སྤྱིར་སྟོན་མཆོག་གཤེན་རབ་མི་བོས་དགག་བྱ་དང་དགོས་པའི་དབང་གིས། བོན་ལ་སྐྱབས་སོང་ཕྱིན་ཆད་འགྲོ་ལ་གནོད་འཚེ་སྤང་དགོས་གསུངས་པ་དང་གཅིག བསྟན་པའི་ལས་ནི་སྙིང་རྗེ་གཞི་རྩ་འཛིན་དགོས་པ་དང་གཉིས། ལུང་དུ་མ་ལས། གཅིག་བསད་གཅིག་གསོ་བྱ་བའི་བོན་ནི་བདག་གིས་མི་ཤེས་སོ། དེ་ནི་ལོག་པ་ཡིན་པས་བྱ་རུ་མི་རུང་ངོ་ཞེས་གསུངས་པ་དང་གསུམ། ནམ་མཁའི་མཐའ་དང་མཉམ་པའི་སེམས་ཅན་ཐམས་ཅད་ཕ་མར་མ་གྱུར་པ་གཅིག་ཀྱང་མེད་པའི་གནད་ཀྱིས་ཐ་ན་སྲོག་ཆགས་འབུ་སྲིན་ཕྲ་མོ་ཡན་ཆད་ཕ་མ་ལྟ་བུར་འདུ་ཤེས་འཛིན་ཏེ་རྒྱུ་འབྲས་མན་ངག་བདུན་ལ་བློ་སྦྱོང་བྱ་དགོས་པ་སོགས་རྒྱུ་མཚན་དུ་མའི་སྒོ་ནས་གཡུང་དྲུང་བོན་ལུགས་འཛིན་པ་རྣམས་ཀྱིས་འགྲོ་བ་སེམས་ཅན་གྱི་སྲོག་ལ་འཚེ་བའི་དམར་མཆོད་ག་ལ་བྱེད་ཆོག་སྟེ་མི་ཆོག་གོ།
འོ་ན་གསང་སྔགས་ཀྱི་བོན་གཞུང་ཁག་ནང་། ཤ་ཁྲག་དམར་གྱི་མཆོད་པ་འབུལ་ཞེས་གསུངས་པ་ཅིའི་ཕྱིར་ཞེ་ན། སྐྱོན་མེད་དེ་ཤ་ཁྲག་གི་མཆོད་པ་ཟེར་བ་ཙམ་གྱིས་དམར་མཆོད་མི་འགྲོ་སྟེ་དམར་མཆོད་ཟེར་བ་ནི་ཆེད་དུ་དམིགས་ཏེ་སེམས་ཅན་གྱི་སྲོག་བཅད་ནས་དེའི་ཤ་ཁྲག་མཆོད་པ་འབུལ་བ་ལ་ཟེར། སྔགས་ལུགས་ལ་དུག་གསུམ་གྱི་རྩ་བ་གཅོད་ཕྱིར་དམ་རྫས་ལ་ཤ་ཁྲག་རུས་གསུམ་དགོས་ཏེ། གཏི་མུག་གི་རྩ་བ་གཅོད་ཕྱིར་ཤ་དང་། འདོད་ཆགས་ཀྱི་རྩ་བ་གཅོད་ཕྱིར་ཁྲག ཞེ་སྡང་གི་རྩ་བ་གཅོད་ཕྱིར་རུས་པ་དགོས་ཀྱང་། དེ་ལྟ་བུའི་དམ་རྫས་ཤ་ཁྲག་རུས་གསུམ་དེའང་སྟོན་པ་གཤེན་རབ་ཀྱིསསེམས་ཅན་གྱི་སྲོག་མ་བཅད་པའི་ཤ་སྣ་དང་ཁྲག་སྣ་དགོས་ཞེས་དམིགས་སུ་བཀར་ནས་གསུངས་ཡོད་པ་དེ་ལྟར་རེད།
