༄༅། །གོས་ཀྱི་རིགས་བཤད་པ།

མི་གསལ། རྩོམ་སྒྲིག་པ།དབང་ཆེན།ཡོང་ཁུངས།ཀྲུང་གོའི་བོད་ལྗོངས་དྲ་བ། སྤེལ་དུས། 11-26



            བོད་མིའི་གོས་ཀྱི་རིགས་ལ་ཆེ་ས་ནས་དབྱེ་ན་ཕོ་ཆས་དང་མོ་ཆས་གཉིས་སུ་མ་འདུས་པ་མེད་ལ།   ཡང་གྱོན་མཁན་གང་ཟག་གི་རྟེན་གྱི་སྒོ་ནས་དབྱེ་ན་སྐྱ་ཆས་དང་གྲྭ་ཆས་གཉིས།  བཟོ་རྒྱུའི་སྒོ་ནས་དབྱེ་ན་སློག་པ།   སྣམ་བུ།  ཚ་རུ།  བར་ཕྱིང་།  གོས་ལྭ་སོགས་མཐའ་ཡས་པ་དང་ཡང་ཐོབ་དང་གོ་གནས་ཀྱི་སྟེང་ནས་རྒྱ་ལུ་ཆས།  ལྷ་ལྕམ་ཆས།  ཕྱག་མཛོད་ཆས།   བློན་ཆས་སོགས་དང་།   དར་ཡུལ་གྱི་ཆ་ནས་སོག་ཆས།   ཧོར་མོའི་ཆས་སོགས་མང་པོ་ཞིག་བྱུང་ཡོད་པ་རེད།  དེ་ལས་གྱོན་མཁན་གང་ཟག་གི་རྟེན་སྒོ་ནས་དབྱེ་ཚུལ་དེ་ལ་རྣམ་གྲངས་གཞན་དག་འདུ་ནུས་པས་སྐྱ་ཆས་ལ་བོད་ཆོལ་ཁ་གསུམ་གྱི་ཡུལ་སོ་སོར་གོས་ཀྱི་གོན་སྟངས་དང་།  རྣམ་པ།   ཆ་ལུགས་སོགས་མི་འདྲ་བ་མཐའ་ཡས་པ་ཞིག་བྱུང་ཡོད་པ་དང་།   དེ་དག་རེ་རེ་ནས་བརྗོད་ཐབས་བྲལ་ཡང་ཆེ་ས་ནས་བལྟས་ན་ཕོ་ཆས་རྣམས་ལྭ་བའི་ཁོབ་ཡངས་ཤིང་ཕུ་རུང་རིང་བ་དང་།  མོ་ཆས་རྣམས་ལྟོས་འཇོག་གིས་ཁོབ་ཆུང་ཞིང་ཕུ་རུང་ཐུང་།  སྐྱེས་པ་རྣམས་ཀྱིས་ལྭ་བ་ཅང་བསྡོགས་ཏེ་ལྭ་འདབས་རྐང་པའི་པུས་ཚིགས་སུ་སླེབས་པར་རགས་འཆིང་བ་དང་།  བུད་མེད་རྣམས་སྤྱིར་བཏང་དུ་ལྭ་འདབས་རྐང་བའི་བོལ་ལ་རེག་ཙམ་ནས་སྐ་རགས་འཆང་།  དེ་ཡང་བོད་མིའི་གོས་གྱོན་ལུགས་འདི་མི་རིགས་གཞན་དང་ཐུན་མོང་མ་ཡིན་པའི་ཁྱད་ཆོས་དུ་མས་ཕྱུག་པས་བོད་ཀྱི་གོས་མགོ་སྤྱི་གཙུག་ནས་ཞབས་རྐང་པའི་བར་དུ་གོས་ཀྱི་བྱེ་བྲག་མང་པོ་ཞིག་དར་ཡོད་པས་དེ་དག་གི་རྣམ་གྲངས་ཙམ་སྨྲས་ན།།
      1.ཞྭའི་རིགས་ལ།   བོད་ཞྭའི་བྱེ་བྲག་རྨོག་རིལ་ཨམ་ཅོག་ཅན།   མགོ་སྐྱོབ་ཀྱི་རྨོག་ཞྭ།  རྒྱ་ལུགས་ཀྱི་ཞྭ་མོ་སྲུབ་ཟན་སུམ་བརྩེགས་ཅན་གྱི་རྨོག་ཞུ།   བྱང་འབྲོག་གི་གཟའ་ཞྭ་ཨར་ཞྭ།   འབྲོག་པའི་ཕྱིང་ཞྭ།  དོམ་ལྤགས་ཀྱིས་བཟོས་པའི་གཟི་དོམ།  ཆང་ས་རྒྱག་དུས་མནའ་མར་བསྐོན་རྒྱུའི་སོག་ཞྭ། ཝ་ལྤགས་ཀྱིས་བཟོས་པའོག་ཝ་ཞུ།  རྣ་བཞི།  རྒྱ་ཞྭ་ལི་མོ།  རྩྭ་ཞྭ།   ཐང་ཞུ།   ཚར་ཞྭ།  པད་ཞྭ།   པཎ་ཞྭ།  གཞན་ཡང་སྔར་བོད་ཀྱི་རྩེ་དྲུང་གིས་མཛད་སྒོར་གྱོན་རྒྱུའི་ཞྭ་དཀར།
སྔགས་པ་ཕུར་ཐོགས་ཅན་གྱི་ཞྭ་ནག   དགེ་ལུགས་པའི་བཙུན་ཞྭ་ཞྭ་སེར།  སྲིད་གཞུང་གི་རིམ་པ་བཞི་བའི་ཡན་གྱི་དབྱར་ཞྭ།  ཞྭ་མོ་ལྕགས་མདའ།  རས་བསེ་ལས་བཟོས་པའི་བསེ་ཐེབས་སོགས་མང་པོ་ཡོད།
     2.སྟོད་གོས་ཀྱི་རིགས་ལ།   ཕྱུ་པའི་འོག་ཏུ་གྱོན་རྒྱུའི་ནང་འཇམ།  སྟོད་ཀོར།   ཚི་ལེན།   ཁམས་འཇམ།  ཁོག་ཚེ་སོགས་རྒྱུ་སྣ་ཚོགས་ལས་བཟོས་པའི་བྱེ་བྲག་མང་པོ་དང་།   གཡུལ་གྱི་གོ་ཁྲབ།  ལྕགས་ཁྲབ་སོགས་སོ།།
    3.དོར་མའི་རིགས་ལ།   རྒྱུ་རས་དང་།   སྣམ་བུ། གོས་ཆེན།  པགས་པ།  བསེ་སོགས་ལས་བྱས་པའི་དོར་ཐུང་།   དོར་རིང་།   དོར་མ་ནང་ཚངས་ཅན།   གསང་ཁེབས་ཏེ་དོར་རྟ།   དོར་ལྷུག་མ་བཅས་སོ།།
   4.ལྷམ་གྱི་རིགས་ལ།   བཟོ་རྒྱུ་མི་འདྲ་བའི་སྒོ་ནས་ཕོ་ཟོམ།  མོ་ཟོམ།   རས་ཟོམ།  ཀོ་ལྷམ།  འཇམ་ཆེན།  སག་ལྷམ།   སྦལ་ཁ།   ལྷམ་སྣེ་འཁྱིལ།   རྒྱ་ལྷམ།  ཕྱིང་འབོབ།  ཐིག་འབོབ།
  ལྷམ་རྟ་ཟོན་མ།   ལྷམ་སྤུ་མ།   གཞན་ཡང་འཁོར་ལོས་བསྒྱུར་པའི་རྒྱལ་པོའི་ལྷམ་དུ་གྲགས་པའི་ལྷམ་ཉེར་བའི་རིན་པོ་ཆེ་སོགས་སོ།   །
5、ལྭ་རིང་གི་རིགས་ལ།   ས་གནས་ཀྱི་དབང་དུ་བྱས་ན་དབུས་ཆས།   ཨམ་ཆས།   ”
ཁམས་པའི་ཆས་དང༌།   དེ་དག་ལ་ཕོ་ཆས་དང་མོ་ཆས་།     བཟོ་རྒྱུའི་ཆ་ནས་སྣམ་བུ་སྤུ་མས་བཟོས་པའི་ལྭ་བ།   ལྭ་ཤག་སྟེ་ཕྱུ་ཆེན།གོས་ལྭ།  རྒྱུ་པགས་པས་བྱས་པའི་སློག་པ།  ལུ་གུའི་པགས་པས་བྱས་པའི་ཚ་རུ།  ཝ་སླག་སྲམ་སླག      ཕྲུགས་ལྭ།    སྣམ་བུའི་ལྭ།  ཕྱིང་ལྭ།   ཐེར་མས་བཟོས་པའི་ཐེར་ལྭ།    དབུས་མོའི་དབུས་ལྭའམ་བོད་ལྭ།   རས་ལྭ།   བར་ཕྱིང་།    གཡོགས་མ།   གཞན་ཡང་ཡུལ་གཞན་ནས་དར་བའི་སོག་ཆས།   དེ་ལ་རྒྱལ་སྲིད་སྣ་བདུན་ཚང་ལུགས་ནི་གཟན་གྱིས་གླང་ཆེན།   །ཀོང་རྣམ་འཁོར་ལོ།   པན་ཏོག་སབ་ས་མ་ཐིག་ཤུབས་ཀྱིས་རྟ་མཆོགཨར་ཀོང་གིས་བློན་པོ།   རིན་ཆེན་སྤྱིས་ནོར་བུ་རིན་ཆེན་བཅས་མཚོན་ཅིང་དེ་དང་ལྷ་ལྕམ་ཆས་སོགས་གོས་ཀྱི་བྱེ་བྲག་ཧ་ཅང་མང་པོ་ཞིག་ད་ལྟ་ཡོད་དོ།།
གྲྭ་ཆས་ནི་དགེ་སློང་གི་འཚོ་བའི་ཡོ་བྱད་བཅུ་གསུམ་དུ་འདུས་ཤིང་།  བཅུ༌།   གསུམ་ནི་སྣམ་སྦྱར།   བླ་གོས།   མཐང་གོས།   ཤམ་ཐབས།   ཤམ་ཐབས་ཀྱེ་གཟན།   རྔུལ་གཟན།   རྔུལ་གཟན་གྱི་གཟན།   གདོང་ཕྱིས།   རྣག་གཟན།   གཡན་པ་དགབ་པ།   སྐྲ་གཟེད།   གདིང་བ།   དབྱར་གྱི་གོས་རས་ཆེན་ཡོ་བྱད་ཀྱི་གོས་རྣམས་སོ།   །དེ་དག་གི་ཁྱད་ཆོས་ངོ་སྤྲོད་ཙམ་ཞུ་ན།   ་
1、སྣམ་སྦྱར།   ཆོས་གོས་རྣམ་གསུམ་གྱི་ཡ་གྱལ།   དགེ་སློང་ཁོ་ནའི་རྟེན་ལ་ཕྱག་འཚལ་ཞིང་བསོད་སྙོམས་རྒྱུ་བ།   ཆོས་འཆད་ཉན་དང་ལས་ཆོག་ལ་འདུ་ས་པའི་སྐབས་སུ་གྱོན་རྒྱུའི་སྟོད་གོས་སེར་པོ་ཞིག        དེ་ལ་ནང་གསེས་སུ་སྣམ་ཕྲན་དགུ་མ།    བཅུ་གཅིག་མ།   བཅུ་གསུམ་མ་བཅས་གསུམ་ཡོད།
2.བླ་གོས།  བཟོ་དབྱིབས་སྣམ་སྦྱར་ལྟ་ར་སྣམ་ཕྲན་དང་གླེགས་བུར་དྲས་ཏེ་དྲུབ་པ་ལ།  ཆེ་ཆུང་ཡང་དགེ་ཚུལ་སློང་གི་སྐུའི་ཚད་ལ་གཞིག་ས་ཏེ་བཟོས་ཆོག་པ་ཡིན།  
3མཐང་གོས།   སྣམ་ཕྲན་ལྔ་དང་།   གླེགས་བུ་ཕྱེད་དང་གཉིས་ཚད་ཞེང་དུ་ཁྲུ་དོ་སྲིད་དུ་ཁྲུ་ལྔའམ་བཞི།   ཐ་མ་ལྟེ་བ་མན་ཆད་པུས་མོ་ཡན་ཆད་དེ་འཁོར་གསུམ་ཁེབས་པའི་ཚད་ཀྱང་རུང་བའི་སྨད་གོས་ཤིག
4.ཤམ་ཐབས།  སྲིད་དུ་ཁྲུ་ལྔ་དང་ཞེང་དུ་ཁྲུ་དོ་ཡོད་པ་མཐང་གོས་ཀྱི་ན་ད་དུ་གྱོན་རྒྱུའི་གོས།
 5、ཤམ་ཐབས་ཀྱི་གཟན།   མཚན་མོ་སྨད་དུ་གྱོན་པའི་གོས།   ཚད་མཐང་གོས་དང་མཉམ།   
6、རྔུལ་གཟན།   ཉིན་མོ་སྟོད་དུ་གྱོན་རྒྱུའི་གོས་ཏེ།   ཆ་ཚད་བླ་གོས་མཉམ་ཞིང་།  རྔུལ་ནག་གི་དྲི་མ་ལེན་ཆེད་ཡིན་པས་རྔུལ་གཟན་ཟེར།
6རྔུལ་གཟན་གྱི་གཟན།   མཚན་མོ་སྟོད་དུ་གྱོན་རྒྱུའི་གོས་ཏེ།   ཆ་ཚད་བླ་གོས་དང་མཚུངས་ཤིང་རྔུལ་གཟན་གྱི་ཐེབས་སུ་གསུངས།
8རྣག་གཟན།   དགེ་སློབ་རྣག་ནད་ཅན་ལ་དམིགས་བསལ་དུ་གནང་བའི་གོས་ཏེ།   ཆ་ཚད་བླ་གོས་དང་མཉམ།
9གཡན་གདབ།   དགེ་སློང་གཡན་པའི་ནད་ཅན་ལ་ཆེད་དུ་གནང་བའི་གོས་ཏེ།  ཕྲེད་དུ་ཁྲུ་དྲུག་དང་ཞེང་ལ་ཁྲུ་གསུམ།
10དབྱར་གྱི་གོས།   དགེ་སློང་རྣམས་ཀྱིས་དབྱར་དུས་གསུམ་དང་སོར་བརྒྱད་ཡོད་པ་ཞིག་ཡིན་ནོ།།
གཞན་ཡང་རྒྱ་ནག་དུ་མ་དར་བའི་སྟོད་འགག་དང་།   དགེ་འདུན་པའི་གནས་མཐོ་དམན་དང་གྲུབ་མཐའི་ཁྱད་པར་འབྱེད་པའི་ཆ་ནས་ཞྭ་མོའི་རིགས་ལ་པཎ་ཐུང་།   པཎ་རིང་།   སྒྲོ་བཙེམས་མ།   སྒྲོ་ལྷུག   བྱང་ཆུས་སེམས་ཞྭ།   ཨོ་རྒྱན་པཎ་ཞྭ།   ཀརྨ་བའི་ཞྭ་ཕྲ།   རི་བོ་དགེ་ལུགས་པའི་ཞྭ་སེར།    རྟ་ཞྭ།  ཀརྨ་སྒར་བ་ནས་དར་བའི་སྒར་སྦུག་བཅས་དང་།   བོད་ཀྱི་དགེ་འདུན་པའི་ཞབས་ལ།
     སྤྱིར་འདུལ་བ་ལས་རྒྱ་གར་སོགས་ན་ས་བབས་གནམ་གཤིས་ཀྱི་དབང་གིས་རི་བྲག་སོགས་སུ་བགྲོད་པ་དང་།  རྩི་ཤིང་ཚེར་མ་སོགས་ཀྱི་གནོད་པ་ལས་སྐྱོབ་ཆེད།
ལྷམ་རྟིང་སྦུབས་ཅན་དང་།  སྣ་སྦུབས་ཅན།  བོལ་གྱི་སྣར་མཐོངས་ཕྱུངས་བའི་སྦུབས་ཅན།    ལྷམ་ཡུ་ཆས་དང་།།   མཆིལ་ལྷམ་སྒྲོག་གུ་ཅན་བཅས་ཡོད་ནའང་།།
བོད་དུ་ཀོ་ལྤགས་ཀྱི་གཞིའི་གནང་བ་ཐོབ་པར་བརྟེན་ལྷམ་ཤ་གཟུགས་མ་དང་།རས་ལྷམ།  རས་ལྷམ་སྐྱིན་འཁོར།   སྒོ་འཁོར།   ཟོན་པོ་སོགས་གྱོན་སྲོལ་བྱུང་ཡོད་དོ།།


རྩོམ་ཡིག་རྗེས་མ།

དྲ་ཚིགས་འདིའི་པར་དབང་གངས་ལྗོངས་ཉི་གཞོན་དྲ་བར་དབང་བས་ཕན་ཚུན་ལ་དབང་བཅོལ་མ་བྱས་གོང་རང་དགར་མི་སྤྱོད་པར་མཁྱེན།
དྲ་ཚིགས་དཔང་རྟགས། 蜀ICP备14009601号-1