གཙོ་ངོས།>> ཞིབ་འཇུག>>སྟག་ངར་གཡག་ངར།

རྩོམ་པ་པོ། ཁྱུང་གསེར་ཞུ། རྩོམ་སྒྲིག་པ།དབང་ཆེན།ཡོང་ཁུངས།ཡོངས་འཛིན་དྲ་བ། སྤེལ་དུས། ༢༠༢༡ལོའི་ཟླ་བ་༠༡ཚེས་༡༡ཉིན།

༄༅།། རྩོད་ལན་ཤ་ཐོག་མེ་བཙའ།།

  རྗེ་ཡི་ཚད་མ་ལས།  རྟགས་ཁྱབ་གསལ་བའི་ཁྱད་པར་གྱིས།  །ཐལ་འགྱུར་ལན་ལ་རྣམ་པ་གསུམ།  །ཞེས་གསུངས་པ་ལྟར་ང་ཚོས་རྒྱུན་ལྡན་ཐལ་འགྱུར་གྱི་ལན་ལ་གཙོ་བོ་རྣམ་པ་གསུམ་དང་གཞན་དུས་སྦྱར་མ་སོགས་དམིགས་བསལ་གྱི་ལན་འདེབས་ཚུལ་མང་པོ་ཞིག་ཡོད་མཆི་བ་ལས།  འདིར་དུས་རྒྱུན་རྒྱུག་ཆེ་བ་སྟེ་དཔེར་ན་རྩོད་པ་བས་ཀ་བ་དངོས་པོ་ཡིན་པའི་ཕྱིར།  ཞེས་པ་བོན་ཅན་མ་བཀོད་ཀྱང་གཞི་དེ་རྟགས་དེ་ཡིན་པའི་རིགས་ལ་དམ་བཅའ་བས་ལན་འདེབས་ཚུལ་ལ་འགའ་རེས་འདོད་ཅེས་ཟེར་མི་རུང་སྟེ་དེ་ལྟར་ན་རྟགས་ལ་འདོད་ལན་རྒྱབ་ན་མཚན་ཉིད་པའི་ཞབས་འདྲེན་ཡིན་ཟེར་ནས་ཡིན་པའི་ཕྱིར།  ཞེས་ལན་འདེབས་པར་བྱེད།   ཡང་འགའ་རེས་དེ་རིགས་ལ་ཁྱབ་པ་མ་བྱུང་ཞེས་པའི་ལན་འདེབས་དགོས་ལ་དེའི་གོ་བ་ཡང་ཀ་བ་དངོས་པོ་ཡིན་པར་འདོད་པའི་དོན་དུ་བྱེད།  དེས་ན་ཁྱབ་པ་མ་བྱུང་ཞེས་པ་ཡང་སྐབས་འགར་མ་ཁྱབ་ཅེས་པའི་དོན་དང་།  སྐབས་འགར་འདོད་ཅེས་པའི་དོན་གཉིས་སུ་འགྲེལ།   ཡང་འགའ་རེས་དེ་ལ་ཁ་ཐུག་འདོད་ཅེས་ལན་འདེབས་པར་བྱེད།  འོ་ན་རྟགས་ལ་འདོད་ལན་བཏབ་པའི་ཉེས་པ་མི་འབྱུང་ངམ་ཟེར་ན་མ་ཡིན་ཏེ།  རྟགས་ལ་འདོད་ལན་བཏབ་པའི་དོན་དཔེར་ན།   རྟགས་གསལ་གང་གི་གསལ་བ་ལ་འདོད་ལན་སོགས་མ་ཐེབས་པར་རྟགས་བཀོད་ཚེ་མ་ཁྱབ་དང་མ་གྲུབ་པའི་ལན་ཡང་འདེབས་མ་ནུས་ནས་འདོད་ཅེས་ཟེར་བ་མ་གཏོགས།   སྔོན་དུ་རྟགས་བཀོད་པའམ་ཕྱིར་ཞེས་བརྗོད་པའི་རྗེས་སུ་འདོད་ཟེར་བ་ཙམ་གྱིས་མཚན་ཉིད་པའི་ཞབས་འདྲེན་དུ་མི་འགྱུར་རོ།  དེ་ལྟར་མ་ཡིན་ན་ཁྱབ་པ་མ་བྱུང་ཟེར་མཁན་དེ་ཡང་དོན་དུ་ཞབས་འདྲེན་དུ་འགྱུར་རོ།  ཞེས་སོགས་ཟེར།  རང་གི་བསམ་ཚུལ་ཡང་དེ་རིགས་ལ་འདོད་ལན་བཏབ་ན་ཚིག་དོན་གཉིས་ཆར་སྐྱོན་མེད་དོན་མཐུན་གྱི་ལན་དུ་འདོད།  འོན་ཀྱང་འདིའི་སྐོར་ལ་འབྲེལ་ཡོད་གྲོགས་མཆོག་རྣམས་ནས་གསལ་ཁའམ་ཡང་ན་རང་རང་གི་བཞེད་ཕྱོགས་ཅི་ཡོད་བསྲི་ཚགས་མེད་པར་བཀའ་མོལ་ལྷུག་སྩོལ་ཡོད་པར་མཁྱེན།།   

 

39.7K

ཐག་རག་ཡིག་བསྒྱུར་མ་ལག

དྲ་ཚིགས་འདིའི་པར་དབང་གངས་ལྗོངས་ཉི་གཞོན་དྲ་བར་དབང་བས་ཕན་ཚུན་ལ་དབང་བཅོལ་མ་བྱས་གོང་རང་དགར་མི་སྤྱོད་པར་མཁྱེན།
དྲ་ཚིགས་དཔང་རྟགས།蜀ICP备14009601号-1