མན་ཐང་ཤང་གི་དབུལ་སྒྲོལ་འགག་སྒྲོལ་གྱི་རྩད་ཞིབ་ཆེན་མོ་དང་། དག་ཐེར་ཆེན་མོ། མཐོར་འདེགས་ཆེན་མོ། ལྟ་ཞིབ་ཆེན་མོ། ཕྱོགས་བསྡོམས་ཆེན་མོ་བཅས་ཀྱི་ལས་ཀའི་ལག་བསྟར་ཇུས་གཞི་གཞིར་བཟུང་། གྲོང་ཚོས་བྱ་སྤྱོད་ཆེ་གྲས་ལྔ་དང་དུད་ཚང་དུ་བསྐྱོད་ནས་གྲལ་བཤེར་བྱེད་པའི་ལས་དོན་སྤེལ་བ་རེད།
ད་ཐེངས་ཀྱི་གྲལ་བཤེར་བྱེད་སྒོ་དེ། གཅིག་ནས་དུད་ཁྱིམ་རེ་རེར་བཅར་འདྲིར་བསྐྱོད་དེ་གཞི་རྩའི་ཆ་འཕྲིན་རྩད་ཞིབ་བྱེད་པ་དང་། གཉིས་ནས་སེམས་ཁྲལ་མེད་པ་གཉིས་དང་འགན་སྲུང་གསུམ་ལ་ལྟ་ཞིབ་བྱེད་པ། གསུམ་ནས་དབུལ་པོ་བསྐྱར་ལོག་གི་ཉེན་ཁ་ཡོད་མིན་རྩད་སྤྱོད་བྱེད་པ། བཞི་ནས་ཉེན་ཁང་སྒྱུར་བཀོད་གནས་ཚུལ་ལ་ལྟ་ཞིབ་བྱེད་པ། ལྔ་ནས་ཁྲོན་པ་གྲལ་བཤེར་བྱེད་པ། དྲུག་ནས་འབྲོག་དུད་ཀྱི་འཕྲོད་བསྟེན་དང་གེགས་འགོག་གེགས་སེལ་དངོས་ཟོག་གྲབས་གསོག་བྱ་ཚུལ་ལ་ལྟ་ཞིབ་བྱེད་པ། བདུན་ནས་གནས་སྤོས་དུད་ཚང་སྡོད་ཁང་དུ་སྡོད་ཚད་ལ་ལྟ་ཞིབ་བྱེད་པ། བརྒྱད་ནས་དབུལ་སྐྱོར་སྲིད་ཇུས་དང་སྨན་བཅོས་འགན་བཅོལ་སྲིད་ཇུས་སྒྲོག་འགྲེལ་བྱེད་པ་། དགུ་ནས་འགོ་ཁྲིད་ཆེ་གྲས་ལྔ་དང་དེ་བཞིན་རིམ་པ་ལྔའི་ཧྲུའུ་ཅི་ཤེས་རྟོགས་ཐུབ་མིན་སོགས་རྣམ་གྲངས་བཅུ་གཉིས་ལ་འདྲི་རྩད་བྱས་པ་རེད། གྲལ་བཤེར་ལས་དོན་ཁྲོད་མང་ཚོགས་ཀྱིས་དབུལ་སྐྱོར་སྲིད་ཇུས་ཤེས་རྟོགས་ཐུབ་ཚད་མཐོ་པོ་མེད་པའི་གནད་དོན་ལ། འཕྲལ་མར་བྱ་སྤྱོད་སྤེལ་བའི་རྩ་དོན་ལྟར་དུད་ཚང་རེར་ངང་རྒྱུད་རིང་པོས་འགྲེལ་བཤད་རྒྱག་པ་དང་གནད་དོན་ཐག་གཅོད་བྱས་པ་རེད།
གྲལ་བཤེར་ལས་དོན་དེ་སྤེལ་བ་བརྒྱུད་འཇགས་ལུང་གྲོང་ཚོའི་ཨུ་ལྷན་གསུམ་གྱིས་ཐེངས་འདིའི་དབུལ་སྒྲོལ་ཡོངས་བཤེར་ལས་དོན་གྱི་གལ་ཆེའི་རང་བཞིན་དང་ཁ་ཚ་དགོས་གཏུག་གི་རང་བཞིན་ལ་ངོས་འཛིན་ཐུབ་པར་མ་ཟད། གྲོང་ཚོའི་འབྲོག་པ་མང་ཚོགས་ཀྱིས་དབུལ་སྐྱོར་སྲིད་ཇུས་ཁག་ལ་སྔར་ལས་ལྷག་པའི་རྒྱུས་ལོན་བྱུང་ནས། མང་ཚོགས་རྣམས་ཏང་གི་བཀའ་དྲིན་ཚོར་བ་དང་། ཏང་གི་བཀའ་ལ་ཉན་པ། ཏང་གི་རྗེས་སུ་འབྲངས་བའི་ཆོད་སེམས་དེ་བས་ཇེ་བརྟན་རུ་ཕྱིན་ཡོད།
