དེ་རིང་ནི་སྤྱི་ལོ་༢༠༢༠ལོའི་རྒྱལ་ཡོངས་གཅིག་གྱུར་མཐོ་རྒྱུགས་གཏོང་འགོ་ཚུགས་པའི་ཉིན་མོ་རེད། གསར་འགོད་པས་སློབ་གསོ་པུའི་ཡིག་རྒྱུགས་ལྟེ་གནས་ནས་ཤེས་རྟོགས་བྱུང་བར། འདི་ལོར་ཧྲན་ཤི་དང་། ཨན་ཧུད། ཧྲང་ཧེ། བོད་ལྗོངས་སོགས་ཞིང་ཆེན་དང་གྲོང་ཁྱེར། རང་སྐྱོང་ལྗོངས་བཅས་སུ་ལོང་བའི་ཡིག་རྒྱུགས་གཏོང་མཁན་སློབ་མ་༥ཡོད་པ་དང་། དེའི་ཁྲོད་དུ་བོད་ལྗོངས་སུ་བོད་རིགས་སློབ་མ་ལོང་བ་གཉིས་ཡོད་ཅིང་། ཁོ་གཉིས་ཀྱིས་ལོང་བའི་བོད་ཡིག་ཡིག་ཚད་བཏང་ཡོད་པ་རེད།
ལོང་བའི་མཐོ་རྒྱུགས་འདོན་མཁན་ནང་དུ། མཐོ་རྒྱུགས་ཡིག་ཚད་གཏན་འཁེལ་ཚོ་ཆུང་གི་ཁོངས་མི་ཕུད། ད་དུང་འབྲེལ་ཡོད་ལོང་བའི་སློབ་གསོའི་ཆེད་ལས་མཁས་པ་ཡོད་པ་རེད། ཡིག་རྒྱུགས་པར་འདེབས་རྙོག་འཛིང་ཆེ་བ་དང་། ལོང་ཡིག་གྲུ་བཞི་རེ་ཡི་གེ་གཅིག་ཡིན་པ་དང་། ཡི་གེ་གཅིག་ཚེགས་དྲུག་ལས་གྲུབ་ཅིང་། ཚེགས་དེ་དག་གི་གནས་སྟངས་ལ་བརྟེན་ནས། དོན་མི་འདྲ་བ་སྟོན་གྱི་ཡོད། སྤྱིའི་ཆ་ནས་ལོང་ཡིག་གྲུ་བཞི་གཉིས་ཀྱིས་རྒྱ་ཡིག་ཡིག་འབྲུ་གཅིག་གི་དོན་སྟོན་གྱི་ཡོད།
ལོང་བས་ཡིག་ཚད་གཏོང་བའི་སྐབས་སུ་ལག་པས་རེག་ནས་ཡིག་ཚད་ཀྱི་དྲི་གཞིར་ལན་འདེབས་དགོས་ཀྱི་ཡོད་པས། དུས་ཚོད་ཐད་བདེ་ཐང་སློབ་མ་ལས་མང་ཞིང་། སློབ་བསྡུའི་སྐབས་སྐར་གྲངས་ཀྱང་སློབ་མ་དཀྱུས་མ་དང་མི་འདྲ་ལ། སྐར་མ་ཁ་སྣོན་སོགས་ཀྱི་གཟིགས་སྐྱོང་མེད།
མཐོ་རྒྱུགས་འོས་མཚམས་དང་སྟབས་བདེ་ཞེས་པའི་ནང་གཏན་འབེབས་བྱས་པར། མིག་ཤེས་ཉམས་པའི་ཡིག་རྒྱུགས་གཏོང་མཁན་སློབ་མར་ལོང་བའི་ཡིག་རྒྱུགས་དང་། ཡི་གེ་ཆེ་བའི་ཡིག་རྒྱུགས། ཡིག་རྒྱུགས་དཀྱུས་མ་བཅས་སྤྱད་དགོས་ཤིང་། དྲི་ལན་འདེབས་པར་དགོས་ངེས་ཀྱི་ལོང་བའི་སྨྱུ་གུ་དང་། ལོང་ཡིག་འབྲི་དེབ། ལོང་ཡིག་རི་མོའི་ལག་ཆ། ཚི་སྣའི་གདན། གསོག་འཇོག་ནུས་པ་མེད་པའི་ལོང་ཡིག་ཡིག་བཏགས་འཕྲུལ་ཆས། གསོག་འཇོག་ནུས་པ་མེད་པའི་གློག་རྡུལ་ཉན་བྱེད་འཕྲུལ་ཆས། ལོང་བའི་འཁར་བ། གློག་སྒྲོན། འོད་རིག་པའི་ཆེ་ཤེལ་སོགས་ཀྱི་རོགས་སྐྱོར་འཕྲུལ་ཆས་སམ་སྒྲིག་ཆས་འཁྱེར་ཆོག་གི་ཡོད། ལོང་བའི་སློབ་མས་ཡིག་ཚད་དེའི་དུས་ཚོད་ཡོངས་ཀྱི་རྨང་གཞིའི་ཐོག་བརྒྱ་ཆའི་༥༠ནར་འགྱངས་བྱེད་ཆོག་གི་ཡོད།
