གཙོ་ངོས།>> རྩོམ་རིག>>སྙན་རྩོམ།

ཁྲི་སེམས་དཔའ། རྩོམ་སྒྲིག་པ།ཚེ་དཔལ། ཡོང་ཁུངས།ངེད་དྲ་བ། སྤེལ་དུས། ༢༠༢༠ལོའི་ཟླ་བ་༠༣ཚེས་༡༢ཉིན།

༄༅།། རྟའུ་ལ་ཕུལ་བ།


ཁྲི་སེམས་དཔའ།
རྟའུ་ནི་སི་ཁྲོན་ཞིང་ཆེན་གྱི་ཡིན་པར་བསམས་ན།
དེ་ནི་ཧ་ཅང་རྒྱང་རིང་ཞིག་སྟེ།
རི་ཆུ་ཁྲི་ཕྲག་གི་ཕ་རོལ་ཏུ།
རྟའུ་ནི་བོད་ཀྱི་ཡིན་པ་དྲན་དུས།
དེ་ནི་དེ་འདྲའི་ཉེ་བ་ལ་ཨང་།
ལག་པ་བརྐྱངས་པ་ཙམ་གྱིས་མྱོང་རེག་ཐུབ་པ་ཞིག
སེམས་ལ་བསྒོམས་པ་ཙམ་གྱིས་ན་ཟུག་སྐྱེས་འོངས་པ་ཞིག
མིག་ལ་ཐོགས་པ་ཙམ་གྱིས་མཆི་མ་འཐོར་འགྲོ་བ་ཞིག
……

ངའི་རྟའུ་ཡི་སྤུན་ཟླ། 
ངས་བཤད་འདོད་པ་ཐམས་ཅད་ཁྱོད་ཀྱིས་གསལ་བོར་རྟོགས་ཡོད།
ངའི་སྡུག་བསྔལ་དུ་རློམ་པ་ཡོད་ཚད་ཁྱོད་ཀྱིས་སྔར་ནས་མྱངས་ཟིན།
ཁྱེད་རང་རླུང་འཚུབ་ཀྱི་དཀྱིལ་སྙིང་དུ་ལུས་ཏེ།
ཁ་ཆར་གྱི་འཇབ་རྒོལ་སེམས་ལ་ཕོག
ཁྱེད་ཀྱིས་འཇིགས་དངངས་ཀྱི་ཟབ་སར་འགྲེ་ལྡོག་རྒྱག་བཞིན།
བསླུ་མེད་ཀྱི་དཀོན་མཆོག་ལ་རེ་ཞིང་བསྒུགས།
རྟའུ་ཡ། གྲོགས་མེད་ཁེར་རྐྱང་དུ་ལུས་པ་ཁྱོད་ཁོ་ན་མིན།
ངས་ཡིག་དྲུག་གི་དབྱངས་རྟ་རྟའུའི་ཕྱོགས་སུ་འཕུར་བ་མཐོང་བྱུང་།
ངས་སེམས་ཁྲལ་གྱི་མིག་ཆུ་རྟའུའི་ཕྱོགས་སུ་བཞུར་བ་མཐོང་བྱུང་།
རྟའུ་ཡི་སྤུན་ཟླ། དགུན་ཁ་འདི་རྙི་ལ་ཚུད་སོང་།
རྙི་འཛུག་མཁན་དེ་སུ་ཡིན་ནམ།
རྟའུ་ཡི་སྤུན་ཟླ། མི་རྣམས་ཀྱི་མཐོངས་སུ་དཀག་པའི་ནམ་མཁའ་འདིས།
སྨུག་པ་ལང་ལོང་གི་གསེབ་ནས་དྭངས་གཙང་བོར་འདུག
རྟའུ་ཡི་སྤུན་ཟླ། ཉིན་གྱི་སྣང་བ་དང་མཚན་གྱི་ངལ་བ།
སྒྱོགས་ཆེན་གྱི་མཆུ་ལ་བཏབ་སྟེ་རྒྱང་དུ་སྤྱུགས་འདོད།
རྟའུ་ཡི་སྤུན་ཟླ། རྟའུ་ཡི་མེ་ལོང་ངོས་སུ་ཤར་བའི།
རྟའུ་ཡི་མ་བསྣོགས་པའི་བཞིན་རས།
བདག་ཡིད་དུ་རྟེའུ་བཞིན་བཏགས་ཡོད།
རླུང་བུ་ཤུར་ཤུར་གྱིས་ལྗོན་པ་བསྒུལ།
ལྗོན་པས་བྱིའུ་བསྒུལ།
རྟའུ་ཡ། ཁྱེད་ཀྱིས་ངའི་སེམས་པ་བསྒུལ་བྱུང་།
སེམས་ཀྱི་ཟབ་སར་བསྐུངས་པའི་རྒྱུ་འབྲས་ཀྱི་སེང་གེ་དཀར་མོས།
མིའི་རིགས་ཀྱི་བྱས་ཉེས་ལ་འཁང་ར་བྱེད།
རྟའུ་ལ་དག་སེལ་འབུད་དགོས་ཟེར།
རྟའུ་ནད་གདོན་ལས་གཏང་དགོས་གསུང་།
རྟའུ་ཡིས་ཅི་ཉེས་ཟེར།
རྟའུ་ཡིས་ཅི་ཉེས། 
མེ་ཏོག་གིས་བཞད་པའི་དབྱར་ཁ་དེ།
རྟའུ་ཡིས་དྲན་སྲིད།
སྤང་ཐང་དུ་ཤ་མོ་བརྡོལ་དུས།
སེར་ཆེན་མེ་ཏོག་ཁྲ་ལམ་མེར་བཞད་དུས།
ཉག་ཆུ་ལྷུང་ལྷུང་དུ་བཞུར་དུས། 
རྟའུ་ཡི་སྐྱིད་དེ་གང་དུ་འཇོག
རྟའུ་ཡ། སྐྱིད་དེ་དྲན་པར་གྱིས། 
སང་ཉིན་དྲན་པར་གྱིས། 
སང་ཉིན་གྱི་སང་ཉིན་དྲན་པར་གྱིས། 
ཁྱེད་ནི་ང་ཡི་རྟའུ། 
ཁམས་ཀྱི་རྟའུ།
བོད་ཀྱི་རྟའུ།
རྟའུ་པ་རྣམས་ཀྱི་རྟའུ། 

39.7K

ཐག་རག་ཡིག་བསྒྱུར་མ་ལག

དྲ་ཚིགས་འདིའི་པར་དབང་གངས་ལྗོངས་ཉི་གཞོན་དྲ་བར་དབང་བས་ཕན་ཚུན་ལ་དབང་བཅོལ་མ་བྱས་གོང་རང་དགར་མི་སྤྱོད་པར་མཁྱེན།
དྲ་ཚིགས་དཔང་རྟགས།蜀ICP备14009601号-1