གཙོ་ངོས།>> རྩོམ་རིག>>སྙན་རྩོམ།

སྦྲང་བུ། རྩོམ་སྒྲིག་པ།ཚེ་དཔལ། ཡོང་ཁུངས།མཚོ་སྔོན་བོད་ཡིག་གསར་འགྱུར། སྤེལ་དུས། ༢༠༢༠ལོའི་ཟླ་བ་༡༠ཚེས་༢༠ཉིན།

༄༅།།སྨྲེང་བ་བརྒྱ་རྩ་བརྒྱད།


དཀར་མཛེས། སྦྲང་བུ།

ང་ཡི་རྣམ་རྟོག་མེ་ཏོག་ཁམས་སུ་ཐོན། །
ང་ཡི་སྙན་ངག་ཡིད་བརྙན་པང་དུ་ལུས། །
རྟོག་བཏགས་རྡོ་བ་དྲུད་པའི་མཚོ་མོའི་ཁར། །
གསེར་ཉ་གཤོག་དྲུག་ཅན་གྱི་སྙན་ངག་ལ། །
གཉུག་མའི་སེམས་ལས་སྤུར་བའི་སྐྱེད་ཚལ་དུ། །
ཞེ་འདང་པདྨའི་མདངས་དེ་སེམས་སུ་འཚང་། །
སྙན་ངག་ཁ་ཅིག་གཙང་པོའི་ཁ་རུ་ལྕེབས། །
ཡིག་འབྲུ་ཚོགས་ཤིག་ལུས་ཀྱི་ཟུངས་བཅུད་ཟད། །
ང་ཡི་སྙན་ངག་དབྱར་ཁའི་ལྗོངས་སུ་སླེབས། །
ཁྱོད་ཀྱིས་འདང་བའི་ཐ་སྙད་ཚོན་པོ་དག །
དབྱངས་སུ་ལྷུང་བའི་རོལ་མོའི་ལྡིང་ཁང་དུ། །
སོར་མོའི་འཕྲུལ་ལས་ང་ཡི་ཟློས་གར་བཞད། །
རྟོག་བཏགས་སྒྱུ་མས་འདག་པ་ཨེ་ཡིན་ནམ། །
སྐྱ་རེངས་ཟླ་བའི་ཚང་དུ་ལོག་ཕེབས་རྐྱེན། །
རྟོག་འགྱུ་གླེགས་བམ་དཀར་པོའི་དྲི་ངད་དུ། །
སྙན་ངག་རི་བོའི་འདབས་སུ་རི་དྭགས་ཤྭ། །
སྣང་བའི་མེ་ཏོག་ཆུན་པོ་རླུང་དུ་བསྐུར། །
ཨེ་མ་དམ་པའི་སེམས་ཀྱི་འཛུམ་དཀར་ཅན། །
སྙན་ངག་ཆུང་མ་བླངས་པར་སྔ་དྲགས་པས། །
གཏམ་རྒྱུད་དྲི་ངད་ཕོག་པའི་སྐྲ་ལོ་སྟེང་། །
གཞོང་བ་མེ་ཏོག་ཅིག་ལ་འགྲེལ་བཤད་གནང་། །
རྨི་ལམ་ཟླ་བའི་གྲོང་གི་གཟུགས་འགྱུར་ལ། །
སྨྲེང་བའི་རྒྱུད་སྐུད་བོར་བ་ཨེ་ཡིན་ནམ། །
རླུང་བུ་འཁྱག་པའི་ཀློང་གི་གཞིས་ཀ་སྟེ། །
སྙན་ངག་བྱད་གཟུགས་བོར་བས་རྐྱེན་གྱིས་སོང་། །
ཟླ་བའི་བས་མཐའི་གྲོང་གི་པདྨ་ལ། །
ཡི་གེའི་ནགས་ཚལ་ཀློང་གི་སྒྲ་ཞིག་གསོན། །
ཚིག་རྒྱན་གྲེ་རུ་ཟུག་པའི་ཁུ་བྱུག་དེས། །
ཁྱེད་ལ་བསྐུར་བའི་སྨྲེང་བ་བརྒྱ་རྩ་བརྒྱད། །
གདུང་བའི་སྐྱོ་གར་ལས་ཀྱིས་མ་བཀུགས་པར། །
སེམས་སུ་འཚང་བའི་འཛུམ་བག་ཟླ་བའི་མདོག །
ང་ལ་གནང་བའི་དབྱར་ཁའི་མཚེར་ས་ཡིན། །
ཡུལ་ལྗོངས་ཤིག་ཏུ་སྙན་ངག་ས་བོན་འདེབས། །
ཡངས་པ་ཞིག་ཏུ་ཁྱེད་ཀྱི་ས་བོན་འདེབས། །
སྐྱིད་སྡུག་རྒྱ་མ་ཐོགས་པའི་ཐབ་ཚང་དུ། །
རི་དྭགས་ཡུ་མོ་ཞིག་ལ་ལག་གཡོག་བྱ། །
ང་ཡི་གམ་དུ་ལོག་ཕེབས་གྱིས་དང་ལགས། །
སྲོད་ཀའི་སྐྱ་རེངས་བྱོན་པའི་རྟ་ཕོ་ཞིག །
མ་ངེས་དྲན་གདུང་སྐོར་ཞིག་རྒྱབ་ཏུ་ཁུར། །
རྟོག་བཏགས་སྣང་བ་བཀྱགས་པའི་ལྐོག་གྱུར་པ། །
མུན་པ་ཁ་གཏད་གོན་ཏེ་ལོག་ཕེབས་གྱིས། །
ཟླ་བའི་བསིལ་ཟེར་ནང་གི་མཇུག་བསྡུ་བ། །
མཚན་མོའི་སྐར་ཚོགས་ཁྲོམ་ནས་ཅི་ལ་མེད། །
སྨྲེང་བ་སྨྲེང་བ་ཡང་སྙིང་དབེན་པ་འདི། །
ལས་སྐལ་མེ་ཏོག་ཚང་གི་ཁ་དོག་ཏུ། །
རྣམ་ཤེས་འགྲེ་ལྡོག་ཐེབས་པ་ཨེ་ཡིན་སྙམ། །
ཞེ་འཛིན་ཐག་པ་བཅད་པའི་གཙང་པོའི་གམ། །
ཕྱི་ནང་དབྱངས་རྟ་བོར་བའི་འཕྲིན་པ་ཞིག །
ཐག་རིང་ལྷིང་འཇགས་ཤིག་ནས་ཡང་དུ་བྲིས། །
སྙན་ངག་བུ་མོའི་སེམས་དེ་ཡིད་དུ་འབབ། །
ས་གཞིས་ཟླ་བའི་འོད་ཅིག་ང་ལ་འཕྲོས། །
རྩྭ་ཐང་ཡངས་པོའི་ཡུག་གཅིག་ང་ལ་གནང་། །
ལྕི་འདམ་ཆར་བའི་ཀློང་གི་ཡིག་འབྲུ་ཚོགས། །
ང་ཡི་ཡིད་བརྙན་ཐལ་རྡུལ་རབ་དྲགས་པས། །
མཚན་འདི་འཁྱག་པས་ཤིན་ཏུ་དུབ་པས་སོ། །
དལ་དལ་ལྷོད་ལྷོད་འཁོར་བའི་གཞིས་སུ་དྲངས། །
མཚར་སྡུག་བཀྲ་བའི་ཡིག་འབྲུའི་རི་བོའི་ངོས། །
བསླུ་བྲིད་བྱུང་བའི་ནགས་མའི་ཚལ་དུ་ཡང་། །
ཟླ་བའི་སྙན་ངག་ཡོལ་བའི་ཕྱོགས་སུ་འཐོར། །
སྨྲ་བ་དམ་པའི་ང་ཡི་སྙན་ངག་ཀུན། །
བློ་ཡི་ཡུལ་དུ་ཆོ་འཕྲུལ་གནས་སམ་ཅི། །
འཆི་བའི་སྙན་ངག་ཐལ་རྡུལ་སྟེང་དུ་སྤྲུལ། །
ཉམ་ཐག་གཅིག་ལ་ཐ་སྙད་ཟུངས་བྲལ་ཏེ། །
མངོན་པ་མཐོ་བའི་ནམ་ཟླའི་བསྐྱུར་མོའི་འོག །
བག་མེད་བྱུང་བའི་མཚན་མོའི་གནས་དག་ལ། །
བདག་ནི་རང་གྲོལ་མེ་ཏོག་རླབས་སུ་བཅིངས། །
ཁྱོད་ནི་ཡང་ཞིང་གླེང་ན་སྙན་ངག་པ། །
རླུང་བུ་འཇགས་རྗེས་བྱུང་བའི་ཡིག་འབྲུ་ཞིག །
ཞི་དུལ་མཚན་མོའི་ཀློང་གི་བརྟུལ་ཞུགས་ཅན། །
ཁྱོད་ལས་འཁྲུངས་པའི་སྙན་ངག་གསོན་དང་ལགས། །
ང་ཡི་གྲིབ་མའི་མཚམས་སུ་ཁྱོད་རང་སྟེ། །
བདག་གི་གྲིབ་མའི་ངང་དུ་གནས་པ་འཁྱིལ། །
ཚོན་གྱིས་མདངས་པའི་ང་ཡི་མིག་ཟུང་གཉིས། །
ལྷ་དང་ཀླུ་མོའི་མཁའ་འགྲོ་ཚོགས་སུ་འཕགས། །
ང་ཡི་སྙན་ངག་ཚོགས་སུ་སྐྱེ་བ་བླངས། །
ང་ཡི་ཡིག་འབྲུའི་ཚོགས་སུ་སྨོན་ལམ་འདེབས། །
ང་དང་འབྲེལ་མེད་ཟེར་ཡང་སྨྲེང་བ་བཏོན། །
ང་ལ་གནང་བའི་ཟློས་གར་པོ་ཏི་ཡང་། །
སེམས་སུ་སྦྱར་བའི་དགའ་བའི་ཕ་རོལ་ཕྱིན། །
སྨྲ་བ་དམ་ཞིང་ང་ཡི་ལ་མོའི་འདབས། །
ཁྲུང་ཁྲུང་འཕུར་སའི་མཁའ་ལམ་ཡངས་པོ་ནས། །
ང་ལ་བར་ཐག་དེ་དང་ཆུ་བོ་དེས། །
བཀྱེད་དེ་སོ་སོའི་སྨྲ་བ་པང་དུ་འཁུམས། །
སྐྱོ་ངལ་ལམ་ལ་ཆས་ཏེ་འགྲོ་བར་བྱ། །
སྙན་ངག་པོ་ཏི་ཀློང་གི་སྙན་ངག་པ། །
དྲན་པའི་ཕྱི་ནང་ངོས་ཀྱི་རི་དྭགས་ཤིག །
དུས་བཞིའི་འགྱུར་བའི་ནང་ལ་ཨེ་ཡོད་ལགས། །
སེམས་པ་ཅོལ་ཆུང་དེ་ཡི་ཡི་གར་དུ། །
མཚན་མོའི་ཟླ་འོད་འོག་གི་སེམས་གསོ་ལ། །
དགའ་བའི་དྲན་པ་ཞིག་ཏུ་སྙན་ངག་འབྲི། །
བར་ཐག་ཞིག་ཏུ་བརྩེ་ཆང་མཐའ་མ་དྲངས། །
ཡིད་གཞུང་ཁོག་ཏུ་རྒྱུ་སྐར་ཕྲེང་ལྟར་རྒྱུ། །
སྐར་མ་སྨིན་དྲུག་ང་ཡི་འཆར་སྒོ་རུ། །
ཟུངས་བཅུད་ཞན་པའི་དགའ་བའི་ཐ་སྙད་ལ། །
འཚོ་བཅུད་སྟེར་ཞིང་ལུས་པོ་ཐང་མ་ཆགས། །
ཀྱེ་མ་སྙན་ངག་གཞུང་གི་ལྷ་མོ་ཚང་། །
སྒྱུ་མའི་མཐོན་པོའི་དཀྱིལ་དུ་ལུས་པ་འདི། །
ཆོ་འཕྲུལ་གསལ་བའི་ངོགས་སུ་བདེ་ལགས་སམ། །
རྟག་བརྟན་ལུས་པའི་སྙན་ངག་གཞི་འདི་ཡང་། །
ལས་ཤིག་ཕ་རོལ་ཕྱིན་པའི་ཨེ་ཡིན་ནམ། །
ལས་ཤིག་མཚན་མོའི་ལྗོངས་ཀྱི་མགྲོན་པོ་ཞིག །
ལས་དེ་མཚོ་མོ་ནང་གི་གསེར་ཉ་འདྲ། །
གསེར་ཉ་བློ་རུ་འབྲི་བའི་སྙན་ངག་པས། །
སྨན་ཤར་མཚོ་རུ་རྐྱལ་བའི་གཟུགས་ཤིག་བྲིས། །
གཟུགས་དེ་ཁོ་ལག་ཚང་བའི་རི་མོ་པས། །
ལྷ་མོ་མཁའ་ལས་དྲངས་པའི་རྣམ་ཤེས་སུ། །
ཡིག་འབྲུ་ཁག་ཅིག་ཀླུ་ཡི་ཡུལ་ནས་དྲངས། །
ཡིག་འབྲུ་ཁག་ཅིག་ནང་སེམས་རྩ་ནས་བརྡོལ། །
སྒྱུ་འཕྲུལ་ལྷ་མོ་འབྲི་བའི་རྒྱན་འདི་བཏགས། །

39.7K

ཐག་རག་ཡིག་བསྒྱུར་མ་ལག

དྲ་ཚིགས་འདིའི་པར་དབང་གངས་ལྗོངས་ཉི་གཞོན་དྲ་བར་དབང་བས་ཕན་ཚུན་ལ་དབང་བཅོལ་མ་བྱས་གོང་རང་དགར་མི་སྤྱོད་པར་མཁྱེན།
དྲ་ཚིགས་དཔང་རྟགས།蜀ICP备14009601号-1