་དཀར་ཕྲན།


        ཚོ་ཆུང་གཉིས་པ་སྡེ་དགེ་རྫོང་གི་དཔེ་ཝར་ཤང་དང་། དཔལ་ཡུལ་ཧོར་པོ་ཤང་བརྒྱུད་ནས་སྟག་རོང་ཨ་ནུ་གཟིགས་འཕེན་གྱི་ཕོ་བྲང་དང་། གླིང་དཀར་ཁྲ་མོའི་གོ་མཚོན་བཟོ་ས། ཀ་ཐོག་དགོན་དུ་བཞུགས་པའི་དཔའ་རྒྱ་ཚ་ཞལ་དཀར་གྱི་རལ་གྲི་ཡ་ཟི་སྐར་ཕྲན་སོགས་གླིང་རྗེ་བློན་གྱི་རྗེས་ཤུལ་ལ་རྟོག་ཞིབ་བྱས། དགོང་མོ་ཚོ་ཆུང་གཉིས་ཀྱིས་སྡེ་དགེ་རྫོང་དུ་ལྷན་འཛོམས་ཀྱི་བཞུགས་མོལ་ཚོགས་འདུ་འཚོགས། ། 


གཉིས་པ། གེ་སར་རྒྱལ་པོའི་ཞབས་རྗེས་འཚོལ་ཞིབ་ཀྱི་དོན་སྙིང་དང་མྱོང་ཚོར།

ཁམས་ཁུལ་དུ་བསྐྱོད་ནས་གེ་སར་གྱི་རྗེས་ཤུལ་འཚོལ་བའི་རྟོག་ཞིབ་ཚོགས་པའི་ཕྱོགས་བསྡོམས་ཚོགས་འདུ།


         ཏང་གི་ཚོགས་ཆེན་བཅོ་བརྒྱད་པ་འཚོགས་ཚུན། བློ་མཐུན་ཞི་ཅིན་ཕིང་གིས་སྲོག་ཤིང་གནང་བའི་ཏང་ཀྲུང་དབྱང་གིས་མི་རིགས་ཀྱི་སྲོལ་རྒྱུན་རིག་གནས་ལ་ཧ་ཅང་མཐོང་ཆེན་པོ་གནང་ཡོད། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་དཔའ་བོའི་ལོ་རྒྱུས་སྙན་ངག་གླིང་གེ་སར་རྒྱལ་པོའི་སྒྲུང་གི་སྐོར་བཀའ་སློབ་ཐེངས་མང་གནང་ཡོད། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས། གཞི་རྩ་མི་བརྗེད་པར་གཞི་ནས་འབྱུང་འགྱུར་གསར་གཏོད་བྱེད་ཐུབ་པ་དང་། རྒྱུན་འཛིན་ཡག་པོ་བྱུང་ན་གཞི་ནས་དེ་བས་ལེགས་པའི་གསར་གཏོད་བྱེད་ཐུབ་ཅེས་གསུངས་ཡོད་ཅིང་། ཕུལ་བྱུང་གི་སྲོལ་རྒྱུན་རིག་གནས་ནི་རྒྱལ་ཁབ་དང་མི་རིགས་གོང་འཕེལ་གྱི་རྩ་བ་ཡིན་པ་སྨོས་མེད་རེད། ཚད་མཐོའི་རིག་གནས་ཀྱི་བློ་སྤོབས་མེད་ན། རིག་གནས་དར་རྒྱས་ཞེས་པ་གླེང་ཐབས་བྲལ་བ་དང་། ཀྲུང་ཧྭ་མི་རིགས་ཀྱི་རླབས་ཆེན་བསྐྱར་དར་ཞེས་པ་བརྗོད་ཐབས་བྲལ་ཞེས་ནན་སྟོན་གནང་ཡོད། དེར་བརྟེན་ཐེངས་འདིའི་གེ་སར་ཞབས་རྗེས་འཚོལ་ཞིབ་བྱེད་སྒོ་ནི་ཧ་ཅང་དོན་སྙིང་ཆེན་པོ་ལྡན་པ་ཞིག་ཡིན་ཞིང་། སྐད་གྲགས་ལྡན་པའི་གེ་སར་རིག་གནས་ཞིབ་འཇུག་པ་སྐུ་ཞབས་ནོར་སྡེ་ལགས་ཀྱིས་གསུངས་པ་ལྟར། བྱེད་སྒོ་འདིས་གེ་སར་རིག་གནས་པས་ས་གནས་དངོས་སུ་བརྟག་དཔྱད་བྱེད་པ་བརྒྱུད་གསོན་ཉམས་ལྡན་པའི་རྒྱུ་ཆ་འཚོལ་བསྡུ་བྱས་ནས་གེ་སར་རིག་གནས་ལ་ཞིབ་འཇུག་བྱ་རྒྱུ་དང་། རྒྱལ་ཡོངས་ཀྱི་གེ་སར་རིག་གནས་འབྱུང་ཁམས་སྣེ་མང་རང་བཞིན་གྱིས་གོང་འཕེལ་འགྲོ་རྒྱུར་ཞིང་ས་གཤིན་པོ་མཁོ་འདོན་བྱུང་བ་མ་ཟད། རྒྱལ་ཡོངས་ཀྱི་གེ་སར་རིག་གནས་ཐོན་ཁུངས་སྔོག་འདོན་དང་སྲུང་སྐྱོང་། གོང་འཕེལ་བཅས་གཏང་རྒྱུར་ཡང་ལག་ལེན་དངོས་ཀྱི་ཉམས་མྱོང་ཕུན་སུམ་ཚོགས་པོ་མཁོ་འདོན་བྱུང་ཡོད།


སྡེ་དགེ་རྫོང་གིས་གེ་སར་གནའ་སྒྲུང་དཔེ་ཚོགས་འགྲེམས་སྤེལ་བྱེད་བཞིན་པ།


        ཚང་མས་མཁྱེན་གསལ་ལྟར། གླིང་གེ་སར་རྒྱལ་པོའི་སྒྲུང་ནི་འཛམ་གླིང་ཐོག་ཆེས་རིང་ཤོས་ཀྱི་དཔའ་བོའི་ལོ་རྒྱུས་སྙན་ངག་གི་མཚན་སྙན་ཐོབ་པ་ཞིག་ཡིན་ཞིང་། སྤྱི་ལོ་2009ལོར་མཉམ་འབྲེལ་རྒྱལ་ཚོགས་སློབ་གསོ་ཚན་རིག་རིག་གནས་སྒྲིག་འཛུགས་ཀྱི་མིའི་རིགས་ཀྱི་དངོས་མིན་རིག་གནས་ཤུལ་བཞག་འཐུས་ཚབ་མིང་ཐོའི་ནང་བཅུག་ཡོད། དེ་ཡང་གནའ་བོའི་བོད་ཀྱི་དམངས་ཁྲོད་རིག་གནས་དང་ངག་ཐོག་དོན་བརྗོད་སྲོལ་རྒྱུན་གྱི་གྲུབ་འབྲས་ཆེ་ཤོས་མཚོན་ཡོད་ཅིང་། བོད་ཀྱི་རིག་གནས་ཀྱི་ཤེས་བྱ་ཀུན་འདུས་ཞེས་བརྗོད་བཞིན་ཡོད། ཁམས་ཁུལ་ནི་གེ་སར་རིག་གནས་ཀྱི་རྨང་གཞི་གཏིང་ཟབ་པའི་ཡུལ་གྲུ་ཞིག་ཡིན་ཞིང་། གང་སར་གླིང་གེ་སར་སྐོར་གྱི་ངག་རྒྱུན་གཏམ་རྒྱུད་དང་། གནའ་ཤུལ་གནའ་རྫས་ཀྱིས་ཁེངས་པ་དང་། གྲགས་ཅན་སྒྲུང་པ་མང་པོ་ཕེབས་པའི་ཡུལ་གྲུ་ཞིག་ཡིན་པས། ད་རེས་གླིང་གེ་སར་གྱི་ཞབས་རྗེས་འཚོལ་ཞིབ་བྱེད་སྒོ་འདི་འདྲ་ཞིག་སྤེལ་བ་ནི་དོན་སྙིང་ཆེན་པོ་ལྡན་པ་ཞིག་ཡིན། དེ་ཡང་ཀྲུང་དབྱང་གི་ཀྲུང་ཧྭའི་ཕུལ་བྱུང་སྲོལ་རྒྱུན་རིག་གནས་རྒྱུན་འཛིན་གོང་འཕེལ་གཏང་རྒྱུའི་སྐོར་གྱི་ཐབས་ཇུས་བཀོད་སྒྲིག་ལག་བསྟར་བྱེད་པའི་ཞིབ་ཕྲའི་བྱ་ཐབས་ཤིག་ཡིན་ལ། རིག་གནས་བློ་སྤོབས་ཆེ་རུ་གཏོང་བ་དང་། རིག་གནས་ངོས་འཛིན་གཅིག་མཐུན་ཆེ་རུ་གཏོང་བའི་ཞིབ་ཕྲའི་མངོན་ཚུལ་ཞིག་ཀྱང་ཡིན་པས། ཁམས་ཁུལ་འབྲེལ་ཡོད་ས་གནས་ཀྱི་ལས་བྱེད་མང་ཚོགས་ཀྱི་མི་རིགས་རིག་གནས་ཀྱི་རང་རྟོགས་དང་རིག་གནས་བློ་སྤོབས་སྔར་བས་ཆེ་རུ་སོང་བ་དང་། གེ་སར་རིག་གནས་འཛིན་སྐྱོང་སྤེལ་གསུམ་བྱ་རྒྱུར་རྨང་གཞི་བརྟན་པོ་ཞིག་བཏིངས་ཡོད།
        དེ་ཡང་རྟོག་ཞིབ་ཚོ་ཆུང་གི་ཁོངས་མི་མཁས་དབང་ཀརྨ་རྒྱལ་མཚན་ལགས་ཀྱིས་གསུངས་པ་ལྟར་གེ་སར་གྱི་རྗེས་ཤུལ་རིག་གནས་ནི་བོད་མི་རིགས་ཀྱི་དམངས་ཁྲོད་རིག་གནས་ཀྱི་གྲུབ་ཆ་གལ་ཆེན་ཞིག་ཡིན་པས་གལ་སྲིད་ཡུལ་དངོས་སུ་བསྐྱོད་ནས་བརྟག་དཔྱད་ཞིབ་འཇུག་མ་བྱས་ན་གླིང་གི་རྗེས་ཤུལ་གཏམ་རྒྱུད་ལ་རྒྱུས་མངའ་ཡང་དག་པར་མི་ཡོང་བས་ད་ཐེངས་ཀྱི་ཁམས་ཁུལ་དུ་བསྐྱོད་ནས་གླིང་གེ་སར་གྱི་རྗེས་ཤུལ་འཚོལ་བའི་བྱ་འགུལ་འདི་ལ་དོན་སྙིང་གལ་ཆེན་ལྡན་ཡོད་པ་ཞིག་རེད་ཅེས་གསུངས་པ་ལྟར་ལགས།
        ཉིན་བཅུ་གཅིག་རིང་གི་འཚོལ་ཞིབ་བྱེད་སྒོ་བྲེལ་བྲེལ་འཚུབ་འཚུབ་ངང་ནས་མཇུག་འགྲིལ་ཞིང་། དུས་ཡུན་ཐུང་ཡང་ནང་དོན་ཕུན་སུམ་ཚོགས་པའི་འཚོལ་ཞིབ་བྱས་པར་བརྒྱུད། གེ་སར་རིག་གནས་ཀྱི་ཆེད་མཁས་རྣམ་པར་མྱོང་ཚོར་ཆེན་པོ་བྱུང་བ་དང་གྲུབ་འབྲས་ཀྱང་མང་པོ་ཐོབ་ཡོད། གལ་སྲིད་ཐེངས་འདིའི་གེ་སར་ཞབས་རྗེས་འཚོལ་ཞིབ་བྱེད་སྒོར་མཇུག་བསྡོམས་ཞིག་བཟོས་པ་ཡིན་ན། གཟབ་རྒྱས་ཆེ་ལ་སྤྲོ་སྣང་འཕེལ་བའི་རྡོག་ཐོན་མཛད་སྒོ་དང་། བཀོད་སྒྲིག་ཞིབ་ཚགས་ལུགས་མཐུན་གྱི་འཚོལ་ཞིབ་བཅར་འདྲིའི་བརྒྱུད་རིམ། ལྗིད་ཏིག་ཏིག་གྲུབ་འབྲས་ཀྱི་ཐོག་ནས་མཇུག་བསྒྲིལ་བ་བཅས་ཡིན་ལ། དེ་བས་ཀྱང་འགན་གཉེར་སྡེ་ཚན་གྱིས་འཐུས་སྒོ་ཚང་ཞིང་ཞིབ་ཚགས་ལྡན་པའི་བཀོད་སྒྲིག་དང་སེམས་རྩ་འཁོལ་བའི་སྣེ་ལེན་གནང་བ་དང་། འཚོལ་ཞིབ་བྱེད་སྒོར་ཞུགས་མཁན་ཆེད་མཁས་རྣམས་ཀྱི་དཀའ་སྤྱད་སྙིང་རུས་དང་། རྩེར་སོན་གྱི་ཆེད་ལས་བྱང་ཚད། གཟབ་ནན་ཆེ་བའི་རིག་གནས་བརྩོན་ཞིབ་ཀྱི་སྙིང་སྟོབས་བཅས་ཀྱིས་བག་ཆགས་ཟབ་མོ་དང་མིག་དཔེ་བཟང་པོ་བཞག་པ་དེ་ཡིན། །


གསུམ་པ། གེ་སར་རྒྱལ་པོའི་ཞབས་རྗེས་འཚོལ་ཞིབ་བྱེད་སྒོར་ཐོབ་པའི་གྲུབ་འབྲས་དང་ གྲོས་འཆར།



དར་རི་རྫོང་གིས་བཞེངས་པའི་མཁར་སེང་འབྲུག་སྟག་རྩེ།


གཅིག གེ་སར་རིག་གནས་ཐོན་ཁུངས་སྲུང་སྐྱོབ་དང་སྔོག་འདོན་སྔར་ལས་ལྷག་པ་བྱས་ནས་གེ་སར་རིག་གནས་ཀྱི་མཚོན་རྟགས་གཏོད་རྒྱུར་ནུས་འབྲས་ཆེན་པོ་ཐོན་པ།

        ཁམས་ཁུལ་གྱི་གེ་སར་རིག་གནས་ཐོན་ཁུངས་སྲུང་སྐྱོབ་དང་གསར་སྤེལ་བྱ་རྒྱུ་དེ་རིག་གནས་བྱ་གཞག་དང་རིག་གནས་ཐོན་ལས་གོང་འཕེལ་གཏང་རྒྱུའི་ངོས་ནས་བརྗོད་ན་ཧ་ཅང་གལ་ཆེ་བར་མཐོང་ཞིང་། རིག་གནས་བྱ་གཞག་གམ་ཡང་ན་རིག་གནས་ཐོན་ལས་གང་ཞིག་ཡིན་རུང་རིག་གནས་ཐོན་ཁུངས་ཀྱི་རིན་ཐང་ཆེ་ཤོས་མངོན་ཐུབ་པ་བྱས་ཚེ་གཞི་ནས་རིག་གནས་བྱ་གཞག་དང་རིག་གནས་ཐོན་ལས་སྐྱོན་བྲལ་དང་། རྒྱུན་མཐུད་ཀྱིས་གོང་འཕེལ་འགྲོ་ཐུབ་པ་ཞིག་རེད། དེར་བརྟེན། ཐེངས་འདིའི་གླིང་གེ་སར་གྱི་ཞབས་རྗེས་འཚོལ་ཞིབ་བྱེད་སྒོ་དེ་ས་ཁོངས་བརྒལ་བའི་ཐོག་ནས་སྤེལ་བ་ནི་འབྲེལ་ཡོད་ས་གནས་ཀྱིས་ཕུན་སུམ་ཚོགས་པའི་གེ་སར་རིག་གནས་ཐོན་ཁུངས་སྲུང་སྐྱོབ་དང་གསར་སྤེལ་བྱ་རྒྱུར་དོན་སྙིང་ཆེན་པོ་ལྡན་པའི་ཚོད་ལྟ་ཞིག་ཡིན་ཞེས་བརྗོད་ཆོག །ད་ཐེངས་རྟོག་ཞིབ་བྱེད་སྒོའི་རིང་འདིས་སྔ་ཕྱིར་མཚོ་སྔོན་མགོ་ལོག་དང་། ཡུལ་ཤུལ་དེ་བཞིན་སྡེ་དགེ་བཅས་སུ་ཆེད་མཁས་ཀྱི་བཞུགས་མོལ་ཚོགས་འདུ་ཐེངས་གསུམ་ཙམ་འཚོགས་པ་དང་། བཞུགས་མོལ་ཚོགས་འདུའི་ཆེད་མཁས་རྣམ་པས་རང་རང་སོ་སོའི་མྱོང་ཚོར་དངོས་ཀྱི་ཐོག་ནས་དྲན་ཚོར་དང་གྲོས་འཆར་མང་པོ་གསུངས་ཡོད། ཆེད་མཁས་རྣམ་པས་ཐེངས་འདིའི་གེ་སར་ཞབས་རྗེས་འཚོལ་ཞིབ་བྱེད་སྒོ་འདི་འདྲ་ཞིག་སྤེལ་བའི་ཐོག་ནས་དཀར་མཛེས་བོད་རིགས་རང་སྐྱོང་ཁུལ་ཨུ་དང་ཁུལ་སྲིད་གཞུང་གིས་བོད་ཀྱི་ཕུལ་བྱུང་སྲོལ་རྒྱུན་རིག་གནས་རྒྱུན་འཛིན་གོང་སྤེལ་གཏང་རྒྱུར་མཐོང་ཆེན་གནང་བ་གང་ལེགས་མངོན་པའི་ངོས་འཛིན་གཅིག་གྱུར་གནང་ཡོད། དེ་དང་ཆབས་ཅིག་མཚོ་སྔོན་སོགས་སྡེ་འབྲེལ་ས་ཁུལ་གྱི་ཏང་ཨུ་དང་སྲིད་གཞུང་ནས་གེ་སར་རིག་གནས་ཐད་སྔར་ན་མེད་པའི་མཐོང་ཆེན་བྱེད་པ་དང་མ་དངུལ་ཐད་ནས་རྒྱབ་སྐྱོར་ཤུགས་ཆེན་བྱེད་པའི་གནས་ཚུལ་ཡང་མཐོང་ཡོད། དཔེར་ན་མཚོ་སྔོན་ཞིང་ཆེན་ཡུལ་ཤུལ་བོད་རིགས་རང་སྐྱོང་ཁུལ་གྱིས་མུ་འབྲེལ་གེ་སར་རིག་གནས་བརྩམ་བྱའི་ལས་གཞི་ལག་བསྟར་བྱས་པ་མ་ཟད། ཡུལ་ཤུལ་བོད་རིགས་རང་སྐྱོང་ཁུལ་གྱི་གལ་ཆེའི་རིག་གནས་ལས་གཞི་གེ་སར་རྣམ་གྲངས་ཀྱི་ལོ་ལྔའི་ལག་བསྟར་ཇུས་གཞི་བཟོས་པ། མཚོ་སྔོན་ཞིང་ཆེན་མགོ་ལོག་བོད་རིགས་རང་སྐྱོང་ཁུལ་དར་ལག་རྫོང་གིས་མ་དངུལ་སྒོར་དུང་ཕྱུར་བཞི་ཙམ་བཏང་ནས་གླིང་གེ་སར་རྒྱལ་པོའི་ཕོ་བྲང་སེང་འབྲུག་སྟག་རྩེ་རྫོང་གསར་བཞེངས་མཛད་པ། དཀར་མཛེས་རྫོང་གིས་སྒོར་དུང་ཕྱུར་6.3ཙམ་བཏང་ནས་བཞེངས་པའི་གེ་སར་་ཁར་གྲོང་སོགས་གང་སར་གེ་སར་རིག་གནས་ཀྱི་མཚོན་རྟགས་ཡོད་པ་དང་། གེ་སར་རིག་གནས་ཀྱི་སྣང་ཚུལ་མཐོང་རྒྱུ་ཡོད་པ་རེད།


རྒྱལ་ཡོངས་གེ་སར་གཞུང་ལས་ཁང་གི་ཀྲུའུ་རེན་གཞོན་པ་འཇམ་དབྱངས་ཆོས་སྒྲོན་གྱིས་ཕྱོགས་བསྡོམས་གནང་བཞིན་པ།


གཉིས། གེ་སར་རིག་གནས་ཐོན་ཁུངས་དང་ས་གནས་དེ་གའི་ཡུལ་སྐོར་ཐོན་ལས་ཟུང་འབྲེལ་བྱ་དགོས་པ།
        རིག་གནས་ནི་ཡུལ་སྐོར་གྱི་བླ་སྲོག་ཡིན་པ་དང་། ཡུལ་སྐོར་ནི་རིག་གནས་ཀྱི་འདྲེན་བྱེད་དངོས་པོ་ལྟ་བུ་ཡིན། འབྲེལ་ཡོད་ཆེད་མཁས་རྣམ་པས་སི་ཁྲོན་དཀར་མཛེས་ཁུལ་དང་ཁྱད་པར་དུ་གླིང་གེ་སར་གྱི་འཁྲུངས་ཡུལ་སྡེ་དགེ་ནས་གེ་སར་རིག་གནས་ཀྱི་ཐོན་ཁུངས་ཧ་ཅང་ཕུན་སུམ་ཚོགས་པོ་སྔོག་འདོན་དང་རྒྱུན་འཛིན་བྱ་རྒྱུའི་ཐད་དགོངས་འཆར་དང་གྲོས་འགོ་མང་པོ་བཏོན་ཡོད་དེ། དཔེར་ན་གེ་སར་རིག་གནས་ཡུལ་སྐོར་གྱི་ལམ་ཐིག་བཟོས་ནས་གེ་སར་རིག་གནས་རྗེས་ཤུལ་ལྗོངས་རྒྱུ་དང་། གེ་སར་རིག་གནས་རྗེས་ཤུལ་མྱོང་རོལ་ལམ་ཞེས་པ་དང་། སྒྲུང་པ་དང་མཉམ་བསྐྱོད་ཀྱི་གེ་སར་རིག་གནས་མྱོང་རོལ་བྱེད་ཅེས་པ་ལྟ་བུའི་རིག་གནས་ཡུལ་སྐོར་སྒྲིག་འཛུགས་བྱ་དགོས་པ། འབྲེལ་ཡོད་སྡེ་ཚན་ནས་གེ་སར་རིག་གནས་ཞིབ་འཇུག་ལ་མཐོང་ཆེན་བྱེད་པ་དང་། གེ་སར་རིག་གནས་ཞིབ་འཇུག་པ་དང་གེ་སར་རིག་གནས་ལ་དགའ་ཞེན་བྱེད་མཁན་ལ་གཅེས་སྐྱོང་དང་རྒྱབ་སྐྱོར་གནང་དགོས་པ། མིག་སྔའི་གེ་སར་རིག་གནས་ཞིབ་འཇུག་གི་རྨང་གཞི་ལེགས་པོ་ཡོད་པའི་ཐོག་རྗེས་སུ་རྩོམ་རིག་དང་། དམངས་སྲོལ། ལོ་རྒྱུས། གནའ་རྫས་རྟོག་ཞིབ། གླིང་སྒྲུང་གི་སྒྲུང་པ་སོགས་གེ་སར་རིག་གནས་ཀྱི་རིགས་དབྱེ་ནས་ཞིབ་འཇུག་བྱ་རྒྱུར་ཤུགས་སྣོན་རྒྱག་དགོས་པ། དེང་རབས་ཚན་རིག་ཤེས་བྱ་དང་ལག་རྩལ་ཐོག་ནས་གེ་སར་རིག་གནས་ཀྱི་གནའ་ཤུལ་གནའ་རྫས་ལ་ཞིབ་འཇུག་བྱས་ནས་སྡེ་དགེའི་ཡུལ་སྐོར་ཐོན་ལས་དང་ཟུང་འབྲེལ་དམ་ཟབ་བྱེད་དགོས་པ། དཔེར་ན་གླིང་གེ་སར་གྱི་ལོ་རྒྱུས་རི་མོ་ཆ་ཚང་དང་དཔའ་ཐུལ་ཕུ་ནུ་སུམ་ཅུ་མ་སྲུ་མོ་སྨན་དང་བཅས་པའི་བཟོ་རྩལ་ཚད་ལྡན་ཅན་གྱི་སྡེ་དགེ་ཨ་ཕྱུག་རིག་དངོས་བཤམས་སྟོན་ཁང་ལྟ་བུ་མགྱོགས་པོ་བཞེང་དགོས་པ། སེར་ཤུལ་རྫོང་བ་རོང་གྲོང་ཚོའི་གླིང་རྗེ་བློན་རྣམས་ཀྱི་ཆུ་ཚན་གསར་སྤེལ་བྱ་རྒྱུ་སོགས་ཀྱི་དགོངས་འཆར་དང་གྲོས་འགོ་མང་པོ་བཏོན་ཡོད། དགོངས་འཆར་དང་གྲོས་འགོ་དེ་དག་གིས་ཕྱིན་ཆད་སྡེ་དགེའི་གེ་སར་རིག་གནས་ཞིབ་འཇུག་སྔར་བས་གཏིང་ཟབ་ཏུ་འགྲོ་རྒྱུ་དང་། གྲུབ་འབྲས་གཡུར་དུ་ཟ་བ་ཐོབ་རྒྱུར་ཕན་ཐོགས་ཡོང་ངེས་རེད།
        གོང་དུ་སོང་བ་ལྟར་གེ་སར་རིག་གནས་ནི་ཁམས་ཁུལ་གྱི་རིག་གནས་མཚོན་རྟགས་གྲགས་ཅན་ཞིག་ཡིན་པ་དང་། ཁམས་ཁུལ་གྱི་གཟུགས་མེད་རྒྱུ་ནོར་རྩ་ཆེན་ཞིག་ཡིན་པས། མཚོན་རྟགས་དེ་དོན་གཉེར་ཡག་པོ་བྱས་ན་ཁམས་ཁུལ་གྱི་དཔལ་འབྱོར་དང་ཡུལ་སྐོར་ལས་རིགས་གོང་འཕེལ་ལ་དོན་སྙིང་ཟབ་མོ་ལྡན་པ་ཞིག་ཡིན། ད་ཐེངས་དཀར་མཛེས་བོད་རིགས་རང་སྐྱོང་ཁུལ་ནས་སྒྲིག་འཛུགས་གནང་བའི་ཁམས་ཁུལ་དུ་བསྐྱོད་ནས་གླིང་གེ་སར་རྒྱལ་པོའི་ཞབས་རྗེས་འཚོལ་བའི་བྱེད་སྒོ་ནི་གེ་སར་རིག་གནས་ཀྱི་མཚོན་རྟགས་མངོན་པར་བྱེད་པའི་དཔེ་མཚོན་ཡག་པོ་ཞིག་ཏུ་གྱུར་ཡོད།
        མདོར་ན་ཐེངས་འདིའི་བྱེད་སྒོ་འདིས་ཁམས་ཁུལ་གྱི་གེ་སར་རིག་གནས་ཐོན་ཁུངས་སྡེབ་སྒྲིག་བྱས་པ་བརྒྱུད་གེ་སར་རིག་གནས་ཞིབ་འཇུག་གི་ཆེད་མཁས་རྣམས་ལ་བར་ཐག་ཉེ་པོས་གླིང་གེ་སར་རྒྱལ་པོའི་ཞབས་རྗེས་མྱོང་རོལ་བྱེད་པའི་སྟེགས་བུ་བཟང་པོ་ཞིག་བསྐྲུན་པ་དང་། ཀྲུང་གོ་གསར་པ་དབུ་བརྙེས་ནས་ལོ་ངོ་70འཁོར་བ་དང་། ལྷག་པར་དུ་ཏང་གི་ཚོགས་ཆེན་བཅོ་བརྒྱད་པ་འཚོགས་ཚུན་འབྲེལ་ཡོད་ས་གནས་ཀྱི་གེ་སར་རིག་གནས་ཞིབ་འཇུག་ཁྱབ་ཁོངས་ནང་ཐོབ་པའི་གཡུར་དུ་ཟ་བའི་གྲུབ་འབྲས་མངོན་པ་དང་། གླིང་གེ་སར་འཁྲུངས་ཡུལ་གྱི་གེ་སར་རིག་གནས་མཚོན་རྟགས་བསྐྲུན་རྒྱུར་རྨང་གཞི་བཟང་པོ་ཞིག་བཏིངས་ཡོད། །  



དྲ་ཚིགས་འདིའི་པར་དབང་གངས་ལྗོངས་ཉི་གཞོན་དྲ་བར་དབང་བས་ཕན་ཚུན་ལ་དབང་བཅོལ་མ་བྱས་གོང་རང་དགར་མི་སྤྱོད་པར་མཁྱེན།
དྲ་ཚིགས་དཔང་རྟགས། 蜀ICP备14009601号-1