ཟུང་ཆུ་རྫོང་གཙོ་ཚང་དགོན་གྲོང་རྡལ་ཕྱུགས་ར་གྲོང་པ་ལ་རང་བྱུང་གི་ཕྱུགས་ར་མུའུ་40ལས་བརྒལ་བ་ཡོད་པས། རྩྭ་ཐང་གི་གྲོང་པ་དང་པོ་ཞེས་པའི་མཚན་སྙན་ཐོབ་ཡོད། དེ་རུ་ཕྱི་སྣོད་ཀྱི་འཇིག་རྟེན་ཉམས་དགའ་ཞིང་། ཐུན་མོང་མ་ཡིན་པའི་དམངས་སྲོལ་རིག་གནས་ཀྱིས་ཕྱུག་པས། གྲོང་པ་དེ་རུ་ཡུལ་སྐོར་ལྗོངས་རྒྱུ་བྱེད་མཁན་མེ་ཏོག་གི་ཚལ་དུ་གསེར་སྦྲང་འཁོར་བ་དང་གཉིས་སུ་མ་མཆིས་ལ། དེ་བས་གྲོང་པའི་ནང་དུ་སྐུ་མགྲོན་སྣེ་ལེན་བྱེད་ས་སོགས་ས་གནས་དེ་གའི་དམངས་སྲོལ་རིག་གནས་ཀྱི་ཁྱད་ཆོས་འབུར་དུ་ཐོན་པའི་སྤྲོ་སྐྱིད་ཁང་མང་ཞིང་། ལོ་གཅིག་ལ་གྲོང་པའི་ཐུན་མོང་གི་ཡོང་བབ་སྒོར་ཁྲི་30ལས་བརྒལ་བ་དང་། གྲོང་མིའི་ཆ་སྙོམས་ཡོང་བབ་སྒོར་ཁྲི་3ལ་སླེབས་ཡོད།

ཕྱུགས་ར་གྲོང་པའི་བོད་ཁྱིམ་སྤྲོ་སྐྱིད་ཁང་གི་ཕྱིའི་བཀོད་པ།

    ངེད་ཚང་གི་ཕྱུགས་ར་ནི་ཁོ་ཚོས་དོ་དམ་བྱེད་བཞིན་ཡོད་རེད། ངས་དུས་རྒྱུན་བོད་ཁྱིམ་སྤྲོ་སྐྱིད་ཁང་དུ་ལས་གཉེར་བྱེད་བཞིན་ཡོད། འདི་འདྲ་བྱས་ན་ཚང་མ་ལ་དགེ་མཚན་ཆེན་པོ་འདུག་ཅེས་ཕྱུགས་ར་གྲོང་པའི་ཕོ་སར་ཚེ་རིང་དབང་ཕྱུག་གིས་ལབས་བྱུང་། ཁོ་པ་ཚང་གིས་ཕྱུགས་ར་གྲོང་པའི་དབུལ་ཕོངས་དུད་ཁྱིམ་ཨ་གྲགས་ཁྱིམ་མི་གསུམ་ལ་ལོ་རེ་སྒོར་ཁྲི་གསུམ་བརྔན་པ་སྦྱིན་ནས་ཕྱུགས་ཟོག་འཚོ་བཅུག་བཞིན་ཡོད་ལ། དེ་དང་དུས་མཚུངས་སུ། ཨ་གྲགས་ཀྱིས་རང་གི་ཕྱུགས་ཟོག་རྣམས་ཚེ་རིང་དབང་ཕྱུག་ཚང་གི་ཕྱུགས་ར་རུ་དེད་ཡོང་ནས་འཚོ་ཆོག་པ་རེད། ལོ་འགའི་རིང་། ཨ་གྲགས་ཚང་གི་ཕྱུགས་ཟོག་གི་གྲངས་འབོར་དེ་སྔོན་གྱི་20ལྷག་ལས་དེང་དུས་90ལྷག་ལ་འཕར་ཞིང་། ཁྱིམ་དུ་ཁང་པ་གསར་པ་ཞིག་ཀྱང་འགེབས་ཡོད་པ་རེད།

བོད་ཁྱིམ་སྤྲོ་སྐྱིད་ཁང་གི་ལྡུམ་ར།

    ཕྱུག་པོས་དབུལ་ཕོངས་ཕྱུག་ལམ་ཁྲིད། ལག་ཟུང་སྦྲེལ་ནས་འབྱོར་འབྲིང་སྐྲུན། གཙོ་ཚང་དགོན་གྲོང་རྡལ་གྱིས་གཞུང་ལམ་ཉེ་འགྲམ་གྱི་གྲོང་ཚོ་ཕྱུག་པོ་དང་ས་ཐག་རིང་བའི་གྲོང་ཚོའི་དབུལ་ཕྱུག་གི་ཧེ་བག་ཇེ་ཆུང་གཏོང་བའི་ཆེད་དུ།  “སྣེ་ཁྲིད་བཞི་དང་རོགས་སྐྱོར་བཞིའི་”དབུལ་སྐྱོར་རོགས་རམ་གྱི་རྣམ་པ་གསར་པའི་ཐོག་མའི་བསམ་འདུན་སྤྱད་པ་རེད། དེ་ལས་སྣེ་ཁྲིད་བཞི་ནི། གྲོང་ཚོ་ནུས་ལྡན་གྱིས་ནུས་མེད་ཁྲིད། གྲོང་པ་ཕྱུག་པོས་དབུལ་པོ་ཁྲིད། སྔོན་ཐོན་ཅན་གྱིས་རྗེས་ལུས་ཁྲིད། ལས་ཁུངས་ཀྱིས་གྲོང་སྡེ་ཁྲིད་པ་བཅས་རེད་ལ། རོགས་སྐྱོར་བཞི་ནི། ཏང་འཛུགས་རོགས་སྐྱོར། རིགས་སྟོབས་རོགས་སྐྱོར། རྣམ་གྲངས་རོགས་སྐྱོར། མ་དངུལ་རོགས་སྐྱོར་བཅས་རེད། “སྣེ་ཁྲིད་བཞི་དང་རོགས་སྐྱོར་བཞི་”ནི་འབོད་ཚིག་ཙམ་མིན་པར་ཐབས་ཤེས་འདིས་གྲོང་སྡེའི་བར་གྱི་ལེགས་ཆ་འདོན་སྤེལ་དང་ཕན་ཚུན་རོགས་རམ་སྒོས་འཕེལ་རྒྱས་ཕྱིན་པར་སྐུལ་འདེད་བཏང་ཡོད།

ཕྱུགས་ར་གྲོང་པའི་བོད་ཁྱིམ་སྤྲོ་སྐྱིད་ཁང་གི་སྐུ་མགྲོན་སྣེ་ལེན་བྱ་ཡུལ།

    སྔོན་ཐོན་གྲོང་པས་དབུལ་ཕོངས་གྲོང་པའི་འབྲོག་པའི་དུད་ཁྱིམ་ལ་ལས་ཞུགས་རོགས་རམ་བྱེད་པའི་དུས་མཚུངས་སུ། ལས་མི་བསྡུ་དཀའ་བའི་གནད་དོན་ཡང་ཐག་གཅོད་བྱས། སྤྱི་ལོ་2013ལོའི་ཚུན། གཙོ་ཚང་དགོན་གྲོང་རྡལ་གྱི་གྲོང་པ་སོ་སོས་གྲོང་པའི་དངོས་ཡོད་གནས་ཚུལ་དང་བསྟུན་ནས། དབུལ་ཕོངས་གྲོང་པའི་ལས་ཞུགས་ཀྱི་འདོད་བློ་ཡོད་པའི་མི་རྣམས་ལ་ལས་ཞུགས་ལས་གནས་1000ལྷག་མཁོ་འདོན་བྱས། ཕྱུགས་ར་གྲོང་པ་དང་སྐྱ་སྨད་གྲོང་པ། བར་རོང་གྲོང་པ། ལྕང་ལ་གྲོང་པ་གསུམ་པ་སོགས་ཡུལ་སྐོར་ལས་རིགས་ལ་བརྟེན་པའི་གྲོང་པ་རྣམས་ཀྱིས་དབུལ་ཕོངས་གྲོང་པ་ལ་མགྲོན་ཁང་དང་བོད་ཁྱིམ་སྤྲོ་སྐྱིད་ཁང་སོགས་ཀྱི་དོ་དམ་དང་ཞབས་ཞུའི་ལས་གནས་མཁོ་འདོན་བྱས་ཡོད།

དེང་རབས་མགྲོན་ཁང་སྤུས་དག་ལྟར་བཟོས་པའི་མལ་ཁང་།

    གཙོ་ཚང་དགོན་གྲོང་རྡལ་གྱི་ཏང་ཨུ་ཧྲུའུ་ཅི་གཞོན་པ་ཝང་ཧུང་ཞ་ཡིས་ང་ཚོའི་ཕྱུག་པོ་དང་སྔོན་ཐོན་ཅན་གྱི་གྲོང་པ་10ཡིས་ཏང་ཨུ་དང་ཀྲི་པུའུ་ཡི་སྣེ་ཁྲིད་འོག་འཕེལ་རྒྱས་ཅུང་ཞན་པའི་གྲོང་པ་10ལ་ཁ་གཏད་རོགས་སྐྱོར་བྱས་ཤིང་། གཞན་ལ་རོགས་སྐྱོར་བྱེད་པ་དེ་རང་དོན་དང་འོས་འགན་དུ་བརྩིས་ནས་སྒྲུབ་བཞིན་ཡོད་ཅེས་ཟེར། ཉེ་བའི་ལོ་ཤས་རིང་། གཙོ་ཚང་དགོན་གྲོང་རྡལ་གྱི་ཏང་ཨུ་ཡིས་ཁྱོན་ཡོངས་ནས་“ཏང་འཛུགས་ཀྱིས་དབུལ་སྐྱོར་ལ་སྣེ་ཁྲིད་པ་དང་དབུལ་སྐྱོར་གྱིས་ཏང་འཛུགས་ལ་སྐུལ་འདེད་གཏོང་བའི་”ལས་དོན་ལ་སྐུལ་འདེད་བཏང་ནས། “སྣེ་ཁྲིད་བཞི་དང་རོགས་སྐྱོར་བཞི་”ཡི་ཏང་ནང་ཁུལ་གྱི་རོགས་སྐྱོར་ལས་གྲྭར་སྐུལ་འདེད་གཏིང་ཟབ་བཏང་བ་དང་། རྒྱལ་ལམ་213ཉེ་འགྲམ་གྱི་དཔལ་འབྱོར་འཕེལ་རྒྱས་ཆེ་བའི་ས་ཁུལ་གྱིས་སྣེ་ཁྲིད་བྱེད་པའི་ནུས་པ་འདོན་སྤེལ་གང་ལེགས་ཐུབ་པ་བྱས། གནད་སྨིན་ཁ་གཏད་དང་ཕྱོགས་གཉིས་མཉམ་འབྲེལ་ལ་སྐུལ་འདེད་བཏང་ནས། དམུ་དགེ་གྲོང་རྡལ་དང་ནོར་བ་གྲོང་པ། ཞའོ་ཧོ་ཡུལ་ཚོ་སོགས་ས་གནས་ཀྱི་དཔལ་འབྱོར་འཕེལ་རྒྱས་དང་ས་གནས་དེ་གའི་རོང་འབྲོག་མང་ཚོགས་ཀྱི་ཡོང་འབབ་འཕར་ནས་ཕྱུག་འགྱུར་ཡོང་བར་ནུས་པ་ཐོན་ཞིང་། གཉིས་ཕན་ཟུང་རྒྱལ་དང་མཉམ་དུ་འཕེལ་རྒྱས་ཡོང་བའི་དབུལ་སེལ་འགག་སྒྲོལ་གྱི་རྣམ་པ་གསར་པ་ཞིག་གྲུབ་ཡོད་དོ། །

ཟུང་ཆུ་རྫོང་གཙོ་ཚང་དགོན་གྲོང་རྡལ་ཕྱུགས་ར་གྲོང་པ།