རྟའུ་ནི་ལ་རྒྱ་རྒྱབ་ལ་ཁུར་བའི་རྟ་ཕོ་སྒ་བསྟད་ཅིག་ཡིན།

རླུང་གི་གཤོག་པ་ཡོད་པས་ཁྱེད་རང་མནོལ་མི་སྲིད།

མགོ་བོ་དགྱེ་དགྱེ་གནོངས་དང་ནམ་མཁའ་ན་སྤྲིན་དཀར་ལྡིང་གིན་འདུག

བསིལ་རླུང་གི་རྒྱུ་བ་འཇམ་པོས་ཁྱེད་ཀྱི་རྔོག་ཆུང་ལ་བྱིལ་བྱིལ་གཏང་ངེས།

ཁྱེས་ཀྱི་རུས་པ་དཀར་པོ་དུང་གི་དྲ་རས་ཡིན་པས།

ཁྱེད་ཀྱི་ཟུངས་ཁྲག་དཀར་པོ་གངས་ཀྱི་ཉིང་ཁུ་ཡིན་པས།

ཁྱེད་ཀྱི་འབྱུང་བཞི་གླིང་ཕྲན་བཞི་ཡི་མངའ་ཐང་ཡིན་པས།

ཁྱེད་ཀྱི་སྐུ་ལུས་ལ་ནད་གདོན་གྱིས་ག་ལ་གཙེས་ཐུབ།

མིག་ཟུང་གི་ཞལ་ཁེབས་ག་ལེར་ཁྱོགས་དང་།

གངས་རིན་པོ་ཆེའི་ཞལ་དཀར་ཁྱེད་ཀྱི་སྒོ་དྲུང་དུ་བརྗིད་འདུག

ཉི་མའི་ཉིང་ཁུ་བཞུས་ཏེ་ཁྱེད་ཀྱི་རྒྱུ་ལྟོར་བཞིབས་ཡོད།

ཟླ་བའི་འོ་ཇ་བསྐོལ་ཏེ་ཁྱེད་ཀྱི་མགྲིན་པས་བརྔུབས་ཡོད།

ཁྱེད་ནི་མཐོ་སྒང་གི་ཆེས་བཙན་སར་གནས་པའི་མི་རབས་ཡིན།

ཁྱེད་ནི་གཙང་ཆེན་གྱི་ཆེས་གཏིང་སར་འཛུལ་བའི་ཕ་བོང་ཡིན།

ཡུལ་གྱར་བའི་མཁའ་དབུགས་འཁྱམ་པོས་ཁྱེད་རང་ག་ལ་ནོགས།

ནད་ཡམས་ཀྱིས་ལག་པ་ཐུང་ངུས་ཁྱེད་རང་ཇི་ལྟར་ཟིན།

དཔུང་བ་སྦོམ་པོ་བྱོས་དང་ཉི་ཟེར་གྱི་ཀ་བ་ཁྱེད་ལ་བསླངས་འདུག

ཉིན་འདི་འགར་ཀུན་ཀྱིས་རྟའུ་གླེང་གིན་འདུག

སྔོན་ཆད་རྟའུ་ཐོས་མ་མྱོང་བ་ཚོས་རྟའུ་གླེང་གིན་འདུག

རྟའུའི་ནང་སྙིང་བསྔོགས་ཏེ་ཕྱི་ལ་དབྱུང་གིན་འདུག

ཡིན་ཡང་། རྟའུ་ནི་སྲ་མོ་སོ་ཡིས་མི་ཆོད་པའི་རྣོ་ལྕགས་ལེབ་མོ་ཞིག་ཡིན།

རྟའུ་ནི་རྣོན་པོ་མཚོན་གྱིས་མི་དབྲལ་བའི་ཡ་ལད་མཁྲེགས་པོ་ཞིག་ཡིན།

རྟའུ་ནི་གཞན་གྱི་རླངས་པར་མི་སྐྲག་པའི་ནག་པོ་དགུ་སྦྱོར་ཞིག་ཡིན།

ནང་སེམས་ཀྱི་ཁ་དོག་ཕྱི་རུ་སྟོན་དང་།

སྦྲང་ཆར་གྱིས་བྱབས་ཁྲུས་གསོལ་ལ་ཉེ།

རྟའུའི་ས་གཞི་ལ་སྨུག་སྤྲིན་ནག་པོ་འཐིབས་ཀྱང་།

རྟའུའི་ནམ་མཁའ་རུ་སྤྲིན་པ་དཀར་པོ་ལྡིང་བས།

རྟའུའི་གློ་མཆིན་ལ་ནག་ནོག་གིས་གས་མི་སྲིད་པའི་ཁས་ལེན་གནང་འདུག

རླུང་ལྭ་དཀར་པོ་གྱོན་པའི་ལྷ་རྗེ་བའི་ལག་པ་ཉི་ཟེར་ཡིན།

ཁྱེད་ལ་འོད་ཀྱི་བླ་བྲེ་མང་པོ་དཔྱངས་ཡོང་དུས།

སུ་ཞིག་གི་ཁ་རླངས་ཀྱིས་བསྒོས་པའི་ནག་ནོག་དེ་དག

རླུང་གིས་བདས་པའི་སྤྲིན་པ་བཞིན་རྨང་ནས་འདག་ངེས།

རྟའུ། ཡིག་དྲུག་གི་མཐུ་ལ་བྱིན་རླབས་མི་འདུག་མ་གསུང་།

ཆོལ་གསུམ་གྱི་སྤུན་ཟླར་མིག་ཟུང་མི་འདུག་མ་གསུང་།

རང་བློ་ནང་དུ་བསྡུས་ཏེ་ལྷོད་ལྷོད་གནོངས་དང་།

ས་ཆེན་གྱི་ལག་པ་མང་པོས་ཁྱེད་རང་བསྐྱབ་ངེས།

མཆོད་མེ་ཡི་འོད་རླབས་མང་པོས་ཁྱེད་རང་བསྲོ་ངེས།

རྒྱབ་གྲྭ་ཆས་ཅན་གྱི་རུ་དཔུང་ཞིག་ཁྱེད་ཉིད་ལ་བསྙེག་གིན་འདུག

ལག་སྨྱུ་གུ་ཅན་གྱི་ཡིག་སྔགས་ཀྱང་ཁྱེད་ཉིད་ལ་གཏོང་གིན་འདུག

འགྲོ་བའི་མིག་ཟུང་དག་གི་སྐར་ཚོགས་ཀྱང་།

ཁྱེད་ཉིད་ཁོ་ནའི་ནམ་མཁའ་རུ་ལྷེམ་ལྷེམ་འགུལ་ཅིང་།

ཉིན་མོའི་སོ་བར་མངགས་པའི་འོད་ཀྱི་མིག་ཟུང་།

ཁྱེད་ཀྱི་ནམ་མཁའ་ཁོ་ནར་གཞི་འདུག་བྱས་ཡོད།

རྟའུ། ཡིད་ཆེས་ཀྱི་སྐ་རགས་དམ་དུ་སྡོམས་དང་།

ང་ཚོ་མཉམ་དུ་ལོ་སར་ལ་འགྲོ་དགོས།

སྐད་ཅིག་གི་ལས་འབྲས་ལྡོག་ཐབས་མེད་ཀྱང་།

མཐའ་མཇུག་གི་བདེན་དོན་ཁ་དོག་གིས་འབྱེད་ངེས།

དེ་བས། ཁྱེད་རང་ནག་པོ་ནས་དཀར་པོར་འགྱུར་བའི་གོ་རིམ་ལ།

ང་ཚོས་སེམས་ཀྱི་མངའ་ཐང་ཕྱེས་ཏེ་བསྒུགས་ནས་ཡོད།

མིག་གི་ཞལ་ཁེབས་བཀྱགས་ནས་བལྟས་ཏེ་ཡོད།

ད་དུང་ལྗིད་ཏིག་ཏིག་གི་ཐ་སྙད་བཀྲུས་ནས་ཅེར་ཏེ་ཡོད།

རྟའུ་ནི་ཕ་མ་མེད་པའི་དྭ་ཕྲུག་ཅིག་གང་ནས་ཡིན།

གནས་བདག་མེད་པའི་མོ་ཧྲང་ཞིག་ཀྱང་ཡིན་མི་སྲིད།

གནས་དབྱུང་བཏང་བའི་བགྲེས་སོང་ཞིག་དེ་བས་ཀྱང་ཡིན་མི་སྲིད།

རྟའུ་ལགས། སྟོབས་ལྡན་གྱི་དཔུང་བ་བརྟན་པོས་ཡར་ལ་ལོངས་དང་།

འཚོ་བ་གསར་བའི་སྐྱ་རེངས་འགྱོག་ལ་ཉེ།

རེ་བར་བཅིབས་པའི་དཔྱིད་ཀ་བསླེབ་ལ་ཉེ།