རི་སྐྱེས་སྲོག་ཆགས་ནི་མིའི་རིགས་ཀྱི་གྲོགས་པོ་ཡིན་པ་དང་། རང་བྱུང་ཁམས་ཆེན་མོས་མིའི་རིགས་ལ་བསྩལ་བའི་རྩ་ཆེ་བའི་རང་བྱུང་ཐོན་ཁུངས་ཡིན་པས།རི་སྐྱེས་སྲོག་ཆགས་ལ་སྲུང་སྐྱོབ་བྱེད་པ་དང་། རང་བྱུང་སྐྱེ་ཁམས་དོ་སྙོམས་ལ་སྲུང་སྐྱོབ་བྱ་རྒྱུ་དེ་ནི། མིའི་རིགས་ཀྱི་འཚོ་གནས་དང་འཕེལ་རྒྱས་ལ་འབྲེལ་བ་ཡོད་ཅིང་། རྒྱལ་ཁབ་ཅིག་དང་། མི་རིགས་ཤིག གྲོང་ཁྱེར་ཞིག་གི་དཔལ་ཡོན་ཡར་ཐོན་བྱུང་ཡོད་མེད་ལ་ཚད་འཇལ་བྱེད་ཀྱི་མཚོན་རྟགས་གལ་ཆེན་ཞིག་ཀྱང་ཡིན། དུས་མཚུངས་སུ། སྤྱི་ཚོགས་རྒྱུན་མཐུད་འཕེལ་རྒྱས་ལ་སྐུལ་འདེད་གཏོང་བའི་ཡུན་རིང་ཁེ་ཕན་གྱི་དགོས་མཁོ་ཡིན་ལ།འཆམ་མཐུན་སྤྱི་ཚོགས་འཛུགས་སྐྲུན་གྱི་ནང་དོན་གལ་ཆེན་ཞིག་ཀྱང་ཡིན།
        ང་ཚོས་སྐྱེ་ཁམས་མ་ལག་ཆེན་པོ་ཞིག་གི་ཁྲོད་འཚོ་བ་རོལ་བཞིན་ཡོད་ལ། སྐྱེ་དངོས་མང་པོས་ང་ཚོའི་ཉེ་འཁོར་གྱི་སྐྱེ་ཁམས་མ་ལག་གྲུབ་ཡོད་པ་དང་། ཉེ་བའི་ལོ་འགར་མིའི་རིགས་ཀྱིས་ཚོད་འཛིན་མེད་པར་སྐྱེ་ཁམས་མ་ལག་གསར་སྤེལ་དང་བེད་སྤྱོད་བྱས་པས། དངོས་རིགས་མང་པོ་རྩ་མེད་དུ་སོང་བ་དང་། ཐོན་ཁུངས་སྣ་ཚོགས་ཇེ་ཉུང་དུ་གྱུར་ཅིང་། སྐྱེ་ཁམས་ཁོར་ཡུག་ཇེ་ཞན་དུ་སོང་བས། མིའི་རིགས་ཀྱི་འཚོ་གནས་ཁོར་ཡུག་ཉིན་རེ་བཞིན་ཇེ་སྡུག་ཏུ་འགྲོ་བཞིན་ཡོད།
        མཚོ་སྔོན་ཞིང་ཆེན་ནི་རི་སྐྱེས་སྲོག་ཆགས་དང་སྐྱེ་དངོས་ཁྱབ་ཁུལ་གཙོ་བོའི་གྲས་ཤིག་ཡིན་ཞིང་། དུས་བསྟུན་བྱ་རིགས་ཀྱི་འབབ་སྡོད་གནས་གཙོ་བོ་ཞིག་ཡིན་པ་དང་། རི་སྐྱེས་སྲོག་ཆགས་དང་སྐྱེ་དངོས་ཀྱི་ཐོན་ཁུངས་ཕུན་སུམ་ཚོགས་པོ་ཡོད་དེ། ཞིང་ཆེན་ཡོངས་ལ་རི་སྐྱེས་སྒལ་ཚིགས་ཅན་གྱི་སྲོག་ཆགས་རིགས605དང་། རྒྱལ་ཁབ་ཀྱི་གཙོ་གནད་སྲུང་སྐྱོབ་རི་སྐྱེས་སྲོག་ཆགས་རིགས85ཙམ་ཡོད་པ་དང་། ཞིང་ཆེན་རིམ་པའི་གཙོ་གནད་སྲུང་སྐྱོབ་སྲོག་ཆགས་རིགས36ཡོད།
        དེའི་སྟབས་ཀྱིས།རི་སྐྱེས་སྲོག་ཆགས་ཀྱི་ཐོན་ཁུངས་སྲུང་སྐྱོབ་འཕེལ་རྒྱས་དང་ལུགས་མཐུན་བཀོལ་སྤྱོད་བྱ་རྒྱུ་དེས་རང་བྱུང་ཐོན་ཁུངས་ལེགས་སྒྱུར་དང་།མི་དང་རང་བྱུང་འཆམ་མཐུན་ལ་སྐུལ་འདེད་གཏོང་བ། སྐྱེ་དངོས་ཀྱི་སྣ་མང་རང་བཞིན་སྲུང་འཛིན་དང་།སྐྱེ་ཁམས་དོ་སྙོམས་ལ་སྲུང་སྐྱོབ།མཛེས་སྡུག་ལྡན་པའི་མཚོ་སྔོན་འཛུགས་སྐྲུན་བཅས་ལ་དོན་སྙིང་གལ་ཆེན་ལྡན།
        མིའི་རིགས་ཐུན་མོང་གི་འཚོ་གནས་ཁོར་ཡུག་གི་ཆེད་དུ།ང་ཚོ་ངེས་པར་འགུལ་སྐྱོད་བྱས་ཏེ། རང་ཉིད་ནས་མགོ་རྩོམ་པ་དང་། རི་སྐྱེས་སྲོག་ཆགས་སྲུང་སྐྱོབ་བྱ་འགུལ་ལ་ཧུར་ཐག་གིས་ཞུགས་པ་དང་རྒྱབ་སྐྱོར་བྱས་ནས། རང་རྟོགས་སྒོས་སྐྱེ་ཁམས་སྲུང་སྐྱོབ་དང་སྤྱི་པའི་འཕྲོད་བསྟེན་བདེ་འཇགས་འདུ་ཤེས་ཇེ་དྲག་ཏུ་བཏང་སྟེ། གོམས་སྲོལ་བསྒྱུར་བཅོས་དང་། རི་སྐྱེས་སྲོག་ཆགས་གང་འདོད་དུ་ཁ་ཟས་བྱེད་པའི་གོམས་གཤིས་ཞེ་མེར་བ་དེ་རྩ་བ་ནས་སྤངས་ཏེ།རི་སྐྱེས་སྲོག་ཆགས་གང་འདོད་དུ་མི་འཛིན་པ་དང་། རི་སྐྱེས་སྲོག་ཆགས་རྔོན་གསོད་མི་བྱེད་པར།སྲོག་ཆགས་ལ་གཅེས་སྐྱོང་དང་། ནགས་ཚལ་ལ་སྲུང་སྐྱོབ་བྱེད་པ། ཚང་ཚིང་འཁྲིགས་པའི་ནགས་ཀླུང་དེ་རི་སྐྱེས་སྲོག་ཆགས་ཀྱི་བསྟི་གནས་དང་འགེབས་སྲུང་གི་གནས་ཡུལ་དུ་བསྒྱུར་དགོས། ནགས་ཚལ་ལ་གཏོར་བརླག་བཟོ་མཁན་དང་། རི་སྐྱེས་སྲོག་ཆགས་ལ་གནོད་འཚེ་གཏོང་མཁན་རྣམས་ལ་ཧུར་ཐག་གིས་ཁ་ཏ་སློབ་གསོ་གཏོང་བ་དང་ཞུ་གཏུག་བྱས་ཏེ། སྐྱེ་ཁམས་ཁོར་ཡུག་སྲུང་སྐྱོབ་ཀྱི་དཔེ་སྟོན་པ་བྱེད་དགོས་ལ། རི་སྐྱེས་སྲོག་ཆགས་དང་ང་ཚོ་གནམ་སྔོན་པོ་གཅིག་གི་འོག་འཆམ་མཐུན་མཉམ་གནས་བྱེད་དགོས། །