༄༅།།སྟག་རོང་ཚང་གི་སྦྲ་བཤད་བཞུགས།

རྩོམ་པ་པོ། མི་གསལ། རྩོམ་སྒྲིག་པ།དབང་ཆེན།ཡོང་ཁུངས།ངེད་དྲ་བ། སྤེལ་དུས། 03-25


   ཕོ་དགྲ་ལྷའི་གདུང་རྒྱུད་དུང་སྐྱོང་མཆོད།།མགོན་དགྲ་ལྷ་ཝེར་མ་བཅུ་གསུམ་མཆོད།།ཡར་ལྟོས་དང་ལྟད་མོ་འདི་འདྲ་གདའ།།གངས་རྒྱབ་རི་པོ་སྟི་བརྩེགས་པའི་མདུན།།སྡེ་འབྲོག་པ་ལྷ་ཡུལ་འཕོས་པ་འདྲ།།ས་སྐྱིད་པོ་ཡིད་ལྷུང་ཁམས་མདོ་ན།།བུ་སྐྱེས་བུ་སྣང་ངུ་ཨ་དཔལ་འཁྲུངས།།སྤང་དཀར་པོ་རྩི་ཐོག་རྒྱས་པའི་ས།།རྟ་ནོར་ལུག་འཕེལ་ཁ་དར་ས་ཡིན།།དུས་དབྱར་དགུན་མཚན་ཉིད་ཚང་ས་རེད།།སྨན་འབྲུག་མོ་ལྷ་ཡི་སྨིན་ལེགས་མ།།དགུན་འབྲིང་པོའི་ཉི་ཤུ་གསུམ་ལ་འཁྲུངས།།དགུང་ཨ་སྔོན་གནམ་ནས་གཡུ་འབྲུག་གྲགས།།ཕུ་དཀར་ཡག་གངས་ནས་སེང་གེ་འགྱིང་།།མར་ན་དམར་གཞུང་ནས་རྐྱང་ཞིག་འདྲོགས།།ཁོང་སེང་ལྕམ་འབྲུག་མོ་དེ་ནས་ཐོགས།།འདི་ལྷ་ཀླུ་གཉན་གྱིས་སྦྲ་རེ་ཕུབ།།གཡང་ལྷ་གཡག་བརྒྱ་ཡི་དཔུང་རྩིད་གཅིག།འབྲི་ཐུལ་མ་བརྒྱ་ཡི་གློ་རྩིད་གཉིས།།གླང་རོག་པོའི་བྲང་ཁའི་སྙིང་རྩིད་གསུམ།།ཕྱུགས་ཟོག་གནག་བརྒྱ་ཡི་རྩིད་པ་བཅས།།སྦྲ་འཁེལ་མི་ལྷ་མོ་སྟོང་གིས་བཀལ།།ཁོག་འཇུར་བུ་ལན་གཅིག་ཤོར་མ་མྱོང་།།སྦྲ་འཐག་མི་ཀླུ་མོ་སྟོང་གིས་འཐག།ཡ་སྐུད་ནོར་ལན་གཅིག་ཤོར་མྱོང་མེད།།སྦྲ་དྲུབ་མི་གཉན་རིགས་སྟོང་གིས་དྲུབས།།ཁབ་སྐུད་པའི་ཡོར་བ་ཤོར་མྱོང་མེད།།སྦྲ་ཕུག་ཆོན་རྒྱ་གར་ཡུལ་ལ་འཐེན།།དེའི་སྒོ་ཆོན་རྒྱ་ནག་མཐིལ་ལ་ཡོད།།དེའི་ཆོན་ཆེན་རི་ཆེན་རྩེ་ལ་བཏབ།།དེའི་ཆོན་ཆུང་རི་ཆུང་མགོ་ལ་འཐེན།།དེས་མི་ཚད་དར་གྱི་ཆོན་ཐག་བཅིངས།།ཀ་མི་རྟ་གཟི་ཡི་ཆར་ཆུང་བསྒྲིགས།།ཡར་མི་འབུད་སེང་ལྡེང་ཕུར་པ་འདེབས།།ཆག་མི་འགྲོ་གསེར་གྱི་ཀ་རས་བཏེགས།།སྦྲའི་ཀ་རྟིང་ལུ་གུའི་རྩེ་ར་གདའ།།ཡར་ཀ་ཁ་སེང་ཁ་གདང་འདྲ་ཡོད།།སྦྲ་འཐེན་མི་དཔའ་བོའི་ལྷ་དམག་ཡིན།།སྦྲའི་ཡ་ཕུག་ཆོས་ཀྱི་དར་ཆེན་འཕྱར།།སྦྲ་མ་ཕུག་རྒྱ་ནག་ཁྲིམས་དར་བསྒྲེངས།།སྦྲའི་སྐེད་པ་ཉི་ཟླ་ཁ་སྤྲོད་དང་།།སྦྲའི་མཐའ་སྐོར་བ་དན་མཛེས་པ་གདའ།།བུ་སྐྱེས་བུའི་ཁྱིམ་ལ་འཛོམས་ལེ་ཡོད།།སྦྲ་ཡར་ནང་བླ་མའི་གྲལ་ཞིག་གདའ།།མགོ་ཞྭ་དཀར་ཅན་གྱི་གྲལ་མགོ་ན།།རྗེ་ཨོ་རྒྱན་པདྨའི་སྤྲུལ་པ་བཞུགས།།སྦྲ་བར་སྐེད་གཞོན་ནུའི་གྲལ་ཞིག་གདའ།།མགོ་རྨོག་དཀར་ཅན་གྱི་གྲལ་མགོ་ན།།གླིང་ཆེ་རྒྱུད་སྟག་རོང་གཟིག་འཕན་བཞུགས།།ཡང་དེ་ནས་མ་སྲུའི་གྲལ་ཞིག་བསྒྲིགས།།མགོ་གཡུ་བྱུར་ཅན་གྱི་གྲལ་མགོ་ན།།སྨན་ཨ་འབྲུག་མཛེས་མ་དེ་ན་བཞུགས།།ཡང་ཇ་ཆང་འོ་མའི་བཏུང་བ་མཆོག།དེ་ཡིད་ཆུ་བབས་འདྲ་འཛད་པ་མེད།།འདི་ཤ་མར་ཐུད་དང་དཀར་མངར་ཟས།།འདི་རྫ་རྡོ་བཞིན་དུ་དྲངས་ནས་ཤོག།གླིང་སྐྱེས་བུའི་ཁྱིམ་ལ་འཛོམས་ནས་གདའ།།གླིང་ཁྲིམས་རྔ་གསལ་བའི་འོད་ལྡན་གཅིག།གླིང་དུང་ཆེན་དཀར་མོ་རྒྱང་གྲགས་གཉིས།།གླིང་སིལ་སྙན་དཀར་མོ་འབྲུག་གྲགས་གསུམ།།གླིང་ཕ་ཆོས་དུམ་པ་བཅུ་གཉིས་བཞི།།གླིང་གནམ་སར་སྦྲགས་པའི་འཁོར་ལོ་ལྔ།།གླིང་བྱུ་རུ་རྒྱལ་མོ་ལག་ཡ་དྲུག།གླིང་དགྲ་བཞི་གཅོད་པའི་ལེབ་ཆེན་བདུན།།གླིང་རྨ་རྒྱལ་གཏེར་ཟོག་ནོར་བུ་བརྒྱད།།གླིང་སྐྱེས་བུའི་ཁྱིམ་ལ་འཛོམས་ལེ་རེད།།ངས་ཁ་སྨོན་མ་ཡིན་དོན་སྨོན་ཡིན།།གང་བསྟོད་པའི་བསམ་དོན་འགྲུབ་པར་ཤོག།ཅེས་མདོ་ཁམས་ཡིད་ལྷུང་གི་ས་ཆ་ན་བཤད་སྲོལ་ཡོད་པའི་སྟག་རོང་ཚང་གི་སྦྲ་བཤད་དོ།།



དྲ་ཚིགས་འདིའི་པར་དབང་གངས་ལྗོངས་ཉི་གཞོན་དྲ་བར་དབང་བས་ཕན་ཚུན་ལ་དབང་བཅོལ་མ་བྱས་གོང་རང་དགར་མི་སྤྱོད་པར་མཁྱེན།
དྲ་ཚིགས་དཔང་རྟགས། 蜀ICP备14009601号-1