སྐད་ཁོངས་མི་འདྲ་བའི་རྒྱལ་ཁབ་དང་རྒྱལ་ཁབ་ཀྱི་བར། མི་རིགས་དང་མི་རིགས་ཀྱི་བར། མི་དང་མིའི་བར་དུ་རིག་གནས་དང་བསམ་བློ་བརྗེ་རེས་བྱས་པའམ་རིག་གནས་ཀྱི་བརྡ་འཕྲིན་ཕན་ཚུན་ལ་གོ་བར་བྱེད་པའི་སྐད་དང་ཡི་གེ་བརྗེ་རེས་བྱེད་པའི་བྱ་བ་དེ་ལ་ལོ་ཙཱའམ་ཡིག་སྒྱུར་ཞེས་འབོད་བཞིན་ཡོད། དེ་ནི་སྐད་ཡིག་གཅིག་གིས་མཚོན་པའི་ནང་དོན་དང་རྩོམ་གཤིས་སོགས་བརྡ་འཕྲིན་རྣམས་ཆ་ཚང་ཞིང་ཡང་དག་པའི་སྒོ་ནས་སྐད་ཡིག་གཞན་ཞིག་གིས་མཚོན་པར་བྱེད་པའི་སྐད་དང་ཡི་གེའི་འགུལ་སྐྱོད་ཅིག་ལ་གོ་ཞིང་། དེ་ལས་འཛམ་གླིང་མིའི་རིགས་ཀྱི་བར་རིག་གནས་དང་སྒྱུ་རྩལ་ཕན་ཚུན་སྤེལ་རེས་བྱེད་པ་དང་། དེས་མིའི་རིགས་ཕན་ཚུན་འབྲེལ་བ་བྱེད་པ། རིག་གནས་དང་ཚན་རིག་ཁྱབ་གདལ་གཏོང་བ། ཐོན་སྐྱེད་གོང་འཕེལ་འགྲོ་རྒྱུར་སྐུལ་མ་གཏོང་བ་སོགས་ཀྱི་ཐད་ནས་གལ་ཆེའི་ནུས་པ་ཐོན་དང་འདོན་མུས་ཡིན། གཤམ་ནས་རང་གི་ལོ་འདི་དག་གི་རིང་ནས་བོད་རྒྱ་གསར་འགྱུར་ཡིག་སྒྱུར་གྱི་ལས་དོན་སྒྲུབ་པའི་ཉམས་མྱོང་དང་ཟུང་འབྲེལ་གྱིས་ཡིག་སྒྱུར་ལས་དོན་པ་ཞིག་ཡིན་ན་ངེས་པར་དུ་དེའི་ཐད་ཀྱི་ཆ་རྐྱེན་འགའ་ཚང་དགོས་ཏེ།

དང་པོ། མ་ཡིག་གི་གོ་དོན་དཔྱིས་ཕྱིན་པ་ཁོང་དུ་ཆུད་པར་བྱ་དགོས།

གསར་འགྱུར་ཡིག་སྒྱུར་གྱི་ལས་ཀ་དང་པོ་ནི་མ་ཡིག་ལ་གོ་བ་མཐར་ཕྱིན་པ་ཞིག་དང་གཏིང་ཚུགས་པ་ཞིག་ལེན་རྒྱུ་དེ་ཡིན་ཞིང་། དེ་ཡང་མ་མཐར་ཡང་མ་ཡིག་གི་བརྡ་སྤྲོད་ཁྱད་ཆོས་ཁོང་དུ་ཆུད་པ་དང་མ་ཡིག་གི་ཐ་སྙད་འབོར་ཆེན་ཁོང་དུ་ཆུད་པ། མ་ཡིག་ལྟ་ཀློག་དང་དེར་བསམ་གཞིག་བྱེད་པའི་ནུས་པ་དང་བྱང་ཚད་ངེས་ཅན་ལྡན་དགོས། མ་ཚད་ད་དུང་མ་ཡིག་གི་ཐ་སྙད་དེ་དག་གི་ལོ་རྒྱུས་རྒྱབ་ལྗོངས་དང་རིག་གནས་ཀྱི་རྒྱབ་ལྗོངས་ཤེས་པར་བྱེད་དགོས། དེས་ན་ཡིག་སྒྱུར་བྱེད་སྐབས་སྐད་ཆའི་བརྗོད་སྟངས་དང་བརྡ་སྤྲོད་ཀྱི་གཞུང་ལུགས། རྒྱན་གྱི་སྦྱོར་ཚུལ་སོགས་བུ་ཡིག་ཏུ་ལེགས་པར་ཕབ་སྟེ་བརྗོད་དོན་ཀློག་པ་པོས་ཁ་གསལ་ལ་གོ་བདེ་བའི་ངང་ནས་རྟོགས་ཐུབ་པ་ཞིག་ཡོང་བར་བྱེད་དགོས། དེ་ལྟར་མ་བྱུང་ཚེ་ལོ་ཙཱ་བ་ཕུལ་བྱུང་ཞིག་བྱེད་འདོད་པ་ནི་ཉིན་མོའི་སྐར་མ་ལྟར་ཡིན། ལྷག་པར་དུ་དེང་སྐབས་གསར་འགྱུར་རྩོམ་ཡིག་ནང་ཕྱི་ཡོང་རིག་གནས་ཀྱི་མིང་ཚིག་དང་ཐ་སྙད་གསར་པ་ནི་ཆར་རྗེས་ཤ་མོ་བརྡོལ་བ་བཞིན་གཅིག་མཇུག་གཉིས་མཐུད་ངང་ཐོན་བཞིན་ཡོད་པས་གསར་འགྱུར་ལོ་ཙཱ་བ་ཞིག་གི་ངོས་ནས་བརྗོད་ཚེ། ཐོག་མར་དུས་རབས་ཀྱི་ཤེས་བྱ་གསར་པ་དེ་དག་ལ་སྦྱངས་བརྩོན་གང་ལེགས་བྱས་ཐོག་དུས་རབས་གསར་པའི་ནང་འཕྲད་པའི་ཡིག་སྒྱུར་གྱི་གནད་དོན་རབ་དང་རིམ་པར་ཞིབ་འཇུག་འཚོལ་ཞིབ་དང་། གཟབ་ནན་གྱིས་དེའི་ཐད་ཀྱི་ཤེས་བྱ་རང་རྒྱུད་ལ་འཇགས་པ་བྱ་རྒྱུ་ནི་མ་མཐའི་ཆ་རྐྱེན་ཞིག་ཡིན་པ་དང་། ཆ་རྐྱེན་དེ་རང་རྒྱུད་ལ་ལྡན་ཚེ་སྐབས་བབས་སུ་བརྗོད་པའི་མ་ཡིག་ལ་གོ་བ་ལེན་པའི་བརྒྱུད་རིམ་དེ་གཞི་ནས་གླེང་ཆོག །

གཉིས་པ། ཡིག་སྒྱུར་བ་རང་ཉིད་ལ་ཡིག་རིགས་གཉིས་ཀྱི་ཆུ་ཚད་མཐོན་པོ་ལྡན་དགོས།

ཡིག་སྒྱུར་བར་ཡིག་རིགས་གཉིས་ཀྱི་ཆུ་ཚད་མཐོ་པོ་ལྡན་དགོས་པ་ནི་ཡིག་སྒྱུར་གྱི་ལས་ལ་འཇུག་པའི་མཐུན་རྐྱེན་དང་པོ་དེ་ཉིད་ཡིན་ལ། ཡིག་སྒྱུར་ལ་མཁས་པར་འགྱུར་བའི་མཐུན་རྐྱེན་དང་པོ་དེའང་ཡིན། དེར་བརྟེན་ཡིག་སྒྱུར་གྱི་ལས་ལ་གཞོལ་མཁན་སུ་འདྲ་ཞིག་ཡིན་རུང་ཡིག་རིགས་མི་འདྲ་བ་གཉིས་ཀྱི་ཆུ་ཚད་ངེས་ཅན་ཞིག་ལྡན་དགོས། དེ་ལྟར་མ་བྱུང་ཚེ་ཡིག་སྒྱུར་ཞེས་པ་གླེང་ཐབས་བྲལ་ལོ། ། འདི་གར་ངས་དམིགས་སུ་བཀར་ནས་བརྗོད་འདོད་པ་ཞིག་ནི་རང་གིས་ཡིག་སྒྱུར་བྱེད་པའི་ཡིག་རིགས་གཉིས་ཀའི་ཡིག་རྩ་ནོན་པོ་དང་། བརྗོད་པ་བསྡུས་ལ་བདེ་བ། རྗོད་བྱེད་ཚིག་གྲུབ་སྙན་ལ་ཚིག་སྦྱོར་འཁྲུག་ཆ་དོད་པོ། བརྡ་རྙིང་གི་ཤེས་བྱ་ཟབ་ཙམ་དང་ཚིག་རྒྱན་རིག་པའི་ཐད་ལའང་ཐོགས་པ་མེད་པ་ཞིག་བཅས་དགོས་གལ་ཆེའོ། །མིག་སྔར་ཡིག་སྒྱུར་རྩོམ་ཡིག་མང་པོ་ཞིག་གི་བརྗོད་དོན་གོ་དཀའ་བ་དང་། རྗོད་བྱེད་ཚིག་སྦྱོར་མི་བདེ་བ་སོགས་ཀྱི་རྒྱུ་རྐྱེན་ནི་སྐད་ཡིག་གཉིས་ཀར་བྱང་ཚད་དེ་ཙམ་མེད་པའམ་ཡང་ན་སྐད་ཡིག་སྣ་གཅིག་གི་བྱང་ཚད་མཐོ་ཙམ་ཡོད་རུང་གཅིག་ཤོས་དེའི་ཆུ་ཚད་དམའ་དྲགས་པས་ཡིན་པ་སྨོས་མེད་རེད། དེས་ན་ལོ་ཙཱ་བ་ཞིག་ཡིན་ཕྱིན་སྐད་ཡིག་གཉིས་ཀྱི་ཆུ་ཚད་མཐོ་རུ་གཏོང་རྒྱུར་རྒྱུན་དུ་དོ་སྣང་ཧ་ཅང་ཆེན་པོ་བྱེད་དགོས་པར་སེམས། །

གསུམ་པ། སྒྱུར་ཡིག་གི་ནང་དོན་དེ་མི་རིགས་རང་གི་སྐད་ཀྱི་འགྲོས་དང་བསྟུན་དགོས།

གནའ་རབས་རྒྱ་གར་གྱི་རིག་གནས་དང་ཆོས་དཔེ་མང་པོ་ཞིག་གི་མ་དཔེ་རྣམས་གཏོར་བཤིག་ཐེངས་མང་བྱུང་བའི་དབང་གིས་མཐོང་རྒྱུ་མེད་པར་གྱུར་ཡང་བོད་ཡིག་ཐོག་ཕབ་སྒྱུར་བྱས་པའི་བཀའ་བསྟན་རྣམས་དེང་སྐབས་ཡང་བསྐྱར་བོད་ཡིག་ནས་ཕར་རྒྱ་གར་གྱི་ཡི་གེར་ཕབ་སྒྱུར་བྱས་པ་དེ་དག་རྒྱ་གར་གྱི་ཡི་གེའི་མ་དཔེ་དངོས་དང་ཁྱད་མེད་པའི་ཕན་ཐོགས་ཆེན་པོ་ཡོད་པ་རྒྱལ་ཁབ་ཕྱི་ནང་གི་མཁས་དབང་མང་པོས་གཅིག་གྱུར་ཐོག་ངོས་འཛིན་གནང་གི་ཡོད་པ་མ་ཟད། རྒྱ་གར་གྱི་དཔེ་ཆ་རྒྱ་ཡིག་དང་བོད་ཡིག་ནང་གོ་སླ་བ་དང་བརྗོད་དོན་ཆ་ཚང་བ་ཡོད་པའང་རྒྱ་བོད་གཉིས་ཀའི་སྐད་ཡིག་ལ་མཁས་པའི་མཁས་དབང་མང་པོ་ཞིག་གིས་གསུངས་དང་གསུང་མུས་རེད། ད་དུང་འཛམ་གླིང་ཐོག་དེ་སྔ་སངས་རྒྱས་ཆོས་ལུགས་ཀྱི་ཆོས་དཔེ་མང་པོ་ཞིག་མི་རིགས་འདྲ་མིན་སྣ་ཚོགས་ཀྱི་སྐད་དུ་ཕབ་སྒྱུར་བྱས་ཡོད་ནའང་བོད་ཀྱི་ཡི་གེར་ཕབ་སྒྱུར་བྱས་པའི་སྒྱུར་ཡིག་ནི་བསྒྱུར་དག་ཤོས་ཤིག་ཡིན་པ་མི་རིགས་དང་རྒྱལ་ཁབ་མི་འདྲ་བའི་མཁས་པ་མང་པོས་མགྲིན་གཅིག་ཏུ་འདོད་ཀྱི་ཡོད། དེར་བརྟེན་དེང་གི་འཛམ་གླིང་རིག་གནས་ཀྱི་གྲལ་སྟར་ནང་བོད་རིག་པ་ཞེས་གཟི་བརྗིད་འོད་སྟོང་འཕྲོ་བའི་གྲས་སུ་གྱུར་ཏེ་རྒྱལ་སྤྱིའི་རང་བཞིན་ལྡན་པའི་ཞིབ་འཇུག་བྱ་ཡུལ་དུ་གྱུར་པ་དེ་ནི་སྔོན་བྱོན་བོད་ཀྱི་ལོ་ཙཱ་བ་རྣམས་ཀྱི་མཛད་རྗེས་ཡིན་ལ། ཡང་སྒོས་ལོ་ཙཱ་བར་མཁོ་བའི་ཆ་རྐྱེན་ལ་མཐོང་ཤིན་ཏུ་ཆེན་པོ་གནང་བའི་འབྲས་བུ་ཞིག་ཡིན་པ་གནམ་འོག་སྐྱེ་བོ་ཀུན་གྱིས་ཀྱང་བསྙོན་དུ་མེད་པ་ཞིག་རེད།

བཞི་པ། ཡིག་སྒྱུར་བར་སྤྱི་ཚོགས་ཀྱི་འགན་སེམས་ཆེན་པོ་ལྡན་དགོས།

ཡིག་སྒྱུར་གྱི་འགན་འཁྲི་ནི་བླ་ན་མེད་པ་ཞིག་ཡིན་པ་དང་དེ་ནི་སྐད་བརྡ་སྤྲོད་རེས་བྱེད་པའི་མཚམས་སྦྱོར་ཞིག་ཡིན་པ་མ་ཟད། སྐད་ཡིག་མི་འདྲ་བ་ཕན་ཚུན་སྤེལ་རེས་བྱེད་པའི་འགན་ཁུར་དགོས་པ་དང་སྤྱི་ཚོགས་ཀྱི་འགན་འཁྲིའང་ཁུར་དགོས། ཡིག་སྒྱུར་གྱི་འགན་འཁྲི་དངོས་འབྲེལ་ཁུར་དགོས་ཚེ་དང་ཐོག་འགན་འཁྲི་དེ་དང་འབྲེལ་ཡོད་ཀྱི་ཤེས་བྱར་ཤེས་རྟོགས་ཡང་དག་པར་བྱེད་དགོས་པ་ལས་མི་ཤེས་ཤེས་མདོག་བྱས་ན་ཅིས་ཀྱང་ག་ལ་འགྲིག ཡིག་སྒྱུར་བྱ་བཞག་ཁྲོད་ད་དུང་རང་ཅག་ལོ་ཙཱ་བ་ཚོས་ཚན་རིག་ལག་རྩལ་དང་ཆ་འཕྲིན་སྣ་ཚོགས་བོད་རིགས་མང་ཚོགས་ལ་བརྒྱུད་སྤྲོད་ལེགས་པོ་བྱ་ཐུབ་པའི་སྤྱི་ཚོགས་ཀྱི་འགན་སེམས་ལ་བརྟེན་ནས་ཡིག་སྒྱུར་གྱི་སྤུས་ཚད་མཐོ་རུ་གཏོང་བའི་མཐུན་རྐྱེན་གང་ལེགས་བསྐྲུན་དགོས་ལ། ཐོག་མཐའ་བར་གསུམ་དུ་འགན་བབས་ལས་ཀ་དེ་བྱང་ཆུབ་པ་ཞིག་ཡོང་བ་བྱ་རྒྱུའི་བརྩོན་སེམས་ཀྱང་དེ་བས་དགོས། གལ་སྲིད་ཁྲལ་སེལ་སླ་བཅོས་ཀྱི་བསམ་བློར་བརྟེན་ནས་ཡིག་སྒྱུར་བྱས་ཚེ་ལོ་མང་ཡིག་སྒྱུར་ལས་ལ་གཞོལ་ནས་ལོ་ཙཱ་བ་རྒན་གྲས་སུ་གྱུར་ཡང་ཤེས་ཚད་དེ་ནམ་ཡང་འཕེལ་མེད་སོར་གནས་སུ་ལུས་ནས་ལོ་ཙཱའི་མཚན་སྙན་གྱི་མདུན་དུ་ངོ་གནང་དགོས་པ་གྱུར་སྲིད། དེར་བརྟེན་ང་ཚོ་ཡིག་སྒྱུར་ལས་དོན་པ་རྣམས་ཀྱིས་གོང་གི་ངེས་པར་དུ་ཚང་དགོས་པའི་རྒྱུ་རྐྱེན་འདི་དག་བློར་ངེས་ཏེ་ལོ་ཙཱ་ཡི་ལས་ཀ་གོང་དུ་སྤེལ་བར་ཧུར་བརྩོན་ཆེན་པོ་བྱ་དགོས་སོ། །