གཙོ་ངོས།>> གླིང་སྒྲུང་།>>རྗེས་ཤུལ།

གངས་དབང་གིས་བྲིས་ཤིང་པར་བླངས། རྩོམ་སྒྲིག་པ།ཚེ་དཔལ། ཡོང་ཁུངས།ཁམས་པའི་དྲ་བ། སྤེལ་དུས། ༢༠༢༡ལོའི་ཟླ་བ་༠༡ཚེས་༢༥ཉིན།

༄༅།། ཨ་སྟག་ལྷ་མོའི་མཁར་ཤུལ།

 ཨ་སྟག་ལྷ་མོའི༼ཀླུ་མོ༽མཁར་ཤུལ།

གངས་དབང་གིས་བྲིས་ཤིང་པར་བླངས།     

གླིང་གི་རྗེས་ཤུལ་བཙལ་བ་ལས། ༣ ཨ་སྟག་ལྷ་མོའི༼ཀླུ་མོ༽མཁར་ཤུལ།

    ཕོ་བྲང་སེང་འབྲུག་སྟག་རྩེ་ན་བཞུགས་ཡོད་པའི་ཨ་ཁུ་འགའ་ལས། དར་ལག་རྫོང་གི་མངའ་ཁོངས་ན་ད་དུང་གླིང་སྒྲུང་སྐོར་གྱི་རྗེས་ཤུལ་ཡོད་ཚུལ་གོ་བས། དེའི་སང་ཉིན་སྔ་མོ་ནས་ལངས་ཏེ་རྫོང་དང་བར་ཐག་སྤྱི་ལེ་བརྒྱ་དང་སུམ་ཅུ་ཙམ་ཡོད་པའི་གསང་རི་མ་ཡུལ་ཚོའི་ཕྱོགས་སུ་སོང་། ཞོགས་པའི་ཉི་འོད་རྨ་ཀླུང་སྒེག་མོར་ཕོག་སྟེ་གསེར་གྱི་རླབས་ཕྲེང་འཕྱོ་བ་དང་། ལམ་འགྲམ་གྱི་སྦྲ་གུར་དང་ནོར་ལུག  ཞོགས་ལས་ལ་བྲེལ་བའི་འབྲོག་མི་བཅས་ཀྱིས། མཐོ་སྒང་ཁོ་ན་ལ་ཡོད་པའི་ཞོགས་པའི་རྣམ་པ་ཞིག་གྲུབ་འདུག་པས། རྩྭ་ཕྲན་དང་ནོར་ལུག ཆུ་བོ་དང་སྦྲ་གུར། འབྲོག་མི་དང་འབྲོག་ཁྱི་བཅས་རེ་རེ་བཞིན་པར་མིག་ཏུ་བཙུད་ཅིང་ཡིག་འབྲུར་འབེབས་འདོད་པ་ཞིག་རེད། ལམ་ལ་འགྲོ་བཞིན་དུ་རླངས་འཁོར་གྱི་སྐར་ཁུང་ལས་གཡས་གཡོན་གྱི་རི་ཆུ་ལ་ལྟ་དུས། ཕྲག་དོག་དང་ཞེ་སྡང་གིས་མ་ངན་བུ་ངན་གཉིས་འདྲེ་ཡི་ལུང་པར་ཕུད་ཀྱང་། རི་ཡག་མོ་གཡང་ཆགས་པའི་རི་དང་། ཆུ་བཟང་མོ་བསོད་ནམས་འཁོར་བའི་ཆུ་ཡི་དྲིན་གྱིས།  འགོག་བཟའ་དང་ཇོ་རུ་མ་བུ་གཉིས་ལ་རི་བོ་ལྟ་བུའི་འགྱུར་མེད་ཀྱི་སྙིང་སྟོབས་འཁྲུངས།ཆུ་བོ་ལྟ་བུའི་རྒྱུན་རིང་གི་ངང་རྒྱུད་བསྐྱེད་པས། རྐྱེན་ངན་དྲག་པོས་ཆོས་དང་ཕྲད་པ་དེ། ། མི་འགྱུར་ལམ་རྙེད་རྐྱེན་ངན་བཀའ་དྲིན་ཆེ། །ཞེས་པ་ལྟར། ཕྲག་དོག་ཁྲག་གིས་མྱོས་པའི་སྟག་དང་། ཞེ་སྡང་དུག་གིས་རྒྱགས་ཏེ་སྦྱོར་བ་ངན་པ་སྤེལ་མཁན་རྣམས་ལ་ཅིས་ཀྱང་བཀའ་དྲིན་ཆེ་ཞུ་དགོས་ཏེ། གལ་སྲིད་ཕྲག་དོག་དང་ཞེ་སྡང་མེད་ན། ཇོ་རུ་གེ་སར་མི་སྲིད་ལ། ང་ཚོ་ལ་སེང་ཆེན་ནོར་བུ་དགྲ་འདུལ་ཞེས་པ་ཞིག་འཁྲུངས་མེད་ནའང་ཐང་།

གླིང་གི་རྗེས་ཤུལ་བཙལ་བ་ལས། ༣ ཨ་སྟག་ལྷ་མོའི༼ཀླུ་མོ༽མཁར་ཤུལ།

གླིང་གི་རྗེས་ཤུལ་བཙལ་བ་ལས། ༣ ཨ་སྟག་ལྷ་མོའི༼ཀླུ་མོ༽མཁར་ཤུལ།

     དེ་ལྟར་ལོ་རྒྱུས་མི་སྣ་ཞིག་ལ་ཕྱིར་རྟོག་བྱེད་བཞིན་གསང་རི་མ་ཡུལ་ཚོའི་ཁངས་ལུང་ཞེས་པའི་ས་ཆ་དེར་སླེབས། ནམ་མཁར་སྤྲིན་དུམ་བུ་ཙམ་ཡང་མེད་པར་ཉི་འོད་གསལ་པོར་འཕྲོས་པས། ཕྱོགས་བཞིའི་རི་ཆུ་དང་བཅས་པ་གསལ་པོར་མཐོང་ཐུབ། ཁངས་ལུང་ཞེས་པའི་ལུང་པ་དེ་རྒྱ་ཆེ་བ་གཞོང་པ་ཆེན་པོ་ཞིག་དང་འདྲ། ལུང་པའི་སྟོད་དང་གཡས་གཡོན་གྱི་རི་བོ་རྣམས་ནི། རྡོ་ལས་བཞེངས་པའི་མཆོད་རྟེན་ལྟར་གཅིག་ལས་གཅིག་ཁྱད་ཆོས་ལྡན་པ་ཞིག་རེད། ཁངས་ལུང་གི་གཡས་ཕྱོགས་ཀྱི་རི་གདོང་གི་འོག་ལ་རི་གདོང་ཆུང་ངུ་ཞིག་སྣང་། དེ་གཉིས་ཀྱི་བར་ལ་རྐང་ཐང་མ་འགྲོ་དུས། གདོང་མགོར་ཨ་སྟག་ལྷ་མོས་ཆིབས་རྟ་བཞོན། མདའ་གཞུ་བཟུང་བའི་འདྲ་སྐུ་ཞིག་བཞེངས་འདུག   འདྲ་སྐུའི་རྒྱབ་ཀྱི་གཤོང་ས་ན་མཁར་ཤུལ་གྲུ་བཞི་མ་ཞིག་ཡོད་པ་དེ་ནི། ཨ་སྟག་ལྷ་མོའི་རྡོ་མཁར་རམ་རུས་མཁར་རེད་ཟེར། ཡུལ་མི་ཚོས་ཁངས་ལུང་རྡོ་མཁར་ཞེས་འབོད་སྲོལ་ཡང་འདུག

 

གླིང་གི་རྗེས་ཤུལ་བཙལ་བ་ལས། ༣ ཨ་སྟག་ལྷ་མོའི༼ཀླུ་མོ༽མཁར་ཤུལ།

གླིང་གི་རྗེས་ཤུལ་བཙལ་བ་ལས། ༣ ཨ་སྟག་ལྷ་མོའི༼ཀླུ་མོ༽མཁར་ཤུལ།

གླིང་གི་རྗེས་ཤུལ་བཙལ་བ་ལས། ༣ ཨ་སྟག་ལྷ་མོའི༼ཀླུ་མོ༽མཁར་ཤུལ།

ཨ་སྟག་ལྷ་མོའི་མདའ་མདུང་བརྡར་ཤུལ

     ད་ལྟར་མཇལ་དུ་ཡོད་པའི་མཁར་ཤུལ་མཐོ་ཤོས་ལ་སྨི་གསུམ་བཞི་ཙམ་ཡོད་ས་རེད། སྔོ་དྲེག་མང་པོ་ཆགས་པའི་མཁར་ཤུལ་གྱི་ཐོག་ལ་འབྲོང་གི་མགོ་རུས་རྙིང་པ་དང་། གཡག་དང་འབྲི་ཡི་མགོ་རུས་ཀྱང་མང་པོ་སྣང་། མཁར་ཤུལ་གྱི་ཟུར་ལ་རྡོ་སྒོར་སྒོར་ཆེན་མོ་དཀྱིལ་ལ་བུ་ག་ཡོད་པ་ཞིག་འདུག  དེ་ནི་ཨ་སྟག་ལྷ་མོའི་མདའ་མདུང་བརྡར་ཤུལ་རེད་ཟེར། བཤད་སྲོལ་དུ་མཁར་དེ་ལ་ཨ་སྟག་ལྷ་མོའི་རུས་མཁར་ཡང་ཟེར། རྒྱུ་མཚན་ནི། མོ་ཡི་ཨ་ཕ་ནི་འབྲོང་གི་རྭ་ཁ་ལས་འདས་པས། ཆུང་དུས་ནས་འབྲོང་ལ་འཁོན་སེམས་བཅངས་ཏེ་ཆེན་པོར་ཆགས་རྗེས། ཁངས་ལུང་ལ་ཡོད་པའི་འབྲོང་མང་པོ་བསད་དེ་འབྲོང་རུས་ལས་མཁར་དེ་བརྩིགས་པ་རེད་ཟེར། མཁར་ཤུལ་ལ་བལྟས་ན་མཁར་གྱི་གཞི་རྨིང་རྡོ་ལས་བརྩིགས་པ་ཡིན་ངེས་ཀྱང་། དེའི་ཐོག་ལ་འབྲོང་རུས་མང་པོ་གཅིག་ཐོག་གཅིག་བརྩེགས་ནས་མཁར་མཐོན་པོ་གྲུབ་མྱོང་བའང་སྲིད་པ་ཞིག་རེད།།

གླིང་གི་རྗེས་ཤུལ་བཙལ་བ་ལས། ༣ ཨ་སྟག་ལྷ་མོའི༼ཀླུ་མོ༽མཁར་ཤུལ།

གླིང་གི་རྗེས་ཤུལ་བཙལ་བ་ལས། ༣ ཨ་སྟག་ལྷ་མོའི༼ཀླུ་མོ༽མཁར་ཤུལ།

39.7K

ཐག་རག་ཡིག་བསྒྱུར་མ་ལག

དྲ་ཚིགས་འདིའི་པར་དབང་གངས་ལྗོངས་ཉི་གཞོན་དྲ་བར་དབང་བས་ཕན་ཚུན་ལ་དབང་བཅོལ་མ་བྱས་གོང་རང་དགར་མི་སྤྱོད་པར་མཁྱེན།
དྲ་ཚིགས་དཔང་རྟགས། 蜀ICP备14009601号-1