༄༅།།ཁྱོད་ཀྱིས་གད་སྙིགས་ལ་རིགས་འབྱེད་ཤེས་སམ།

རྩོམ་སྒྲིག་པ།ཚེ་དཔལ། ཡོང་ཁུངས།མཚོ་སྔོན་བོད་ཡིག་ཚན་རྩལ་ཚགས་པར་ཁང་། སྤེལ་དུས། 05-22



        གད་སྙིགས་ལ་སྤྱིར་བཏང་དུ་རིགས་བཞིར་དབྱེ་ཡོད་པ་སྟེ། ཕྱིར་བསྡུ་རུང་བའི་གད་སྙིགས་དང་ཐབ་ཚང་གི་གད་སྙིགས། གནོད་ལྡན་གད་སྙིགས། གད་སྙིགས་གཞན་དག་བཅས་ཡིན།
        གཅིག ཕྱིར་བསྡུ་རུང་བའི་གད་སྙིགས་ནི་ཤོག་སྙིགས་དང་འགྱིག་རྫས། ཤེལ་རིགས། ལྕགས་རིགས། རས་རྒྱུ་སོགས་ཀྱི་རིགས་ཆེན་པོ་ལྔ་ལ་དབྱེ་ཆོག་ཅིང་། ཤོག་སྙིགས་ཀྱི་རིགས་ལ་ཚགས་པར་དང་དུས་དེབ། དཔེ་ཆ་རྙིང་བ། ཤོག་ཐུམ་སྣ་ཚོགས་འདུས་པ་ཡིན། འགྱིག་རྫས་ཀྱི་རིགས་ལ་འགྱིག་དམ་དང་འགྱིག་ཐུམ། འགྱིག་ཁུག་སོགས་འདུས་ནའང་། གཙང་ཤོག་སོགས་ལ་ཆུའི་འདུས་ཚད་མཐོ་སྟབས་ཕྱིར་བསྡུ་མི་རུང་། ཤེལ་ཆག་གི་རིགས་ལ་ཤེལ་དམ་དང་ཤེལ་ཆག ཚ་དམ་སོགས་འདུས། (མེ་ལོང་ནི་གད་སྙིགས་གཞན་དག་གམ་གད་སྙིགས་སྐམ་རིགས་ལ་གཏོགས།) ལྕགས་རིགས་ཀྱི་སྐོར་ལ་ལི་རྒྱུ་དམ་བེ(易拉罐)དང་ལྕགས་སྒམ་ཟས་རིགས་ཀྱི་སྣོད་ཆས་སོགས་འདུས། རས་རྒྱུའི་རིགས་ལ་གྱོན་ཆས་རྙིང་བ་དང་། ཅོག་ཁེབས། ལག་ཕྱིས། དཔེ་ཁུག ལྷམ་སོགས་འདུས་པ་ཡིན། 
གོང་གསལ་གྱི་གད་སྙིགས་འདི་དག་ཕྱོགས་བསྡུས་བེད་སྤྱོད་བྱས་ན་འབག་བཙོག་ཉུང་ལ་ཐོན་ཁུངས་གྲོན་ཆུང་བྱེད་ཐུབ། ཤོག་སྙིགས་ཏུན་གཅིག་གིས་ཤོག་བུ་བཟང་པོ་སྤྱི་རྒྱ850བཟོ་ཐུབ་པ་དང་། དེས་ཤིང་ཆ་སྤྱི་རྒྱ300ཙམ་གྲོན་ཆུང་བྱེད་ཐུབ་པར་མ་ཟད། ཐོན་སྐྱེད་ཀྱི་འབག་བཙོག74%ཉུང་དུ་གཏོང་། བཏུང་བའི་སྣོད་ཆས་ཏུན་གཅིག་གིས་རིམ་པ་གཉིས་པའི་རྒྱུ་ཆ་ཏུན0.7བཟོ་ཐུབ། ལྕགས་རིགས་ཏུན་གཅིག་གིས་ལྕགས་བཟང་པོ་ཏུན0.9བཟོ་ཐུབ་པ་ལས་གཏེར་རྡོ་སྲེག་བརྡར་གྱི་མ་རྩ47%གྲོན་ཆུང་བྱེད་ལ། མཁའ་དབུགས་འབག་བཙོག75%ཉུང་དུ་བྱེད། ཆུའི་འབག་བཙོག་དང་སྲ་གཟུགས་བཙོག་དངོས97%ཉུང་དུ་གཏོང་ཐུབ།
        གཉིས། ཐབ་ཚང་གི་གད་སྙིགས་ནི་ཟ་མ་ལྷག་མ་དང་། སྔོ་ཚལ་ལྷག་མ། རུས་པ། སྔོ་ཚལ་གྱི་རྩ་བ། སིལ་ཏོག་གི་ཤུན་པ་སོགས་ཀྱི་ཟས་རིགས་ལྷག་མ་འདུས་པ་ཡིན། གོང་གསལ་དག་ལ་སྐྱེ་དངོས་ལག་རྩལ་སྤྱད་དེ་ལས་སྣོན་བྱས་ན། ཐབ་ཚང་གི་གད་སྙིགས་ཏུན་གཅིག་གིས་སྐྱེ་ལྡན་ལུད་རྫས་ཏུན0.6ནས0.7ཙམ་བཟོ་ཐུབ།
        གསུམ། གནོད་ལྡན་གད་སྙིགས་ནི་མིའི་བདེ་ཐང་ལ་གནོད་པའི་ལྕགས་རིགས་ལྕི་བ་དང་དངོས་པོ་དུག་ཅན་ནམ་ཁོར་ཡུག་ལ་གནོད་འཚེ་བཟོ་བའམ་གནོད་འཚེ་འབྱུང་བའི་དངོས་པོ་ལྷག་མ་རིགས་ཡིན། དཔེར་ན། གློག་རྫས་དང་འོད་གློག་གི་སྦུ་གུ གློག་ཞུའི་ཤེལ་ཏོག དངུལ་ཆུའི་དྲོད་འཇལ་བྱེད། སྣུམ་རྩིའི་སྣོད། ཁྱིམ་སྤྱོད་གློག་ཆས་འགའ། དུས་བརྒལ་སྨན་རྫས། ཡོ་བྱད། དུས་བརྒལ་སྒེག་རྫས་ལྟ་བུ་འདུས།
        བཞི། གད་སྙིགས་གཞན་དག་ནི་གོང་གསལ་གྱི་གད་སྙིགས་རིགས་དག་དང་མི་འདྲ་བའི་སོ་ཕག་དང་རྫ་ཆས། ས་རུལ། གསང་སྤྱོད་ཁང་གི་ཤོག་སྙིགས་སོགས་ཕྱིར་བསྡུ་དཀའ་བའི་དངོས་པོ་དང་ས་རྡུལ། ཟས་སྣོད་དམ་ཁུག་མ་སོགས་ཡིན། 
གོང་གསལ་གྱི་གད་སྙིགས་རིགས་བཞི་མ་གཏོགས། ད་དུང་སྨན་བཅོས་སྐོར་གྱི་གད་སྙིགས་ཏེ་ཁྲག་གཅོད་བལ་ཐུར་དང་བཤགས་བཅོས་ཀྱི་གྲི་སོགས་ཡོད་ལ། འདི་དག་ལ་དམིགས་བསལ་ལས་སྣོན་བྱེད་དགོས།


དྲ་ཚིགས་འདིའི་པར་དབང་གངས་ལྗོངས་ཉི་གཞོན་དྲ་བར་དབང་བས་ཕན་ཚུན་ལ་དབང་བཅོལ་མ་བྱས་གོང་རང་དགར་མི་སྤྱོད་པར་མཁྱེན།
དྲ་ཚིགས་དཔང་རྟགས། 蜀ICP备14009601号-1