སྨོན་ལམ་བོད་ཀྱི་བརྡ་འཕྲིན་ཞིབ་འཇུག་ཁང་གི་བྱུང་རིམ་མདོར་བསྡུས།

    སྨོན་ལམ་བོད་ཀྱི་བརྡ་འཕྲིན་ཞིབ་འཇུག་ཁང་ནི་བརྡ་འཕྲིན་ཤེས་བྱའི་སྐོར་ལ་ཞིབ་འཇུག་དང་། བོད་སྐད་ཡིག་དང་འབྲེལ་བའི་མཉེན་ཆས་སྣ་ཚོགས་ཞིབ་འཇུག་དང་བཟོ་བསྐྲུན་བྱེད་པའི་ལྟེེ་གནས་ཁང་ཞིག་ཡིན།

ལས་གཞི་འདི་ཉིད་ཐོག་མར་བློ་བཟང་སྨོན་ལམ་སྒེར་ངོས་ནས་འགོ་བཙུགས་ཤིང་། ཕྱི་ལོ་2005 ལོར་སྨོན་ལམ་བོད་ཡིག་ཐོན་རིམ་དང་པོ་དང་། ཕྱི་ལོ་2006 ལོར་སྨོན་ལམ་བོད་ཡིག་ཐོན་རིམ་གཉིས་པ། ཕྱི་ལོ་2009 ལོར་སྨོན་ལམ་བོད་ཡིག་ཐོན་རིམ་གསུམ་པ་དང་། སྨོན་ལམ་བོད་ཀྱི་ཐུན་མོང་སྐད་གདངས་མཉེན་ཆས། ཕྱི་ལོ་2010 ལོར་སྨོན་ལམ་བོད་ཡིག་ཐོན་རིམ་གསུམ་ཚེག་གཅིག་ཅན་དང་། སྨོན་ལམ་ཚིག་མཛོད་ཐོན་རིམ་དང་པོ་བཅས་སྔ་རྗེས་བཟོ་སྐྲུན་དང་རིན་མེད་འགྲེམས་སྤེལ། ཕྱི་ལོ་2011་ལོར་Andriod OS ཁ་པར་མ་ལག་ནང་སྨོན་ལམ་བོད་ཡིག་དང་སྨོན་ལམ་ཚིག་མཛོད་གསར་བཅུག་བཅས་བྱས་པར་བོད་སྐད་ཡིག་བེད་སྤྱོད་གཏོང་མཁན་ཚོར་ཁ་ཡོད་ལག་ཡོད་ཀྱི་ཕན་ཐོགས་ཆེན་པོ་བྱུང་བར་བརྟེན། བོད་ཕྱི་ནང་དུ་བཞུགས་པའི་གནད་ཡོད་མི་སྣ་དང་མཁས་དབང་གང་མང་གིས་ཚད་མཐོའི་རྒྱབ་སྐྱོར་དང་ལས་གཞི་འདི་བཞིན་རྒྱུན་འཁྱོངས་དགོས་ཚུལ་གསུངས་པ་དང་། ལྷག་དོན་༸སྤྱི་ནོར་༸ལས་གཞི་འདི་ཉིད་བོད་ཀྱི་སྐད་ཡིག་དང་རིག་གཞུང་སྲུང་སྤེལ་གྱི་ཆ་རྐྱེན་གལ་ཆེན་ཞིག་ཡིན་སྟབས་གློག་ཀླད་ལས་རིགས་དང་འབྲེལ་བའི་ལྟེ་གནས་ཁང་ཞིག་གསར་འཛུགས་བྱེད་དགོས་ཞེས་རྩ་འཛིན་བཀའ་སློབ་སྤྱི་ཕེབས་བྱུང་བར་བརྟེན། ཕྱི་ལོ་ཉིས་སྟོང་བཅུ་གཉིས་ལོའི་ཕྱི་ཟླ་བཞི་བའི་ཚེས་ཉི་ཤུ་ཉིན་འདི་ག་སྨོན་ལམ་བོད་ཀྱི་བརྡ་འཕྲིན་ཞིབ་འཇུག་ཁང་དངོས་སུ་འཛུགས་སོ།