དེ་ཡང་རང་སྣང་མཁའ་སྤྱོད་དཔལ་གྱི་གནས་མཆོག་ནས་མ་མཁའ་འགྲོའི་གཙོ་མོ་ནེའུ་ཆུང་དབྱིངས་ཕྱུག་རྒོད་ལྕམ་དཀར་མོ་དེས་གླིང་རྒྱལ་པོའི་དབུ་ཞྭ་ཕྱིང་དཀར་ཉི་མ་རང་ཤར་གྱི་ཞྭ་བཤད་རྡོ་རྗེའི་ཚེ་གླུ་ཅོ་གའི་དྲུག་འགྱུར་གྱི་དབྱངས་རྟ་ལ་དྲངས་ནས་བླངས་པར་གདའ་འོ། །གླུ་ཨ་ལ་འོད་གསལ་སྟོང་པའི་གཤིས། །ངག་ཐ་ལ་ལྷུན་གྲུབ་སྣང་བའི་གར། །རྩལ་མ་འགག་རྟེན་འབྲེལ་རི་མོར་བཀྲ། །ཨ་ལ་ལ་ངོ་མཚར་རྨད་དུ་བྱུང་། །དབྱིངས་དག་པ་འོད་ལྔའི་གུར་ཁང་ནས། །མགོན་བཅོམ་ལྡན་རིགས་ལྔའི་ཌཱ་ཀི་མ། །ཐུགས་ཀུན་ཁྱབ་ཡེ་ཤེས་གཡོ་བ་མེད། །གནས་འདི་རུ་གཟི་བྱིན་དངོས་གྲུབ་སྩོལ། །ས་འདི་ཡི་ས་ངོ་མ་ཤེས་ན། །ཕྱི་བཀྲ་ཤིས་གླིང་དཀར་སྟོད་ཀྱི་ས། །ནང་བཀྲ་ཤིས་མཁའ་སྤྱོད་ཞིང་གི་དལ། །ཤར་རྨ་ལུང་རྡོ་རྗེའི་ར་བ་རེད། །ང་ནེའུ་ཆུང་རྒོད་ལྕམ་དཀར་མོ་ཡིན། །གླིང་སྐྱེས་བུའི་བཀའ་ཡི་བདག་མོ་དང་། །གླུ་ཅོ་ག་དྲུག་འགྱུར་ངག་སྒོ་ནས། །བརྡ་ལུང་བསྟན་བདེན་ཚིག་གྲུབ་མི་ཡིན། །དུས་དེ་རིང་བཀྲ་ཤིས་ཉི་མ་ལ། །གླིང་སྐྱེས་བུ་རྡོ་རྗེ་ཚེ་རྒྱལ་ཀྱི། །ཞྭ་འཛམ་གླིང་ཉི་མ་རང་ཤར་གྱི། །བརྡ་མཚོན་རྟགས་རྟེན་འབྲེལ་གླུ་རུ་ལེན། །སྤྱིར་སྲིད་པ་བོད་ཀྱི་བཤད་སྲོལ་ལ། །མགོ་ཞྭ་ཡི་ཡན་ན་མཐོན་པོ་མེད། །དེ་ཡོད་ན་ཉི་མ་ཟླ་བ་རེད། །མགོ་ཞྭ་ཡི་གོང་ན་རིན་ཆེན་མེད། །དེ་ཡོད་ན་རིགས་བདག་བླ་མ་རེད། །གཏམ་དེ་ནི་དོན་གྱི་སྙིང་པོ་རེད། །རྗེ་རྒྱལ་པོའི་ཕྱིང་ཞྭ་དཀར་པོ་འདིའི། །རྒྱུ་བཤད་ན་ལྷ་ལུག་དཀར་མོའི་བལ། །བཀྲ་ཤིས་པའི་ལྷ་རྫས་དཀར་པོའི་རིགས། །གླིང་དཀར་པོའི་བུ་མོ་ནེའུ་ཆུང་ངས། །གཟའ་པ་སངས་དཀར་པོ་རྒྱུ་བའི་ཉིན། །རྨ་ལྷ་ལུང་བྲག་དཀར་ཉིན་ཁུགས་ནས། །ངག་བདེན་ཚིག་དཀར་པོའི་ཕྱིང་གླུ་བླངས། །བལ་འདབ་དཔེ་ལྷོ་སྤྲིན་དཀར་པོར་བྱས། །ཕྱིང་ཆུ་གཙང་གངས་ཆུ་དཀར་པོས་བཅགས། །ཕྱིང་བླངས་གྲངས་ཐེར་འབུམ་དཀར་པོས་བརྩིས། །ཞྭ་དཔེ་ལེན་རྨ་རྒྱལ་གངས་དཀར་བྱས། །ལྷ་དཀར་ཕྱོགས་དགྲ་བླའི་དཔའ་རྫོང་ཡིན། །བོད་རུས་དྲུག་དཀར་པོའི་གཏམ་ཚོ་ལྟར། །རི་དཀར་པོ་རྩེ་མཐོ་ལྡོང་ལ་ཐོབ། །ལྡོང་དཀར་པོའི་ཞྭ་ཐོབ་མཐོ་དོན་བཤད། །ཞྭའི་དཔེ་གཞི་གངས་དཀར་བྱས་ལེ་དེ། །གླིང་དཀར་པོའི་བསྟན་པའི་མངའ་ཐང་དང་། །ལྷ་དཀར་ཕྱོགས་བསྟན་སྲིད་མཐོ་བའི་བརྡ། །ཞྭའི་རྩེ་ལ་ནོར་བུའི་ཏོག་ཅིག་བཙུགས། །དེ་ནོར་བུ་མེ་དཔུང་འབར་བ་ཡིན། །སྤྱིར་སེང་ཆེན་ཡིད༌བཞིན༌ནོར༌བུ་མཆོག །ལྷོ་འཛམ་གླིང་རིགས་བདག་ཡིན་པའི་བརྡ། །སྒོས་མཆོག་ཐུན་གཉིས་ཀྱི་དངོས་གྲུབ་ལ། །ལས་མ་འབད་མངའ་དབང་འབྱོར་བའི་བརྡ། །རྫོང་བཅོ་བརྒྱད་རྫོང་ཕྲན་ཉེར་ལྔ་ཡི། །དཔལ་བསམ་འཕེལ་ཆོས་ནོར་སྒོ་འབྱེད་བརྡ། །ཞྭའི་གདོང་ལ་གསེར་གྱི་མེ་ལོང་བཏགས། །དེ་མེ་ལོང་ཀུན་གསལ་ཡེ་ཤེས་མདངས། །ཐུགས་མཁྱེན་དང་བརྩེ་བའི་རང་རྩལ་ལ། །དཔལ་ཤེས་བྱའི་སྣང་བརྙན་བཀྲ་བའི་བརྡ། །གཞི་འཁོར་འདས་སྣང་སྲིད་ཆོས་སོ་ཅོག །དོན་ཀུན་བཟང་གཅིག་ཏུ་གཟིགས་པའི་བརྡ། །ཞྭའི་འཕྲུ་ལ་རྨ་བྱའི་སྒྲོ་མདོངས་སྒྲོན། །དེ་སྒྲོ་ཐིག་མཐིང་དབྱིངས་ཁྱབ་ཆེན་བརྡལ། །གང་སྣང་ཚད་དག་པའི་རྒྱས་ཐེབས་ཤིང་། །མདངས་སྐུ་ལྔའི་དཀྱིལ་འཁོར་ལྷུན་རྫོགས་ཏེ། །རྩལ་ཡེ་ཤེས་ལྔ་ཡི་འཕྲིན་ལས་ཀྱིས། །དབྱིངས་ཀུན་ཁྱབ་འགྲོ་དོན་ལྷུན་གྲུབ་བརྡ། ཞྭའི་རྒྱན་ལ་དར་སྐུད་སྣ་ལྔ་དཔྱངས། །དེ་གཡས་གཡོན་འཇའ་རིས་ཤིགས་སེ་ཤིག ། ལྷ་རྒྱལ་བ་རིགས་ལྔའི་ཚེ་དར་དང་། །མ་མཁའ་འགྲོ་སྡེ་ལྔའི་བླ་དར་མཚོན། །ཞྭ་མཐོང་གྲོལ་ཡོན་ཏན་ལྔ་ལྡན་ཞིང་། །དཔལ་ཞི་རྒྱས་དབང་དྲག་ཡོན་ཏན་ལྔའི། །ལས་ཐོགས་པ་མེད་པ་འགྲུབ་པའི་བརྡ། །ཞྭའི་ཁ་དོག་དཀར་ལ་དྭངས་པ་ནི། །སྐུའི་འགྲོ་དོན་འཕྲིན་ལས་དཀར་བའི་བརྡ། །ཞྭའི་རྩེ་མོ་རྣོ་ལ་མཐོ་བ་ནི། །ཉམས་རྟོགས་པའི་གདེངས་ཚད་མཐོ་བའི་བརྡ། །ཞྭ་སྐེད་པ་མན་ནས་སྦོམ་པ་ནི། །བྱམས་སྙིང་རྗེའི་རྩ་བ་བརྟན་པའི་བརྡ། །ཞྭའི་མཐའ་འཁོར་ཡངས་ལ་ཟླུམ་པ་ནི། །འཁོར་གདུལ་བྱས་གླིང་བཞི་འཁོར་བའི་བརྡ། །ཞྭའི་ཕྱིང་ཤ་སྲབ་ལ་དྭངས་པ་ནི། །ཞྭ་གྱོན་ན་རིག་ཁམས་དྭངས་པའི་རྟགས། །ཞྭའི་ནང་རྫོང་དར་ལས་གྲུབ་པ་ནི། །ནང་རླུང་སེམས་རང་དབང་འབྱོར་བའི་རྟགས། །ཞྭའི་ནང་དུ་རྟེན་གསུམ་བཞུགས་པ་ནི། །ཞྭ་འདི་གྱོན་འགྲོ་དོན་འབྱུང་བའི་བརྡ། །རྗེ་གེ་སར་རྡོ་རྗེ་ཚེ་རྒྱལ་གྱི། །ཞྭ་བྱིན་ལྡན་འཛམ་གླིང་ཉི་ཤར་འདི། །མགོན་བཀའ་བརྒྱུད་བླ་མའི་ཕོ་བྲང་ཡིན། །དཔལ་ཡི་དམ་རྒྱ་མཚོའི་དཀྱིལ་འཁོར་ཡིན། །མ་མཁའ་འགྲོ་བྱེ་བའི་བླ་གནས་ཡིན། །དཔའ་དགྲ་བླ་འབུམ་གྱི་རྟེན་མཁར་ཡིན། །ཤར་གླིང་དཀར་སྟོད་ཀྱི་གཡང་རྟེན་ཡིན། །ཞྭ་འདི་ལ་དཔེ་ལེན་སུས་བྱས་ན། །དེ་གྱོན་པའི་མི་ཡི་དོན་གཉིས་འགྲུབ། །ཞྭ་འདི་འདྲ་མིག་གིས་མཐོང་གྱུར་ན། །ལས་རྟེན་འབྲེལ་ལེགས་ཚོགས་ངང་གིས་རྒྱས། །ཞྭ་འདི་ལ་དགའ་གུས་སུས་བྱས་ན། །ཚེ་བསོད་ནམས་རླུང་རྟ་གོང་དུ་འཕེལ། །ཞྭ་འདི་འདྲ་རྒྱུན་དུ་སུས་གྱོན་ན། །དཔལ་རྒས་མེད་ཚེ་ཡི་ལངས་ཚོ་ཐོབ། །ཞྭ་འདི་ལ་གཙིགས་ཆེན་སུས་བྱས་ན། །ཆོས་བསམ་པ་ཡིད་བཞིན་ལྷུན་གྱིས་གྲུབ། །ཞྭ་འདི་འདྲ་རྟེན་དུ་སུས་བཀུར་བ། །དཔལ་ཕུན་ཚོགས་སྡེ་བཞིའི་ཕྱྭ་གཡང་འཁོར། །ཞྭ་འདི་འདྲ་གྱོན་ན་བྱ་ལས་འགྲུབ། །ཞྭ་འདི་འདྲ་གྱོན་ན་བར་ཆད་སེལ། །ཞྭ་འདི་འདྲ་གྱོན་ན་དགྲ་གྱོད་ཞུ། །ཞྭ་འདི་འདྲ་གྱོན་ན་མཐུ་བྱད་བཟློག །ཞྭ་འདི་འདྲ་གྱོན་ན་ཁ་ལས་དགེ ། །རྗེ་བླ་མས་མནབ་ན་མཛད་འཕྲིན་རྒྱས། །སྟག་ཤ་རས་གྱོན་ན་རླུང་རྟ་དར། །སྨན་བུ་མོས་གྱོན་ན་སྙན་གྲགས་འཁོར། །ཆུང་བྱིས་པས་གྱོན་ན་ཤེས་རིག་བཀྲ། །ཕྱུགས་རྫི་བོས་གྱོན་ན་ཕྱྭ་གཡང་འཁོར། །ཚོང་ཁེ་བས་གྱོན་ན་མཁོ་རྒུ་འགུག །མི་སུ་ཡིས་གྱོན་ཡང་ཅི་བསམ་འགྲུབ། །དེ་སེང་ཆེན་ལྷ་ཡི་བླ་མ་དང་། །མ་མཁའ་འགྲོའི་ཐུགས་བརྩེ་མྱུར་བས་ཡིན། །ཞྭ་བཀྲ་ཤིས་དཀར་པོའི་བཤད་པ་འདིའི། །དོན་ཅི་བཞིན་བསླུ་བ་མེད་པ་ནི། །ཆོས་རྟེན་འབྲེལ་ཆེན་པོའི་གནད་གསང་དང་། །སྨན་ནེའུ་ཆུང་ལྷ་མོའི་བདེན་ཚིག་ཡིན། །སྤྱིར་དབུ་ཞྭ་འཛམ་གླིང་ཉི་ཤར་འདིའི། །ཕྱི་ནང་དང་གསང་བའི་ཡོན་ཏན་རྣམས། །ལྕེ་བརྒྱ་རུ་སྤྲུལ་ནས་བཤད་ན་ཡང་། །བརྗོད་དཀའ་མོད་འདི་རུ་བསྡུས་ཙམ་ཡིན། །ཞྭ་དཀར་པོའི་བརྡ་དོན་གླུ་དབྱངས་འདིས། །གླིང་དཀར་པོའི་བསྟན་པ་རྒྱས་པར་ཤོག །ཅེས་གསུངས་སོ། །གྲོགས་མཆོག་མཁར་རེའི་གེ་སར་རྟ་རྫི་ཡིས། །ཞྭ་བཤད་ཕྲིས་ཞེས་སྐུལ་མས་རྐྱེན་བྱས་ཏེ། །བདེན་གྲུབ་ཅོ་གའི་དྲུག་འགྱུར་དབྱངས་སྒོ་ནས། །གླུ་འདི་སྨིན་དབུས་ཨ་དཀར་མིང་གིས་རྙེད། ། དགེ་འོ་དགེའོ་ཀུན་ཏུ་བཀྲ་ཤིས་ཤོག །
