གཙོ་ངོས།>> རྩོམ་རིག>>སྙན་རྩོམ།

དུར་མིག རྩོམ་སྒྲིག་པ།ཡོང་ཁུངས།ངེད་དྲ་བ། སྤེལ་དུས། ༢༠༡༩ལོའི་ཟླ་བ་༡༢ཚེས་༣༡ཉིན།

༄༅།། རི་ཁྲོད་ནང་གི་ལ་གཞས།


དུར་མིག
སྔ་དུམ།

གཙང་བོ་ཁ་ཞེངས་ཆེ་ས། །
བརྩེ་བ་ཆུ་མིག་དགུ་སྒྲིལ། །
མཚོ་མཐའི་གླུ་སྐད་ནང་ལ། །
ལས་ཀྱི་མེ་ཏོག་བཏབ་ཡོད། །
གྱང་རྙིང་ནང་གི་གླག་རྒོད། །
འཕུར་འགྲོ་བསམ་ན་སྐྲག་གི །
ཞོགས་པའི་ཉི་ཟེར་འཆར་ཚེ། །
རྣ་ལོང་ཆ་ཡ་འགུལ་འདུག །
ཕ་ཡུལ་ནམ་མཁའ་མཐོང་ན། །
ཆུང་འདྲིས་རྟག་པར་དྲན་ངེས། །
བདག་མོ་མེད་པའི་གུར་ཆུང་། །
འཁོར་བའི་ཐབ་ཚང་ཆུ་རེད། །
ཉི་འོད་ཁ་དོག་འཚེར་བཞིན། །
ཤེལ་སྒོའི་ཕྱི་ནང་གཉིས་ལ། །
དོ་དགོང་སྐད་ཆ་བཤད་པ། །
ཚེ་ཡི་ཐག་པ་བསླས་འོངས། །
དབྱར་ཟླ་བརྒྱད་པའི་ནང་ལ། །
ཆུ་དང་ཆར་བ་འཛོམས་སྲིད། །
མིག་ཆུ་ཁོག་ཏུ་མིད་བཞིན། །
གླུ་ཚིག་ནང་ལ་བླངས་ཡོང་། །
དགོན་གྲྭའི་བར་ཤག་ནང་དུ། །
ཏིང་འཛིན་རོལ་མོ་དཀྲོལ་བ། །
སྐྱིད་སྡུག་ངག་ལ་བཀུག་པའི། །
ཚེ་གང་སྐྱབས་འཇུག་ཞུས་ཡོད། །
བར་དུམ།

ས་སྲོད་ནང་གི་བསང་མེ། །
བྲག་ཐོག་འདི་ནས་སྒྲོན་པ། །
བདག་གི་ཕུག་རོན་དཀར་པོ། །
རྩྭ་སྐྱ་ཁམ་གང་བཟུང་འདུག །
འབྲོག་སྡེའི་རི་སྒོ་རླུང་རེད། །
སེམས་ཁྲལ་ལྷག་མ་ཞིག་ལ། །
ལུག་ཁྱུ་སྨུག་ལ་འདྲེས་ཉིན། །
དྲན་པའི་ལྕགས་ཀྱུ་ཁྱོད་ཡིན། །
མཚན་མོའི་འོད་ཀོར་ནང་ལ། །
ལྷ་སའི་སྲང་ལམ་བྲིས་ཡོད། །
སྐྱིད་ཆུའི་འགྲམ་ངོགས་དེ་རུ། །
མིག་ཟུང་མཉམ་དུ་ཨེ་ཡོད། །
གནམ་གཤིས་ཧ་ཅང་འཁྱག་ན། །
སྔར་བཞིན་སེམས་ཁུར་ཨེ་བྱས། །
ལམ་འགྲམ་ཆུ་འཁྱིལ་ཞིག་ནས། །
ཞལ་ངོ་བཙལ་ནས་རྙེད་དགོས། །
ལྷགས་རླུང་ནང་གི་དར་ཐག །
རྟ་ཕོ་རྐྱང་དཀར་རྒྱུག་ཡོང་། །
ལམ་གྱི་ཟམ་པར་ཁེན་བཞིན། །
རྒྱུག་ཆུའི་གཞུང་ལ་བལྟས་ཡོད། །
སེམས་ཀྱི་ཉིན་སྲིབ་མཚམས་སུ། །
ཉི་ཤུའི་སྣང་བ་དགུང་ཡིན། །
ཐང་གི་འཕྲིན་པ་འབྲི་བཞིན། །
འུ་གཉིས་རྨི་ལམ་གཅིག་རེད། །

ཕྱི་དུམ།
དབྱིངས་ན་འཕུར་བའི་བྱ་ཁྱུ། །
གང་ནས་ཡོང་བ་ཡིན་ནམ། །
ཉིན་མཚན་གཉིས་ཀྱི་སྐྱོ་བ། །
ཆུ་གཙང་ནང་དུ་བཀྲུ་ཆོག །
ཕྱི་མིག་ནང་གི་མཚན་མོ། །
བྱུ་རུའི་སྡོང་བོ་སྐྱེས་ཡོད། །
འདོད་པའི་མེ་ཏོག་ངུ་བ། །
ད་ནི་གཞིས་ཀ་ཚེས་དགོས། །
སྐར་ཁུང་འགྲམ་གྱི་བྱང་ཐང་། །
མ་འོངས་འཚོ་བ་ཆགས་པ། །
མི་ཚེའི་སྐྱ་ཡ་གྲགས་འོང་། །
ཡོལ་བའི་རྒྱབ་ལ་གབ་འདུག །
འུར་ཆ་ཁུར་བའི་རྫི་རོགས། །
སྐྱོ་སྡུག་གླུ་ཆུང་ལེན་ས། །
ཚེ་སྔོན་ལས་འཕྲོ་དེ་ལ། །
འགྲོ་ཞོར་ཆར་བ་ཤག་ཤག །
མེ་ཏོག་རླུང་གིས་བཏུས་པ། །
དགའ་བོ་ཡོང་བ་ཁྱོད་ཡིན། །
ཞེན་ཆགས་འདུན་པ་དཀར་པོ། །
ཚོར་བའི་གཤོག་པ་གཡུ་རེད། །
རི་བོང་རྣ་ཅོག་མཐོང་ཉིན། །
འབུད་ཤིང་བཏུ་ནས་ང་ཐོན། །
མེ་ཁ་གསོ་མཁན་ཁྱོད་ཡིན། །
འབྲོག་ལུང་སྡེ་བའི་སྐྱིད་རེད། །  

39.7K

ཐག་རག་ཡིག་བསྒྱུར་མ་ལག

དྲ་ཚིགས་འདིའི་པར་དབང་གངས་ལྗོངས་ཉི་གཞོན་དྲ་བར་དབང་བས་ཕན་ཚུན་ལ་དབང་བཅོལ་མ་བྱས་གོང་རང་དགར་མི་སྤྱོད་པར་མཁྱེན།
དྲ་ཚིགས་དཔང་རྟགས།蜀ICP备14009601号-1