གཙོ་ངོས།>> དམངས་སྲོལ།>>གཉེན་སྟོན།

རྩོམ་སྒྲིག་པ།ཡོང་ཁུངས། སྤེལ་དུས། ༢༠༡༤ལོའི་ཟླ་བ་༡༢ཚེས་༡༦ཉིན།

༄༅། །གཉེན་སྟོན་དང་འབྲེལ་པའི་དར་བཤད་མེས་པོའི་ཞལ་རྒྱུན།

          དེ་ཡང་ཡུལ་གངས་ཅན་པའི་གནའ་བོའི་ལུགས་སྲོལ་བཟང་པོའི་རྗེས་སུ་འབྲངས་སྟེ་གཉེན་སྟོན་སྐོར་ལས་དར་བཤད་བྱ་ཚུལ་ནི། དེ་རིང་ལྷ་ཉིན་དཀར་པོ་ལ། གནམ་ལ་གཟའ་སྐར་དང་ཚེས་གྲངས་བཟང༌། ས་ལ་འབྱུང་བ་ལྔ་བཞིའི་དུས་ཚོད་བཟང༌། བར་ལ་ལ་ཉེ་དང་གཉེན་ཉེ་བཟང༌། བཟང་པོ་གསུམ་གྱི་རྟེན་འབྲེལ་འགྲིགས་པའི་སྐབས། དབུས་རི་རྒྱལ་ལྷུན་པོའི་སྐུ་མདུན།ཡོངས་འདུ་དཔག་བསམ་ཤིང་གི་རྩེ་མོ། མེ་ཏོག་པདྨ་འཁྲུངས་པའི་དགའ་ཚལ། འཛམ་གླིང་བདེ་བ་ལྷ་ཡི་གཞལ་ཡས། དབྱར་འཇའ་ཚོན་སྣ་ལྔ་ཤར་བའི་གུར་ཁྱིམ་ནང༌། ནམ་མཁའ་གཡུ་ཡི་འཁོར་ལོ་རྩིབས་དགུ་གདུགས་ལྟར་ཕུབ་པའི་མ་འོག ཕ་རྒྱུད་དེ་སྒ་ནས་ཆད།མ་རྒྱུད་དེ་ལྡོང་ནས་ཆད། བུ་རྒྱུད་དེ་འབྲུ་ནས་ཆད། བོད་སྒ་འབྲུ་ལྡོང་གསུམ་འཛོམས་པའི་མི་འདི། མི་ཚེ་ཆུ་ལས་རིང༌། མི་སྲོག་བྲག་ལས་སྲ། མི་རྒྱུད་དར་ལས་འཇམ།འཛོམས་ནས་འཕོ་འགྱུར་མེད་པའི་བཀྲ་ཤིས་ཤོག བྲག་རི་རིན་ཆེན་སྤུངས་པའི་གཡོན་ཟུར། ཆུ་བོ་གསེར་ལྡན་ཁྲ་མོའི་གཡས་ཟུར། རྒྱབ་རི་ལ་ཉི་མ་ཤར་འདྲ། མདུན་རི་ལ་ཟླ་བ་ཚེས་འདྲ། མཁར་མི་འགྱུར་དངུལ་དཀར་གྲུ་བཞིའི་ནང༌། ཐབ་ཆེན་གཡུང་དྲུང་གཡས་འཁྱིལ་ལ།ཐབ་ལྷ་མེ་ལྷ་རང་འཁོར་ཤོག མ་སྲུ་མོ་སྨན་གནས་ར་གསུམ། ཟས་ནོར་ལོངས་སྤྱོད་འཛོམ་པར་ཤོག འཛོམས་ནས་དར་གུད་མེད་པར་ཤོག ཕུ་སྤང་དཀར་མེ་ཏོག་ཡར་སྐྱེས་ཀྱི་ར་བ་ལ། སྟེང་ལྷ་ཆེན་ཚངས་པ་གདོང་བཞི་མན་ཆད། འོག་ཀླུ་རྒྱལ་གཙུག་ན་དགའ་བོ་ཡན་ཆད། བར་གཉན་ཆེན་ཨ་བོ་གེ་འཛོ་ཚུན་ཆད། ཕྱི་གསེར་རིའི་རི་བདུན། ནང་རོལ་པའི་མཚོ་བདུན། དེར་གནས་ཀྱི་ལྷ་ སྲིན་སྡེ་བརྒྱད། དེ་རིང་རུ་ང་དང་ཕྲག་དོག་མི་མཛད་པའི་ཉི་མ་ལ། ས་སྐྱིད་རིན་ཆེན་ལྡོང་རྒྱུད་ནས། ང་མི་ཆུང་བསམ་པའི་དོན་འགྲུབ་ཡིན། ཚིག་གཅིག་བཟླས་ན་ཁ་དགེ ཚིག་གཉིས་བཟླས་ན་བཀྲ་ཤིས། ཚིག་གསུམ་བཟླས་ན་དོན་འགྲུབ། ཁས་ཅི་བཟླས་ལ་བཀྲ་ཤིས། ལག་གར་བཞག་ལ་གཡང་ཆགས། རྡོག་གར་རྫིས་ལ་རྩྭ་སྐྱེ།ངས་ལག་ལ་བཟུང་བའི་རྒྱ་དར་དཀར་པོ་ཡུག་དགུ་འདི། བྱུང་བ་ནག་པོ་རྒྱ་ནས་བྱུང༌། བཀལ་བ་སྨུག་ཆུང་དྲེལ་ལ་བཀལ། སླེབས་པ་དབུ་ནག་བོད་ལ་སླེབས། དར་བ་སྤུར་རྒྱལ་བོད་ལ་དར། ལྷ་བླ་མ་བཟང་པོའི་མཇལ་དར། གོང་དཔོན་ལུ་བཟང་པོའི་ཁྲིམས་དར། མ་སྲུ་མོ་བཟང་པོའི་གནས་དར། བུ་དཔའ་བོ་བཟང་པོའི་དཔའ་དར། རྟ་ཅང་ཤེས་མགྱོགས་པའི་མགྱོགས་དར། མ་བྱས་དར་རྩི་ཧྲུག་པོ་ཡོད། དར་དཀར་པོ་ཉིན་མོ་བདེ་ལེགས་འདི། དར་སྟོད་ཚེ་ལྷ་རྣམ་གསུམ་བཞུགས། ཚེ་དང་བསོད་ནམས་འཕེལ་བའི་རྟེན་འབྲེལ་ཡིན། དར་སྐེད་ཛཾ་ལྷ་རིགས་ལྔ་བཞུགས། རྒྱུ་ནོར་ལོངས་སྤྱོད་འཛོམས་པའི་རྟེན་འབྲེལ་ཡིན། དར་མཐར་དཔའ་བོ་མཁའ་འགྲོ་བཞུགས། བར་ཆད་བདུད་ལས་རྒྱལ་བའི་རྟེན་འབྲེལ་ཡོད། མཐའ་ནས་རྒྱ་ནག་ལྕགས་རིས་བསྐོར། ལྕགས་ཀྱི་སྲོག་རྩ་འགྲུབ་པའི་རྟེན་འབྲེལ་ཡིན། ཕྱི་མི་འགྱུར་བཀྲ་ཤིས་རྟགས་བརྒྱད་ཡོད། ནང་མི་འགྱུར་དགོས་འདོད་ནོར་བུ་ཡོད། ཚེ་མི་ཉམས་རྡོ་རྗེའི་མདུད་པ་ཡོད། གཡང་མི་ཉམས་ཕྱུགས་ཀྱི་ར་བ་ཡོད། བདག་ཅག་གི་འགལ་རྐྱེན་སྤང་བྱ་མི་མཐུན་པའི་ཕྱོགས་ཐམས་ཅད་ལས་རྣམ་པར་རྒྱལ་ཏེ་ཤིན་ཏུ་བཀྲ་ཤིས་པ་དང་བདེ་ལེགས་ཀྱི་དཔལ་དམ་པ་ཐོབ་པ་གཅིག་ཏུ་གྱུར་ཅིག །

39.7K

རྩོམ་ཡིག་སྔོན་མ།
༄༅། །ལོ་སྐྱུར་སྙོལ་ཐབས།
རྩོམ་ཡིག་རྗེས་མ།
༄༅། །མ་ཕམ་གཡུ་མཚོ།

ཐག་རག་ཡིག་བསྒྱུར་མ་ལག

དྲ་ཚིགས་འདིའི་པར་དབང་གངས་ལྗོངས་ཉི་གཞོན་དྲ་བར་དབང་བས་ཕན་ཚུན་ལ་དབང་བཅོལ་མ་བྱས་གོང་རང་དགར་མི་སྤྱོད་པར་མཁྱེན།
དྲ་ཚིགས་དཔང་རྟགས།蜀ICP备14009601号-1